“Yihooway Baageeta Erees”

1. Xoossaa asaappe issoti issoti qoppido cimo qofaa qonccissiya Geeshsha Maxaafaa taarikiyaa yoota. (Ha huuphe yohuwaa doomettan deꞌiya misiliyaa xeella.)

ISSI gallassi maallado Qeese Ubbatu Halaqay Aarooni ixaanaa cuwayiyoobaa oyqqidi gayttiyo dunkkaaniyaa penggen eqqiis. Qassi hara baggaara, Qoraahinne 250 asatikka ixaanaa cuwayiyoobaa oyqqidi Yihoowayyo cuwayoosona. (Qoo. 16:16-18) Coo xeelliya urawu ha ubba asatikka ammanettidi Yihoowawu goynniya asa milatoosona. SHin Aaroonappe attin, harati qeese gidanawu otoruwan koyiya asata. (Qoo. 16:1-11) Eti Xoossay bantta goynuwan ufayttees gi qoppidi bantta huuphiyaa cimmidosona. SHin hegee wozanaa qoriyaanne loꞌꞌo milatiya iita asa gidida eta beꞌiya Yihoowa cayiyoogaa mala.—Erm. 17:10.

2. Muusee kasetidi ay yootidee, qassi i giidobay polettidee?

² Muusee hegaappe issi gallassaa kasetidi, “Wontto maallado GODAI ooni aagaakkonne . . . bessana” yaagiis. (Qoo. 16:5) Tamay “GODAA matappe yiidi, ixaanaa cuwayiya [Qoraahanne] naa77u xeetanne ishatamu asaa” mi bayido wode, Yihooway bawu tumuppe goynniyay oonakko, qassi tumuppe goynnennay oonakko erissiis. (Qoo. 16:35; 26:10) He wode, Yihooway Aaroona ashshiis; hegee i tumu qeesenne Xoossaayyo tumuppe goynniya asa gidiyoogaa bessiyaaba.—1 Qoronttoosa 8:3 nabbaba.

3. (a) Kiitettida PHawuloosa wode aybi hanidee? (b) Muuse wode makkalida asata Yihooway qaxxayido hanotaappe ay tamaariyoo?

³ Hegee hanoosappe 1,500 gidiya layttay aadhi simmin, kiitettida PHawuloosa wodekka hegaa malabay haniis. He wode gubaaꞌiyan deꞌiya issi issi Kiristtaaneti worddo timirttiyaa tamaarissidosona. Coo xeelliya uri kaddida he asati gubaaꞌiyan deꞌiya haratuppe dummatiyoogaa akeekennan aggana danddayees. SHin kaddida he asati ammanettida Kiristtaaneta qohiyaabaa oottidosona. Bolla baggaara dorssa milatidi garssa baggaara wanggireello mala gidida he asati “amarida ammaniya asatu ammanuwaa” bashshiyoogaa doommidosona. (2 Xim. 2:16-18) Gidoppe attin, Yihooway hegaa coꞌꞌu giidi xeellibeenna; qassi daro xeetu layttaappe kase Qoraahinne a cita gidida asati makkalido wode Xoossay he hanotaa waati giigissidaakko PHawuloosi erennan aggenna. Hegaara gayttidaagan, ane Geeshsha Maxaafan deꞌiya issi qofaa pilggidi nuuni appe tamaarana danddayiyoobaa beꞌoos.

“TAANI YIHOOWAY LAAMETTIKKE”

4. PHawuloosi ay akeekidee, qassi i hegaa mintti ammaniyoogaa Ximootiyoosayyo waati qonccissidee?

⁴ Yihooway loꞌꞌo milatiya iitatu goynuwaanne baassi azazettiyaageeta shaakki eriyoogaakka PHawuloosi akeekiis. PHawuloosi Ximootiyoosayyo ayyaanaa kaaletuwan dabddaabbiyaa xaafido wode hegaa mintti ammaniyoogaa qonccissiya qaalaa goꞌettiis. PHawuloosi kaddida asati gubaaꞌiyan deꞌiya issota issota ayyaanaaban qohiyaabaa oottiyoogaa yooti simmidi, “Gidikkokka, Xoossay baasido mino baasoy qaaxxana danddayenna. Qassi a bollan, ‘Yihooway baageeta erees’; qassi ‘Yihoowa sunttaa xeegiya ubbay iita ooso aggibayo’ yaagiya qaalati xaafettidosona” yaagidi xaafiis.—2 Xim. 2:18, 19, NW.

