Xoossaakko Shiiqa

“Abeet Ta Xoossau, Loꞌꞌobaa Gishshau, Tana Qoppa”

“TANA loyttidi eriya Yihooway, tana siiqana woykko tanan ufayttana danddayenna gaada qoppaas.” Bana pattennabadan qoppiyoogan metootida, issi ammanettida Kiristtaaniyaa hegaadan xaafaasu. Xoossay tanan ufayttiyoogee atto shin, tana qofakka qoppenna giyoogan inttekka hegaadan unꞌꞌetti ereetii? Yaatikko, Nahimiyaa 13:31n [NW] deꞌiya qofay inttena minttettana danddayees.

Ichashantta xeetu layttan K.K. Ayhudata haariyaagaa gidida Nahimee, Xoossaa ufayssanau bau danddayettiyaabaa ubbaa oottiis. Morkkee eqettishinkka, Yerusalaame gimbbiyaa zaarettidi keexxiyoogan i sintta xeera gididi kaalettiis. Xoossaa Higgee polettanaadan oottiis; naaqettidaageetuyyo qarettiis; qassi ba mala Israaꞌeeletu ammanuwaa minttanau baaxetiis. Ha ammanettida bitanee oottido loꞌꞌobaa Xoossay akeekidee? Yihooway Nahimiyan ufayttidee? A sunttan xeegettiya maxaafaa wurssetta qaalatuppe hegaa zaaruwaa akeekana danddayoos.

Nahimee, “Abeet ta Xoossau, loꞌꞌobaa gishshau, tana qoppa” yaagidi woossiis.a Nahimee ba oottido loꞌꞌobaa Xoossay akeekenna woy babaa dogees giidi hirggidee? Akkay. Nahimee, Yihooway ammanettidi baayyo goynniyaageetanne eta loꞌꞌo oosuwaa loyttidi akeekiyoogaa xeelliyaagan Geeshsha Maxaafaa xaafida, baappe kase deꞌidaageeti xaafidobaa eriyoogee sirissenna. (Kes. 32:32, 33; Maz. 56:8) Yaatin, i Xoossay waatanaadan oychidee? Issi xuufee “qoppa” geetettida Ibraysxxe qaalay, “issibaa dosiyoogaanne hassayiyoobaara gayttidabaa oosuwan peeshshiyoogaa” malaatiyoogaa yootees. Nahimee woosau deꞌiya wolqqan wozanappe ammanettiyoogan, Xoossay bau qarettidi qoppanaadaaninne bana anjjanaadan woossiis.—Nah. 2:4.

Nahimee bana qoppanaadan woossidoogaa Yihooway zaaranee? Issi ginan zaariis. Yihooway Nahimiyaa woosay Geeshsha Maxaafan xaafettanaadan oottidoogee Nahimiyau qarettidi a qoppiyoogaa bessees. Gidikkokka, ‘woosaa siyiyaagee’ Nahimee wozanappe woossidoogaa zaaranau hara darobaa oottana.—Maz. 65:2.

Geeshsha goynuwau oottido ubbabaa gishshau, Xoossay Nahimiyaa biron woytana. (Ibr. 11:6) Yihooway qaalaa gelido sinttappe yaana, geeshshatettay kumiyo ooratta alamiyan i Nahimiyaa hayquwaappe denttiyoogan anjjana.b (2 PHe. 3:13; Ajj. 21:3, 4) He wode, gannatiyan saꞌan merinau deꞌiyo hidootaa demmidoogan, loꞌꞌobaa gishshau Yihooway bana qoppidoogaa Nahimee tumuppe akeekana.

Kawuwaa Daawiti, “Abeet GODAU, tumukka neeni xilluwaa anjjaasa. Neeni gonddallee kammiyoogaadan ne kehatettan a kammaasa” yaagidoogee tuma gidiyoogaa Nahimiyaa woosay qonccissees. (Maz. 5:12) Ee, nuuni a ufayssanau wozanappe baaxetiyoogaa Xoossay akeekeesinne xoqqu oottidi xeellees. Intte ayyo oottanau danddayettida ubbabaa oottiyo wode, i inttessi qarettidi qoppanaagaanne inttena palahissidi anjjanaagaa ammanettana danddayeeta.

Usuppuniyan Nabbabiyo Geeshsha Maxaafaa Kifiliyaa:

◼ Nahimiyaa 1-13

[Tohossa qofata]