Yelagatettan Loꞌꞌobaa Dooriyoogaa

1. Yelaga Kiristtaaneti daroti ufayssiyaabaa ay ay oottiiddi deꞌiyoonaa?

NUUNI ufayssiya wodiyan deꞌoos. Awudeegaappenne dumma ogiyan, miilooniyan qoodettiya asay ubba deriyaappe tumu goynuwau yiiddi deꞌees. (Ajj. 7:9, 10) Daro yelagati shemppuwaa ashshiya Geeshsha Maxaafaa tumaa eranaadan harata maaddiyoogan, bantta deꞌuwan ufayssiyaabaa beꞌiiddi deꞌoosona. (Ajj. 22:17) Issi issi yelagati Geeshsha Maxaafaa xannaꞌissiyoogan asay kaseegaappe loꞌꞌo deꞌuwaa deꞌanaadan maaddiiddi deꞌoosona. Harati kare biittaa qaalaa haasayiyaageetuyyo mishiraachuwaa mishettidi yootoosona. (Maz. 110:3; Isi. 52:7) Ha ufayssiya oosuwaa oottanau neeni waatana koshshii?

2. Yihooway yelagatussi aawatettaa immana koyiyoogaa Ximootiyoosa leemisoy waati qonccissii? (Ha huuphe yohuwaa doomettan deꞌiya misiliyaa xeella.)

² Guyyeppe Xoossau haggaaziyoogan ufayssiya maataa demmanaadan maaddana danddayiyaabaa yelagatettan deꞌaydda doorana danddayaasa. Leemisuwau, Lisxxira giyo kataman deꞌiya Ximootiyoosi bau layttay 20 heera gidiyo wode misoonaawe gidanaadan maaddida loꞌꞌo dooruwaa dooridoogee qoncce. (Oos. 16:1-3) Ishantta wolqqaama yedettay gakkido, mati eqqida Tasalonqqe gubaaꞌiyaa baanaadan PHauloosi Ximootiyoosau yootidoy hegaappe guutta aginay aadhi simmiina gidennan aggenna. PHauloosa he katamaappe wolqqan kessidosona; shin i Ximootiyoosi ishantta minttettanaagaa ammanettiis. (Oos. 17:5-15; 1 Tas. 3:1, 2, 6) He maataa demmidoogan Ximootiyoosau aybi siyettidaakko qoppa.

NEESSI UBBABAAPPE AADHIYA DOORUWAA

3. Neeni ne deꞌuwan doorana danddayiyo ubbabaappe aadhiyaabay aybee, qassi hegaa awude doorana danddayay?

³ Yelagatettay keehi koshshiyaabaa dooriyo wode. SHin, Yihoowau haggaazanau dooriyoogee hara ubba dooruwaappe aadhees. Yaatanau keehippe loꞌꞌo wodee awudee? Yihooway, “Ne yelagatettaa laittan nena Medhdhidaagaa qoppa” yaagees. (Era. 12:1) Bessiyaagaadan Yihoowa ‘qoppana’ danddayiyoy au loyttidi haggaaziyoogaa xallaana. (Zaa. 10:12) Xoossau kumetta wozanaappe haggaazanau kuuyiyoogee neeni doorana danddayiyo ubbabaappe aadhiya dooro. Hegee sinttanau ne deꞌoy giiga gidanaadan maaddees.—Maz. 71:5.

4. Neeni Xoossau haggaaziyo haggaazuwan nena maaddana woy qohana danddayiya dooroti awugeetee?

⁴ Sinttanau ne deꞌuwau maaddiyay neeni Yihoowau haggaazanau dooriyoogaa xalla gidennaagee qoncce. Leemisuwau, neeni aqo oyqqooshsha, oyqqikko oona ekko woy oona geloo, qassi ay ooso oottoo gaada qoppana danddayaasa. Ha allaalletuura gayttidaagan kuuyiyoobay keehi koshshiyaaba; shin neeyyo danddayettida keenan Yihoowau loytta haggaazanau koyiyaakkonne kasetada dooriyoogee loꞌꞌoba. (Zaa. 30:19, 20) Ayssi giikko, hegeeti issoy issuwaara gayttidaba. Neeni aqo deꞌuwaaranne oosuwaara gayttidaagan dooriyoobay Xoossau haggaaziyo haggaazuwan maaddees woy qohees. (Luq. 14:16-20⁠ra gatta xeella.) Hara baggaara qassi, neeni Xoossau haggaazanau koyiyoogee aqo deꞌuwaaranne oosuwaara gayttidaagan loꞌꞌobaa dooranaadan maaddees. Yaatiyo gishshau, ubbabaappe aadhiyaabaa kasetada doora.—Pili. 1:10.

