“Taani Giyoogaa Siyitenne Akeekite”

1, 2. Yesuusi yootiyoobaa siyida daroti hegaa akeekibeennay aybissee?

ISSI uri bana haasayissiya asa cenggurssaa siyana danddayees. I ubba bana haasayissiya uraa shonggaakka akeekana danddayees. SHin i he siyiyoobaa akeekana xayikko, hegee a ay maaddii? (1 Qor. 14:9) Hegaadan, Yesuusi yootiyoobaa shaꞌan qoodettiya asay siyiis. I ubba eti akeekana danddayiyo qaalan yootiis. SHin i yootidobaa akeekida asati ubbata gidokkona. Hegaa gishshawu, Yesuusi bana ezggiyaageeta, “Ubbai taani giyoogaa siyitenne akeekite” yaagiis.—Mar. 7:14.

² Yesuusi yootidobaa daroti akeekibeennay aybisee? Issoti issoti bala qofaa qoppidosonanne iitabaa halchidosona. Yesuusi hegaa mala asata, “Intte intte wogaa naaganau Xoossaa azazuwaa yeggi bayeeta” yaagiis. (Mar. 7:9) Eti Yesuusi yootidobaa akeekanawu koyibookkona. Qassi bantta qofaa laammanawu koyibookkona. Eta hayttay sissaa siyana; shin eta wozanay dammiis! (Maatiyoosa 13:13-15 nabbaba.) Yaatin, nuuni Yesuusa timirttiyan goꞌettanawu nu wozanay akeekiyaagaa gidiyoogaa waati erana danddayiyoo?

YESUUSA TIMIRTTIYAN WAANI GOꞌETTANEE?

3. Erissiyo ashkkarati Yesuusi yootidobaa akeekana danddayidoy aybissee?

³ Nuuni ashkke gidida Yesuusi erissiyo ashkkaratu leemisuwaa kaallana bessees. I eta, “Intte aifee xeelliyo gishshaunne intte haittaikka siyiyo gishshau, intte anjjettidaageeta” yaagiis. (Maa. 13:16) Harati akeekibeennabaa eti waati akeekana danddayidonaa? Koyruwan, eti oyshaa oychanawu koyidosonanne Yesuusi woygana koyidaakko eranawu baaxetidosona. (Maa. 13:36; Mar. 7:17) Naaꞌꞌanttuwan, eti kase eriyoobaa bolli gujjidi eranawu koyidosona. (Maatiyoosa 13:11, 12 nabbaba.) Heezzanttuwan, eti siyidobaaninne akeekidoban bantta xallaa gidennan, haratakka maaddanawu baaxetidosona.—Maa. 13:51, 52.

4. Yesuusa leemisuwaa akeekanawu, nuuni oottana bessiya heezzubati aybee?

⁴ Nuuni Yesuusa leemisuwaa akeekana koyikko, ammanettida a erissiyo ashkkaratu leemisuwaa kaallana bessees. Yaatanawu heezzubaa oottana koshshees. Koyro, Yesuusi giidobaa xannaꞌanawu, wotti denttidi qoppanawu, pilgganawunne bessiya oyshaa oychanawu wodiyaa bazzana koshshees. Yaatiyoogee eraa demissees. (Lee. 2:4, 5) Kaallidi, he eray kase eriyoobaara waani gayttiyaakko, qassi hegee nuna waati goꞌꞌiyaakko qoppana koshshees. Hegee akeekancha oottees. (Lee. 2:2, 3) Wurssettan, nuuni tamaaridoban goꞌettana woykko oosuwan peeshshana koshshees. Hegee aadhida erancha gidiyoogaa bessees.—Lee. 2:6, 7.

