Yesuus Kiristtoosabaa Oychiyo Oyshatu Zaaruwaa

“Asai tana oona gii?”—LUQ. 9:18.

YESUUSI ba erissiyo ashkkarata ha oyshaa oychidoy a xeelliyaagan asau dumma dumma qofay deꞌiyoogaa eriyo gishshataassa. Gidoppe attin, hegaa mala dumma dumma qofay deꞌanaadan oottiya gaasoy baawa. Yesuusi asaappe qosettibeenna, qassi aynne geeman oottibeenna. Ubba i asay deꞌiyo moottaaninne kataman etaara qoncciyan haasayiis. I asay babaa tumaa eranaadan koyiyo gishshau, asay deꞌiyo ubbasan sabbakiisinne tamaarissiis.—Luq. 8:1.

Geeshsha Maxaafan deꞌiya, Maatiyoosa, Marqqoosa, Luqaasanne Yohaannisa wonggeletun xaafettida, Yesuusi tamaarissidonne oottidobaappe abaa tumaa erana danddayettees. Ayyaanaa kaaletuwan xaafettida he taariketuppe Yesuusa xeelliyaagan nuuni oychiyo oyshatuyyo aliya zaaruwaa demmana danddayoos.—Yoh. 17:17.

OYSHAA: Yesuusi tumuppe deꞌon deꞌida asee?

ZAARUWAA: Ee. Koyro xeetu layttan deꞌida Josefesanne Tasitesa gujjin, taarikiyaa eranchati Yesuusi deꞌon deꞌida asa gidiyoogaa yootidosona. Hegaappekka aadhiyaabay, Yesuusi deꞌidaba milatissi coo yootiyo asa gidennan, tumuppe deꞌida asa gidiyoogaa wonggeleti ammanttiya ogiyan qonccissoosona. He taariketi issibay hanido wodiyaanne sohuwaa xeelliyaagan darobaa qonccissidi yootoosona. Leemisuwau, Wonggeliyaa xaafida Luqaasi Yesuusi haggaazuwaa doommido layttaa qonccissanau, taarikiyaa eranchati eta sunttaa xaafido, haariyo maatay deꞌiyo laappun asata yootiis.—Luq. 3:1, 2, 23.

Yesuusi deꞌon deꞌida asa gidiyoogaa bessiya naqaashay ammanttiyaaba. Evidens for zi Historikal Jises giyo maxaafay, “Daro eranchati Naazireete Yesuusa geetettiya bitanee koyro xeetu layttan deꞌidoogaa ammanana” yaagiis.

OYSHAA: Yesuusi Tumuppe Xoossay?

ZAARUWAA: CHii gidenna. Yesuusi bana Xoossaara issi likke giidi qoppikka erenna. Hegaappe dumma ogiyan, Yesuusi i Yihoowappea guuxxiyoogaa zaari zaaridi qonccissiis. Leemisuwau, Yesuusi Yihoowa “Ta Xoossau,” qassi “issi Xoossaa” yaagiis. (Maa. 27:46; Yoh. 17:3) Issi ura hegaadan gaana danddayiyay appe guuxxiya asa xalla. Bana ootissiya ura “ta halaqaa” woykko “aawatettay deꞌiyoogaa” giya oosanchay halaqaappe bana guutti xeelliyoogee qoncce.

Yesuusi i Xoossaappe dummatiyoogaakka qonccissiis. Yesuusi ba maataa eqettiyaageetussi issi wode, “Naa77u asa markkatettai tuma gidiyoogee intte higgiyan xaafetti uttiis. Taani tabaa ta huuphen markkattais; qassi tana kiittida ta Aawaikka tabaa markkattees” yaagiis. (Yoh. 8:17, 18) Yesuusi Yihoowappe dummatiyoogee qoncce. Hankkoode eti waanidi naaꞌꞌu markkadan qoodettana danddayiyoonaa?

OYSHAA: Yesuusi coo loꞌꞌo asee?

ZAARUWAA: CHii, i coo loꞌꞌo asa xalla gidenna; i keehi gitabaa oottiis. Yesuusi i Xoossaa sheniyaara gayttidaagan darobaa oottidoogaa erees. Hegeetuppe amaridaageeti kaallidi deꞌiyaageeta:

● “Xoossaa Na7aa issuwaa.” (Yoh. 3:18) Yesuusi ba huuphe awuppe yiidaakko erees. I saꞌan yelettanaappe daro wodiyaa kasetidi a deꞌoy doommiis. I, ‘Taani saluwaappe yaas’ yaagiis. (Yoh. 6:38) Yesuusi Xoossay koyro medhido mereta, qassi Xoossay hara ubbabaa medhiyo wode aara issippe oottiis. Yesuusi Xoossay barkka medhidoogaa gidiyoogaadan, i “Xoossaa Na7aa issuwaa” geetettiyoogee bessiyaaba.—Yoh. 1:3, 14; Qol. 1:15, 16.