5, 6. PHawuloosi ‘Xoossay baasido mino baasuwaa’ giya qofaa goꞌettidoogee hanotaa loytti qonccissiyoy aybissee, qassi i giidobay Ximootiyoosa waati maaddidee?

⁵ PHawuloosi ha xiqisiyan hanotaa loytti qonccissiya qaalaa goꞌettiis. ‘Xoossay baasido mino baasuwaa’ giya qofay Geeshsha Maxaafan ha soho xallan deꞌees. Geeshsha Maxaafay “keexettiis” woykko baasettiis giya qaalaa beni Israaꞌeela katamaa Yerusalaama gujjin, dumma dummabawu leemisuwan goꞌettees. (Maz. 87:1, 2) Yihoowa halchuwan Yesuusi poliyoobaykka baasuwan leemisettiis. (1 Qor. 3:11; 1 PHe. 2:6) PHawuloosi ‘Xoossay baasido mino baasuwaabaa’ xaafiyo wode ay hassayidi xaafidee?

⁶ PHawuloosi Qoodaabaa 16:5n Muusee Qoraahanne a citata xeelliyaagan giidobaa qonccissido wode, ‘Xoossay baasido mino baasuwaabaa’ yootiis. PHawuloosi Ximootiyoosa minttettanawu Yihooway ubbabaa akeekiyoogaanne makkalanchata qaxxayiyoogaa Muusee wode hanidabaa yootidi hassayissiis. Daro wodiyaappe kase Qoraahi Yihoowa halchuwaa teqqana danddayibeennaagaadan, kaddidaageetikka a halchoy gubaaꞌiyan polettennaadan oottana danddayokkona. PHawuloosi “Xoossay baasido mino baasoy” aybakko qonccissi yootibeenna. SHin i yootidobay Ximootiyoosi Yihoowan ammanettanaadaaninne an zemppanaadan maaddidoogee qoncce.

7. Yihooway xillobaa oottiyoogaanne ammanettiyaagaa gidiyoogaa waati erana danddayiyoo?

⁷ Yihooway kessido maaray mule laamettenna. Mazamure 33:11, “GODAA halchchoi merinaassi eqqidi de7ees; a wozanaa qofaikka yeleta ubbaa gakkanau de7ees” yaagees. Hara xiqiseti qassi Yihoowa haaroy, aggenna a siiqoynne a xillotettay merinawu deꞌiyoogaa, qassi i merinawukka ammanettiyaagaa gidiyoogaa qonccissoosona. (Kes. 15:18; Maz. 106:1; 112:9; 117:2) Milkkiyaasa 3:6y (NW), “Taani Yihooway laamettikke” yaagees. Hegaadankka, Yaaqooba 1:17y, Yihooway ‘ba huuphen dummatennaagaa’ yootees.

YIHOOWAN AMMANETTANAADAN OOTTIYA ‘XAAFETTIDABAA’

8, 9. PHawuloosi ‘xaafettidabaa’ giidi leemiso hanotan yootidobaappe ay tamaariyoo?

⁸ PHawuloosi 2 Ximootiyoosa 2:19n goꞌettido leemisoy keettaa baasuwan xaafidobaa mala. Beni wode, keettaa baasuwan xaafiyoogee meeze gididaba; hegee he keettaa keexxiday oonakko woy keettaa goday oonakko qonccissiyaaba gidana danddayees. Geeshsha Maxaafaa xaafetuppe ha leemisuwaa koyro goꞌettiday PHawuloosa.a ‘Xoossay baasido mino baasuwaa’ bolli naaꞌꞌubay xaafettiis. Koyroogee, “Yihooway baageeta erees”; qassi naaꞌꞌanttoogee, “Yihoowa sunttaa xeegiya ubbay iita ooso aggibayo” yaagees. Ha qofay Qoodaabaa 16:5n (Nabbaba.) deꞌiyaabaa hassayissees.