5. Eraa, akeekaanne aadhida eratettaa giddon deꞌiya dummatettaa leemisuwan yoota.

⁵ Eraa, akeekaanne aadhida eratettaa giddon deꞌiya dummatettay aybee? Kaallidi deꞌiya leemisuwan hegaa qonccissana danddayettees: Neeni kaamiyaa ogiyan gidduwan eqqidaashin issi kaamee neekko yiiddi deꞌiyaabadan qoppa. Koyruwan, kaamee neekko yiiddi deꞌiyoogaa beꞌadasa; hegee eraa. Kaallada, neeni yan eqqaaggiyaaba gidikko, nena kaamee dirxxanaagaa eraasa; hegee akeekaa! Hegaa gishshawu, neeni kaamiyaa ogiyaappe eesuwan kiyaychaasa; hegee aadhida eratettaa! Geeshsha Maxaafay nuuni ‘loꞌꞌo aadhida eratettaa naaganaadan’ minttettees. Hegee shemppo ashshiyaabaa!—Lee. 3:21, 22; 1 Xim. 4:16.

6. Yesuusi yootido laappun leemisota pilggiyo wode nuuni qoppana oyshati awugeetee? (Saaxiniyaa xeella.)

⁶ Ha huuphe yohuwaaninne hagaappe kaalliyaagan, Yesuusi yootido laappun leemisota pilggana. He leemisota pilggiyo wode, kaallidi deꞌiya oyshata qoppana: He leemisuwaa birshshettay aybee? (Hegee nuuni eraa demmanawu maaddees.) Yesuusi he leemisuwaa yootidoy aybissee? (Hegee akeekaa demmanawu maaddees.) Nuuni hegaa nu huuphiyawu, qassi harata maaddanawu waati goꞌettana danddayiyoo? (Hegee aadhida eratetta.) Wurssettan, hegee Yihoowabaanne Yesuusabaa nuna ay akeekissii?

SANAAFICIYAA AYFIYAA

7. Sanaaficiyaa ayfiyaa leemisuwaa birshshettay aybee?

⁷ Maatiyoosa 13:31, 32 nabbaba. Yesuusi sanaaficiyaa ayfiyaabaa yootido leemisuwaa birshshettay aybee? Sanaaficiyaa ayfee Kawotettaa mishiraachuwaanne he mishiraachuwaa yootiyoogan demmido ayfiyaa, woykko Kiristtaane gubaaꞌiyaa leemiso. ‘Zeretta ubbaappe guuxxiya’ sanaaficiyaa ayfiyaadan, Kiristtaane gubaaꞌeekka PHenxxaqosxxe gallassi 33 M.Ln, keehi guutta qoodan doommiis. SHin amarida layttaappe guyyiyan eesuwaninne aahuwan dicciis. (Qol. 1:23) Yesuusi “kafoi” he mittaa “tashiyan keexxiyoogaa” yootiis. Hegee Kiristtaane gubaaꞌee diccidi aakkiyo wode, ashkke gidida asati ayyaana qumaa, shemppiyoosaanne deꞌiyoosaa yaappe demmanaagaa bessees.—Hizqqeela 17:23⁠ra gatta xeella.

8. Yesuusi sanaaficiyaa ayfiyaabaa leemisuwaa goꞌettidoy aybissee?

⁸ Yesuusi ha leemisuwaa goꞌettidoy aybissee? I Xoossaa Kawotettay waani diccanaakko, xube gidiya ubbabaa waati teqqanaakkonne xoonanaakko bessanawu maalaalissiya sanaafice mittaa dichaabaa leemisuwan yootiis. Kiristtaane gubaaꞌee 1914ppe doommidi keehi dicciis! (Isi. 60:22) He gubaaꞌiyaa yara gididaageeti ayyaanaaban naagettidi deꞌidosona. (Lee. 2:7; Isi. 32:1, 2) Qassi gubaaꞌee dicciyoogaa aybinne diggana danddayenna.—Isi. 54:17.

9. (a) Sanaaficiyaa ayfiyaa leemisuwaappe nuuni ay tamaarana danddayiyoo? (b) Hegee Yihoowabaanne Yesuusabaa nuna ay akeekissii?

