Muusa—Mino Ammanoy Deꞌiyo Asa
AMMANOY AYBEE?
Geeshsha Maxaafay yootiyoogaadan, “ammanoy” naqaashay deꞌiyoobaa mintti ammaniyoogaa giyoogaa. Xoossan ammaniya uri I gelido qaalaa ubbaa polanaagaa ammanettees.
MUUSEE AMMANIYOOGAA WAATI BESSIDEE?
Muusee Xoossay gelido qaalaa ammaniyoogaa bessiyaabaa oottiis. (Doomettaabaa 22:15-18) I Gibxxen ishalo deꞌuwaa deꞌana danddayees; shin hegaa aggidi nagaran “guutta wodiyaa ufaittanaagaappe, Xoossaa asaara waayettanaagaa dooriis.” (Ibraawe 11:25) Hegee, guyyeppe i zilꞌꞌettanaadan oottiya, dirbban kuuyido kuushshee? CHii gidenna; Muusee, “beettenna Xoossaa be7idabaadan, genccidi sinttau biis” yaagidi Geeshsha Maxaafay yootees. (Ibraawe 11:27) Muusee ammanuwan oottidoban mule zilꞌꞌettibeenna.
Muusee harati Xoossan minttidi ammananaadan maaddiis. Leemisuwau, Israaꞌeelati Paaroona olanchatuppenne Zoꞌo Abbaappe gidduwan piriyan gelidabadan qoppido wode hanidabaa qoppa. Israaꞌeelati bantta bolli wolqqaama bashshay gakkana hanees gi yayyidi, Yihoowakkonne Muusekko waassidosona. He wode Muusee waatidee?
Xoossay Zoꞌo Abbaa shaakkidi, Israaꞌeelata hegaara pinttidi ashshanaagaa Muusee erennan aggana danddayees. Gidikkokka, Xoossay ba asaa ashshanau issibaa oottanaagaa Muusee ammanettiis. Muusee Israaꞌeelatikka hegaadan ammanettanaadan koyiis. Geeshsha Maxaafay, “Muusee asaa, ‘Yayyoppite; minni eqqite; GODAI hachchi inttena ashshiyo ashettaa intte be7ana’” yaagidoogaa yootees. (Kessaabaa 14:13) Muusee Israaꞌeelatussi mino ammanoy deꞌanaadan maaddidee? Ee; Muuse xallaa gidennan, Israaꞌeelata ubbaa xeelliyaagan Geeshsha Maxaafay, “[Eti] mela biittan hemettiyoogaadan, Zo7o Abbaa pinnidoogee ammanuwaana” yaagees. (Ibraawe 11:29) Muuse ammanoy a xallaa gidennan, Yihoowan ammanettiyoogee aadhida eratetta gidiyoogaa akeekida ubbaa maaddiis.
NUUNI HEGAAPPE TAMAARIYOOBAY AYBEE?
Xoossay gelido qaalan ammaniyoogaa bessiyaabaa oottiyoogan Muuse leemisuwaa kaallana danddayoos. Leemisuwau, nuuni Xoossaa goynuwaa kaseyiyaaba gidikko, i nuuyyo asatettan koshshiyaabaa kunttanau qaalaa geliis. (Maatiyoosa 6:33) Ha wodiyan daro asay aquwaabaa kaseyiyo gishshau, nuunikka aquwaabaa kaseyanau paacettana danddayoos. SHin, nuuni sima deꞌuwaa deꞌanaunne Xoossaa goynuwaa kaseyanau baaxetiyo wode, Yihooway nuuyyo koshshiya ubbabaa kunttanaagaa ammanettana danddayoos. I, “Taani nena mulekka yeggikke woikko aggikke” yaagidi qaalaa geliis.—Ibraawe 13:5.
Nuunikka harati Xoossan mintti ammananaadan maaddoos. Leemisuwau, erancha aawatinne aayeti bantta naatu ammanoy minnanaadan maaddiyo daro injjee deꞌiyoogaa akeekoosona. Xoossay deꞌiyoogaa, qassi suure woy bala gididabay aybakko i higgiyaa kessidoogaa, yelidaageeti bantta naata naatettaappe doommidi tamaarissana koshshees. Hegaa bollikka, Xoossaa higgiyaa naagiyoogee aybippenne aaruwan goꞌꞌiyaaba gidiyoogaa naati akeekanaadaaninne ammananaadan maaddana koshshees. (Isiyaasa 48:17, 18) Yelidaageeti bantta naati “Xoossai de7iyoogaanne bana koyiyaageetuyyo woituwaa immiyoogaa” ammananaadan maaddiyo wode, etayyo alꞌꞌo imotaa immoosona.—Ibraawe 11:6.