Hassayay?

Mati kiyida Wochiyo Keelaa maxeeteta loyttada nabbabadii? Yaatikko, neeni kaallidi deꞌiya oyshata zaarana danddayay?

Ahaa xuuggiyoogee Kiristtaanetussi bessiyaabee?

Ahaa xuuggiyoogee woy aggiyoogee issi uri kuuyiyooba. Geeshsha Maxaafay hegaara gayttidaagan qoncce gididabaa yootennaba gidikkokka, asay Kawuwaa Saaꞌoolanne a naꞌaa Yonaataana ahaa xuuggidi moogidoogaa yootees. (1 Sam. 31:2, 8-13)—6/15, sinttaa 7.

Iitabay gakkanaadan oottiyay Xoossaa gidennaagaa waati erana danddayiyoo?

Xoossaa oge ubbay xillo. I ammanettiyaagaa, iitatetti baynnaagaa, tumanchanne suure. Yihooway maarotaynne qaretay kumidoogaa. (Zaa. 32:4; Maz. 145:17; Yaaq. 5:11)—7/1, sinttaa 4.

Aassiyaageeti keehi koshshiyoosan haggaazanawu kare biitti biya ura metana danddayiyaabay aybee?

Metiya heezzubay (1) duussaa meezetiyoogaa, (2) laamotaa gencciyoogaa, qassi (3) he heeran deꞌiya ishanttuura meezetiyoogaa. Ha metiyaabaa xoonida daroti keehi anjjettidosona.—7/15, sinttaa 4-5.

Yooseefa ishantti a ixxidoy aybissee?

Hegawu issi gaasoy Yaaqoobi a haratuppe aatti siiqidi alleeqettida maayuwaa ayyo immidoogaa. Yooseefa ishati a qanaatidi a aylletettawu bayzzidosona.—8/1, sinttaa 11-13.

Ooratta traktteti goꞌettanawu metennaageetanne loꞌꞌo ayfiyaa demissiyaageeta gididoy aybiinee?

Eti issi mala ogiyan giigidosona. Qassi hegan deꞌiya oyshaanne xiqisiyaa nuuni asawu nabbabanaadan maaddoosona. Keettaaway aybanne zaarin trakttiyaa gomppan deꞌiya, Geeshsha Maxaafay giyoobaa yootana danddayoos. Nuuni zaarettidi oychiyo wode zaarana oyshaakka bessana danddayoos.—8/15, sinttaa 13-14.

Siyirak Peshita giyoobi aybee?

Siyirake Aramayke doonawu zuussay deꞌiyo, naaꞌꞌantto woy heezzantto xeetu layttaa M.Ln, asay darosan haasayiyo qaala. Giriikettuwan xaafettida Geeshsha Maxaafaa shaahoy koyro birshshettidoy Siyirake doonaana gidennan aggenna. Siyirake doonawu birshshettida Geeshsha Maxaafay guyyeppe Peshita geetettiis.—9/1, sinttaa 13-14.

Yihoowa Markkati bantta naata waati heemmana danddayiyoonaa?

Bantta naata eranawu naati yootiyoobaa eti siyana bessees. Eta ayyaanaaban mizanawu baaxetite. Eti ayyaanaabaa siriyoogaa doommiyo wodekka eta siiquwan kaalettite.—9/15, sinttaa 18-21.

Xoossaa Kawotettay yiyo wode xayanabay aybee?

Dumma dumma sahuwaa, hayquwaa, ooso xayiyoogaa, olaa, kattay qaxuwaatiyoogaanne hiyyeesatettaa.—10/1, sinttaa 6-7.

Harati Kiristtoosaara haaranaadan oottiya maachay awugee?

Yesuusi ba kiittidoogeetuura wurssetta Paasikaa mi simmidi etaara maacettiis; hegee Kawotettaa maachaa geetettees. (Luq. 22:28-30) Hegee eti Yesuusaara saluwan haaranaagaa ammanettanaadan oottees.—10/15, sinttaa 16-17.

Seexaanay deꞌon deꞌiyaaba gidiyoogaa bessiya naaꞌꞌu leemisota Geeshsha Maxaafaappe yoota.

Seexaanay Yesuusa paaccanawu aara haasayidoogaa Geeshsha Maxaafay yootees. Qassi Iyyooba wode Seexaanay Xoossaara haasayiis. Ha taariketi Seexaanay deꞌon deꞌiyaaba gidiyoogaa bessiyaaba.—11/1, sinttaa 4-5.

Yaaqoobi Oosuwaa 15:14n yootido, Yihooway “ba sunttawu, NW” doorido asay oonee?

Eti banttana xeegida Xoossaa “ooratta oosuwaa yootanau” doorettida zare gidanaadan Yihooway doorido Ayhudatanne Ayhuda gidenna asata.(1 PHe. 2:9, 10)—11/15, sinttaa 24-25.

Timgad aybee, qassi yan deꞌida asatu qofay aybee?

Timgad giyo sohoy Huuphessa Afirkkan (ha wodiyan Aljjeeriyan) deꞌiya, Rooma asatu gita katama. Yan deꞌiya asatu ammanuwaa xeelliyaagan pilggiyaageeti bookkidi demmido xuufee, “Deꞌo giyoobi shankkatiyoogaa, bollaa meecettiyoogaa, kaaꞌiyoogaanne ufayttiyoogaa” yaagees. Hegee 1 Qoronttoosa 15:32n qonccidaagaara issi mala qofa.—12/1, sinttaa 8-10.