YELAGATETTAN AY OOTTUUTEE?

5, 6. Suurebaa dooriyoogee guyyeppe loꞌꞌobaa waati demissana danddayiyaakko leemisuwaa yoota. (Ha maxeetiyan, “Taani Naatettan Dooridobaa” giya huuphe yohuwaakka xeella.)

⁵ Neeni Xoossau haggaazanau doorikko, neeni oottanaadan i koyiyoobaa wotta dentta qoppada, ayyo waata haggaazanaakko kuuyana danddayaasa. Jaappaane biittaa asa gidida ishay hagaadan giidi xaafiis: “Tau layttay 14 gidido wode, gubaaꞌe cimaara haggaazishin haggaazuwan taani ufayttennaagaa i akeekiis. I keha qaalan tana, ‘Yuichiro, soo baada xarapheezaa matan uttada Yihooway neessi oottidobaa yuushsha qoppa’ yaagiis. Taani i giidoogaadan oottaas. Taani amarida gallassau aggennan qoppaasinne woossaas. Ta xeelay loddan loddan laamettiis. Taani daro takkennan, Yihoowayyo ufayttada haggaaziyoogaa doommaas. Misoonaawetubaa nabbabiyoogee tana ufayssees; qassi Xoossau loytta haggaazanau qoppiyoogaa doommaas.”

⁶ Yuichiroy gujjidikka hagaadan giis: “Sinttappe Yihoowau kare biittan haggaazanau maaddiyaabaa dooranau qofaa qachaas. Leemisuwau, taani Inggilizettuwaa tamaaranau kuuyaas. Naaꞌꞌantto xekka timirttiyaa wurssido wode, aqinye gidada haggaazanau amarida saatiyau Inggilizettuwaa tamaarissanau qofaa qachaas. Taayyo layttay 20 gidin Monggooliyaa biittaa qaalaa tamaariyoogaa doommaas; qassi he biittaa ishantta oychanau baas. Naaꞌꞌu layttappe guyyiyan, 2007n, Monggooliyaa biittaa beꞌanau baas. Taani amarida aqinyetuura sabbakanau baada daro asay tumaa eranau koyiyoogaa beꞌido gishshau, yaa baada maaddanau koyaas. Taani issi issibaa giigissanau guyye Jaappaane baas. Taani Hosppune 2008ppe doommada Monggooliyaa biittan aqinye gidada haggaazays. Hagan deꞌoy metees. SHin, asay Kawotettaa mishiraachuwaa siyees; qassi taani eti Yihoowakko shiiqanaadan maaddays. Taani ubbaappe aadhiya deꞌo ogiyaa dooridobadan taassi siyettees.”

7. Nuuni nu huuphessi doorana bessiyaabay aybee, qassi Muusee nuussi aybin leemiso gidii?

⁷ Yihoowa Markka gididi ba deꞌuwan oottanabaa ubba asay ba huuphe doorana koshshees. (Yaas. 24:15) Aqo oyqqana koshshiya koshshennaakko, oona ekkanaakko woy oona gelanaakko woykko ay ooso oottanaakko nuuni neessi yootana danddayokko. Neeni amaridaagaa xallaa loohana koshshiyo oosuwaa dooruutee? Yelaga Kiristtaanetuppe amaridaageeti hiyyeesa heeran deꞌoosona; harati qassi dure kataman deꞌoosona. Alame yuushuwan eta eeshshay, eray, eti deꞌuwan beꞌidobay, eta koshshaynne ammanoy issuwaagee haraagaappe keehi dummatees. Yelagatoo, intte beni Gibxxen deꞌiya Ibraawe biittaa yelagati yelaga Muuseppe dummatiyoogaa keenaa issoy issuwaappe dummatana danddayeeta. I kawo keettan deꞌiya ubbabaa demmiyo qaaday deꞌees; shin hara Ibraaweti aylle. (Kes. 1:13, 14; Oos. 7:21, 22) Eti nuugaadan keehi koshshiyaabaa kuuyana bessiyo wodiyan deꞌidosona. (Kes. 19:4-6) Eti ubbaykka bantta deꞌuwan ay oottanaakko doorana koshshiis. Muusee suurebaa dooriis.—Ibraawe 11:24-27 nabbaba.

