NABBABIYAAGEETU OYSHAA

Kiristtaane gidida aawaynne aayyiyaa bohettida naꞌaara gubaaꞌe shiiquwan issippe uttiyoogee bessiyaabee?

Bohettida uray Kawotettaa Addaraashan uttiyo sohuwaabaa qoppiyoogee keehi koshshiyaaba gidenna. Kiristtaane aawaynne aayyiyaa etaara issippe son deꞌiya bohettida naꞌaa ayyaanaaban maaddiyoogee bessiyaaba gidikko maaddanaadan Wochiyo Keelaa maxeetee minttettiiddi takkiis. Xiqimita 1, 2001, Wochiyo Keelaa (Amaarattuwaa), sinttaa 16ppe biidi 18 gakkanaassi qonccidaagaadan, yelidaageeti banttanaara issippe son deꞌiya, asa gamma gakkibeenna bohettida naꞌaa Geeshsha Maxaafaa xannaꞌissanakka danddayoosona. Hegaadan oottiyoy naꞌay ba mooruwaappe simmanau koshshiya maaduwaa demmana giidi qoppiyo gishshataassa.a

Kawotettaa Addaraashan uttiyoosaa xeelliyaagan, asa gamma gakkibeenna bohettida naꞌi woppu giidi yelidaageetuura uttikko aynne baa. Bohettida uri addaraashan guyye gaxan uttana koshshees giya higgee baynna gishshau, bohettida naꞌikka a yelidaageeti uttiyoosan awaaninne eta matan uttana danddayees. Yelidaageeti bantta naꞌau ayyaanaaban koshshiyaabaa kunttiyaageeta gidiyo gishshau, naꞌay shiiquwan tamaariyoobaa loyttidi ezggiyoogaa eranau koyiyoogee qoncce. Hegaara gayttidaagan, naꞌay barkka uttanaadan aggibayiyoogaappe etaara uttanaadan oottiyoogee maaddana danddayees.

Gidoppe attin, bohettida naꞌay bana yelidaageetuura issippe deꞌennaba gidikko shin? Yaanikko, yelidaageetuura issippe uttana danddayenna giyoogee? Kiristtaaneti banttanaara issippe deꞌenna bohettida dabbuwaara gayttiyoogaa xeelliyaagan kaallana koshshiya qofaa takkida Wochiyo Keelaa maxeetee qonccissi yootiis.b Gidoppe attin, bohettida uri shiiquwaa wode woppu giidi so asaara uttiyoogee, koshshennan aara wodiyaa aattanau koyiyoogaappe keehi dumma. Ammanettida so asay bohettida bantta dabbuwaa bessiyaagaadan xeelliyaabanne aara gayttiyoogaa xeelliyaagan Geeshsha Maxaafay yootiyo zoriyaa kaallanau baaxetiyaaba gidikko, qofissiyaabi waayi deꞌana.—1 Qor. 5:11, 13; 2 Yoh. 11.

Bohettida uri bessennabaa hanennaba gidikko, i so asaa matan uttiyoogee woy gubaaꞌiyan deꞌiya hara uraa matan uttiyoogee qofissiyaaba gidenna. Issi uri uttiyoosaa xeelliyaagan dumma dumma hanotau higge kessiyoogee daro metoy merettanaadan oottana danddayees. Ammanettida so asaa gujjin, gubaaꞌiyan shiiqida ubbay bohiyoogaa xeelliyaagan Geeshsha Maxaafaa maaraa kaallanau baaxetiyaabanne uttiyo sohuwaa xeelliyaagan ishantti xubettennaba gidikko, gubaaꞌe shiiquwaa yiyaageeti uttiyo sohoy hegaa keena qofissana koshshenna.