Xoossaa Sambbata SHemppoy Aybee?
“Xoossaa asaayyo Sambbataa shemppoi naagetti uttiis.”—IBR. 4:9.
1, 2. Doomettaabaa 2:3ppe ay akeekana danddayiyoo, qassi woygiya oyshati denddiyoonaa?
XOOSSAY saꞌaa, asaa naati deꞌanau injjetiyaagaa oottidi medhdhidoy usuppun gallassatuuna gidiyoogaa Doomettaabaa maxaafaa koyro shemppoy yootees. SHin hegee 24 saate gidida gallassa gidennan, hegaappe keehi adussa wodiyaa bessiyaaba. Huuphiyan huuphiyan he gallassatu wurssettaa xeelliyaagan Geeshsha Maxaafay, “Sa7ai qammiisinne wonttiis” yaagees. (Doo. 1:5, 8, 13, 19, 23, 31) SHin laappuntta gallassaa xeelliyaagan, “Xoossai laappuntta gallassaa anjjiisinne geeshsha oottiis; aissi giikko, Xoossai ba oottiyo oosuwaa wurssidi shemppidoi he gallassaana” yaagees.—Doo. 2:3.
2 “SHemppidoi” giya qaalaa akeekite. Muusee 1513 K.K. Doomettaabaa maxaafaa xaafiyo wodeekka Xoossaa shemppo ‘gallassa’ gidiyoogaa hegee akeekissees. Yaatin, Xoossay ha wodiyankka shemppiiddi deꞌii? Hegaadaana gidikko, nuuni yaa waani gelana danddayiyoo? Nuuni ha oyshatu zaaruwaa eriyoogee keehi koshshiyaaba.
Yihooway Hanno Gakkanau ‘SHemppiiddi’ Deꞌii?
3. Laappuntta gallassay koyro xeetu layttankka wuribeennaagaa, Yohaannisa 5:16, 17n Yesuusi yootidobay waati qonccissii?
3 Koyro xeetu layttaa M.Lykka, Yihooway shemppiiddi deꞌiyo laappuntta gallassa gaanaadan oottiya naaꞌꞌu naqaashati deꞌoosona. Koyro naqaashay, Yesuusi asaa sambbata gallassi pattin, a ixxiyaageeti mootido wode i etau immido zaaruwaa. Goday etau, “Ta Aawai ubba wode oottees; taanikka oottanau bessees” yaagidi zaariis. (Yoh. 5:16, 17) Hegee woygiyoogee? Eti Yesuusa mootidoy i sambbatan oottido gishshataassa. I he mootuwau, “Ta Aawai ubba wode oottees” yaagidi zaariis. I giidobay hara guussan, kaalidi deꞌiyaagaadaana: ‘Taaninne ta aaway issi mala oosuwaa oottoos. Ta aaway shaꞌan qoodettiya layttau oottiiddi takkiis, qassi sinttanaukka oottiyoogaa aggenna; hegaa gishshau, taani Sambbatankka gidin oottana danddayays.’ Xoossay saꞌaunne asau halchidobaa oottiyo laappuntta gallassay, Yesuusi saꞌan deꞌiyo wodekka wuribeennaagaa hegee qonccissiis.a
4. Laappuntta gallassay PHauloosa wodekka polettibeennaagaa bessiya, i yootidobay aybee?
4 Naaꞌꞌantto naqaashay qassi kiitettida PHauloosi qonccissidoba. Xoossaa sambbata shemppuwaa xeelliyaagan, Doomettaabaa 2:2n deꞌiya qofaappe ekkidi, PHauloosi geeshsha ayyaanay denttetin, “Nuuni ammanidaageeti i shemppiyoosaa gelana” yaagidi xaafiis. (Ibr. 4:3, 4, 6, 9) Hegaa gishshau, laappuntta gallassay PHauloosa wodekka polettibeenna. Yaatin, laappuntta gallassay woqqu wodiyau takkii?
