Mussinnay Kumido Alamiyan Ammanettidaageeta Gididi Deꞌana Danddayettii?

NUUNI nagarancha gidiyoogee, alameenne Dabloosi iitabau nuna denttettikkokka, hegaa eqettana danddayoos. Ayba ogiyan? Xoossaakko shiiqiyoogaananne a Qaalan deꞌiya zoriyaa oosuwan peeshshiyoogaana. Naaꞌꞌu leemisuwaa ane beꞌoos.

GEESHSHA MAXAAFAA MAARAA: “Ha sa7aa asaa milatoppite.”—Roo. 12:2.

Tumu taarikiyaa: Gelyermi Brazile biittaa asa gidida dure zalꞌꞌancha. I, suurebaa oottiyoogee metiyoogaa yootiis. I hagaadan giis: “Dirijjitee halchidobaa polanau woy hara zalꞌꞌanchatuura keesettanau, zalꞌꞌanchi worddotiyoogaa doommana danddayees. Daroti qoppiyoogaadan, mattaayiyaa miyoogeenne immiyoogee meeze. Issi uri daro miishshan zalꞌꞌiyo wode, tumabaa oottiyoogee metiyaaba.”

Gidikkonne, Gelyermi likkebaa oottanau metiyaabaa eqettiis. Zalꞌꞌanchati bessennabaa oottiyo wodekka, suurebaa oottana danddayiyoogaa i yootiis. I gujjidi hagaadan giis: “Issi ura kanddoy geeshsha gidana koshshees. Xillo gidiyoogaa goꞌꞌaa akeekanaadan Geeshsha Maxaafay tana maaddiis. Xillo uri woppu giidi deꞌees; qassi a kahay a walassennanne qumꞌꞌenna. I banaara oottiyaageeti suurebaa oottanaadan maaddana danddayees.”

GEESHSHA MAXAAFAA MAARAA: “Duretanau koyiyaageeti paaciyaaninne piriyan geloosona; qassi daro asaa bashshaunne xayuwau goochchi efiya daro eeyyanne qohiya amuwan kunddoosona. Aissi giikko, miishsha siiqiyoogee iitatetta ubbau pultto.”—1 Xim. 6:9, 10.

Tumu taarikiyaa: Anddiree sarotettau maaddiyaabaa giigissiya dirijjitiyaa goda. Toho kuwaasiyaa kilabe gidida gita dirijjitee appe shammees. Issitoo, wolqqaama kaassaappe simmin Anddiree ayssiyaagaa biiruwaa biidi ba oottidobaa kaarinniyaa immiis. Miishshaa kifiliyan oottiyaageeti tiikeetiyaa bayzzido miishshaa qoodiyoogan buskkattoosona. Ooso saatee wuriichido gishshau, Anddira gujjin issi issibaa etau sheedhiya asatuyyo he kifiliyaa halaafee miishshaa eesuwan qanxxiis.

Anddiree hagaadan giis: “Taani soo baydda, halaafee tau palaha miishshaa immidoogaa akeekaas. Halaafee aaro miishshaa immidoy oossakko erana danddayennaagaa akeekaas. Ha buskkattiya bitanee xayida miishshaa baappe qanxxanaagaakka erays. Simmada baanau qofaa qachaas. Kaassaa beꞌanau biida daro asaa giddoora kanttada palaha miishshaa zaaraas. Halaafee keehi garamettiis. Hegaappe kase ayyo ooninne miishsha zaari erenna.”

Anddiree gujjidi hagaadan giis: “Taani he loꞌꞌobaa oottido gishshau, halaafee tana bonchees. Hegee hanoosappe daro layttay aadhikkonne, he kilebiyau issi issibaa sheedhiya koyroogeetuppe hanno gakkanau etau sheedhiyay ta xalla. Geeshsha Maxaafaa zoriyaa kaalliyoogee tana bonchissido gishshau galatays.”

Xoossaa maaduwan, kandduwaa mooriyaabaa eqettana danddayiyoogaa eriyoogee minttettiyaaba. SHin, asa baaxiyan mussinnay muleera xayana danddayenna. Mussinnau gaaso gididabay nagarancha asaa naati xayssana danddayenna wolqqaamaba. SHin, yaagiyoogee mussinnay mule xayenna giyoogee? Hagaappe kaalliya huuphe yohoy he oyshau Geeshsha Maxaafay yootiyooba qonccissees.