8. Bantta deꞌuwan ay dooranaakko qoppiya yelagata maaddiyaabay aybee?

⁸ Intte yelagatettan loꞌꞌobaa dooranaadan Yihooway maaddees. I waati maaddii? Intte hanotay aybanne gidin intte goꞌettana danddayiyo Geeshsha Maxaafaa maaraa i tamaarissees. (Maz. 32:8) Hegaa bollikka, inttena yelida Kiristtaanetinne gubaaꞌe cimati intte he maaraa waatidi oosuwan peeshshana danddayiyaakko yuushshi qoppanaadan maaddana danddayoosona. (Lee. 1:8, 9) Sinttappe intte deꞌuwan inttena goꞌꞌiya loꞌꞌobaa dooranaadan maaddana danddayiya geeshsha maxaafaa maaraa heezzaa ane beꞌoos.

INTTEYYO KAALETO GIDIYA GEESHSHA MAXAAFAA MAARAA HEEZZAA

9. (a) Yihooway nuuni koyidobaa dooranaadan laꞌatettaa immidi waati bonchidee? (b) ‘Kasetidi Xoossaa kawotettaa koyiyoogee’ waatanau maaddii?

⁹ Kasetidi Xoossaa kawotettaanne a xillotettaa koyite. (Maatiyoosa 6:19-21, 24-26, 31-34 nabbaba.) Yihooway nuuni koyidobaa dooranaadan laꞌatettaa immidi nuna bonchiis. I intte intte yelagatettaa wodiyaappe ay keenaa Kawotettaabaa sabbakanau peeshshana koshshiyaakko yootenna. SHin nuuni kasetidi Kawotettaabaa koyanaadan maaddiya maaraa Yesuusi yootiis. I yootidobaa oosuwan peeshshiyoogan Xoossaa intte siiqiyoogaa, intte shooruwau qoppiyoogaanne merinaa deꞌuwaa hidootaa nashshiyoogaa bessana danddayeeta. Intte aqo oyqqanaunne oosuwaa oottanau qoppiyo wode, intte dooriyoobay asatettau koshshiyaabau hirgganaadan oottiyaabakko, woy qassi intte Xoossaa Kawotettaunne a xillotettau mishettiyoogaa bessiyaabakko qoppite.

10. Yesuusi ufayttanaadan oottidabay aybee, qassi neeni ufayttanaadan oottiya dooroy aybee?

¹⁰ Haratussi oottiyoogan ufayttite. (Oosuwaa 20:20, 21, 24, 35 nabbaba.) Yesuusi deꞌuwan keehi maaddiya ha maaraa kehatettan tamaarissiis. I ba sheniyaa poliyoogaappe ba Aawaa sheniyaa polido gishshau keehi ufayttiis. Ashkke asay Kawotettaa mishiraachuwaa siyiyoogaa beꞌidoogee Yesuusa ufayssiis. (Luq. 10:21; Yoh. 4:34) Harata maaddiyoogee ufayssiyoogaa ne huuphe beꞌennan aggakka. Neeni deꞌuwan dooriyo waannatiyaabaa Yesuusi tamaarissido maaraadan doorikko, neeyyookka ufayttaasa Yihoowakka ufayssaasa.—Lee. 27:11.

