“Minttetto Ubbaa Xoossaa” Yihoowan Ammanettite
“Xoossaa nu Godaa Yesuus Kiristtoosa Aawaa, maarotettaa Aawaanne minttetto ubbaa Xoossaa galatai gakko.”—2 QOR. 1:3.
1. Naꞌa gidin cima gidin, asau aybi koshshii?
NUUNI yelettoosappe doommidi minttettuwaa koyoos. Issi guutta naꞌay ayyo minttettoy koshshiyoogaa nuuni eranaadan yeekkees. Geella a idimmanaadan koyidi woykko namisettidi gidana danddayees. Nuuni gasttiyo wodekka, darotoo minttettuwaa koyoos. Ubba nuna metoy gakkiyo wode, minttettuwaa keehippe koyoos.
2. Yihooway banan ammanettiyaageeta minttettiyoogaa ammanettanaadan oottiyaabaa ay yootidee?
2 Nu soo asaynne nu laggeti darotoo amarida keenaa nuna minttettana danddayoosona. SHin issi issitoo nuuni unꞌꞌettanaadan oottiya metoy asi maaddana danddayennaagaa. Nuuni ay keena unꞌꞌettidaba gidikkonne, minttettana danddayiyay Xoossaa xalla. A Qaalay, “GODAI bana xeesiya ubbau, tuman bana xeesiya ubbau matan de7ees. . . . Qassi i eta waasuwaa siyidi, eta ashshees” yaagidi, nuna ammanttiyaabaa yootees. (Maz. 145:18, 19) Ee, “GODAA aifee xillotukko xeellees; qassi i ubba wode eta waasuwaa ezggees.” (Maz. 34:15) SHin nuuni Xoossaa maaduwaanne minttettuwaa demmanau koyikko, an ammanettana bessees. Mazamuraawee Daawiti kaallidi deꞌiyaagaadan yexxido wode hegaa qonccissiis: “GODAI un77ettidaageetuyyo baqati attiyoosaa; meto wodiyankka geli attiyo soho. Ne sunttaa eriyaageeti nenan ammanettoosona; aissi giikko, GODAU, neeni nena koyiyaageeta yegga bayakka.”—Maz 9:9, 10.
3. Yihooway ba asaa siiqiyo siiquwaa Yesuusi leemisuwan woygidi qonccissidee?
3 Yihoowayyo goynniyaageeti ayyo alꞌꞌo. Yesuusi kaallidi deꞌiyaagaadan giido wode hegaa qonccissiis: “Ichchashu siine kafoti santtimiyan baizettokkonaayye? Etappe issinnonne Xoossai dogenna. SHin harai atto intte huuphiyan de7iya binnaana ubbaikka qoodan de7ees; simmi yayyoppite; daro siine kafotuppe intte aadhdheeta.” (Luq. 12:6, 7) Hananabaa yootiya Ermmaasa baggaara Yihooway beni wode ba asau, “Taani inttena merinaa siiquwan siiqais; ta aggenna siiquwan taani inttena taakko shiishshaas” yaagiis.—Erm. 31:3.
4. Nuuni Yihooway gelido qaalan ammanettana danddayiyoy aybissee?
4 Yihoowaninne i gelido qaalay polettiyoogan ammanettiyoogee nuuni unꞌꞌettiyo wode minttettana danddayees. Yaatiyo gishshau, “GODAI intte Xoossai intteyyo immana giido lo77o ubbaappe issibinne attibeennaagaa intte ubbai intte wozanaaninne shemppuwan ereeta. I intteyyo immana giidobaappe issibinne attennan, ubbai polettiis” yaagida Yaasuugaadan, nuuni Xoossan ammanettana koshshees. (Yaa. 23:14) Hegaa bollikka, nuuni metiya hanotan guutta wodiyau waayettiyaaba gidikkokka, “Xoossai ammanettidaagaa” gidiyoogaa, qassi ammanettida ba ashkkarata mule yeggi bayennaagaa ammanettana danddayoos.—1 Qoronttoosa 10:13 nabbaba.