● ‘Asa Naꞌaa.’ (Maa. 8:20) Yesuusi bana darotoo ‘asa naꞌaa’ yaagiis; he qofay Wonggeletun 80 gidiya sohuwan deꞌees. He qofay, i saꞌan deꞌiyo wode Xoossanne asa gidennan, muleera asa gidiyoogaa qonccissees. Xoossaa Naꞌaa issoy asa gididi yelettidoy ayba ogiyaanee? Yihooway geeshsha ayyaanaa goꞌettidi ba Naꞌaa deꞌoy Ayhuda asa gidida, geelaꞌee Mayraami uluwan tilettanaadan oottiis. Hegaappe denddidaagan, Yesuusi nagari baynna polo asa gididi yelettiis.—Maa. 1:18; Luq. 1:35; Yoh. 8:46.

● ‘Tamaarissiyaagaa.’ (Yoh. 13:13) Yesuusi Xoossay assi immido oosoy Xoossaa Kawotettaabaa ‘tamaarissiyoogaanne mishiraachuwaa yootiyoogaa’ gidiyoogaa qonccissiis. (Maa. 4:23; Luq. 4:43) I Xoossaa Kawotettay aybakko, qassi Yihoowa shenee polettanaadan he Kawotettay ay oottanaakko asaayyo geliya ogiyan qonccissiis.—Maa. 6:9, 10.

● ‘Qaalaa.’ (Yoh. 1:1) Yesuusi Xoossaa doona gididi oottiis; giishin erana koshshiyaabaanne kaaletuwaa Xoossay haratussi a baggaara yootiis. Yihooway saꞌan deꞌiya asau ba qofaa yootanau Yesuusa goꞌettiis.—Yoh. 7:16, 17.

OYSHAA: Yesuusi yaana geetettida Masee?

ZAARUWAA: Ee. Geeshsha Maxaafay, Masee woy Kiristtoosi yaanaagaa kasetidi yootiis; he qaalatu birshshettay “Tiyettidaagaa” giyoogaa. Yaana geetettida he Masiyaayyo Yihoowa halchoy polettiyoogaara gayttidaagan gita maatay deꞌees. Issi wode, Samaare biittaa maccaasiyaa Yesuusau, “Kiristtoosa giyo masee yaanaagaa taani erais” yaagaasu. Yesuusi iyyo, “Ha nenaara haasayiya taani a” yaagiis.—Yoh. 4:25, 26.

Yesuusi tumuppe Masiyaa gidiyoogau naqaashi deꞌii? Ee, heezzu naqaashati deꞌoosona; he naqaashati issippe issi ura dummayidi erissiya kushe ashaaran deꞌiya malaataa mala. He malaatay Yesuusa bolli polettidee? Ane beꞌoos:

● I yelettido yaraa. Masee Abrahaama zariyan Daawita yaraappe yelettanaagaa Geeshsha Maxaafay kasetidi yootiis. (Doo. 22:18; Maz. 132:11, 12) Yesuusi Abrahaamanne Daawita zeretta.—Maa. 1:1-16; Luq. 3:23-38.

● Polettida hiraagata. Masiyaa yeletaaranne hayquwaara gayttida corabaa gujjin, abaa yootiya daro hiraagay Ibraysxxe Geeshsha Maxaafaa xuufetun deꞌees. He ubba hiraagati Yesuusa deꞌuwan polettidosona. Hegeetuppe amaridaageeti kaallidi deꞌiyaageeta: I Beetaliheemen yelettiis (Mik. 5:2; Luq. 2:4-11), Gibxxe biittaappe xeesettiis (Hoo. 11:1; Maa. 2:15), qassi a meqettaappe issoynne meqqennan a woridosona (Maz. 34:20; Yoh. 19:33, 36). Yesuusi Masiyaa xeelliyaagan odettida hiraagati ubbay ba deꞌuwan polettanaadan oottiis gaana danddayettenna.b

● Xoossay markkattido markkatettaa. Yesuusi yelettido wode, Masee yelettidoogaa dorssaa heemmiyaageetuyyo yootanaadan Xoossay kiitanchata kiittiis. (Luq. 2:10-14) Yesuusi saꞌan haggaaziyo wode, an ufayttiyoogaa Xoossay ba huuphe saluwaappe zaari zaaridi yootiis. (Maa. 3:16, 17; 17:1-5) Yesuusi Mase gidiyoogaa qonccissiya hara naqaasha gidana mala, maalaaliyaabaa oottanaadan Yihooway ayyo wolqqaa immiis.—Oos. 10:38.