⁹ PHawuloosi ‘xaafettidabaa’ giidi leemiso hanotan yootidobaappe ay tamaariyoo? Xoossaageeta gididaageeti Yihooway xoqqu oottidi xeelliyoobaanne a maaraa xeelliyaagan naaꞌꞌu gitabaa akeekoosona: hegeekka, (1) Yihooway baayyo ammanettiyaageeta siiqees; qassi (2) Yihooway iitabaa ixxees. Ha qofay gubaaꞌiyan denddiya kaddida asatuura gayttidaagan ay qonccissii?

10. PHawuloosa wode kaddidaageeti oottidobay ammanettida asata waati qohidee?

¹⁰ Ximootiyoosinne ammanettida hara asati kaddidaageeti gubaaꞌiyan oottiyoobaa beꞌidi hirggennan aggokkona. Issi issi Kiristtaaneti, ‘Hegaa mala asati gubaaꞌiyan deꞌanaadan coꞌꞌu giidi xeelliyoy aybissee?’ giidi oychennan aggokkona. Ammanettida asati, eti ayyo ammanettidi deꞌiyoogaanne kaddida asati ayyo worddo goynuwaa goynniyoogaa Yihooway eranddeeshsha giidi qoppennan aggokkona.—Oos. 20:29, 30.

11, 12. PHawuloosa dabddaabbee Ximootiyoosa ammanoy minnanaadan waati maaddidee?

¹¹ PHawuloosi xaafido dabddaabbee Ximootiyoosa ammanoy minnanaadan oottidoogee qoncce; i ammanettida Aarooni bonchettidoogaa, qassi loꞌꞌo milatiya Qoraahinne a citati worddo gidiyoogee qoncciyaa kiyidoogaa, eti ixettidoogaanne xayidoogaa hassayissiis. Hegaadankka, worddo Kiristtaaneti eta giddon deꞌiyaaba gidikkokka, Muuse wodeegaadan, Yihooway baageeta shaakki eriyoogaa PHawuloosi qonccissiis.

¹² Yihooway mule laamettenna; i ammanettiya Xoossa. I iitatettaa ixxees; qassi bantta nagaraappe simmennaageeta ba keerido wodiyan xayssana. Ximootiyoosi “Yihoowa sunttaa xeegiya” asaappe issuwaa gidiyo gishshawu, ikka worddo Kiristtaaneti oottiyo iitabaa ixxanaadan azazettiis.b

TUMU GOYNOY ANJJUWAA DEMISSEES

13. Nuuni ay ammanettana danddayiyoo?

¹³ Nuunikka PHawuloosi xaafidobaappe ayyaanaaban maaddiyaabaa demmana danddayoos. Yihooway nuuni ayyo ammanettidi deꞌiyoogaa akeekiyoogaa eriyoogee minttettiyaaba. SHin hegee coo akeekiyoogaa xalla gidenna. Yihooway baageetuyyo wozanappe qoppees. Geeshsha Maxaafay, “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees” yaagees. (2 Odi. 16:9) Hegaa gishshawu, nuuni “geeshsha wozanaappe” Yihoowayyo oottiyoobay mule hada attennaagaa ammanettana danddayoos.—1 Xim. 1:5; 1 Qor. 15:58.