5. Nuuni harata minttettana danddayiyoy ayba ogiyaanee?
5 Kiitettida PHauloosi Yihooway, “minttetto ubbaa Xoossaa” gidiyoogaa yootiis. “Minttettiyoogaa” giyoogee unꞌꞌettida woy azzanida uray woppu gaanaadan oottiyoogaa giyoogaa. Hegee, he uri keehi azzanennaadan oottiyoogaanne a minttettiyoogaa. Yihooway tumuppe hegaadan oottees. (2 Qoronttoosa 1:3, 4 nabbaba.) Saluwan deꞌiya nu Aawaa aybinne woy ooninne teqqana danddayenna gishshau, bana siiqiyaageeta minttettanau koshshiyaabaa aybanne oottana danddayees. Nuunikka, “daro waayiyaa [waayettiya]” nu mala Kiristtaaneta minttettana danddayoos. “Xoossai nuna nu huuphen minttettido” minttettuwan hegaadan oottana danddayoos. Unꞌꞌettidaageeta minttettanau Yihoowayyo deꞌiya zawi baynna wolqqaa hagee loyttidi qonccissees!
Unꞌꞌettanaadan Oottiyaabaa Gencciyoogaa
6. Unꞌꞌettanaadan oottana danddayiyaabatu leemisuwaa yoota.
6 Nu deꞌuwan daro macaran nuuyyo minttettoy koshshees. Nuuni keehippe azzananaadan oottiyaabatuppe issoy, siiqiyo uri, ubba qassi siiqiyo aqo laggee woy naꞌi hayqqiyoogaa. Issi ura asay coo ixxikko woy zaggikko, he urau minttettoy koshshana danddayees. Sahoy, ceegatettay, hiyyeesatettay, aqo deꞌuwan gakkiya metoy woy alamiyan hanettiya azzanttiyaabay issi urau minttettoy koshshanaadan oottana danddayees.
7. (a) Azzanttiya hanotan nuussi ay mala minttettoy koshshii? (b) “Meqqida wozanaa” pattanau Yihooway ay oottana danddayii?
7 Unꞌꞌettiyo wode wozanan, qofan, nuuyyo siyettiyaaban, asatettaanne ayyaanaabaa payyatettan nuuni woppu gaanaadan oottiya minttettoy koshshana danddayees. Leemisuwau, wozanaa qoppite. Xoossaa Qaalay nu wozanay meqqana” danddayiyoogaa yootees. (Maz. 51:17) Yihooway ‘wozanay meqqidoogeeta pattiyoonne eta mazunttaakka qachiyo’ gishshau, i ha hanotaa giigissana danddayiyoogee tuma. (Maz. 147:3) Keehi iita hanotankka, nuuni kumetta wozanan ammanettidi Xoossaa woossiyaabanne a azazuwaa naagiyaaba gidikko, i meqqida wozanaa woppissana danddayees.—1 Yohaannisa 3:19-22; 5:14, 15 nabbaba.
8. Nuuni qofan unꞌꞌettiyo wode Yihooway maaddana danddayiyoy ayba ogiyaanee?
8 Dumma dumma metoy nuuni keehippe unꞌꞌettanaadan oottiyo gishshau, darotoo nuuyyo qofan minttettoy koshshees. Nu ammanuwan gakkiya ha paaciyaa nu minotettan genccana danddayiyaaba milatenna. Gidikkokka, Mazamuraawee, “Tana hirggai woriyo wode, neeni tana woppu oottada ufaissaasa” yaagidi yexxiis. (Maz. 94:19) Hegaa bollikka, PHauloosi hagaadan giidi xaafiis: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana.” (Pili. 4:6, 7) Geeshsha Maxaafaa nabbabiyoogeenne wotti dentti qoppiyoogee qofan unꞌꞌettiyo wode genccanau keehippe maaddana danddayees.—2 Xim. 3:15-17.
