‘Yihoowa Ne Xoossaa Siiqa’
“Godaa [“Yihoowa,” NW] ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa.”—MAA. 22:37.
1. Xoossaynne a Naꞌay issoy issuwaa keehi siiqiyoy aybissee?
YIHOOWA Naꞌay Yesuus Kiristtoosi, ‘Taani Aawaa siiqays’ yaagiis. (Yoh. 14:31) Yesuusi gujjidikka, “Aawai ba Na7aa siiqees” yaagiis. (Yoh. 5:20) Hegee garamissiyaaba gidenna. Aybissi giikko, Yesuusi saꞌaa yaanaappe kase keehi daro wodiyawu Xoossaayyo “waanna oosanchcha” gididi deꞌiis. (Lee. 8:30) Yesuusi Yihoowaara oottiyo wode, ba Aawaa eeshshaabaa darobaa tamaariis; qassi a siiqanaadan oottiya darobaa beꞌiis. Eti issippe deꞌido gishshawu, issoy issuwaa keehi siiqoosona.
2. (a) Issi ura siiqiyoogaa giyoogee woygiyoogee? (b) Nuuni tobbana oyshati awugeetee?
2 Issi ura siiqiyo wode, a wozanappe dosoos. Daawiti, “Abeet GODAU, ta wolqqau, taani nena siiqais” yaagidi yexxiis. (Maz. 18:1) Xoossay nuna siiqiyo gishshawu, nuunikka hegaadan qoppana bessees. Nuuni Yihoowayyo azazettikko, i nuna siiqana. (Zaarettido Wogaa 7:12, 13 nabbaba.) SHin nuuni Xoossaa beꞌana danddayenna gishshawu, a waati siiqana danddayiyoo? Yihoowa siiqiyoogaa giyoogee woygiyoogee? Nuuni a siiqana koshshiyoy aybissee? Nuuni Xoossaa siiqiyoogaa waati bessana danddayiyoo?
XOOSSAA SIIQANA DANDDAYOOS
3, 4. Nuuni Xoossaa siiqiyoy aybissee?
3 “Xoossai ayyaana” gidiyo gishshawu, nuuni a beꞌana danddayokko. (Yoh. 4:24) Gidoppe attin, Yihoowa siiqana danddayoos; qassi Geeshsha Maxaafay nuuni hegaadan oottanaadan yootees. Leemisuwawu, Muusee Israaꞌeelata, “Neeni GODAA ne Xoossaa ne kumetta wozanaappe, ne kumetta shemppuwaappenne ne kumetta wolqqaappe siiqa” yaagiis.—Zaa. 6:5.
4 Nuuni Xoossaa wozanappe siiqiyoy aybissee? I nuuni ayyaanaabaa koyanaadan oottidi medhido gishshataassanne siiqanaadan oottidi medhdhido gishshataassa. Ayyaanaaban koshshiyaabaa nuuni demmiyaaba gidikko, Yihoowa loytti siiqoos; qassi hegee nuuni ufayttanaadan oottees. Yesuusi, “Bantta ayyaanan hiyyeesa gididoogaa eriyaageeti anjjettidaageeta; aissi giikko, saluwaa kawotettai etassa” yaagiis. (Maa. 5:3) Morisen giyo bitanee issi maxaafan, asay ubba wode Xoossaa ammananawu koyiyoogee keehi garamissiyaaba gidiyoogaa xaafiis. Hara daro asaykka he bitanee giidoogaadan, asay meretan Xoossawu goynnana koyiyoogaa akeekees.
5. Xoossaa koyidi demmana danddayiyoogaa waati eriyoo?
5 Nuuni Xoossaa koyidi demmana danddayiyoo? Ee, i nuuni a koyidi demmanaadan minttettees. Kiitettida PHawuloosi Ateenan deꞌiya asawu yootido wode hegaa qonccissiis. He asatuppe daroti Ateeno giyo macca xoosseeyyo goynnanawu beeta maqidasiyaa baana koshshiyaabadan qoppidosona. SHin PHawuloosi “sa7aanne sa7an de7iya ubbabaa medhdhida” tumu Xoossaa eti koyidi demmana danddayiyoogaa yootiis. I Xoossay beeta maqidasiyan deꞌennaagaakka qonccissiis. Asay awan deꞌiyaaba gidikkokka, Xoossaa koyidi demmana danddayees. I gujjidikka, “Xoossai nuuppe ooyyoonne haaho gidenna” yaagiis. (Oos. 17:24-27) Ee, asay Xoossaa koyidi demmana danddayees. Laappun miiloonenne baggaappe dariya Yihoowa Markkati Xoossaa demmidosona; qassi eti a wozanappe siiqoosona.