⁹ Sanaaficiyaa ayfiyaa leemisuwaappe ay tamaarana danddayiyoo? Nu heeran deꞌiya Yihoowa Markkati keehi guutta woy haggaazuwan sohuwaara loꞌꞌo ayfiyaa demmennan aggana danddayoos. Gidikkokka, Xoossaa Kawotettay xube gidiya aybakka gidin xoonana danddayiyoogaa mule dogana bessenna. Hegee nuuni genccanawu maaddees. Leemisuwawu, Ishaa Ediwin Iskineri 1926n Hindde biido wode yan deꞌiya Yihoowa Markkati guutta; qassi dichay keehi laafa gidiyo gishshawu, oosoy ayfennaba milatiis. SHin i sabbakiyoogaa aggibeenna; qassi Kawotettaa mishiraachoy wolqqaama xubiyaa xooniyoogaa akeekiis. Haꞌꞌi Hindden 37,000ppe dariya Yihoowa Markkati deꞌoosona; qassi zillaytti 108,000ppe dariya asay Godaa Kahuwaa bonchanawu shiiqiis. Kawotettaa oosoy waani aakkidaakko hara leemisuwaakka beꞌa. Zambbiyan oosoy doomettidoy Ishaa Iskineri Hindde biitti biido layttaana. Haꞌꞌi yan deꞌiya Yihoowa Markkati 170,000ppe daro; qassi 2013n Godaa Kahuwaa bonchanawu 763,915 asay shiiqiis. Hegee Zambbiyan deꞌiya 18n asaappe 1y shiiqiis giyoogaa. Keehi maalaaliya dicha!

IRSHSHUWAA

10. Irshshuwaa leemisuwaa birshshettay aybee?

¹⁰ Maatiyoosa 13:33 nabbaba. Irshshuwaa leemisuwaa birshshettay aybee? Ha leemisoykka Xoossaa Kawotettaa mishiraachuwaanne i ayfiyo ayfiyaa bessiyaaba. Xiilliyaa “munaqai ubbai” asa ubbaassi leemiso; qassi munaqay denddiyoogee sabbakiyoogan Xoossaa Kawotettaa mishiraachoy ubbasan aakkiyoogaa bessees. Sanaaficiyaa ayfiyaa dichaa asay beꞌidi akeekees; shin irshshoy koyro munaqaara walahettiyo wode asi beꞌidi akeekenna. Irshshoy munaqaa denttana gakkanaashin amarida wodiyawu asi hegaa akeekenna.

11. Yesuusi irshshuwaa leemisuwaa goꞌettidoy aybissee?

¹¹ Yesuusi ha leemisuwaa goꞌettidoy aybissee? I Xoossaa Kawotettaa mishiraachoy ubbasan odettanaagaanne hegee suure wozanay deꞌiyo asata laammanaagaa bessiis. Kawotettaa mishiraachoy ‘saꞌaa gaxaa gakkanaashin’ odettiiddi deꞌees. (Oos. 1:8) SHin Kawotettaa mishiraachoy ayfiiddi deꞌiyaaba gidikkokka, koyro heeran hegaa akeekennan aggana danddayoos. Ubbasan deꞌiya asay Kawotettaa mishiraachuwaa siyidi ammaniiddi deꞌees; qassi he mishiraachoy eti bantta deꞌuwan issi issibaa laamanaadan maaddiiddi deꞌees.—Roo. 12:2; Efi. 4:22, 23.

12, 13. Irshshuwaa leemisuwan qonccidaagaadan, Xoossaa Kawotettaa mishiraachuwaa yootiyo oosoy waani diccidaakko leemisuwaa yoota.

