Siraafita Biittaa Amꞌꞌiyaa Ba Ammanuwan Anjjettaasu

ISSI hiyyeesa amꞌꞌiyaa ba mexi issi naꞌaa qoomma uttaasu. A keehippe ufayttaasu. Hegaappe guuttaa kasetada, a ba naꞌaa ahaa idimmada keehippe azzana uttaasu. Haꞌꞌi a hayquwaappe denddida ba naꞌay pashkki giyaagaa beꞌada keehippe ufayttaasu. I son deꞌiya imattay iyyo, “Be7a, ne na7ai paxiis” yaagiis.

Hegee 3,000 gidiya layttappe kase hanidaba. He taarikee 1 Kawotu Maxaafaa shemppo 17n deꞌees. Maccaasee son deꞌiya imattay Xoossay kiittin hananabaa yootiya Eelaasa. Maccaasiyaa shin oonee? A Siraafita kataman deꞌiya sunttay odettibeenna amꞌꞌiyo. I naꞌay hayquwaappe denddidoogee i ammanoy keehippe minnanaadan oottidabatuppe issuwaa. Nuuni i hanotaa qoppiyo wode, keehi loꞌꞌobaa tamaaroos.

EELAASI AMMANIYA AMꞌꞌIYO DEMMIIS

Iita gidida Israaꞌeela kawuwaa Akaaba wode, Yihooway daro wodiyau gamꞌꞌiya koshaa yeddanau qofaa qachiis. Eelaasi koshay denddanaagaa yooti simmin, Xoossay a Akaabappe qottidi, maalaalissiya ogiyan qooraaseti au oyttaanne ashuwaa ehaanaadan oottiis. Yihooway he wode Eelaasa, “Ha sohuwaappe denddada, Sidoona matan de7iya Siraafiti ba; baada yan de7ashsha. Issi am77e maccaasiyaa nena qumaa mizanaadan taani azazaas” yaagiis.—1 Kaw. 17:1-9.

Eelaasi Siraafita gakkiyo wode, issi hiyyeesa amꞌꞌiyaa mittaa mixiyaaro demmiis. Eelaasa qumaa mizanaara ha maccaasiishsha? A ba huuphe keehippe hiyyeesa gidaydda waatada hegaadan oottana danddayay? Eelaasi hegaadan qoppennan aggenna, shin maccaasiyo haasayissiyoogaa doommiis. I, “Hayyanaa, tau uyanau haatta bulen ekka yarkkii” yaagiis. A haattaa ehanau biishin Eelaasi, “Hayyanaa guutta baso oittakka ekkada yarkkii” yaagiis. (1 Kaw. 17:10, 11) Amꞌꞌiyaa he imattau immiyo haatti xayenna, shin oyttaa immanaagee keehi metiyaaba.

A hagaadan gaasu: “[“Yihooway,” NW] ne Xoossai ero! Taayyo oitti baawa. Taayyo otuwan issi kuuchcha xiilleenne xaaruwan qii zaite xalaalai de7ees. Taani hagaa yiidoogee guutta mitta mixada, soo simmada, hinnokka taayyoonne ta na7aayyo issitoo uukkanaassanne miidi haiqqanaassa.” (1 Kaw. 17:12) Eta haasayay ay qonccissiyaakko ane qoppoos.

Amꞌꞌiyaa Eelaasi Xoossaa yayyiya Israaꞌeela asa gidiyoogaa eraasu. A, ‘Yihooway ne Xoossay ero’ giidoogaappe hegaa akeekana danddayoos. A Israaꞌeela Xoossaabaa amaridabaa eriyaaba milatausu, shin Yihoowabaa yootiyo wode “ta Xoossaa” gabeykku. A Sidoona matan deꞌiya Siraafita kataman deꞌausu. Siraafiti Baalau goynniya asay deꞌiyoosa milatees. Gidikkokka, Yihooway ha amꞌꞌee wozanan issi dummatiyaabaa beꞌiis.

Ha hiyyeesa amꞌꞌiyaa eeqau goynniya asaa giddon deꞌiyaaba gidikkokka, ammanoy deꞌiyo asa gidiyoogaa bessaasu. Yihooway Eelaasa ikko kiittidoy akka Eelaasikka goꞌettanaadaana. Hegaappe nuuni loꞌꞌobaa tamaarana danddayoos.