XOOSSAA SIIQIYOOGAA GIYOOGEE WOYGIYOOGEE?
6. Yesuusi, “ubbaappe gitatiya azazonne qassi ubbaappe aadhdhiya azazo” giidobay aybee?
6 Nuuni wozanappe koyidi Yihoowa siiqana koshshees. Issi Parisaawee, “Tamaarissiyaagoo, higgiyaa giddon ubbaappe aadhdhiya azazoi augee?” yaagidi oychido wode Yesuusi hegaa kaallidi deꞌiyaagaadan qonccissiis: “‘Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa’ yaagiis. Hegee ubbaappe gitatiya azazonne qassi ubbaappe aadhdhiya azazo.”—Maa. 22:34-38.
7. (a) Nu “kumetta wozanaappe,” (b) nu “kumetta shemppuwaappe,” qassi (c) nu “kumetta qofaappe” Xoossaa siiqiyoogaa giyoogee woygiyoogee?
7 Nuuni Xoossaa nu “kumetta wozanaappe” siiqanaadan Yesuusi yootido wode gaana koyidobay aybee? I nuuni wozanappe koyidi, qassi qoppidi Yihoowa siiqana bessees gaanawu koyiis. Qassi nu “kumetta shemppuwaappe” woykko nu kumetta hanotan a siiqana bessees. Hegaa bollikka, nuuni Xoossaa “kumetta qofaappe” woykko qoppiyo ubbaban siiqana koshshees. Yaatiyo gishshawu, nuuni Yihoowa kumetta hanotaaninne nuussi deꞌiya ubbaban siiqana bessiyoogaa Yesuusi mintti yootiis.
8. Xoossaa loytti siiqiyoogee nuuni ay oottanaadan denttettii?
8 Nuuni Xoossaa kumetta wozanaappe, shemppuwaappenne qofaappe siiqiyaaba gidikko, a Qaalaa minnidi xannaꞌiyaageeta, i koyiyoobaa wozanappe oottiyaageeta, qassi Kawotettaa mishiraachuwaa mishettidi yootiyaageeta gidoos. (Maa. 24:14; Roo. 12:1, 2) Nuuni Yihoowa tumuppe siiqiyo wode akko kaseegaappe aaruwan shiiqoos. (Yaaq. 4:8) Nuuni Xoossaa siiqana koshshiyo ubba gaasuwaa qonccissana danddayennaagee tuma. SHin hegeetuppe amaridaageeta ane beꞌoos.
NUUNI YIHOOWA SIIQANA KOSHSHIYOY AYBISSEE?
9. Neeni Yihoowa siiqiyoy aybissee?
9 Yihooway nuna Medhidaagaanne nuuyyo koshshiyaabaa Immiyaagaa. PHawuloosi, “Nuuni aani paxa de7oosinne de7idi qaaxettoos” yaagiis. (Oos. 17:28) Yihooway ha loꞌꞌiya saꞌaa nuuni deꞌanaadan immiis. (Maz. 115:16) I nuussi deꞌuwawu koshshiya qumaanne harabaakka immees. Hegaa gishshawu, PHawuloosi Lisxxira kataman deꞌiya, eeqawu goynniya asawu, “De7o [Xoossay] . . . intteyyo iraa saluwaappe bukissees; kattaakka i wodiyan immees; qassi qumaa immidi, inttena daro ufaissees; yaatidi intteyyo lo77obaa oottiiddi, ubba wodekka bau markka xayibeenna” yaagidi yootiis. (Oos. 14:15-17) Yihooway nuuyyo koshshiya ubbabaa siiquwan immees. Hegee Medhidaagaa nuuni siiqanaadan oottiyaaba.—Era. 12:1.
