5 Xoossay Wozanappe Goynniyo Goynno Ubban Ufayttees Hegee Tumee?

Geella neeni siyidobaa: “Issisaa efiya daro ogee deꞌiyoogaadan, Xoossaakko efiya daro ogee deꞌees. Ubba asay Xoossaakko efiya ba ogiyaa demmana bessees.”

Geeshsha Maxaafay tamaarissiyoobaa: Nuuni asa bessanau giidi gidennan, wozanappe goynnana bessees. Yesuusi ba wode haymaanootiyaa kaalettiyaageeta Xoossay aybissi ixxidaakko etau hagaadan giis: “Isiyaasi hananabaa yootido wode, inttebaa, lo77o milatiya iitatubaa xaafidoogaadankka, Xoossai, ‘Hagee asai tana ba bolla doonan bonchchees. SHin eta wozanai taappe haahuwan de7ees.’” (Mar. 7:6) Wozanappe goynniyoogaa xallay, Xoossay nu goynuwan ufayttanaadan oottenna.

Yesuusi, haymaanootiyaa kaalettiya he asatunne eta kaalliya asatu goynuwan paccida waannabay aybakko yootido wode hegaa qonccissiis. Yesuusi, “Asai tau mela goinnees. Aissi giikko, asi oottido azazuwaa Xoossaa higgiyaa milatissidi tamaarissees” giya Xoossaa qaalay etan polettidoogaa yootiis. (Mar. 7:7) Eti bantta haymaanootiyaa wogaa kaalliyoogaa Xoossay koyiyoobaappe kaseyiyo gishshau, eta goynoy “mela” woy hada.

Geeshsha Maxaafay, Xoossaakko efiya daro ogee deꞌees giyo qofaa kaafenna; hegaappe, issi oge xallay deꞌiyoogaa tamaarissees. Maatiyoosa 7:13, 14y hagaadan gees: “Un77o penggiyaara gelite. Aissi giikko, bashshau efiya penggee aaho; ogeekka woggaa. Hegaara geliya asaikka daro. Aissi giikko, de7uwau efiya penggee un77o; ogeekka xuntta. Qassi hegaara biya asatikka amaridaageeta.”

Tumaa eriyoogee nena maaddiyo ogiyaa: Neeni maaratoone wottaa woxxanau daro aginau loohada, wottankka xoonadasa; shin erennan issi higgiyaa menttido gishshau woytuwaa demmennaagaa eriyoode neeyyo aybi siyettanaakko qoppa. Ne daafura ubbay mela attidabadan qoppana danddayaasa. Nuuni Xoossau goynniyoogaara gayttidaagan hegaa malabay hanana danddayii?

Kiitettida PHauloosi nu goynuwaa ispporttiyaa naasiyaara geeddarssiyoogan, “Naasettiya urikka he naasiyaa wogaa kaallidi naasettana xayikko, woytuwaa ekkenna” giidi xaafiis. (2 Xim. 2:5, NW) Nuuni “wogaa kaallidi,” giishin i koyiyo ogiyan Xoossaayyo goynniyoogan a ufayssoos. Issi wottanchay ba koyidoogaadan woxxidi, woytuwaa demmana giidi qoppana danddayennaagaadan, nuunikka Xoossaakko efees giidi nu koyido ogiyaa kaallana danddayokko.

Xoossaa ufayssanau, nu goynoy a xeelliyaagan odettiya worddobaappe geeyidaagaa gidana bessees. Yesuusi, “Aawau tumaappe goinniyaageeti ayyaanaaninne tumatettan” goynnanaagaa yootiis. (Yoh. 4:23) Xoossaakko efiya tumu ogiyaa, a Qaalaappe, Geeshsha Maxaafaappe tamaaroos.—Yoh. 17:17.a

[Tohossa qofaa]

[Sinttaa 8n deꞌiya misiliyaa qonccissuwaa]

Ubba haymaanootee, asay Xoossaa ufayssiya ogiyan ayyo goynnana mala tamaarissii?