Ne Oosuwaa Asi Beꞌin Beꞌana Xayin Qofissii?
KEETTAA keexxiyoogee Baxaaliꞌeelawunne Oholiꞌaabawu oorattaba gidenna. Eti Gibxxen aylletettan deꞌiyo wode daro xuubiyaa medhanawu keehi daafuridoogaa dogiyaakko ixxokkona. SHin he wodee aadhiichiis. Eti gayttiyo dunkkaaniyaa keexxiyo oosuwan kaalettanaadan maddabettidoogee kushe hiillan keehi gooba gidanaadan maaddana. (Kes. 31:1-11) SHin, eti oottido maalaalissiyaabaa beꞌana asati keehi guutta. Asi nashshibeennaagee eti hidootaa qanxxanaadan oottidee? Eta oosuwaa asi beꞌin beꞌana xayin eta qofissiyaabee? Neegaa shin asi beꞌin beꞌana xayin nena qofissii?
AMARIDAAGEETU XALLAY BEꞌIYO KEEHI LOꞌꞌIYA OOSUWAA
Gayttiyo dunkkaaniyan deꞌiya miishshatuppe amaridaageeti oosettido ogee maalaalees. Leemisuwawu, maachaa taabootaa bolli deꞌiya, worqqaappe merettida kiruubeta qoppa. Kiitettida PHawuloosi eti ‘bonchettidaageeta’ gidiyoogaa yootiis. (Ibr. 9:5) Qoxettida worqqaappe medhido he misileti ay keena loꞌꞌiyaakko qoppa!—Kes. 37:7-9.
Baxaaliꞌeelinne Oholiꞌaabi oottidobaa ha wodiyan demmiyaaba gidiyaakko, hegee daro asay nashshana danddayiyoosan, keehi loꞌꞌo muuzemiyan wottiyooba. SHin hegee oosettido wode, ay keena loꞌꞌiyaakko beꞌida asay woqqee? Kiruubeti Ubbaappe Aadhiya Geeshsha Sohuwan deꞌiyo gishshawu, qeese ubbatu halaqaa xallay Nagaray Atto Geetettiyo Gallassi layttan issitoo yaa geliyo wode eta beꞌees. (Ibr. 9:6, 7) Hegaappe denddidaagan, hegaa beꞌida asay keehi guutta.
ASI SABBANA XAYIKKONNE UFAYTTIYOOGAA
Neeni Baxaaliꞌeela woy Oholiꞌaaba gidiyaakko, qassi keehi daafurada hegaa mala maalaaliya misiliyaa medhiyaakko, he misiliyaa keehi guutta asay beꞌiyoogaa eriyo gishshawu neeyyo aybi siyettanee? Ha wodiyan asay oottidoban laggeti sabbiyo wodenne nashshiyo wode ufayttees. Eti hegee bantta oosoy goꞌꞌiyaaba gidiyoogaa bessiyaabaadan qoppoosona. SHin Yihoowa ashkkarati etappe dummatoosona. Baxaaliꞌeelaagaadaaninne Oholiꞌaabaagaadan Yihoowa sheniyaa oottiyoogeenne an nashettiyoogee nuna ufayssees.
Yesuusi saꞌan deꞌiyo wode, haymaanootiyaa kaalettiyaageeti hara asay garamettanaadan woossiyoogee meeze gididaba. SHin Yesuusi asan sabettanawu koyennan wozanappe woossanaadan zoriis. Hegee ‘geeman beꞌiya nu Aaway nuuyyo qoncciyan immanaadan’ oottees. (Maa. 6:5, 6) Waannabay harati nu woosaabaa qoppiyoobaa gidennan, Yihooway nu woosaabaa qoppiyoobaa. Nu woosaa tumuppe goꞌꞌiyaaba oottiyay a qofaa. Nu geeshsha haggaazuwan nuuni oottiyo ubbabankka hanotay hegaa mala. Harati nuna sabbido gishshawu nu oosoy goꞌꞌiyaaba giidi qoppokko; shin hegee “geeman be7iya” Yihoowa ufayssees.
Gayttiyo dunkkaanee oosetti wurido wode, “shaarai Xoossaa Dunkkaaniyaa kammiis; GODAA bonchchoikka a kumiis.” (Kes. 40:34) Hegee Yihooway ufayttidoogaa loytti qonccissees! He wode Baxaaliꞌeelayyoonne Oholiꞌaabayyo aybi siyettidee? Eti oottidoban eta sunttay xaafettana xayikkokka, eti bantta ooso ubbaa Xoossay anjjiyoogaa eriyoogan ufayttidoogee qoncce. (Lee. 10:22) Hegaappe kaalliya layttatun, eti oottidobay Yihoowayyo haggaaziyoogan goꞌꞌidoogaa beꞌidi, eti wozanappe ufayttidoogee erettidaagaa. Baxaaliꞌeelinne Oholiꞌaabi ooratta alamiyan hayquwaappe denddiyo wode, gayttiyo dunkkaanee 500 gidiya layttawu geeshsha goynuwan goꞌettidoba gidiyoogaa siyidi ufayttanaagee erettidaba!
Ne huuphiyaa kawushshada dosan neeni oottiyoobaa asi beꞌana xayikkokka, Yihooway beꞌees!
Ha wodiyan Yihoowa dirijjitiyan animeeshin giyoobaa oottiyaageetu, misiliyaa medhiyaageetu, muuziqaa miishshaa kaaꞌiyaageetu, pootuwaa denttiyaageetu, xuufiyaa birshshiyaageetunne xaafiyaageetu sunttay odettenna. Hegaappe denddidaagan, eti oottiyoobaa ooninne “beꞌenna” gaana danddayettees. Kumetta saꞌan 110,000ppe dariya gubaaꞌetun oosettiya darobaa xeelliyaagankka hegaadan gaana danddayettees. Gubaaꞌe hisaabiyaa oottiyaagee aginaa wurssettan oottiyoobaa ooni beꞌii? Gubaaꞌe xaafee haggaazo irpporttiyaa giigissiyo wode ooni beꞌii? Kawotettaa Addaraashan koshshiyaabaa giigissiya ishaa woy michiyo ooni beꞌii?
Baxaaliꞌeelinne Oholiꞌaabi oottido maalaaliyaaban ceeqettanaadan, wurssettan wanccaa, madaaliyaa woy hegaa mala harabaa demmibookkona. SHin eti aybippenne aadhiyaabaa demmidosona; hegeekka Yihoowan nashettiyoogaa. Yihooway eta oosuwaa beꞌidoogee erettidaba. Etaagaadan nu huuphiyaa kawushshidi nu dosan haggaaziyaageeta gidanawu amottoos.