Xoossay Neeyyo Ay Oottidee?

Hagee daro asay eriyoonne yootiyo, Geeshsha Maxaafaa xiqisetuppe issuwaa. Ha xiqisee “asaa naati Xoossaara dabbotiyoogaa, qassi eti atotettaa waati demmanaakko qanttan xaaxi waaxi qonccissiya qofa” geetettiis. Hegaappe denddidaagan, issi issi biittan ha xiqisiyaa qofay woy ha xiqisee (Yohaannisa 3:16) asay shiiqiyoosan, kaame giddon, godaa bollinne hegaa mala sohuwan xaafettees.

Ha xiqisiyaa hegaadan xaafiya ubbay, Xoossay siiqiyo gishshau merinaa deꞌuwaa demmana giidi qoppees. Neeni shin? Xoossaa siiquwaa xeelliyaagan neeyyo aybi siyettii? Xoossay nena siiqiyoogaa bessanau ay oottidaakko eray?

‘XOOSSAY HA SAꞌAA KEEHI SIIQIIS’

Xoossay saluwaanne saꞌaa, asaanne harabaa medhido gishshau daro asay a galatees. Paxa deꞌiya qeeribati merettido hanotay muttumurettidaagaa; qassi eti maaran mankkan merettidosona; hegaa gishshau, eta medhida aadhida eratettay deꞌiyo uri deꞌana bessees. Xoossay deꞌuwaa immido gishshau daro asay ubba galla a galatees. Eti deꞌuwan deꞌanaunne bantta oottiyooban ufayttanau carkkuwaa, haattaa, qumaanne harabaa gujjin, deꞌuwau koshshiyaabaa ubbaa immiyay Xoossaa gidiyoogaakka akeekoosona.

He ubbabau nuuni Xoossaa galatana bessees; aybissi giikko, i nuna Medhidaagaanne nuussi koshshiyaabaa Kunttiyaagaa. (Mazamure 104:10-28; 145:15, 16; Oosuwaa 4:24) Nuussi deꞌuwau koshshiya ubbabaa Xoossay immiyoogaa qoppiyo wode, i nuna ay keena siiqiyaakko akeekana danddayoos. Kiitettida PHauloosi, “[Xoossay] de7uwaa shemppuwaanne ubbabaa asa ubbaassi immees. . . . Nuuni aani paxa de7oosinne de7idi qaaxettoos” yaagidi hegaa qonccissiis.—Oosuwaa 17:25, 28.

SHin Xoossaa siiqoy qonccidoy i nuussi koshshiyaabaa kunttiyoobaa xallaana gidenna. Nuuni ayyaanaabaa saamettanaadaaninne hegaa alanaadan maaddiyoogankka i nuna hara meretatuppe bonchiis. (Maatiyoosa 5:3) Hegaappe denddidaagan, azazettiya asaa naati Xoossaa keettaa asa woykko a ‘naata’ gidiyo maataa demmana danddayoosona.—Roome 8:19-21.

Yohaannisa 3:16y, Naꞌay Yesuusi ba Aawaabaanne ba Xoossaabaa tamaarissanaadan, qassi nu gishshau hayqqanaadan saꞌau kiittiyoogankka Xoossay ba siiquwaa qonccissidoogaa yootees. SHin daroti Yesuusi asaa naatu gishshau hayqqana koshshidoy aybissakko, qassi a hayqoy nuna Xoossay siiqiyoogaa waati qonccissiyaakko akeekokkona. Yesuusi aybissi hayqqidaakko, qassi hegee nuna waatidi maaddiyaakko Geeshsha Maxaafay yootiyoobaa ane beꞌoos.

“BA MEXI ISSI NA7AA IMMIIS”

Sahuwaappenne cimatettaappe denddidaagan ubba asaykka hayqqees. SHin hagee Xoossay asaa naatuyyo koyro halchidoba gidenna. I koyro asati gannate saꞌan merinau deꞌanaadan koyiis. SHin eti merinau deꞌanau koyikko, au azazettana bessiyoogaakka yootiis. Eti au azazettana xayikko hayqqanaagaa Xoossay yootiis. (Doomettaabaa 2:17) Koyro bitanee Xoossaa maataa bolli makkaliis; hegee a bollinne a zaretu bolli hayquwaa kaalettiis. Kiitettida PHauloosi, “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagiis.—Roome 5:12.