5. Laappuntta gallassaa halchoy aybee, he halchoy muleera polettanay awudee?
5 Ha oyshaa zaaruwaa demmanau, nuuni laappuntta gallassaa halchuwaa erana koshshees. Doomettaabaa 2:3y he halchuwaa qonccissiiddi, “Xoossai laappuntta gallassaa anjjiisinne geeshsha oottiis” yaagees. Yihooway he gallassaa saꞌau halchidobaa polanau geeshsha oottiis. A halchoy, azazettiya asaa naati saꞌan deꞌanaadaana, qassi saꞌaanne a bolli deꞌiya mereta ubbaa loytti naaganaadaana. (Doo. 1:28) Xoossaa Yihoowaynne “Sambbataa Godaa” gidida Yesuus Kiristtoosi “ubba wode” oottiyoy Xoossay saꞌau halchidobay polettanaadaana. (Maa. 12:8) Xoossaa shemppo gallassay wuriyoy, i saꞌau halchidobay muleera polettiyo, Kiristtoosa SHaꞌu Layttaa Haaruwaa wurssettaana.
‘Hegaadan Azazettennan Ixxoppite’
6. Nuuyyo akeekisso gidana danddayiya leemisoy awugee, hegaappe ayba timirtte demmana danddayiyoo?
6 Xoossay ba halchuwaa Addaameyyoonne Hewaaniyyo qoncciyan yootiis; shin eti hegaara moggidi deꞌibookkona. Addaameenne Hewaana Xoossau azazettennan ixxida koyro asata. Hegaappe simmin, miilooniyan qoodettiya asaykka azazettibeenna. Ubba Xoossay doorido a asay, giishin Israaꞌeela dereekka azazettibeenna. Koyro xeetu layttan deꞌida Kiristtaanetuppekka issoti issoti beni Israaꞌeelatuugaadan azazettennan aggana danddayiyoogaa PHauloosi yootiis. I, “Simmi Israa7eela asai azazettennan ixxidi, Xoossaara issippe shemppiyoosaa gelennan attidoogaadan, nuuppe ooninne hegaa mala ixuwan he sohuwaa gelennan attenna mala minnoos” yaagidi xaafiis. (Ibr. 4:11) PHauloosi, azazettennan ixxiyoogaa Xoossaa sambbata shemppuwaa gellennaagaara gattidi yootidoogaa akeekite. Nuuni hegaappe ay tamaariyoo? Nuuni issi issi ogiyan Xoossaa halchuwaara eqettiyaaba gidikko, Xoossaa sambbata shemppuwaa gelana danddayiyoo? Ha oyshaa zaaruwaa eriyoogee keehippe koshshiyaaba; hegaara gayttidaagan ha huuphe yohuwan darobaa tamaarana. SHin koyro, Israaꞌeelati iita leemiso gididoynne eti Xoossaa sambbata shemppuwaa gelibeennay aybissakko ane beꞌoos.
“Taani SHemppiyoosaa Eti Mulekka Gelokkona”
7. Israaꞌeelata Gibxxetu aylletettaappe naxa kessiyo wode, Yihooway halchidobay aybee, etappe koyettiyaabay aybee?
7 Yihooway 1513 K.K., Israaꞌeelata xeelliyaagan ba halchuwaa Muuseyyo yootiis. I hagaadan giis: “Taani eta Gibxxe biittaa asatu kushiyaappe ashshanaunne he biittaappe eta kessada, aahonne lo77o biitti ehaanau wodhdhaas. He biittai maattainne eessai goggiyo biitta.” (Kes. 3:8) Eta mayzza aawaa Abrahaamayyo gelido qaalaadan, Yihooway Israaꞌeelata “Gibxxe biittaa asatu kushiyaappe” ashshidoy eta ba asa oottanaassa. (Doo. 22:17) Xoossay, Israaꞌeelati banaara dabbo gididi deꞌanaadan maaddiya higgiyaa immiis. (Isi. 48:17, 18) I Israaꞌeelatuyyo hagaadan giis: “Intte taayyo kumetta azazettikkonne ta maachchaa [Higgiyan deꞌiyaagaadan] naagikko, kawotetta ubbaa giddon intte taayyo buzo gidana. Kumetta sa7ai tabaa.” (Kes. 19:5, 6) Hegaa gishshau, Israaꞌeelati Xoossaa dabbo gididi deꞌana danddayiyoy, i yootiyoobaa azazettiyoogaa xallaana.