11. Baaruki ufayttiyoogaa aggidoy aybissee, qassi Yihooway a woygidi zoridee?

¹¹ Yihoowayyo haggaaziyoogee nuna aybippenne aaruwan ufayssiyaaba. (Lee. 16:20) Ermmaasa xaafee Baaruki hegaa dogennan waayi aggana. Issi wode, i Yihoowau haggaaziyoogan ufayttiyoogaa aggiis. Yihooway assi hagaadan giis: “Neeni neeyyo gitabaa koyaiyye? Hegaa koyoppa. Aissi giikko, asaa ubbaa bollan taani iitabaa ehaana. . . . SHin neeni biidosan ubban taani nena haiquwaappe ashshana.” (Erm. 45:3, 5) Baaruki ufayttanaadan oottanabay aybee? A ufayssanay gitabaa koyiyoogeeyye Xoossau ammanettidi haggaaziyoogan Yerusalaamee xayiyo wode attiyoogee?—Yaaq. 1:12.

12. Ramiroy ba deꞌuwan ufayttanaadan oottidabay aybee?

¹² Ramiro giyo ishay haratussi oottiyoogan ufayssaa demmidaageetuppe issuwaa. I hagaadan giis: “Taani Andiis giyo Deriyaa heeran diccaas; nu soo asay hiyyeesa. Hegaa gishshau, ta bayra ishay taani yuniversttiyan tamaarana mala miishsha qanxxanaagaa yootiis; hegee keehi gitaba. SHin taani mata wode xammaqettada Yihoowa Markka gidaas; qassi issi aqinyee taani aara issi guutta kataman haggaazanaadan shoobbiis. Taani yaa baas; yaatada huuphiyaa qanxxiyoogaa tamaarada, tau koshshiyaabaa kunttanau huuphe keettaa dooyaas. Nuuni asay Geeshsha Maxaafaa tamaaranaadan shoobbin daroti ufayttidi siyidosona. Guyyeppe, taani he heeraa asay haasayiyo qaalaa goꞌettiya mati eqqida gubaaꞌiyaa baas. Taani kumetta wodiyaa haggaaziyoogaa doommoosappe tammu laytta gidiis. Asay ba qaalan mishiraachuwaa tamaaranaadan maaddiyoogaa keenaa tana ufayssana danddayiya hara oosoy baa.”

13. Yelagatettaa wodee Yihoowau loyttidi haggaazanau loꞌꞌo wode gididoy aybissee?

¹³ Yelagatettan Yihoowau haggaaziyoogan ufayttite. (Eranchchaa 12:1 nabbaba.) Neeni guyyeppe Yihoowayyo haggaazanau kasetada loꞌꞌo oosuwaa oyqqana bessees gaada qoppana koshshenna. Yelagatettaa wodee Yihoowau loyttidi haggaaziyoogaa doommanau loꞌꞌo wode. Daro yelagatussi so asaara gayttida aawatettay keehi darenna; qassi deexobaa oottanau etau payyatettaynne wolqqay deꞌees. Neeni yelagatettan Yihoowau ay oottanau koyay? Neeni aqinye gidanau qoppana danddayaasa. Kare biittaa qaalaa haasayiyaageeta maaddanau koyana danddayaasa. Woy qassi ne gubaaꞌiyan kaseegaappe loytta haggaaziyo ogeta akeekana danddayaasa. Neeni Xoossau haggaazanau halchidobay ayba gidikkonne, deꞌuwau koshshiyaabaa kunttanau oottana bessees. Neeni ay keenaa loohana koshshii? Neeni ay dooranee?

LOꞌꞌOBAA DOORANAU GEESHSHA MAXAAFAA MAARAA KAALLIYOOGAA

14. Issi uri sinttanaa deꞌuwaabaa halchiyo wode naagettana bessiyaabay aybee?

¹⁴ Nuuni beꞌido Geeshsha Maxaafaa maarati heezzati oosuwaara gayttidaagan neeni ay kuuyanaakko maaddana danddayoosona. Tamaare keettan zoriyaa immiyaageeti heeran demmana danddayiyo oosuwaabaa eriyoogee qoncce. Woy qassi neeni deꞌiyo heeran woy haggaazanau baana koyiyo heeran ayba ooso demmana danddayiyaakko neessi yootana danddayiya kawo ooso keettay deꞌennan waayi aggana. Neeni hegaa mala sohuwaappe demmiyoobay maaddana danddayikkonne naagetta. Yihoowa siiqenna asay neeni alamiyaa siiqanaadan oottanau malana danddayees. (1 Yoh. 2:15-17) Neeni alamiyan deꞌiyaabaa qoppiyo wode, ne wozanay nena sohuwaara cimmana danddayees.—Leemiso 14:15 nabbaba; Erm. 17:9.

