GEESHSHA MAXAAFAA OYSHAA ZAARUWAA

Xoossaa sunttay oonee?

Nu soo asa ubbau sunttay deꞌees. Ubba mehiyaukka suntti deꞌees. Xoossaayyo shin sunttay deꞌana koshshennee? Geeshsha Maxaafan Xoossay xeegettiyo daro boncho sunttati deꞌoosona; hegeetuppe amaridaageeti Ubbaa Danddayiya Xoossaa, Ubbaa Haariya Godaa, Medhidaagaa giyaageeta; shin au buzo sunttaykka deꞌees.—Isiyaasa 42:8 nabbaba.

Geeshsha Maxaafaa daro birshshettatun Xoossaa sunttay Mazamure 83:18n deꞌees. Leemisuwau, Ooratta Alamiyaa Geeshsha Maxaafaa Birshshettan ha xiqisee, “Neessi sunttay Yihoowa gididoogee, neeni saꞌa ubban Ubbaappe Xoqqiyaagaa gidiyoogaa asay ero” yaagees.

Nuuni Xoossaa sunttaa xeegana koshshiyoy aybissee?

Nuuni a buzo sunttan xeeganaadan Xoossay koyees. Nuuni siiqiyo nu laggetuura issippe haasayiyo wode, eta sunttan eta xeegoos. Xoossaa xeelliyaagan shin hanotay hegaappe dummatana koshshii? Hegaa bolli qassi, Yesuus Kiristtoosi nuuni Xoossaa sunttaa goꞌettanaadan minttettiis.—Maatiyoosa 6:9; Yohaannisa 17:26 nabbaba.

SHin nuuni Xoossaa dabbo gidanau koyiyaaba gidikko, a sunttaa eriyoogaa xallay gidenna. Leemisuwau, i ay mala Xoossee? Xoossaakko shiiqiyoogee danddayettiyaabee? He oyshatu zaaruwaa Geeshsha Maxaafaappe demmana danddayaasa.