8. Israaꞌeelati Xoossau azazettidaba gidiyaakko ay mala duussaa deꞌanee shin?
8 Xoossay yootiyoobaa Israaꞌeelati azazettiyaakko, eti ay mala duussaa deꞌanaakko qoppite! Yihooway eta goshshaa, woyne gadiyaanne eta mehiyaa anjjana shin. Eta morkketikka eta xoonana danddayokkona. (1 Kawotu 10:23-27 nabbaba.) Hara kawotettati, ubba Yesuusi saꞌan deꞌiyo wode, daro biittaa haariya Roomatikka eta haarana danddayokkona shin. Tumu Xoossau haarettiyoogee ayyaanaaban gidin asatettaaban anjjo demissiyoogaa hara kawotettati akeekanaadan oottiya loꞌꞌo leemiso gidana shin.
9, 10. (a) Israaꞌeelati Gibxxe simmanau koyidoogee wolqqaama bala gididoy aybissee? (b) Israaꞌeelati Gibxxe simmikko, Yihooway koyiyo ogiyan au goynnana danddayiyoonaa?
9 Israaꞌeelati Yihoowa halchuwaara moggidi deꞌiyoogan bantta xallau gidennan, asaa zeretta ubbau anjjuwaa demissiyo gita maatay etau imettiis. (Doo. 22:18) SHin Israaꞌeelatuppe daroti, Xoossaa dere gidiyoonne hara kawotettatussi leemiso gidiyo maataa xoqqu ootti xeellibookkona. Ubba eti Gibxxe simmanau koyidosona! (Qoodaabaa 14:2-4 nabbaba.) SHin eti Gibxxe simmikko, Yihoowayyo goynnanaunne i halchidoogaadan hara kawotettau leemiso gidanau danddayokkona. Israaꞌeelati eeqau goynniya Gibxxetuyyo zaarettidi aylle gidikko, Muuse Higgiyaa kaallanaunne eta nagaray atto geetettanaadan Yihooway giigissidoban goꞌettanau mule danddayokkona. Eti ayba yuushshi qoppenna asee! He makkalanchata Yihooway kaallidi deꞌiyaagaadan giidoogee maalaalissenna: “Taani he asaa hanqqettada, ‘Eti ubba wode bantta wozanan baloosona. Ta ogiyaakka eribookkona’ yaagaas. Hegaadankka qassi, taani hanqqetta caaqqada, ‘Taani shemppiyoosaa eti mulekka gelokkona’ yaagaas.”—Ibr. 3:10, 11; Maz. 95:10, 11.
10 Gibxxe simmanau koyiyoogan, he iita asati banttau imettida ayyaanaabaa anjjuwaa xaasayi xeellidosona; eti ubba yan deꞌiya sunkkuruutuwaanne tuummuwaa amottidosona. (Qoo. 11:5) He makkalanchati, galataa xayida Eesawagaadan, alꞌꞌo gidida ayyaanaabaa woytuwaa malꞌꞌiya guutta quman laammanau koyidosona.—Doo. 25:30-32; Ibr. 12:16.
11. Muuse wode deꞌida Israaꞌeelati ammanettibeennaagee, Yihoowa halchoy polettennaadan oottidee?
11 Gibxxeppe kiyida Israaꞌeelati Yihoowan ammanettibeennaba gidikkokka, i ba xeelaa kaalliya yeletan wottidi, Israaꞌeelatuyyo halchidobaa ‘oottiyoogaa’ aggibeenna. Eta naati etappe aaruwan azazettidosona. Yihooway yootidoogaadan, eti Hidoota Biittaa gelidi, yan deꞌiyaageeta xooniyoogaa doommidosona. Yaasa 24:31, “Yaasu paxa de7ido wode ubbaaninne Yaasuppe simmin de7idi, Xoossai Israa7eelatussi oottido ooso ubbaa erida cimatu wode ubban Israa7eelati GODAASSI goinnidosona” yaagees.
