Yesuus Kiristtoosa I Haꞌꞌi Ay Oottiiddi Deꞌii?

Alame yuushuwan daro asay Tisaase aginan Yesuusa guutta naꞌa oottidi medhido misiliyaa beꞌees. A misiliyaa miizzay kattaa wottin miyo wogga saaxine malatiya qoriyan deꞌiyaabadan medhoosona. SHin nuuni Yesuusi haꞌꞌikka guutta naꞌa gididi deꞌiyaabadan qoppana koshshii?—a I haꞌꞌi ay oottiiddi deꞌiyaakko ane beꞌoos. Beetaliheeme heeran issi gallassi qammi dembban dorssaa heemmiyaageetuyyo hanidabaappe hegaa erana danddayoos.

Akeekennan issi kiitanchay dorssaa heemmiyaageetuyyo beettiis. I etau, “Hachi Godai Kiristtoosi, ashshiyaagee Daawita kataman [yelettiis]” yaagiis. Kiitanchay eti Yesuusi ‘maayuwan xaaxin miizzay kattaa wottin miyo qoriyan zinꞌꞌidaagaa demmanaagaakka’ yootiis. Sohuwaara hara daro kiitanchati kiyi beettidi, ‘Xoossaa galatiyoogaa’ doommidosona.

Kiitanchati Xoossaa galatishin siyiyaakko neeni waananee?— Dorssaa heemmiyaageeti keehippe ufayttidosona! Eti, “Ane Beetaliheeme gakkanaashin biidi, Xoossai nuussi odido yohoi hanidaagaa be7oos” yaagidosona. Yaa gakkidi eti “Mairaamonne Yooseefa demmidi, miizzai kattaa wottin miyo qoriyan gacino na7ai zin77idaagaa be7idosona.”

Sohuwaara harati Mayraamanne Yooseefi deꞌiyoosaa Beetaliheeme yiidosona. Dorssaa heemmiyaageeti hanettidabaa yootin eti ubbay garamettidosona. He garamissiyaabay aybakko eranau koyay?— Xoossaa siiqiya nuuni ubbay eranau koyoos. Yesuusi yelettidoogee hegaadan keehi ufayssidoy aybissakko ane beꞌoos. Hegaa beꞌanau, Mayraama azinaa gelanaappe kase hanidabaa erana koshshees.

Issi gallassi kiitanchay Gabreeli Mayraamikko yiis. Yiidi, “gita gidana; qassi Ubbaappe Bolla Xoossaa Na7a geetettana” naꞌaa a yelanaagaa yootiis. Gabreeli, ‘I merinau kawotanaagaa, qassi a kawotettaassi wurssetti baynnaagaa’ yootiis.

Mayraama attuma asaara asho gaytotettaa pola erenna gishshau, hegee waanidi hanana danddayiyaakko erana koyaasu. Yaatiyo gishshau, Gabreeli iyyo hagaadan giis: “Geeshsha Ayyaanai ne bolli yaana; Ubbaappe Bolla Xoossaa wolqqai nenan shemppana; hegaa gishshau, ne yelana geeshsha na7ai Xoossaa Na7aa geetettana.” Xoossaa Naꞌaa saluwaappe ehiidi, guutta naꞌa gididi diccanaadan Mayraami ulo giddon wottiyoogee keehippe maalaalissiyaaba!

Guutta naꞌaa Yesuusa beꞌanau biya heezzu asatunne dorssaa heemmiyaageetu misiliyaa beꞌa eray?— Daro biittan Ufayssa Masqqalaa wode hegee meeze gididaba. SHin hegee tuma gidenna. He asati Xoossay ixxiyoobaa oottiyaageeta, xoolinttiyaa qoodiyaageeta. Eti gakkiyo wode aybi hanidaakko ane beꞌoos. Geeshsha Maxaafay, “Soo gelidi, na7ai ba aayee Mairaamiira de7iyaagaa be7idosona” yaagees. Yaatiyo gishshau, he wode Yesuusi miizzay kattaa wottin miyoosan deꞌiya gacino naꞌa gidenna; i Yooseefaaranne Mayraamiira son deꞌiya naꞌa!

Xoolinttiyaa qoodiyaageeti Yesuusa waatidi demmidonaa?— Eta issi xoolinttee kaalettiis; koyro Beetaliheeme gidennan, Kawuwaa Heeroodisakko Yerusalaame kaalettiis. Geeshsha Maxaafay Heeroodisi Yesuusa demmidi woranau koyidoogaa yootees. Ane hagaa akeeka. Xoolinttiyaa qoodiyaageeta issi xoolinttee Heeroodisakko kaalettanaadan oottiday oona gaada qoppay?— Tumu Xoossaa Yihoowa gidennan, a morkkiyaa, Seexaanaa Dabloosa!

Seexaanay ha wodiyan daro asay Yesuusa gacino naꞌa ootti xeellanaadan koyees. SHin kiitanchay Gabreeli Mayraamiyyo, “Inne . . . merinau kawotana; a kawotettaassi wurssetti baawa” yaagiis. Haꞌꞌi Yesuusi saluwan Kawo gididi haariiddi deꞌees, qassi mata wode Xoossaa morkketa ubbaa xayssana. Nuuni Yesuusi haꞌꞌi Kawo gidiyoogaa erananne haratussi hegaa yootana koshshees.