10. Wozuwaa xeelliyaagan neeyyo aybi siyettii?
10 Nuuni Addaameppe laattido nagaraanne hayquwaa Xoossay xayssana. (Roo. 5:12) “Nuuni biron nagaranchcha gididi de7ishin, Kiristtoosi nu gishshau haiqqiis; hegee Xoossai nuna ai keenaa siiqiyaakkonne a siiquwaa erissees.” (Roo. 5:8) Nuuni nu nagaraappe simmiyaabanne Yesuusa wozuwan ammaniyaaba gidikko, Yihooway nuuyyo atto gaana. Ba Naꞌay nu gishshawu hayqqanaadan saꞌaa kiittido gishshawu, nuuni Yihoowa wozanappe galatoos.—Yoh. 3:16.
11, 12. Yihooway nuuyyo ayba hidootaa immidee?
11 Yihooway nuuyyo merinaa deꞌuwaa immanawu qaalaa geliis. (Roo. 15:13) Xoossay qaalaa gelidobay ammanuwaa paacciyaabay gakkiyo wode genccanawu nuna maaddees. Ayyaanan tiyettidaageeti ‘hayqqana gakkanaassi ammanettikko saluwaa deꞌuwaa akiliiliyaa ekkana.’ (Ajj. 2:10) Ammanettidi deꞌiya hara asay qassi Gannate saꞌan merinawu deꞌana. (Luq. 23:43) Nu hidootaa xeelliyaagan nuuyyo aybi siyettii? Yihooway ‘loꞌꞌo imo ubbaanne kumetta woyto ubbaa’ Immiyaagaa gidiyo gishshawu, nu wozanay ufayssan, sarotettaaninne siiquwan kumennee?—Yaaq. 1:17.
12 Yihooway hayqqidaageeti denddanaagaa qaalaa geliis. (Oos. 24:15) Nuuni siiqiyo asi hayqqiyo wode keehi azzanoos; shin hayqqidaageeti denddanaagaa eriyo gishshawu, ‘hidootay baynna asatudan kayyottokko.’ (1 Tas. 4:13) Siiqiya Xoossaa Yihooway hayqqidaageeta denttanawu laamotees; ubba qassi Iyyooba mala suurenne ammanettida asata denttanawu keehi laamotees. (Iyy. 14:15) Hayqqida asay denddidi ha saꞌan bantta dabbotuura gayttiyo wode, ubbay keehi ufayttanaagaa qoppa. Maalaalissiya dendduwaa hidootaa immida, saluwan deꞌiya nu Aawaa nuuni keehi galatoos!
13. Xoossay nuuyyo qoppiyoogaa bessiyaabay aybee?
13 Yihooway nuuyyo qoppees. (Mazamure 34:6, 18, 19; 1 PHeexiroosa 5:6, 7 nabbaba.) Nuna siiqiya Xoossay banan ammanettiyaageeta ubba wode maaddanawu koyiyoogaa nuuni eriyo gishshawu, a qooruwan deꞌiya ‘wude dorssata’ gididi woppu giidi deꞌana danddayoos. (Maz. 79:13) Qassi Xoossay nuuyyo sinttappe oottanabaakka qoppa. Xoossaa Kawotettaa Kawo gidida Yesuusi danuwaa, huqqunnaanne iitabaa saꞌaappe xayssana. Hegaappe guyyiyan, Xoossay bawu azazettiya asaa naatu ubbawu sarotettaanne eti ufayttidi deꞌanawu koshshiya ubbabaa immana. (Maz. 72:7, 12-14, 16) Xoossay qaalaa gelido ha allaalleta qoppiyo wode, nuuni nu Xoossaa kumetta wozanaappe, shemppuwaappe, wolqqaappenne qofaappe siiqanawu koyiyoogee attenna.—Luq. 10:27.