12. Xoossaa sambbata shemppuwau geliyoogee ha wodiyankka danddayettiyaaba gidiyoogaa waati erana danddayiyoo?
12 Gidikkokka, he azazettiya yeletay hayqqin, “GODAA woikko Israa7eela asaassi i oottidobaa ubbaa erenna hara yeletai denddiis.” Wurssettan, “Israa7eela asai GODAA sinttan iitabaa oottiis; Ba7aala geetettiya eeqatuyyo goinniis.” (Daan. 2:10, 11) Hegaa gishshau, Hidoota Biittay etau “shemppiyoosaa” gidibeenna. Eti makkalancha gidiyo gishshau, Xoossaa dabbo gididi deꞌibookkona. PHauloosi Israaꞌeelata xeelliyaagan hagaadan giis: “Xoossai shemppiyoosaa asaa efiidi Yaasu shemppissidobaa gidiyaakko, Xoossai hara gallassabaa guyye keerenna. Hegaa gishshau, Xoossaa asaayyo Sambbataa shemppoi naagetti uttiis.” (Ibr. 4:8, 9) PHauloosi ‘Xoossaa asaa’ giidoy Kiristtaaneta. Hegee, Ayhudattanne Ayhuda gidenna Kiristtaaneta gujjiyoogee erettidaagaa. PHauloosi yootidoogaadan, ha wodiyan deꞌiya Kiristtaanetikka Xoossaa sambbata shemppuwau gelana danddayoosona.
Issoti Issoti Sambbata SHemppuwau Gelibookkona
13, 14. (a) Muuse wode, Israaꞌeelati Xoossaa sambbata shemppuwau gelanau ay oottana koshshidee? (b) Koyro xeetu layttan deꞌida Kiristtaaneti shin?
13 PHauloosi Ibraawe Kiristtaanetuyyo xaafiyo wode, etappe amaridaageeti Xoossaa halchuwaara moggennabaa oottoosona. (Ibraawe 4:1 nabbaba.) Hegaadan oottidoy ayba ogiyaanee? Eti issi issiban Muuse Higgiyaa kaalloosona. Xoossaa halchuwaara moggidi deꞌana koyiya Israaꞌeela asa ubbay, 1,500 gidiya layttau Higgiyaa naagana koshshidoogee tuma. SHin Yesuusi hayqqi simmin, Higgiyaa naagiyoogee attiis. Issi issi Kiristtaaneti hegaa eribeenna gishshau, issi issibaara gayttidaagan Higgiyaa naagana koshshees giidi ammaniyoogaa aggibookkona.b
14 PHauloosi Higgiyaa naagiyoogaa aggibeenna Kiristtaanetuyyo, Yesuusi qeese ubbatu halaqa gidiyoogee, ooratta maachaynne ayyaana beeta maqidasee eti Kiristtaane gidanaappe kase deꞌiyaagaappe aadhiyoogaa qonccissiis. (Ibr. 7:26-28; 8:7-10; 9:11, 12) Hegaa gishshau, PHauloosi Higgee azaziyo saamintta Sambbataa naagiyaageeta qoppidi gidennan aggenna, Yihoowa sambbata shemppuwau geliyoogee gita maata gidiyoogaa xeelliyaagan hagaadan giis: “Xoossaa asaayyo Sambbataa shemppoi naagetti uttiis. Aissi giikko, Xoossai shemppiyoosaa geliya ooninne, Xoossai ba oosuwaappe shemppidoogaadan, ikka ba oosuwaappe shemppana.” (Ibr. 4:8-10) Ibraawe Kiristtaaneti Muuse Higgiyaa maaran issi issibaa oottiyoogan Yihoowan nashettana danddayoos giidi qoppiyoogaa aggana koshshiis. PHenxxaqosxxe gallassa 33 M.Lppe doommidi, Xoossay ba kehatettan nashshiyoogeeti, Yesuus Kiristtoosan ammaniyoogaa oosuwan bessiyaageeta.
15. Nuuni Xoossaa sambbata shemppuwau gelanau, azazettiyoogee koshshiyaaba gididoy aybissee?
15 Muuse wode deꞌida Israaꞌeelati Hidoota Biittaa gelennaadan oottiday aybee? Azazettennan ixxiyoogaa. PHauloosa wode deꞌida issi issi Kiristtaaneti Xoossaa sambbata shemppuwau gelennaadan oottiday aybee? Etikka azazettennan ixxidoogaa. Yihooway ba asay baayyo dumma ogiyan goynnanaadaaninne Muuse Higgiyaa naagiyoogaa agganaadan koyiyoogaa akeekibookkona.