OYSHAA: Yesuusi waayettananne hayqqana koshshidoy aybissee?

ZAARUWAA: Nagari baynna asa gidida Yesuusi waayettana bessenna shin. Danobaa oottida uradan, i mittaa bolli misimaariyan xishettidi kawushsha hayqo hayqqanakka bessenna. Gidikkokka, i hegaa malabay ba bolli gakkanaagaa erees, qassi hegau bana aattidi immiis.—Maa. 20:17-19; 1 PHe. 2:21-23.

Masee haraatu nagaray atto geetettanaadan waayettanaageenne hayqqanaagee abaa yootiya hiraagan kasetidi odettiis. (Isi. 53:5; Dane. 9:24, 26) Yesuusi ba huuphe i “daro asaa wozanau [ba] shemppuwaa immanau” yiidoogaa yootiis. (Maa. 20:28) I yarshsho gididi hayqqidoogee wozana danddayiyoogaa ammaniyaageetussi nagaraappenne hayquwaappe attidi, Gannate saꞌan merinaa deꞌuwaa demmiyo hidootay deꞌees.c—Yoh. 3:16; 1 Yoh. 4:9, 10.

OYSHAA: Yesuusi hayquwaappe denddidoogaa tumuppe ammanana danddayiyoo?

ZAARUWAA: Ee. Yesuusi hayquwaappe denddanaagaa loyttidi erees. (Maa. 16:21) Gidoppe attin, Yesuusa gidin Geeshsha Maxaafaa xaafidaageeta gidin, i maalaaliyaabi hanennan hayquwaappe denddana gibeennaagee akeekana koshshiyaaba. Hegaa mala qofay ammanana danddayennaba. Hegaappe dumma ogiyan Geeshsha Maxaafay, “Xoossai haiquwaa seelaa appe xaissidi, a denttiis” yaagees. (Oos. 2:24) Xoossay deꞌiyoogaanne i ubbabaa Medhidaagaa gidiyoogaa nuuni ammanikko, i ba Naꞌaa hayquwaappe denttana danddayiyoogaa ammananaadan oottiya mino naqaashay deꞌees.—Ibr. 3:4.

Yesuusi hayquwaappe denddidoogau ammanttiya naqaashi deꞌii? Kaallidi deꞌiyaabaa akeeka.

● Ayfiyan beꞌida markkata. Yesuusi hayqqido wodiyaappe 22 laytta gidiyaagee aadhi simmin kiitettida PHauloosi, Yesuusi hayquwaappe denddidaagaa 500ppe dariyaageeti beꞌidoogaa, qassi i xaafiyo wode etappe daroti deꞌon deꞌiyoogaa yootiis. (1 Qor. 15:6) Issi woy naaꞌꞌu markki deꞌiyoobaa issi uri ammananau metootana danddayees, shin 500 asay markkattidobaa ooni kashi gaana danddayii?

● Ammanana danddayiyo markkata. Tumuppe hanidabaa ooppenne loyttidi eriya, Yesuusi erissiyo ashkkaratuppe koyrottiyaageeti Yesuusi hayquwaappe denddidoogaa xalan markkattidosona. (Oos. 2:29-32; 3:13-15) I hayquwaappe denddidoogaa ammaniyoogee Kiristtaane ammanuwan keehippe koshshiyaaba gidiyoogaa eti akeekidosona. (1 Qor. 15:12-19) He erissiyo ashkkarati Yesuusa kaddiyoogaappe hayqqanau dooridosona. (Oos. 7:51-60; 12:1, 2) Worddo gididabau eriiddi ba dosan hayqqida ura eray?

Yesuusa xeelliyaagan denddiya usuppun waanna oyshatuyyo Geeshsha Maxaafaappe zaaruwaa beꞌida. He zaaroti Yesuusi oonakko nuuyyo loyttidi qonccissoosona. SHin he zaarota eriyoogee keehippe koshshiyaabee? Yesuusa xeelliyaagan neeni ammaniyoobay nena maaddana woy qohana danddayii?

[Tohossa qofata]