GEESHSHA MAXAAFAA OYSHAA ZAARUWAA
Deꞌo giyoogee hagaa xallee?
Issi Issitoo, Asaa Naatu Baree Keehi Qantta Gaada Qoppa Eray?
‘Deꞌo giyoogee kaaꞌiyoogaa, oottiyoogaa, aqo oyqqiyoogaa, naata dichiyoogaa qassi ceeggiyoogaa xalleeyye’ gada oycha eray? (Iyyooba 14:1, 2) Geeshsha Maxaafay erancha asatikka hegaadan qoppidoogaa yootees.—Eranchchaa 2:11 nabbaba.
Deꞌuwawu halchidobi deꞌii? Koyruwan nuuni, ‘Deꞌoy waani doommidee?’ giidi oychana bessees. Nu guuggeenne nu bolla kifileti harati maalaaliya ogiyan merettidoogaa pilggi eri simmidi, daro asay nuna Medhida, aadhida erancha uri deꞌiyoogaa akeekidosona. (Mazamure 139:14 nabbaba.) Yaatikko, issibaa halchidi nuna medhiis giyoogaa. Hegee aybakko eriyoogee nu deꞌuwan kaseegaappe aaruwan ufayttanawu maaddees.
Asay merettidoy aybissee?
Xoossay koyro azinaanne machiyo Addaamanne Hewaano anjjiis; qassi etawu ufayssiya oosuwaa immiis. Xoossay eti saꞌaa kumanaadan, gannatiyaa aassanaadan qassi merinawu deꞌanaadan halchiis.—Doomettaabaa 1:28, 31 nabbaba.
Asay Xoossaa haaruwaa bolli makkalidoogee amarida wodiyawu a halchoy polettennaadan oottiis. SHin Xoossay nuna aggibayibeenna; qassi asaa naatussinne saꞌawu halchidoba laammibeenna. Geeshsha Maxaafay Xoossay ammanettida asaa naata ashshanawunne saꞌawu halchidoba polanawu oottiiddi deꞌiyoogaa yootiyoobay nuna keehi minttettees! Xoossay asaa naatussi koyro halchido deꞌuwaa neeni demmanaadan koyees! (Mazamure 37:29 nabbaba.) Neenikka Xoossaa halchuwan goꞌettanawu waatana koshshiyaakko Geeshsha Maxaafaappe tamaara.