Naati Xoossaabaa Tamaarana Koshshii?

“Nuuni ixettanaadan oottiya haymaanootee nuussi deꞌees; shin siiqettanaadan oottiya haymaanootee nuussi baawa.”—INGILIZEE BIITTAA ASA GIDIDA, XAAFIYAA JONATAN SWIFT.

SWIFTI hegaadan giidoy 18ntta xeetu layttaana; shin ha wodiyankka daroti a qofaa maayoosona. Issoti issoti, yelidaageeti bantta naata Xoossaabaa tamaarissiyo maatay deꞌana bessenna giidi ammanoosona. Eti, haymaanootiyaa kaalliya so asay dichido naati amarida hanotan qohettiyaabadan qoppoosona.

Intte qofay shin aybee? Kaalliya qofaappe ammanttiyaagee awugee?

● Yelidaageetussi bantta naata Xoossaabaa tamaarissiyo maatay deꞌana bessenna.

● Yelidaageeti bantta naati diccana gakkanaashin haymaanootiyaabaa etaara tobbana koshshenna.

● Naati naatettan deꞌiyo wode, yelidaageeti Xoossaa xeelliyaagan bantta ammaniyoobaa eta tamaarissana koshshees. SHin naati gasttiyo wode, he yohuwaa bantta huuphe qoppidi kuuyanaadan yelidaageeti minttettana koshshees.

● Yelidaageeti Xoossaa xeelliyaagan ammaniyoobaa aybanne gidin naati sirennan kaallana koshshees.

Haymaanootee Naata Qohii?

Ba naꞌassi qoppiya ooninne ba naꞌaa qohana koyenna. SHin naata Xoossaabaa tamaarissana bessenna giyaageetu qofay likke gidiyoogaa naqaashay bessii? Yelidaageeti ammaniyoobay naata qohiyaakko woy goꞌꞌiyaakko, pilggiyaageeti daro wodiyau minttidi pilggidosona. Hegan eti ay akeekidonaa?

Haymaanootee qohiyoogaappe naatu dichau goꞌꞌiyaaba gidana danddayiyoogaa pilggiyaageeti akeekidosona. Sooshal Saynis Risercha giyo gaazeexan 2008n kiyida iripporttee, “Haymaanootee naati yelidaageetuura, giishin aawaarakka aayeerakka keehippe matattanaadan oottiyoogee qoncciis” yaagiis. Ha iripporttee, “Haymaanooteenne ayyaanaabay daro naatu deꞌuwan keehippe koshshiyaaba milatees; qassi so asaa gaytotettau keehi koshshees” yaagidikka yootees. Ha iripporttiyan qonccidabay, Yesuusi, “Bantta ayyaanan hiyyeesa gididoogaa eriyaageeti anjjettidaageeta” giido qofaara ay keena moggiyaakko akeekite.—Maa 5:3.

Naati Xoossaabaanne haymaanootiyaabaa tamaarana bessiyoy gitati simmiina giyo qofay shin? Hegaadan giidi qoppiyoogee kaallidi deꞌiya tumaara moggenna: Guutta naatu guuggee issibaa an qolanau giigida, mela balddiyaa mala. Yelidaageeti bantta naatu guuggiyan kandduwaa maaraanne bantta qofan suure giidi qoppiyoobata kunttiyoogaappe woy harati eta naatu guuggiyaaninne wozanan dumma dumma qofaa kunttanaadan paqqadiyoogaappe issuwaa doorana koshshees.

Hegau Maaddiyaabay Aybee?

Haymaanootee asay issoy issuwaara ixettanaadan denttettana danddayiyoogaa taarikee bessees. Yaatin, yelidaageeti Jonatan Swifiti giidobay gakkennaadan oottana danddayiyoy ayba ogiyaanee? Naati harata siiqanaadan maaddiya haymaanoote timirttiyaa, yelidaageeti waatidi tamaarissana danddayiyoonaa?

Hegau maaddiyaabay kaallidi deꞌiya heezzu oyshatu zaaruwaa demmiyoogaa: (1) Naati tamaarana koshshiyaabay aybee? (2) Eta ooni tamaarissana bessii? (3) Tamaarissanau keehippe loꞌꞌo ogeti awugeetee?

[Tohossa Qofaa]