9. Nuuyyo siyettiyaaban unꞌꞌettiyo wode waanidi genccana danddayiyoo?
9 Issi issitoo nuuni keehippe hidootaa qanxxidi, qohiyaabay siyettin unꞌꞌettana danddayoos. Geeshsha Maxaafay yootiyo aawatettaa kiyanau woy haggaaziyo maatan oottanau danddayennabadan qoppana danddayoos. He wodiyankka, Yihooway nuna minttettanaunne maaddanau danddayees. Leemisuwau, wolqqaama gidida morkke kawotettata olanau Yaasu Israaꞌeeleta kaalettanaadan sunttettido wode, Muusee asaayyo hagaadan giis: “Minnite; aikko baawa; yayyoppite. Eta be7idi dagammoppite. Aissi giikko, GODAI intte Xoossai inttenaara gidana. I inttena yeggenna woikko aggenna.” (Zaa. 31:6) Yaasu Yihooway maaddin, Xoossaa asaa kaalettidi Hidootaa Biittaa gelissiis; qassi morkketa ubbaa xooniis. Hegaappe kase Zoꞌo Abbaa pinniyo wode, Xoossay Muusa hegaadan maaddiis.—Kes. 14:13, 14, 29-31.
10. Nu asatettaa payyatettay unꞌꞌissiyaaban qohettiyaaba gidikko, ayba maado demmana danddayiyoo?
10 Unꞌꞌissiyaabay asatettan nu payyatettaa qohana danddayees. Bessiyaagaadan qumaa miyoogee, shemppiyoogeenne bollaa minttiyaabaa oottiyoogee, qassi geeshshatettaa naagiyoogee nuna maaddana danddayiyoogee tuma. Geeshsha Maxaafan baasettida, ayyaanaaban loꞌꞌo qofaara deꞌiyoogee nu asatettaa payyatettau maaddana danddayees. Yaatiyo gishshau, issi unꞌꞌissiyaabay nuna gakkiyo wode, PHauloosa gakkidabaanne i yootido minttettiyaabaa qoppiyoogee maaddees; i hagaadan giis: “Nuuni ubba baggaarakka un77ettida; shin me7erettibookko; qassi issi issi wode siroos; shin muleerakka aggi bayana gibookko. Nuuni yedetettida; shin Xoossai nuna olibeenna; qassi nu morkketi nuna oli bayidosona; shin nuuni xayibookko.”—2 Qor 4:8, 9.
11. Ayyaanaabaa payyatettaa qohiyaabaa waatidi eqettana danddayiyoo?
11 Issi issi paacee ayyaanaaban nu payyatettaa qohana danddayees. He wodiyankka, Yihooway nuna ashshana danddayees. A Qaalay, “GODAI hokkidaageeta ubbaa zemppissees; kunddidaageeta ubbaa denttees” yaagidi nuna minttettees. (Maz. 145:14) Geeshsha Maxaafay yootiyo, merinaa deꞌuwaa hidootaa ubbatoo qoppiyoogee nu ammanoy paacettiyo wode maaddana danddayees.—Yoh. 17:3.
Xoossay Immiyo Minttettuwaa Leemisota
12. Yihooway Abrahaama waatidi minttettidaakko qonccissa.
12 Issi mazamuraawee ayyaanay denttettin, “Neeni [Yihooway] taassi, ne ashkkaraassi, immido qaalaa qoppa; he qaalan taani ufaissaa oottais. Neeni, ‘Taani nena paxa wottana’ giido qaalai ta tuggaa wode tana minttettees” yaagiis. (Maz. 119:49, 50) Xoossay immiyo minttettuwaa leemisuwaa daruwaa oyqqida, Yihoowa Qaalay, ha wodiyan nuussi deꞌees. Leemisuwau, Yihooway Sadoomanne Gamoora xayssana haniyoogaa erido wode, Abrahaami unꞌꞌettennan aggenna. Ammanettida asa gidida Abrahaami, “Tumu neeni xillota iitatuura xaissuutee?” yaagidi Xoossaa oychiis. Yihooway 50 xilloti deꞌiyaakko Sadooma katamaa xayssennaagaa yootidi, Abrahaama minttettiis. Gidikkokka, Abrahaami, 45 xilloti, 40 xilloti, 30 xilloti, 20 xilloti, 10 xilloti deꞌikko shin? giidi Yihoowa ichashutoo oychiis. Ichashutookka, Yihooway xilloti deꞌikko Sadooma ashshanaagaa danddayaaninne kehatettan Abrahaamayyo yootiis. He heeran tammu xilloti deꞌennaba gidikkokka, Yihooway Looxanne a macca naata ashshiis.—Doo. 18:22-32; 19:15, 16, 26.