¹² Kawotettaa mishiraachuwaa yootiyoogee demissiyo ayfee darotoo qoncci beettiyoy asay koyro he mishiraachuwaa siyi simmin daro layttay aadhiina. Leemisuwawu, haꞌꞌi hara macara biiruwan oottiya Franzinne a keettaayiyaa Margita 1982n Brazile macara biiruwan oottoosona. Eti issi qeeri kataman sabbakidosona. Eti Geeshsha Maxaafaa xinaatiyaa doomissido asatu giddon issi aayyiyaanne i oyddu naati deꞌoosona. He naatuppe issuwaassi he wode layttay 12; i keehi dungguuxa gidiyo gishshawu, xinaatiyaa doommana haniyo wode darotoo qosettees. Franzinne Margita hara oosoy etawu imettido gishshawu, he asata xannaꞌissana danddayibookkonna. SHin 25 layttappe guyyiyan eti he katamaa beꞌanawu biidosona. Eti yan 69 aassiyaageetinne 13 kumetta wodiyaa aqinyeti deꞌiyo gubaaꞌee deꞌiyoogaa, qassi ishatinne michoti ubba shiiquwaakka ooratta Kawotettaa Addaraashan shiiqiyoogaa beꞌidi ay keena ufayttidaakko qoppa! He dungguuxa naꞌay shin? I haꞌꞌi gubaaꞌiyaa cimata shiishshiyaagaa gididi haggaazees! Yesuusi yootido irshshuwaa leemisuwaadan, Kawotettaa mishiraachoy ubbasan odettiisinne daroti bantta deꞌuwan issi issibaa laammanaadan oottiis; qassi he azinaynne machiyaa hegaa beꞌidi keehi ufayttidosona!

¹³ Ishantti sabbakennaadan digettido biittatunkka Kawotettaa mishiraachoy asay deꞌuwan issi issibaa laammanaadan maaddiiddi deꞌees. Hegaa mala biittatun Kawotettaa mishiraachoy waani gakkidaakko akeekiyo wode darotoo garamettoos. Leemisuwawu, Kawotettaa mishiraachoy Kuuba biitti gakkidoy 1910na; qassi Ishaa Rasili he haruuruwaa 1913n xomoosiis. SHin koyro dichay qoncce gidenna. Ha wodiyan Kuuban deꞌiya hanotay aybee? Kawotettaa mishiraachuwaa yootiyaageetu qooday 96,000ppe bolla; qassi 2013n Godaa Kahuwaa bonchanawu 229,726 asay shiiqiis; hegee he haruuruwan deꞌiya 48n asaappe 1y shiiqiis giyoogaa. Mishiraachuwaa yootiyoogee digettibeenna biittatunkka gidin, he heeran deꞌiya Yihoowa Markkati darin oosettibeennabadan qoppiyo moottankka mishiraachoy gakkana danddayees.a—Era. 8:7; 11:5.

14, 15. (a) Yesuusi irshshuwaa leemisuwan tamaarissidobaappe nuuni waani goꞌettana danddayiyoo? (b) Hegee Yihoowabaanne Yesuusabaa nuna ay akeekissii?

¹⁴ Yesuusi irshshuwaa leemisuwan tamaarissidobaappe nuuni waani goꞌettana danddayiyoo? Nuuni Yesuusa leemisuwaa birshshettaa wotti dentti qoppiyo wode, Kawotettaa mishiraachuwaa siyibeenna miilooniyan qoodettiya asati waati siyana danddayiyaakko keehi hirggana koshshennaagaa akeekoos. Yihooway ubbabaa ba sheniyaadan oottees. SHin nu oottanabay aybee? Xoossaa Qaalay hagaadan gees: “Maallado guuran gidinkka omarssan, ne zerettaa zeriyoogaa aggoppa; aissi giikko, maalladoogee lo77anaa omarssaagee lo77anaa neeni erakka.” (Era. 11:6) SHin nuuni Kawotettaa mishiraachoy ayfiyaa ayfanaadan, ubba qassi sabbakiyo oosoy digettido biittatun ayfanaadan woossiyoogaa mule dogana koshshenna.—Efi. 6:18-20.

¹⁵ Qassi, nu oosuwaa ayfiyaa koyro heeran beꞌana xayikko hidootaa qanxxana koshshenna. Nuuni “guutta doomettaa” mule karana koshshenna. (Zak. 4:10) Wurssettan beꞌiyo ayfee nuuni kasetidi qoppidoogaappe keehi daro gidana danddayees!—Maz. 40:5; Zak. 4:7.