Ha Wodiyan Xoossaa Sambbata SHemppuwau Geliyoogaa
16, 17. (a) Ha wodiyan, Xoossaa sambbata shemppuwau geliyoogaa giyoogee woygiyoogee? (b) Kaalliya huuphe yohuwan ay tobbanee?
16 Atotettaa demmanau Muuse Higgiyaappe amaridaagaa naagana koshshees giya tumu Kiristtaanee ha wodiyan baawa. PHauloosi Efisoona Kiristtaanetuyyo xaafidobay qoncce. I hagaadan giis: “Intte Xoossaa aaro kehatettan, ammanuwan attideta; hagee Xoossaa imoppe attin, intte oosuwaana gidenna. Intte daafuran beettibeenna gishshau, intte ceeqettiyoobi aibinne baawa.” (Efi. 2:8, 9) Yaatin, Xoossaa sambbata shemppuwau geliyoogaa giyoogee Kiristtaanetussi woygiyoogee? Yihooway saꞌaunne bau azazettiya asaa naatuyyo halchidobaa polanau laappuntta gallassaa, giishin ba shemppo gallassaa dooriis. Yihoowa dirijjitiyaa baggaara nuuyyo qonccida, a halchuwaara moggiya ogiyan azazettiyoogaaninne oottiyoogan Yihoowa sambbata shemppuwau gelana danddayoos.
17 Hegaappe dumma hanotan, ammanettida wozannaama ashkkaray zoriyo Geeshsha Maxaafan baasettida zoriyaa xaasayi xeelliyaageeta woykko azazettennaageeta gidikko, Xoossaa halchuwaara moggennabaa oottoos. Hegaadan oottikko, Yihoowa dabbo gidana danddayokko. Nuuni azazettiyaageeta gidiyoogaa woy gidennaagaa bessiya issi issi hanotaa kaalliya huuphe yohuwan tobbana. He hanotatun nuuni kuuyiyoobay, Xoossaa sambbata shemppuwau gelidoogaa woy gelibeennaagaa bessees.
[Tohossa qofata]
a Beeta maqidasiyaa oosuwaa oottiya qeesetinne leewati sambbata gallassi oottiyo gishshau ‘borettokkona.’ Qeese ubbatu halaqaa gidiyoogaadan, Yesuusikka sambbataa higgiyaa menttidabadan qoppennan bau imettida ayyaanaabaa oosuwaa oottana danddayees.—Maa. 12:5, 6.
b Kiristtaane gidida Ayhudatuppe, PHenxxaqosxxe gallassi 33 M.Lppe simmin, Nagaraa Atto Giissiyo Gallassi yarshsho shiishshiday deꞌiyaakkonne erokko. Hegaadan oottiyoogee Yesuusa yarshshuwaa toochiyoogaa bessiyaaba. Gidikkokka, issi issi Ayhuda Kiristtaaneti Higgiyaara gayttida wogaa he wode mintti kaalloosona.—Gal. 4:9-11.
Wotti Dentti Qoppiyo Oyshata
• Xoossay shemppiyo laappuntta gallassaa halchoy aybee?
• Laappuntta gallassay ha wodiyankka wuribeennaagaa waati erana danddayiyoo?
• Muuse wode deꞌida Israaꞌeelatinne koyro xeetu layttan deꞌida issi issi Kiristtaaneti Xoossaa sambbata shemppuwau gelennaadan oottiday aybee?
• Ha wodiyan, Xoossaa sambbata shemppuwau geliyoogaa giyoogee woygiyoogee?
[Sinttaa 27n deꞌiya misiliyaa qonccissuwaa]
Yihoowa dirijjitiyaa baggaara nuuyyo qonccida, a halchuwaara moggiya ogiyan azazettiyoogaaninne oottiyoogan Yihoowa sambbata shemppuwau gelana danddayoos
[Sinttaa 26n deꞌiya misiliyaa qonccissuwaa]
Sambbata shemppuwau gelanau, Xoossaa asay ha wodiyan ay oottana koshshii?