14. Yihooway nuuyyo ayba gita maataa immidee?
14 Yihooway nuuni ayyo Markka gidana mala gita maataa immiis. (Isi. 43:10-12) Nuuni a Kawotettawu oottanaadaaninne i ehaanawu qaalaa gelidobaa metoy gakkiyo ubbawu yootiyo maataa immido gishshawu, Xoossaa siiqoos. Qassi nuuni yootiyo mishiraachoy tumu Xoossaa Qaalan deꞌiyaabaa gidiyo gishshawu, ammanettidi aynne sirennan yootana danddayoos; i qaalaa gelidobay polettennan mule attenna. (Yaasa 21:45; 23:14 nabbaba.) Hegaa gishshawu, nuuni Yihoowa siiqanaadan oottiya keehi daro gaasoy deꞌees. SHin nuuni a siiqiyoogaa waati bessana danddayiyoo?
XOOSSAA SIIQIYOOGAA WAATI BESSANA DANDDAYIYOO?
15. Xoossaa Qaalaa xannaꞌiyoogeenne oosuwan peeshshiyoogee nuna waati maaddii?
15 Xoossaa Qaalaa minnidi xannaꞌiyoogaaninne oosuwan peeshshiyoogan. Yaatiyoogee, nuuni Yihoowa siiqiyoogaanne a qaalay ‘nu gediyaassi xomppe, nu ogiyaassikka pooꞌo’ gidanaadan keehi koyiyoogaa bessees. (Maz. 119:105) Nuna metoy gakkiyo wode, siiquwan odettida kaallidi deꞌiya qofaappe minttettuwaa demmana danddayoos: “‘Nagara oottennan aggarkkinaashsha’ giya, meqqida wozanaa neeni karakka.” “Aggenna ne siiqoi tana kaafiis. Tana hirggai woriyo wode, neeni tana woppu oottada ufaissaasa.” (Maz. 51:17; 94:18, 19) Yihooway metootanchatussi qarettees; Yesuusikka aagaadan asawu qarettees. (Isi. 49:13; Maa. 15:32) Geeshsha Maxaafaa xannaꞌiyoogee Yihooway nuussi qoppiyoogaa loytti akeekanaadan maaddees; qassi hegee nuuni a loytti siiqanaadan denttettees.
16. Ubba wode woossiyoogee nuuni Xoossaa keehi siiqanaadan waati maaddii?
16 Ubba wode Xoossaakko woossiyoogan. Nuuni woossiyo wode ‘woosaa siyiyaagaakko’ kaseegaappe aaruwan shiiqoos. (Maz. 65:2) Xoossay nu woosaa siyiyoogaa akeekiyo wode, a keehi siiqoos. Leemisuwawu, nu wolqqay danddayiyoogaappe aadhiya paaciyaa paacettanaadan i koyennaagaa nuuni akeekido wodeti deꞌana danddayoosona. (1 Qor. 10:13) Nuuni unꞌꞌettido wode Yihoowakko mintti woossidi ubbaappe aadhiya ‘Xoossaa sarotettaa’ demmido wodeti deꞌana danddayoosona. (Pili. 4:6, 7) Qassi issi issitoo, Nahimiyaagaadan nu wozanan woossin Xoossay hegaa siyidoogaa akeekana danddayoos. (Nah. 2:1-6) Nuuni ‘ubba wode Xoossaa woossin’ i nuuni mintti woossidobaa zaariyoogaa akeekiyo wode, a kaseegaappe aaruwan siiqoos; qassi nu ammanoy paacettiyo wode i nuna maaddanaagaa keehi ammanettoos.—Roo. 12:12.
17. Nuuni Xoossaa siiqiyaaba gidikko, gubaaꞌe shiiquwaa waati xeelliyoo?
17 Ubba wode gubaaꞌe shiiquwaanne gita shiiquwaa shiiqiyoogan. (Ibr. 10:24, 25) Beni Israaꞌeelati Yihoowassi yayyiyoogaanne a Higgiyaa poliyoogaa tamaaranawu issippe shiiqoosona. (Zaa. 31:12) Nuuni Xoossaa wozanappe siiqiyaaba gidikko, a sheniyaa poliyoogee deexxiyaaba gidenna. (1 Yohaannisa 5:3 nabbaba.) Hegaa gishshawu, nuuni hanennaban gaasoyidi shiiquwaappe attana bessenna. Nuuni Yihoowa kase siiqiyo siiquwaa aggana bessenna.—Ajj. 2:4.