14. Yihooway ay mala goynuwaa ixxii?

¹⁴ Qassi Yihooway loꞌꞌo milatiya iitatu goynuwaa ixxiyoogaa nuuni akeekana bessees. A ayfee “sa7aa bollan ubbasaa xeellees”; yaatiyo gishshawu, “kumetta wozanaappe” assi goynnenna uraa i erees. Leemiso 3:32y Yihooway “iitaa oottiyaageeta” ixxiyoogaa yootees; issi uri geeman nagaraa oottiiddi azazettiyaaba milatikko a ixxees. Iita uri guutta wodiyawu asaa cimmana danddayikkokka, Yihooway ubbabaa danddayiyaagaanne xillo Xoossaa gidiyo gishshawu a cimmana danddayenna. Geeshsha Maxaafay, “Ba nagaraa genttiya uri aacenna” yaagees.—Lee. 28:13; 1 Ximootiyoosa 5:24; Ibraawe 4:13 nabbaba.

15. Nuuni aybippe haakkana koshshii, qassi aybissi?

¹⁵ Yihoowa asay ubbay ayyo wozanappe goynnees gaana danddayoos. Gubaaꞌiyan cimo goynuwaa goynniya asi darotoo deꞌenna. SHin Muuse wodenne beni Kiristtaane gubaaꞌiyan hegaa mala asi deꞌidaba gidikko, ha wodiyankka deꞌana danddayees. (2 Xim. 3:1, 5) Gidoppe attin, nu ishati Yihoowayyo ammanettidi deꞌiyoogaa sirana koshshii? Aynne sirana koshshenna! Gaasoy baynnan nu ishatanne nu michota siriyoogee bala. (Roome 14:10-12; 1 Qoronttoosa 13:7 nabbaba.) Qassi nu ishati ammanettidi deꞌiyoogaa siriyoogee ayyaanaaban nuna qohees.

16. (a) Loꞌꞌo milatiya iita asa gidiyo qofi nu wozanan xaphuwaa yeddennaadan aybi maaddana danddayii? (b) “Ubbatoo ‘Inttena Qoridi Pirddite’” giya saaxiniyan deꞌiya qofaappe ay tamaarana danddayiyoo?

¹⁶ Ubba Kiristtaanee “huuphiyan huuphiyan ba oosuwaa paacco.” (Gal. 6:4) Nuuni nagaraa laattido gishshawu, Yihoowayyo goynniyoy akeekennan bala gaasuwaana gidana danddayees. (Ibr. 3:12, 13) Hegaa gishshawu, nuuni Yihoowayyo oottiyoy aybissakko issi issitoo nuna paaccana bessees. Hagaadan giidi nuna oychana danddayoos: ‘Taani Yihoowayyo goynniyoy a siiqiyo gishshataassee, qassi i tana haaranaadan koyiyo gishshataassee? Woy sinttappe Gannatiyan demmana anjjuwaa ubbabaappe xoqqu oottada xeelliyo gishshataassee?’ (Ajj. 4:11) Hegaadan nuna qoriyoogee, nuuni nu wozanan loꞌꞌo milatiya iita asa gidanaadan oottiya ayba qofinne deꞌennaadan teqqanawu maaddees.

AMMANETTIDI DEꞌIYOOGEE UFAYSSAA DEMISSEES

17, 18. Nuuni Yihoowawu wozanappe goynnana koshshiyoy aybissee?

¹⁷ Nuuni Yihoowawu wozanappe goynnanawu baaxetiyo wode daro anjjettoos. Daawiti, “GODAI a iitatettaa qoodenna asinne a qofan baletoi bainna asi anjjettidaagaa” yaagiis. (Maz. 32:2) Ee, bantta wozanan baleto qofi baynnaageeti ha wodiyankka ufayttoosona; qassi sinttappe tumu ufayssaa demmana.

¹⁸ Mata wode, Yihooway iita asata woy geeman nagaraa oottiya asata qoncciya kessana. I, “xilluwaappenne nagaranchchaappe gidduwan de7iya zawaanne Xoossaassi azazettiyaageetuppenne azazettennaageetuppe gidduwan de7iya zawaa” erissana. (Mil. 3:18) Hegee gakkanaashin, Yihoowa ‘ayfee xillotukko xeelliyoogaanne i ubba wode eta woosaa ezggiyoogaa’ eriyoogee keehi minttettees.—1 PHe. 3:12.