Gidikkokka, “GODAI xillobaa dosees.” (Mazamure 37:28) I koyro bitanee eriiddi nagaraa oottidobaa sheneho gibeennaba gidikkokka, issi uri azazettibeennaagaappe denddidaagan ubba asay merinau tuggatanaadaaninne hayqqanaadan pirddibeenna. Hegaappe dumma ogiyan, i “shemppoi haiqqikko shemppo” yaagiya maaraa kaallidi suure pirddaa pirddiyoogan, azazettiya asaa naati merinaa deꞌuwaa demmanaadan hanotaa giigissiis. (Kessaabaa 21:23) Yaatin, Addaame bashshido polo deꞌuwaa waatidi zaarettidi demmana danddayettii? Issi uri Addaameegaara lagge gidida deꞌuwaa yarshshana bessees; qassi hegee polo asa deꞌo gidana bessees.

Addaame zaretuppe ooninne hegaa mala yarshshuwaa yarshshana danddayennaagee tuma; shin Yesuusi danddayees. (Mazamure 49:6-9) Yesuusi nagaraa laattibeenna gishshau, Addaameegaadan polo asa. Hegaa gishshau, ba shemppuwaa aatti immiyoogan asaa naata nagaraa aylletettaappe woziis. Yaatiyoogan, asaa naati Addaameenne Hewaana kase deꞌidoogaadan polo gididi deꞌana danddayiyo hanotaa Yesuusi giigissiis. (Roome 3:23, 24; 6:23) Yaatin, kehatettan giigissido ha giigissuwaappe goꞌettanau nuuni oottana bessiyaabay deꞌii?

“XOOSSAA NA7AA AMMANIYA UBBAI”

Yohaannisa 3:16n, “Xoossaa Na7aa ammaniya ubbai merinaa de7uwaa ekkanaappe attin, xayenna mala” yaagiya qofay deꞌees. Hegee issi uri merinaa deꞌuwaa demmanau oottana koshshiyaabay deꞌiyoogaa bessiyaaba. ‘Merinaa deꞌuwaa ekkanau’ koyikko, nuuni Yesuusa ammanana, qassi au azazettana bessees.

Neeni, ‘Azazettanaadan ooni oychidee? Yesuusi “Xoossaa Na7aa ammaniya ubbai” merinaa deꞌuwaa ekkanaagaa yootibeennee?’ yaagada qoppana danddayaasa. Ee, ammaniyoogee bessiyaaba. SHin Geeshsha Maxaafay Yesuusa ammaniyoogaa xallay gidees geenna. Xoossan nashettanau koyiya uri Yesuusi Ashshiyaagaa gidiyoogaa eriyoogaappe aadhiyaabaa oottana bessees. Ammaniya uri Yesuusi tamaarissidobaa oosuwan peeshshanau wozanappe baaxetana koshshees. Oosoy baynna ammanoy mela. Geeshsha Maxaafay, “Oosoi shaahettido ammanoi haiqqidaagaa” yaagees. (Yaaqooba 2:26) Hegaa giyoogee, ammaniya uri Yesuusa ammaniyoogaa oosuwan bessana koshshees; woykko i ba ammaniyoogaadan deꞌana bessees giyoogaa.

PHauloosi hagaadan giidi nuuni oottana koshshiyaabaa qonccissiis: “Kiristtoosa siiqoi nuna godatees; aissi giikko, issi asi [Yesuusi] asa ubbaayyo haiqqidoogaa nuuni akeekida; . . . Paxa de7iyaageeti bantta gishshau haiqqidaagaayyoonne qassi haiquwaappe denddidaagaayyo de7anaappe attin, sinttappe bantta huupheyyo de7enna mala, i asa ubbaa gishshau haiqqiis.” (2 Qoronttoosa 5:14, 15) Yesuusa yarshuwaa wozanappe nashshiyoogee nuuni nu xallaa siiqiyoogaa bessiya ogiyan deꞌiyoogaa aggidi, nu gishshau hayqqida Yesuusau deꞌanaadan nuna denttettana bessees. Hegee nu deꞌuwan Yesuusi tamaarissidobaa oosuwan peeshshiyoogaa kaseyana bessees giyoogaa. Hegee nu xeelaara, oottanau dooriyoobaaranne hara ubbabaara gayttidaba. Yesuusa ammaniyoogaa oosuwan bessiyaageeti ay woyto demmanee?

“MERINAA DE7UWAA EKKANAAPPE ATTIN, XAYENNA MALA”

Yohaannisa 3:16 wurssettan deꞌiya qofay, Yesuusa wozuwan ammaniyoogaa oosuwan bessiyaanne Yihooway kessido maaraara maayettiya ogiyan deꞌiya asatuyyo Xoossay qaalaa gelidobaa qonccissees. Xoossay hegaa mala asati ‘merinaa deꞌuwaa ekkanaadaanappe attin xayanaadan koyenna.’ SHin Xoossaa siiquwan deꞌiya asatuyyo naaꞌꞌu hidootay deꞌees.