Baalau goynniya Siraafitan deꞌiya asay ubbay keehi iita gidenna. Yihooway Eelaasa ha amꞌꞌeekko kiittidi, baayyo goynnennaageeta gidikkokka, loꞌꞌobaa oottanau koyiyaageeta akeekiyoogaa bessiis. Xoossay, “dere ubban baassi yayyiyaagaanne xillo ooso oottiyaagaa [galatiyoogee]” qoncce.—Oos. 10:35.

Siraafita amꞌꞌee mala gidida ay keena asay intte moottan deꞌii? Eta yuushuwan deꞌiya asay worddo haymaanootiyaa kaalliyaaba gidikkokka, eti hegaappe loꞌꞌobaa koyiyaageeta gidana danddayoosona. Eti Yihoowabaa aynne erennan aggana woy guuttabaa erana danddayoosona; yaatiyo gishshau, eti tumu goynuwaa goynnanaadan maaddana koshshees. Intte hegaa mala asata koyiiddinne maaddiiddi deꞌeetii?

‘KASETADA TAAYYO GUUTTA KOMPPUWAA KOMPPA’

Eelaasi amꞌꞌe maccaasiyaa ay oottanaadan oychidaakko akeekan qoppite. A bau deꞌiya guutta kattaa issitoo xalla kattin anne i naꞌay miidi hayqqanaagaa yootaasu. SHin Eelaasi woygidee? “Yayyoppa; baada neeni giidoogaadan ootta. SHin kasetada ne xiilliyaappe guutta komppuwaa komppada taayyo ekka ya; hegaappe simmada neeyyoonne ne na7aayyo komppa. Aissi giikko, GODAI Israa7eela Xoossai, ‘Sa7aa bollan GODAI iraa bukissana gakkanaashin, xiillee otuwaappe wurenna; zaiteekka xaaruwaappe coroshettenna’ yaagees” yaagiis.—1 Kaw. 17:11-14.

Issoti issoti, ‘Qilliiccayiyye, tau deꞌiya qumay hegaa xalla shin akka imma baya gay?’ gaana danddayoosona. SHin he amꞌꞌiyaa hegaadan gabeyikku. A Yihoowabaa eriyoobay guutta gidikkokka, Eelaasi giidobaa ammanada, i oychidobaa oottaasu. Hegee ammanuwaa keehi paacciyaaba gidikkokka, a ba aadhida eraa bessiyaabaa oottaasu.

He hiyyeesa amꞌꞌiyo Xoossay aggi bayibeenna. Eelaasi giidoogaadan, Yihooway koshaa wodee wurana gakkanaashin Eelaasi, amꞌꞌiyaanne i naꞌay maanaadan, iyyo deꞌiya guutta kattaa darissiis. Tumakka, “GODAI Eelaasa baggaara yootido qaalaa naagidi, otuwaappe xiillee wuribeennanne xaaruwaappe zaiteekka coroshettibeenna.” (1 Kaw. 17:16; 18:1) He maccaasiyaa Eelaasi giidobaa oottabeennaba gidiyaakko, a he wode uukkana xiilleenne zaytee issitoo xallau kattin wuri aggana. A bau ammanoy deꞌiyoogaa bessaasu; Yihoowan ammanettaasu; qassi kasetada Eelaasau miyoobaa immaasu.

Xoossay banttau ammanoy deꞌiyoogaa bessiyaageeta anjjiyoogaa hegaappe tamaarana danddayoos. Intte suuretettaa paacciyaabay gakkiyo wode ammanoy deꞌiyoogeeta gidiyoogaa bessikko, Yihooway inttena maaddana. Intte he paaciyan genccanaadan maaddidi, i intteyyo koshshiyaabaa kunttiyaagaa, inttena naagiyaagaanne intte dabbo gidana.—Kes. 3:13-15.

Ha amꞌꞌee taarikiyaappe tamaariyoobaa 1898n kiyida Xiyoone Wochiyo Keelay hagaadan qonccissiis: “Ha maccaaseessi azazettanaadan oottiya ammanoy deꞌiyaaba gidikko, hananabaa yootiyaagaa baggaara Goday o maaddana; a ammanoy deꞌiyooro gidana xayikko, hegaadan oottiya hara amꞌꞌiyaa deꞌana danddayausu. Nu hanotaa xeelliyaagankka, Goday nu deꞌuwan dumma dumma ogiyan nu ammanoy paacettanaadan oottana danddayees. Nuuni ammanoy deꞌiyoogeeta gidikko anjjuwaa demmana; hegee xayikko, he anjjuwaa demmokko.”