ZALꞌꞌANCHAANNE MOOGIDO MIISHSHA

16. Zalꞌꞌanchaabaanne moogido miishshaabaa leemisuwaa birshshettay aybee?

¹⁶ Maatiyoosa 13:44-46 nabbaba. Zalꞌꞌanchaabaanne moogido miishshaabaa leemisuwaa birshshettay aybee? Yesuusi saꞌan deꞌiyo wode, zalꞌꞌanchati alꞌꞌo inqquwaa demmanawu keehi haaho biitti boosona. Ha leemisuwan zalꞌꞌanchan leemisettidaageeti ayyaanaaban banttawu koshshiyaabaa demmanawu haahosaa biya ashkke asata. ‘Daro alꞌꞌo inqqoy’ keehippe xoqqu oottidi xeelliyo Xoossaa Kawotettaa tumawu leemiso. Zalꞌꞌanchay he alꞌꞌo inqquwaa goꞌꞌaa akeekidi, hegaa shammanawu bayyo deꞌiyaabaa ubbaa bayzzanawu koyiis. Yesuusi goshshan “moogido” miishshaa oottiiddi demmida bitaniyaabaakka yootiis. Zalꞌꞌanchaagaappe dumma ogiyan he bitanee alꞌꞌo miishshaa koyanawu harasaa bibeenna. SHin ikka zalꞌꞌanchaagaadan he alꞌꞌo miishshaa demmanawu “baayyo de7iyaabaa ubbaa” bayzzanawu koyiis.

17. Yesuusi zalꞌꞌanchaabaanne moogido miishshaabaa leemisuwaa yootidoy aybisee?

¹⁷ Yesuusi ha naaꞌꞌu leemisota yootidoy aybisee? I asay tumaa dumma dumma ogiyan siyiyoogaa bessanawu hegaa yootiis. Issi issi asay tumaa siyanawu koyidi, keehi haahosaa bees. Harati qassi tumaa daafurennan demmoosona; geella issi asi etakko yiidi markkattin siyana danddayoosona. Ha leemisuwan qonccida naaꞌꞌu asatikka bantta demmidobaa xoqqu oottidi xeellidosona; qassi hegaa banttabaa oottanawu daro baaxetidosona.

18. (a) Ha naaꞌꞌu leemisuwaappe nuuni waani goꞌettana danddayiyoo? (b) Hagee Yihoowabaanne Yesuusabaa nuna ay akeekissii?

¹⁸ Ha naaꞌꞌu leemisuwaappe nuuni waani goꞌettana danddayiyoo? (Maa. 6:19-21) Nena hagaadan oycha: ‘Ta qofaykka ha asatuugaa malee? Taanikka tumaa hegaadan xoqqu oottada xeelliyaanaa? Taani tumaa demmanawu daro baaxetiyaanaayye woy galla galla deꞌossi koshshiyaabaa demmanawu qoppiyoogaa malabawu hirggiyaanaa?’ (Maa. 6:22-24, 33; Luq. 5:27, 28; Pili. 3:8) Nuuni tumaa demmido gishshawu wozanappe ufayttiyoogee, nu deꞌuwan a kaseyanawu murttanaadan oottees.

19. Kaallidi deꞌiya huuphe yohuwan ay pilgganee?

¹⁹ Nuuni Xoossaa Kawotettaara gayttida ha leemisotu birshettaa siyiyaageetanne wozanaappe akeekiyaageeta gidanaadan amottoos. Nuuni yaatanawu he leemisotu birshettaa eriyoogaa xalla gidennan hegaappe tamaaridobaa oosuwan peeshshana koshshiyoogaa hassaya. Kaalliya huuphe yohuwan, hara heezzu leemisota pilggana, qassi hegaappe nuuni ay tamaarana danddayiyaakko beꞌana.