Amaridaageeti saluwan deꞌanaagaa Yesuusi etau yootiis. Ammanettida erissiyo ashkkarati aara bonchuwan haaranaadan etau sohuwaa giigissanaagaa Yesuusi etau qoncciyan yootiis. (Yohaannisa 14:2, 3; Piliphphisiyuusa 3:20, 21) Saluwan deꞌanau hayquwaappe denddiyaageeti “Xoossaassinne Kiristtoosassi qeeseta gidana; eti aara issippe sha7u laittau haarana.”—Ajjuutaa 20:6.

Kiristtoosa kaalliyaageetuppe amaridaageetu xallay he maataa demmana. Yesuusi, “Amarida dorssa wudiyau, intte Aawai ba kawotettaa inttessi immanau ufaittiyo gishshau yayyoppite” yaagiis. (Luqaasa 12:32) ‘Amarida dorssa wudiyaa’ qooday aappunee? Ajjuutaa 14:1, 4y hagaadan gees: “Hegaappe guyyiyan, taani be7aas. Be7ite, Dorssai [hayquwaappe denddida Yesuus Kiristtoosi] Xiyoone Deriyaa bolli [saluwan] eqqiis. A sunttainne a Aawaa sunttai som77uwan xaafettido, issi xeetanne oitamanne oiddu sha7u asati aara issippe de7oosona. . . . Eti Xoossaassinne Dorssaassi baira gidanau, sa7aa asa giddoppe wozettidaageeta.” Hanno gakkanau deꞌida daro biilooniyan qoodettiya asaara gatti xeelliyo wode 144,000 asati ‘amarida wude.’ Eti kawo gidanaagee odettiis; shin oona haaranee?

Yesuusi saluwaa Kawotettay haariyo wode goꞌettiya ammanettida naaꞌꞌantto citay deꞌiyoogaakka yootiis. Yohaannisa 10:16y Yesuusi kaallidi deꞌiyaagaadan yootidoogaa qonccissees: “Ha wudiyan bainna hara dorssatikka tau de7oosona. Taani etakka ehaanau bessees. Qassi eti ta qaalaa siyana; issi wudee de7ana; heemmiyaageekka issuwaa gidana.” Ha ‘dorssati’ saꞌan merinaa deꞌuwaa demmanau hidootoosona; hegee Addaameenne Hewaana koyro deꞌidoogaa mala deꞌo. Eti sinttappe saꞌan deꞌanaagaa waati erana danddayiyoo?

Gannatee saꞌay ay mala gidanaakko Geeshsha Maxaafay daro sohuwan yootees. Hegaa beꞌanau Geeshsha Maxaafaa kessada kaallidi deꞌiya xiqiseta nabbabana danddayaasa: Mazamure 37:9-11; 46:8, 9; 72:7, 8, 16; Isiyaasa 35:5, 6; 65:21-23; Maatiyoosa 5:5; Yohaannisa 5:28, 29; Ajjuutaa 21:4. Ha xiqiseti olay, koshay, harggeenne hayqoy xayanaagaa yootoosona. Qassi loꞌꞌo asati bantta keettaa keexxidi bantta gadiyaakka oottidi ufayttiiddi deꞌanaagaanne naata yelidi saruwan deꞌanaagaa yootoosona.a He hidootay nena ufayssennee? Ha hidootay mata wode polettanaagaa nuuni ammananaadan oottiya gaasoy deꞌees.

XOOSSAY NEEYYO DAROBAA OOTTIIS

Xoossay neeyyoonne asaa naatu ubbaayyo giigissidobaa qoppiyaaba gidikko, i keehi darobaa oottidoogaa akeekaasa. I nuuyyo deꞌuwaa, aadhida eratettaa, payyatettaanne deꞌuwau koshshiyaabaa immiis. He ubbaappe aaruwan, Xoossay nuuyyo hayqqida Yesuus Kiristtoosa baggaara wozuwaa imotaa immiis; hegee Yohaannisa 3:16n qonccidaagaadan harabaappe aadhiya gita anjjo.

Harggee, oli, koshi, woy hayqoy baynnan sarotettaaninne ufayssan merinau deꞌiyoogee zawi baynna ufayssaunne anjjuwau gaaso gidiyoogee erettidaagaa. Neeni wozanappe koyiyaaba gidikko he anjjuwaa demmaasa. Oychana koshiya hara oyshay, ‘Neeni Xoossaayyo ay oottaydda deꞌay?’ yaagiyaagaa.