Nuna paacee gakkiyo wode, Geeshsha Maxaafaappenne Geeshsha Maxaafaa qofaa oyqqida xuufetuppe Xoossaa kaaletuwaa koyana bessees. Yaatidi, oosuwan peeshshanau deexxiyaaba gidikkokka, Yihooway immiyo kaaletuwaadan oottana koshshees. Nuuni, “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana” yaagiya aadhida eratetta zoriyaa oosuwan peeshshiyaaba gidikko, tumuppe anjjuwaa demmana.—Lee. 3:5, 6.

‘NEENI TA NAꞌAA WORANAU YAADII?’

He amꞌꞌee ammanuwaa paacciya harabaykka o gakkiis. Geeshsha Maxaafay, “Guutta wodiyaappe guyyiyan he keettaa godee na7ai harggiis; harggee goobi goobidi bin, wurssettan na7ai shemppuwaa teqettidi haiqqiis” yaagees. Keehippe azzanida ha maccaasiyaa hagaa mala metoy o gakkido gaasuwaa eranau Eelaasa, “Xoossaa asoo, neeni tana morkkiyoobi aibiinee? Neeni ta nagaraa hassayissada ta na7aa woranau yaadii?” yaagaasu. (1 Kaw. 17:17, 18) A yiillotada hegaadan giidoy aybissee?

A kase oottido, i zoriya wozanaa qumꞌꞌiya nagaraa hassayada hegaadan gaadeeshsha? A ba naꞌay hayqqidoy Xoossay qaxxayiina, qassi Eelaasi naꞌaa woranau Xoossay kiittin yiidaagaa gaada qoppadeeshsha? Geeshsha Maxaafay hegaa xeelliyaagan aybanne yootenna, shin issibay qoncce: He amꞌꞌiyaa iitaban aybiininne Xoossaa amaassalabeykku.

Eelaasi, he amꞌꞌee naꞌay hayqqidoogaaninne maccaasiyaa bana keehippe kayyoyiyaabay gakkidoy i yiido gishshataassa ga qoppidoogan dagammennan aggenna. I naꞌaa ahaa pooqiyaa pude efiidi, “Abeet GODAU, ta Xoossau, qassi ha taani de7iyo mishiree am77ee na7aa worada, i bollakka meto ehai?” yaagidi waassiis. Eelaasi ha keha maccaasiyaa tuggatanaadan Xoossay paqqadikko, Xoossaa sunttay borettin siyanau koyibeenna. Yaatiyo gishshau, Eelaasi, “Abeet GODAU, ta Xoossau, ha na7aa shemppuwaa zaara” yaagidi woossiis.—1 Kaw. 17:20, 21.

“BE7A, NE NA7AI PAXIIS”

Yihooway a woosaa siyiis. He amꞌꞌiyaa Xoossay kiittin hananabaa yootiyaagau miyoobaa immaasu, qassi ammanoy deꞌiyooro gidiyoogaa bessaasu. Xoossay naꞌay hayquwaappe denddanaagaanne hegee sinttappe yaana yeletau hidootay deꞌanaadan oottanaagaa eriyo gishshau, i hayqqanaadan paqqadidaba milatees; hegee hayqqida uri denddidoogaa yootiya Geeshsha Maxaafan xaafettida koyro taarike. Eelaasi woossin Yihooway naꞌay paxanaadan oottiis. Eelaasi, “Be7a, ne na7ai paxiis” yaagin amꞌꞌiyaa ayba ufayttidaakko qoppite! Yaatin amꞌꞌiyaa Eelaasau, “Neeni Xoossaa asa gididoogaanne ne doonaappe odettiya GODAA qaalai tuma gididoogaa taani ha77i eraas” yaagaasu.—1 Kaw. 17:22-24.

Koyro Kawotu maxaafaa shemppo 17y ha maccaaseebaa harabaa yootenna. Gidikkokka, Yesuusi he maccaasiyo xeelliyaagan loꞌꞌobaa yootido gishshau, a Yihoowayyo ammanettida ashkkara gidada deꞌennan aggukku. (Luq. 4:25, 26) Xoossay ba ashkkaratuyyo loꞌꞌobaa oottiyaageeta anjjiyoogaa i taarikiyaappe tamaaroos. (Maa. 25:34-40) Xoossay ammanettidaageetuyyo iita wodiyankka koshshiyaabaa kunttiyoogaa he taarikee qonccissees. (Maa. 6:25-34) Qassi Yihooway hayqqidaageeta denttanau koyiyoogaanne denttana danddayiyoogaakka bessees. (Oos. 24:15) Ha allaalleti Siraafita amꞌꞌiyo hassayanaadan oottiya loꞌꞌo gaaso.