Xoossaa Qaalaappe Tamaara
Ayyaana Meretati Nuna Maaddiyoy Woy Qohiyoy Ayba Ogiyaanee?
Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.
1. Kiitanchati oonee?
Kiitanchati saluwan deꞌiya, ayyaana meretata. Eta deꞌoy asaagaappe keehi xoqqa. I ba huuphe ayyaana gidida, tumu Xoossay saꞌaa medhanaappe kasetidi kiitanchata medhiis. (Iyy. 38:4, 7; Maa. 18:10) Yihoowa yuushuwan miilooniyan qoodettiya, ammanettida kiitanchati deꞌoosona.—Mazamure 103:20, 21; Daaneela 7:9, 10 nabbaba.
2. Kiitanchati asaa maaddiyoonaa?
Kiitanchati xillo asa gidida Looxa maaddidosona. Xoossay asaa iitatettaappe denddidaagan issi katamaa xayssanau qofaa qachiis; Looxee deꞌidoy he katamaana. Naaꞌꞌu kiitanchati Looxeenne a soo asay baqatanaadan yootidosona. Issi issi asay hegaa qiredan xeellidi siyennan ixxiis. SHin, Looxeenne a macca naati Xoossay kiitanchatu baggaara yootidobaa siyidi azazettido gishshau, bashshaappe attidosona.—Doomettaabaa 19:1, 13-17, 26 nabbaba.
Geeshsha Maxaafay yootiyoogaadan, kiitanchati ha wodiyan Xoossaa Kawotettaa mishiraachuwaa ammanettidi sabbakiyaageeta kaalettiyoogan asaa maaddoosona. (Maa. 24:14) He mishiraachoy naagettanaadan akeekissiyoogaakka gujjees. Xoossay Looxa akeekissidobay qire gidennaagaadan, hegeekka qire gidenna. Hegee Xoossay kiitanchatu baggaara yootiyooba.—Ajjuutaa 1:1; 14:6, 7 nabbaba.
Xoossay nuna paacee gakkiyo wode minttettanau kiitanchata goꞌettana danddayees. I Yesuusa minttettanau issi kiitanchaa goꞌettiis.—Luqaasa 22:41-43 nabbaba.
Xoossay mata wodiyan kiitanchata hegaappe dumma ogiyan, giishin tuggau gaaso gidida iita asaa xayssanau goꞌettana. Hegee asaa naati ufayttanaadaaninne woppu gaanaadan oottana.—2 Tasalonqqe 1:6-8 nabbaba.
3. Daydanttati nuna qohiyoy ayba ogiyaanee?
Saꞌan deꞌiya daro asay Xoossaayyo azazettennan ixxidi iitabaa oottidoogaadan, saluwan deꞌiya daro kiitanchatikka Xoossaa bolli makkalidosona. (2 PHe. 2:4) Azazettennan ixxida kiitanchati daydanttata geetettoosona. Etappe waannatiyaagee Seexaanaa Dabloosa. Seexaanaynne daydanttati asaa balettiiddi deꞌoosona.—Ajjuutaa 12:9 nabbaba.
Seexaanay shori baynna zalꞌꞌiyaa, asaa naatu kawotettaanne worddo haymaanootiyaa asaa Xoossaappe wora zaaranau goꞌettiis. Hegaa gishshau, asaa naata qohiya pirdda pacan, makkalaaninne tuggan oyshettana bessiyay Seexaanaa.—1 Yohaannisa 5:19 nabbaba.
4. Daydanttati asaa waati balettiyoonaa?
Seexaanay hayqqidaageeti asaa haasayissiya ayyaana gidoosona giidi darota balettees. SHin, Geeshsha Maxaafay hayqqidaageeti aybanne oottennaagaa yootees. (Era. 9:5) Dayddanttati hayqqida ura cenggurssa milatissidi asaa haasayissiyoogan balettoosona. (Isi. 8:19) Eti shareechiya asatu baggaara harata balettoosona. Xoossaa Qaalay nuuni hegaa mala ooso ubbaappe haakkanaadan yootees. Yaatiyo gishshau, iita ayyaana oosuwaara gayttidabaa nuuni xayssana koshshees.−Zaarettido Wogaa 18:10, 11; Oosuwaa 19:19 nabbaba.
Nuuni Yihoowa siiqikko, daydanttatussi yayyana koshshenna. Xoossaa Qaalaa xannaꞌidi, oosuwan peeshshiyo wode, Dabloosa teqqoos; qassi Xoossaakko shiiqoos. Yihooway daydanttatuppe keehi wolqqaama. Ammanettida a kiitanchati nuna minttettoosona.−Mazamure 34:7; Yaaqooba 4:7, 8 nabbaba.
Gujo qofaa demmanau, Yihoowa Markkati attamissido ha maxaafaa shemppo 10 xeella. Tumuppe Geeshsha Maxaafay Tamaarissiyoy Aybee?