13. Haanna Yihoowan ammanettiyoogaa waatada bessadee?
13 Elqqaana keettaayiyaa Haanna naꞌa yelanau keehippe koyaasu. SHin a mayne gidiyo gishshau, keehi unꞌꞌettaasu. He allaalliyaa xeelliyaagan a Yihoowakko woossaasu; Qeese Ubbatu Halaqaa Eeli iyyo, “Neeni a woossidobaa Israa7eela Xoossai neeyyo immo” yaagiis. Hegee Haanno minttettin, “hegaappe simmin mulekka azzanabeikku.” (1 Sam. 1:8, 17, 18) Haanna Yihoowan ammanettada, bana qofissidabaa ayyo yootada aggabayaasu. A hananabaa erennaba gidikkokka, wozanaa sarotettaa demmaasu. Guyyeppe, Yihooway i woosaa zaariis. A shahaarada attuma naꞌaa yelaasu; he naꞌaa Sameela gaada sunttaasu.—1 Sam. 1:20.
14. Daawitassi minttettoy koshshidoy aybissee, i minttettuwaa demmanau ookko xeellidee?
14 Xoossay minttettiyoogau hara leemisoy beni Israaꞌeele kawuwaa Daawita. Yihooway ‘wozanaa xeelliyaagaa’ gidiyoogaadan, sinttappe Israaꞌeela kawo gidanaadan Daawita dooriyo wode, i suure asa gidiyoogaanne tumu goynuwau mishettiyoogaa erees. (1 Sam. 16:7; 2 Sam. 5:10) SHin guyyeppe Daawiti Berssaabiira wodiraa laammiis; qassi i azinaa worissiyoogan he nagaraa genttanau maliis. Daawiti gita nagaraa oottidoogaa akeekido wode, Yihoowakko hagaadan giidi woossiis: “Ne qaretaa daruwaadan ta mooruwaa qucca. Ta iitatettaappe tana mule meecca; ta nagaraappe tana geeshsha. Aissi giikko, ta mooruwaa taani erais; ta nagarai ubbatoo ta sinttaana.” (Maz. 51:1-3) Daawiti tumuppe ba nagaraappe simmiis; Yihoowaykka ayyo atto giis. Gidikkokka, Daawiti ba nagaray kaalettidoban waayettiis. (2 Sam. 12:9-12) Gidoppe attin, Yihoowa maarotettay ba huuphiyaa kawushshida a ashkkaraa minttettiis.
15. Yesuusi hayqqanaappe kase Yihooway a waatidi maaddidee?
15 Saꞌan deꞌiyo wode Yesuusa daro paacee gakkiis. Ammanuwaa paacciyaabati a bolli gakkanaadan Xoossay paqqadiis; qassi Yesuusi ubbatoo ba suure equwaa naagidi deꞌiis; i Yihoowan ammanettiyaanne I haariyo maataa bonchiya polo asa. Yesuusi asay a woranau aattidi immana haniyo wode, “Neeni koyiyoobai hanoppe attin, taani koyiyoobai hanoppo” yaagidi Yihoowakko woossiis. He wode, issi kiitanchay Yesuusakko yiidi a minttettiis. (Luq. 22:42, 43) Yesuusau he wode koshshiya minttettuwaa, wolqqaanne maaduwaa Xoossay immiis.
16. Nuuni ammanettidaageeta gidiyoogan shemppo miyaabay gakkikko, Xoossay maaddana danddayiyoy ayba ogiyaanee?
16 Nuuni mino equwaa naagiya Kiristtaane gidiyoogaa gaasuwan shemppo miyaabay nuna gakkikkokka, Yihooway nuuni ayyo ammanettidaageeta gidanaadan maaddana danddayees; qassi maaddees. Hegaa bollikka, dendduwaa hidootan minettoos. Qassi ‘wurssetta morkkee, hayqqoy xayiyo’ wodiyaa hidootan naagoos. (1 Qor. 15:26) Ammanettida, Xoossaa ashkkara gididi hayqqidaageetanne harata Yihooway hassayees; qassi eta hayquwaappe denttana. (Yoh. 5:28, 29; Oos. 24:15) Hayqqidaageeta denttanau Yihooway gelido qaalan ammanettiyoogee nuna minttettees; qassi hegee yedetay gakkiyo wode ammanettanaadan oottiya hidoota.