18. Xoossaa siiqiyoogee Kawotettaa mishiraachuwaara gayttidaagan nuuni ay oottanaadan denttettii?
18 ‘Wonggeliyaa tumatettaa’ haratuyyo minnidi yootiyoogan. (Gal. 2:5) Nuuni Xoossaa siiqiyoogee, Armmageedoona olan ‘tumatettaa gishshaa piriixiya’ a Naꞌay haariyo Mase Kawotettaabaa haratuyyo yootanaadan denttettees. (Maz. 45:4; Ajj. 16:14, 16) Asay Xoossaa siiquwaabaanne i ooratta alamiyaa ehaanawu gelido qaalaabaa tamaaridi, erissiyo ashkkara gidanaadan maaddiyoogee keehi ufayssiyaaba.—Maa. 28:19, 20.
19. Nuuni gubaaꞌe cimata nashshana koshshiyoy aybissee?
19 Gubaaꞌe cimata nashshiyoogan. (Oos. 20:28) Gubaaꞌe cimati ubba wode nuussi qoppiya, Yihoowa imotata. Gubaaꞌe cimati “asai huuphiyan huuphiyan carkkuwaappe geemmiyo soho, gotiyaappe baqatiyo soho gidana; mela sohuwan goggiya haattanne booddila biittan de7iya gita zaallaa kuwaa mala.” (Isi. 32:1, 2) Gotiyaappe woy wolqqaama uushuwaappe geemmiyo sohuwaa demmiyo wode keehi ufayttoos. Awaa suuluwaappe shemppiyo gita zaallaa kuwaa demmiyo wode ufayttoos. Hegaadan, cimatikka nuna ayyaanaaban minttettoosonanne maaddoosona. Nuuni sintta xeera gididi kaalettiya ishatuyyo azazettiyoogan, “imota” gidida attuma asata keehi nashshiyoogaa bessoos; qassi Xoossaanne gubaaꞌiyawu Huuphe gidida Kiristtoosa siiqiyoogaa bessoos.—Efi. 4:8; 5:23; Ibr. 13:17.
Yihooway wudiyawu wozanappe qoppiya cimata immiis (Mentto 19 xeella)
XOOSSAA LOYTTA SIIQA
20. Neeni Xoossaa siiqiyaaba gidikko, Yaaqooba 1:22-25n deꞌiya qofaa waata xeellay?
20 Neeni Yihoowayyo mata dabbo gidikko, Xoossaa Qaalaa ‘siyiyaagaa xalla gidennan aani aqiyaagaa’ gidaasa. (Yaaqooba 1:22-25 nabbaba.) Yihoowa Qaalan ‘aqiya’ asassi minnidi sabbakanaadaaninne gubaaꞌe shiiquwan ba qofaa yootanaadan denttettiya ammanoy deꞌees. Neeni Xoossaa wozanappe siiqiyo gishshawu, i nuuppe koyiyo ubbabaa qonccissiya “bali bainna higgiyaa” azazettaasa.—Maz. 19:7-11.
21. Nuuni wozanappe woossiyo woosay aybin leemisettana danddayii?
21 Xoossaa Yihoowa siiqiyoogee neeni ubbatoo akko wozanappe woossanaadan denttettees. Kawuwaa Daawiti ba woosaa beni Israaꞌeelan qeeseti galla galla Yihoowawu cuwayiyo ixaanan leemisidi hagaadan giis: “Ta woosai ixaanaa cuwaadan ne [Yihoowa] sintti shiiqo; taani ta kushiyaa micciyoogee neeyyo omarssa yarshsho mala gido.” (Maz. 141:2; Kes. 30:7, 8) Neeni ne huuphiyaa kawushshada mintta woossiyo woosaynne Xoossaa sabbanawunne galatanawu wozanappe woossiyo woosay sawuwaa tonggu giya ixaana mala woykko Xoossaa ufayssiyaagaa gidanaadan amottoos.—Ajj. 5:8.
22. Kaalliya huuphe yohuwan nuuni ay tamaaranee?
22 Nuuni Xoossaanne nu shooruwaa siiqanaadan Yesuusi yootiis. (Maa. 22:37-39) Yihoowanne a higgiyaa siiqiyaaba gidikko, hegee nuuni nu shooruwaa siiqanawu maaddees. Hegaabaa kaalliya huuphe yohuwan loytti tamaarana.