Yesuusa I Ufayssiya Deꞌo Deꞌiis

YESUUSI tumuppe ufayssiya deꞌo deꞌidee? I diccido keettaa asay hiyyeesa gidiyoogee qoncce; qassi saꞌan deꞌido wode ubban ayyo darobi baawa. Ubba ayyo ‘zinꞌꞌidi shemppi ekkiyoosikka’ baawa. (Luqaasa 9:57, 58) Qassi asay a ixxiisinne cayiis; wurssettan morkketi a woridosona.

Neeni, ‘Hegaa mala deꞌoy taani ufayssiya deꞌo gaada qoppiyooba gidenna!’ gaana danddayaasa. SHin Yesuusa deꞌuwaara gayttidaagan nuuni erana koshshiyo harabay deꞌees. A deꞌuwaara gayttidaagan oyddubata ane beꞌoos.

1. YESUUSI BA DEꞌUWAN XOOSSAA SHENIYAA POLIIS.

“Ta qumai tana kiittidaagee koyiyoobaa oottanaagaanne a oosuwaa polanaagaa.” —Yohaannisa 4:34.

Yesuusi haasayiyoobaaninne oottiyooban saluwan deꞌiya ba Aawaa, Yihoowa sheniyaa polanau koyiis. I Xoossaa sheniyaa poliyoogan keehi ufayttiis. Qommoora deꞌiya xiqisiyan qonccidaagaadan, i hegee baassi quma mala gidiyoogaa yootiis. I hegaadan giidoy awudekko akeeka.

Yesuusi hegaadan giidoy laaxa saate heeraana. (Yohaannisa 4:6) I deretiya Samaariyaa biittan maalladoppe doommidi hemettiiddi takkido gishshau, namisettidoogee qoncce. Erissiyo ashkkarati a, “Guuttabaa markkii!” yaagidi woossidosona. (Yohaannisa 4:31) Yesuusi etau zaaridoban, Xoossaa sheniyaa poliyoogee au quma mala, qassi a minttettiyaaba gidiyoogaa qonccissiis. Hegee i ba deꞌuwan ufayttiyoogaa bessiyaaba gidennee?

2. YESUUSI BA AAWAA WOZANAPPE SIIQEES.

‘Taani Aawaa siiqays.’—Yohaannisa 14:31.

Yesuusi saluwan deꞌiya ba Aawaara mata dabbo gididi deꞌiis. Yesuusi Xoossaa keehi siiqiyo gishshau, ba Aawaa sunttaa, a halchuwaanne a eeshshaa haratussi yootiyoogan abaa qonccissiis. Yesuusi haasayiyooban, oottiyoobaaninne qoppiyooban ba Aawaa loytti qonccissido gishshau, Yesuusabaa nabbabiyoogee, a Aawaabaa nabbabiyoogaa mala. Piliphoosi Yesuusa, “Aawaa nuna bessa” giido wode, Yesuusi, “Tana be7ida urai Aawaakka be7iis” giidoy hegaassa.—Yohaannisa 14:8, 9.

Yesuusi ba Aawaa keehi siiqiyo gishshau, hayqqana gakkanaashin au azazettiis. (Piliphphisiyuusa 2:7, 8; 1 Yohaannisa 5:3) Yesuusi Xoossaa hegaadan wozanappe siiqiyoogee i ba deꞌuwan keehi ufayttanaadan oottiis.

3. YESUUSI ASAA SIIQEES.

“Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa.”—Yohaannisa 15:13.

Nuuni nagarancha gidiyo gishshau, nu sinttanaa deꞌoy keehi iita gidiyoogee qoncce. Geeshsha Maxaafay, “Nagarai ha sa7aa issi asa [Addaame] baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagees. (Roome 5:12) Nuuni nagaraa gaasuwan gakkiya hayquwaappe nu wolqqan attana danddayokko.—Roome 6:23.

Yihooway asaa naata metuwaappe shemppissiyaabaa giigissiis; hegee keehi ufayssiyaaba. I polo gidida ba Naꞌay, Yesuusi asaa naata nagaraanne hayquwaa aylletettaappe kessanau waayetti hayqqanaadan paqqadiis; hegaadan oottidi wozuwaa giigissiis. Yesuusi ba Aawaanne asaa naata siiqiyo gishshau, nu gishshau ba shemppuwaa aatti immiis. (Roome 5:6-8) Ba goꞌꞌaa aggibayiyo hegaa mala siiqoy i ba deꞌuwan ufayttanaadan oottiis.a

4. YESUUSI A AAWAY A SIIQIYOOGAANNE AN UFAYTTIYOOGAA EREES.

“Taani siiqiyo ta Na7ai, tana ufaissiyaagee hagaa.”—Maatiyoosa 3:17.

Yesuusi xammaqettiyo wode, Yihooway saluwaappe hegaadan giis. Yaagiyoogan, Yihooway ba Naꞌaa Yesuusa siiqiyoogaanne an ufayttiyoogaa qoncciyan yootiis. Yesuusi, “Ta Aawai tana siiqees” giidoogee maalaaliyaaba gidenna. (Yohaannisa 10:17) Yesuusi Aaway a siiqiyoogaanne an ufayttiyoogaa eriyoogee, i yedetaanne tooshiyaa xalidi genccanaadan maaddiis. Yesuusi hegaa eriyoogee ubba hayqqiyo wodekka genccanaadan maaddiis. (Yohaannisa 10:18) Yesuusi ba Aaway bana siiqiyoogaanne banan ufayttiyoogaa eriyoogee, i ba deꞌuwan keehi ufayttanaadan oottidoogee qoncce.

Yesuusi ufayssiya deꞌuwaa deꞌidoogee erettidaagaa. Nuuni ufayssiya deꞌuwaa deꞌana danddayiyoy ayba ogiyaanakko, appe darobaa tamaarana danddayoos. Kaalliya huuphe yohoy, waani deꞌana bessiyaakko Yesuusi bana kaalliyaageeta zorido zoriyaappe amaridaagaa qonccissees.