17. Nuuni siiqiyo uri hayqqiyo wode Yihooway nuna minttettana danddayiyoy ayba ogiyaanee?
17 Nuuni siiqiyo hayqqidaageeti, ha wodiyan deꞌiya unꞌꞌissiya ubbabay baynna ooratta alamiyan deꞌanau hayquwaappe denddiyo hidootay deꞌiyoogaa eriyoogee ayba minttettiyaabee! Qassi ha iita siraataa xayuwaappe attiya, Yihoowayyo ammanettida “zawai bainna daro [asay],” hayquwaappe denddiyaageeta mokkiyoogeenne tamaarissiyoogee etau ayba gita maatee!—Ajj. 7:9, 10.
Nuuppe Garssaara Xoossaa Merinaa Kusheti Deꞌoosona
18, 19. Yedetay gakkiyo wode Xoossaa ashkkarati minttettuwaa demmidoy ayba ogiyaanee?
18 Muusee minttettiyaanne keehippe ufayssiya mazamuriyan Israaꞌeelatuyyo, “Merinaa Xoossai intteyyo qato; a merinaa kusheti intteppe garssaara de7oosona” yaagidi ammanttiyaabaa yootiis. (Zaa. 33:27) Guyyeppe, hananabaa yootiya Sameeli Israaꞌeelatuyyo, “Intte kumetta wozanaappe GODAAYYO kiitettiteppe attin, a kaalliyoogaa aggoppite . . . GODAI ba gita sunttaa gishshau ba asaa aggenna” yaagidi yootiis. (1 Sam. 12:20-22) Nuuni tumu goynuwan Yihoowa mintti oyqqikko, i nuna mule yeggi aggenna. I nuuyyo koshshiya maaduwaa ubba wode immana.
19 Ha metiya wurssetta gallassatun, Xoossay paci baynnan ba asaa koshshiyaagaadan maaddeesinne minttettees. Yihoowayyo oottiyo gishshau, alame yuushuwan shaꞌan qoodettiya nu mala Kiristtaaneta xeetaappe dariya layttau yedetay gakkiisinne qashettidosona. Yihooway baassi oottiyaageeta paacee gakkiyo wode tumuppe minttettiyoogaa eta temokroy bessees. Leemisuwau, nu ishatuppe issoy beni Sooviyete biittan ba ammanuwaa gaasuwan 23 layttaa qashettanaadan pirddettiis. Gidikkokka, i minttettuwaanne wolqqaa demmanaadan oottiya ayyaana qumaa demmiis. I hagaadan giis: “He ubba layttan Yihoowan ammanettiyoogaa tamaaraas; appe wolqqaa demmaas.”—1 PHeexiroosa 5:6, 7 nabbaba.
20. Yihooway nuna yeggennaagaa ammanettana danddayiyoy aybissee?
20 Nuna gakkana danddayiya metoy ayba gidikkokka, mazamuraawee, “Xoossai ba asaa yeggenna” yaagido minttettiya qaalata hassayana koshshees. (Maz. 94:14) Nuussi minttettoy koshshiyaaba gidikkokka, harata minttettiyo gita maataykka nuussi deꞌees. Kaalliya huuphe yohuwan nuuni beꞌanaagaadan, ha metiya alamiyan azzaniyaageeta minttettana danddayoos.
Woygada Zaaruutii?
• Nuuni unꞌꞌettanaadan oottana danddayiya issi issibati aybee?
• Yihooway ba ashkkarata waatidi minttettii?
• SHemppo miyaabi gakkiyo wode, nuna aybi minttettana danddayii?
[Sinttaa 23n diyaagaa qonccissuwaa]
. . . Qohana Danddayiyaabata Genccyo Ogiyaa
▪ Nu wozanaa Maz. 147:3; 1 Yoh. 3:19-22; 5:14, 15
▪ Nu qofaa Maz. 94:19; Pili. 4:6, 7
▪ Nuuyyo siyettiyaaban nuna Kes. 14:13, 14; Zaa. 31:6
▪ Asatettan nu payyatettaa 2 Qor. 4:8, 9
▪ Ayyaanaaban nu payyatettaa Maz. 145:14; Yaaq. 5:14, 15