Yelidaageetoo​—Intte Naata Guutta Naatettaappe Doommidi Loohissite

GEESHSHA MAXAAFAY, “Naati GODAAPPE imettiya imota; yeloti tumuppe woito” yaagees. (Maz. 127:3) Hegaa gishshau, Yihoowa Markka gidida aawatinne aayeti naꞌa yeliyo wode keehi ufayttiyoogee garamissiyaaba gidenna.

Naꞌi yelettiyo wode ufayttiyaaba gidikkokka, hegaappe simmin deꞌiya aawatettay wolqqaama. Naꞌay payya gididi diccanaadan, bollau maaddiya qumaa ubbatoo mizana koshshees. Naꞌay tumu goynuwaa mintti kaallanaadan, aawaynne aayyiyaa ayyaanaabaa qumaa a loytti mizananne Xoossaa higgiyaa a wozanan wottanau minnidi tamaarissana koshshees. (Lee. 1:8) He loohissuwaa awude doommana koshshii, qassi hegee ay ay gujjii?

YELIDAAGEETUSSI KAALETOY KOSHSHEES

Beni Israaꞌeelan Xorꞌꞌa kataman deꞌida Daana zariyaa, Maanuhebaa qoppite. Maanuhe maccaasiyaa mayniyaa attuma naꞌaa yelanaagaa Yihoowa kiitanchay iyyo yootiis. (Daan. 13:2, 3) Ammanettida asa gidida Maanuheenne a maccaasiyaa hegaa siyidi keehi ufayttidoogee qoncce. SHin eta keehi qofissidabaykka deꞌees. Hegaa gishshau, Maanuhee, “Abeet GODAU, na7ai yelettiyo wode ai oottanau koshshiyaakko erissana mala, neeni wontta kiittido Xoossaa asi nuukko simmidi yaanaadan oottarkkii” yaagidi woossiis. (Daan. 13:8) Maanuhanne a maccaasiyo bantta naꞌaa dichana ogiyaabay qofissiis. Eti bantta naꞌaa Samssoona Xoossaa higgiyaa tamaarissidoogee qoncce; qassi eti bantta oottidoban loꞌꞌo ayfiyaa demmidosona. Geeshsha Maxaafay, “GODAA Ayyaanai [Samssoona] denttettiyoogaa doommiis” yaagees. Hegaappe denddidaagan, Samssooni Israaꞌeela bolli daanna gididi maalaalissiya darobaa oottiis.—Daan. 13:25; 14:5, 6; 15:14, 15.

Naata loohissiyoogaa awude doommana koshshii? Ximootiyoosa “guutta naatettaasappe” doommidi a aayyiyaa Euniiqanne a aayee aayyiyaa Loyda “geeshsha maxaafata” tamaarissidosona. (2 Xim. 1:5; 3:15) Ximootiyoosi guutta naatettaappe doommidi Geeshsha Maxaafan loohiis.

Kiristtaaneti bantta naꞌaa “guutta naatettaasappe” doommidi loohissana mala, kaaletuwaa demmanau woossiyoogeenne kasetidi halchiyoogee eratetta. Leemiso 21:5y, “Mino oosanchchaa halchchoi dureyees” yaagees. Naꞌi yelettanaappe kase, aawaynne aayyiyaa loyttidi giigettiyoogee erettidaagaa. Ubba sinttappe naꞌau koshshiyaabaa kasetidi xaafi oyqqana danddayoosona. Eti ayyaanaaban oottanabaakka halchiyoogee keehi koshshiyaaba. Bantta naꞌaa guutta naatettaappe doommidi hegaadan loohissanau eti halchana koshshees.

Naata dichiyoogaabaa yootiya issi maxaafay hagaadan gees: “Naꞌi yeletti simmin deꞌiya amarida aginay guuggee keehi eesuwan dicciyo wode. He wodiyan sinapsetu qooday, hegeekka oorattabaa tamaaranau maaddiya, guugge giddon issoy issuwaara gayttiyaabatu qooday laatamu kushe darees.” Yelidaageeti naꞌaa guuggiyaa dichaa wodiyaa giddon qantta gidida ha wodiyan ayyaanaabaa bantta naꞌaa wozanan wottiyoogaa doommiyoogee eratetta!

