GEESHSHA MAXAAFAA OYSHAA ZAARUWAA

Geeshsha Maxaafay yootiyoobaa akeekana danddayettii?

Geeshsha Maxaafay Xoossaa Qaala. I siiqiya aaway kiittido dabddaabbe mala. (2 Ximootiyoosa 3:16) Xoossay nuuni a waati ufayssana danddayiyaakko, i iitabay deꞌanaadan paqqadidoy aybissakko, qassi i sinttappe asaa naatussi ay oottanaakko Geeshsha Maxaafan qonccissiis. SHin haymaanootiyaa asttamaareti Geeshsha Maxaafaa qofaa geellayidosona; hegaappe denddidaagan daro asay Geeshsha Maxaafay yootiyoobaa mule akeekana danddayennabadan qoppees.—Oosuwaa 20:29, 30.

Xoossaa Yihooway nuuni abaa tumaa eranaadan koyees. Hegaa gishshau, nuuni akeekana danddayiyo qofay deꞌiyo maxaafaa nuussi immiis.—1 Ximootiyoosa 2:3, 4 nabbaba.

Geeshsha Maxaafaa waatada akeekana danddayay?

Yihooway nuussi Geeshsha Maxaafaa immiyoogaa xalla gidennan, a giddon deꞌiya qofaa akeekanau nuna maaddees. Nuna tamaarissanaadan Yesuusa kiittiis. (Luqaasa 4:16-21) Yesuusi daro xiqiseta yootidi, asay Geeshsha Maxaafaa qofaa akeekanaadan maaddiis.—Luqaasa 24:27, 32, 45 nabbaba.

Yesuusi ba doommido oosuwaa oottanaadan Kiristtaane gubaaꞌiyaa essiis. (Maatiyoosa 28:19, 20) Ha wodiyan, Yesuusa tumuppe kaalliyaageeti Geeshsha Maxaafay Xoossaa xeelliyaagan tamaarissiyoobaa asay akeekanaadan maaddoosona. Neeni Geeshsha Maxaafaa qofaa akeekanau koyikko, Yihoowa Markkati nena ufayssan maaddana.—Oosuwaa 8:30, 31 nabbaba.