Xoossaa Qaalaappe Tamaara
Xoossay Kumetta Saꞌaa Haariya Kawotetta Essanee?
Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.
1. Kumetta saꞌaa haariya kawotettay asaa naatussi koshshiyoy aybissee?
Ha wodiyan asaa naata metiyaabay darotoo alame yuushuwan deꞌees. Issi issi biittan daro asay hiyyeesa, qassi huqqunnettidi deꞌees. Hara biittan qassi daro asay keehi ishalidi deꞌees. Saꞌaa aquwaa oonanne yuuꞌennan ubbau gattana danddayiyay kumetta saꞌaa haariya kawotetta xalla.—Eranchchaa 4:1; 8:9 nabbaba.
2. Kumetta saꞌaa haarana danddayiyay oonee?
Asi loytti ayssana danddayenna gishshau, issi uri kumetta saꞌaa ayssana giyoogee daroti maayennaba. Ubba asay dosiyo uri baa. Qassi sunttettidi asa qohennay oonee? Issi uri asa ubbaa huqqunnidi haaranaagaa qoppiyoogee yashshiyaaba.—Leemiso 29:2; Ermmaasa 10:23 nabbaba.
Xoossaa Yihooway ba Naꞌay Yesuusi asaa naata merinau haaranaadan sunttiis. (Luq. 1:32, 33) Yesuusi saꞌan deꞌiis. He wode, sahettidaageeta pattiis, ashkketa tamaarissiis, qassi guutta naatuura wodiyaa aattiis. (Mar. 1:40-42; 6:34; 10:13-16) Yaatiyo gishshau, Yesuusi haarana danddayiya dumma Kawo.—Yohaannisa 1:14 nabbaba.
3. Kumetta saꞌaa haariya kawotetti eqqana danddayii?
Xoossay ba Naꞌay saluwan uttidi saꞌaa haaranaadan sunttiis. (Dane. 7:13, 14) Kawo gidida uri haariyo katamaa ubbaa baana koshshennaagaadan, Yesuusi asaa naata haaranau saꞌaa yaana koshshenna.—Maatiyoosa 8:5-9, 13 nabbaba.
Yesuusi Kawo gidanaadan ubba asay koyanee? Akkay. I kawo gidanaadan koyiyaageeti loꞌꞌobaa dosiya asatu xalla. Yihooway i sunttido, siiqiya geeshsha kawuwau haarettenna asaa saꞌaappe xayssana.—Maatiyoosa 25:31-33, 46 nabbaba.
4. Kumetta saꞌaa Haariyaagee ay oottanee?
Henttanchay ba dorssata shiishshiyoogaadan, Yesuusi ubba deriyaappe ashkke asaa shiishshidi, Xoossaa siiquwaabaa tamaarissiiddi deꞌees. (Yoh. 10:16; 13:34) He asati Yesuusaunne a haaruwau wozanappe exatoosona. (Maz. 72:8; Maa. 4:19, 20) Kumetta saꞌan, Yesuusau ammanettidi haarettiyaageeti i Kawo gididoogaa issippetettan yootiiddi deꞌoosona.—Maatiyoosa 24:14 nabbaba.
Yesuusi matan iita kawotettata xayssidi asaa shemppissana. I ammanettidi bana kaalliyaageetuppe amaridaageeti saluwan banaara kawo gididi saꞌaa haaranaadan dooriis. (Dane. 2:44; 7:27) Yesuusa Kawotettan saꞌay Yihoowa eriyoogan kumana, qassi asaa naatu taarikiyaa doomettan xayidaagaa mala gannatee zaarettidi eqqana.—Isiyaasa 11:3, 9; Maatiyoosa 19:28 nabbaba.