15, 16. Oosuwaara gayttidaagan neeyyo loꞌꞌo zoriyaa immana danddayiyay oonee?

¹⁵ Neeni oottana danddayiyo dumma dumma oosuwaa era simmada, loꞌꞌo zoriyaa oychana koshshees. (Lee. 1:5) Neeni Geeshsha Maxaafaa maaraa kaallada oosuwaa doorana mala nena maaddana danddayiyay oonee? Yihoowakka nenakka siiqiya, qassi nebaanne ne hanotaabaa loyttidi eriya asay yootiyoobaa siya. Eti neeni oottana danddayiyoobaanne oottanau koyiyoobaa yigga xeellanaadan maaddana. Eti yootiyoobay neeni ne halchuwaabaa wotta yeggada qoppanaadan maaddana danddayees. Ne aawaynne ne aayyiyaa Yihoowa siiqiyaageeta gidikko, hegee gita anjjo! Ne gubaaꞌe cimatikka ayyaanaaban nena kaalettana danddayiyaageeta. Hegaa bollikka, aqinyetinne woradaa xomoosiyaageeti kumetta wodiyaa haggaazanau dooridoy aybissakko eta oycha. Eti aqinye gididi haggaaziyoogaa waatidi doommidonaa, qassi banttau koshshiyaabaa waati kunttiyoonaa? Haggaaziyoogan ayba anjjo demmidonaa?—Lee. 15:22.

¹⁶ Nena loyttidi eriya uri akeekan zorana danddayees. Leemisuwau, neeni timirtte keettan minna tamaaranau koyenna gishshau naaꞌꞌantto xekka timirttiyaa aggada aqinye gidanau koyikko shin? Nena dosiya uri ne qofaa akeekana danddayees. Yaatiyo gishshau, neeni minnada tamaariyoogee hidootaa qanxxennaadan maaddiyoogaa eranaadan i maaddana danddayees. Neeni Yihoowau merinau haggaazanau koyikko, he eeshshay keehi koshshiyaaba.—Maz. 141:5; Lee. 6:6-10.

17. Nuuni ay mala dooro doorennaadan naagettana koshshii?

¹⁷ Yihoowau haggaaziya ubbaa ayyaanaaban qohiyaabay, hegeekka eta Yihoowappe haassana danddayiyaabay gakkees. (1 Qor. 15:33; Qol. 2:8) SHin, issi issi oosoy haraappe aaruwan ayyaanaaban qohana danddayees. Intte heeran issoti issoti doorido oosoy eti ‘bantta ammanuwaa bashshanaadan’ oottidee? (1 Xim. 1:19) Xoossaara deꞌiya dabbotaa mooriyaabaa doorennaadan naagettiyoogee loꞌꞌoba.—Lee. 22:3.

YELAGA KIRISTTAANE GIDIYOOGAN UFAYTTA

18, 19. Issi uri aqinye gidanau halchana xayikko, ay oottana koshshii?

¹⁸ Neeni Yihoowau haggaazanau wozanappe koyikko, neeni oottanaadan i shoobbiyoobaa yelagatettan deꞌaydda pola. Hagee Yihoowau ufayttada haggaazanau maaddiyaabaa kuuyiyo wode.—Maz. 148:12, 13.

¹⁹ Hara baggaara qassi, neeni Yihoowau kaseegaappe loytta haggaazanau halchana xayikko shin? Ammanuwan minnanau baaxetiyoogaa aggoppa. PHauloosi Yihoowappe anjjuwaa demmanau ay oottidaakko qonccissiis. I hagaadan giis: “Intteppe amaridaageetuyyo aibiininne dumma qofai de7ikko, hegaakka Xoossai intteyyo qonccissana. Gidikkokka, nuuni hanno gakkanaassi de7ido maaraadan, ane sinttau boos.” (Pili. 3:15, 16) Yihooway nena siiqiyoogaa hassaya. I zoriyoobay aybippenne aaro. Neeni yelagatettan loꞌꞌobaa dooranaadan nena i maaddana danddayees.