Kumetta wodiyaa aqinye gidida issi aayyiyaa ba naꞌiyo xeelliyaagan hagaadan gaasu: “Iyyo issi agina gidiyo wodeppe doommada, haggaazuwaa ekkada bays. Hanettiyaabaa a erana danddayennaba gidikkokka, a naatettan deꞌishin hegaadan oottiyoogee o maaddanaagaa eraas. Iyyo naaꞌꞌu laytta gidiyo wode, haggaazuwan demmiyo asau yayyennan trakttiyaa immiyoogaa doommaasu.”

Naata guutta naatettaappe doommidi loohissiyoogee loꞌꞌo ayfiyaa demissees. Gidikkokka, naatussi ayyaanaaban kaaletuwaa immiyoogee metiyoogaa yelidaageeti akeekoosona.

“WODIYAA” WOOMMITE

Naati woppu giidi uttennaageeta woy sohuwaara salettiyaageeta gidiyoogee yelidaageetussi gita meto gidana danddayees. Naati issibaa qoppiiddi, sohuwaara hegaa aggidi harabaa qoppana danddayoosona. Naati eranau keehi koyiyo gishshau heeran deꞌiya ubbabaa loytti akeekanau maloosona. Yelidaageeti bantta naꞌay tamaariyoobaa loytti kaallana mala waati maaddana danddayiyoonaa?

Muusee yootidobaa qoppite. Zaarettido Wogaa 6:6, 7y hagaadan gees: “Hachchi taani nena azaziyo ha azazota ne wozanan wotta. Eta neeni ne naata tamaarissa; neeni ne son uttiyo wode, ogiyan hemettiyo wode, zin77iyo wodenne denddiyo wode etabaa haasaya.” “Tamaarissa” geetettidi birshshettida qaalay zaaretti zaarettidi yootiyoogaa bessees. Guutta naꞌay ubbatoo haattaa ushshana koshshiyo puute mala. Zaaretti zaarettidi yootiyoogee gasttati issi keehi koshshiyaabaa hassayanaadan maaddiyo gishshau, hegee naatakka maaddiyoogee erettidaagaa!

Naata Xoossaabaa tumaa tamaarissanau yelidaageeti etaara wodiyaa aattana koshshees. Ha bichaarissiya alamiyan hegau wodiyaa bazziyoogee metiyaaba gidana danddayees. SHin kiitettida PHauloosi keehi koshshiya ayyaanaabaa oosuwau wodiyaa bazzanaadan zoriis. (Efi. 5:15, 16) Hegaadan waati oottana danddayiyoo? A machiyaa oosoy dariyo aqinye gidido gubaaꞌe cimay, naꞌiyo loohissiyoogaa, gubaaꞌiyaa aawatettaanne ba oosuwaa bessiyaagaadan polanau metootiis. Eti bantta naꞌiyo loohissiyo wodiyaa waati demmana danddayiyoonaa? Aaway hagaadan giis: “Taani oosuwaa baanaappe kase, ubbatoo guuran taaninne ta keettaayyiyaa iyyo Geeshsha Maxaafaa Taariketa Tamaariyo Maxaafaa giya maxaafaappe woy Geeshsha Maxaafaa Galla Galla Pilggiyoogaa giya bukleetiyaappe nabbaboos. Omarssi a ichanaappe kase iyyo nabbaboos; qassi haggaazuwau kiyiyo wode o ekkidi boos. Koyro layttatun hegee nuuppe halanaadan koyibookko.”

‘NAATI TOORA MALA’

Nuuni nu naati wozannaama gididi diccana mala koyiyoogee qoncce. Gidikkokka, eta loohissiyo waanna gaasoy eti Xoossaa siiqiyaageeta gidanaadaana.—Mar. 12:28-30.

Mazamure 127:4y, “Issi urai ba yelagatettan yelido naati, olanchchaa kushiyan de7iya tooratu mala” yaagees. Yaatiyo gishshau, naati zambbidobaa caddanau xonggana koshshiyo tooran leemisettidosona. Tooraa xonggiya uri xonggi simmidi guyye zaarana danddayenna. ‘Toora’ mala gidida naati yelidaageetu kushiyan guutta wode xallau takkoosona. He wodiyaa Xoossaa higgiyaa eta tamaarissanau goꞌettana koshshees.

Kiitettida Yohaannisi ayyaanaaban ba naata xeelliyaagan, “Ta naati tumatettan de7iyoogaa siyiyoogaappe aadhdhidi, tana ufaissiyaabi baawa” yaagiis. (3 Yoh. 4) Yelida Kiristtaanetikka bantta naati “tumatettan de7iyoogaa” beꞌiyo wode hegaadan gaana danddayoosona.