SINTTA HUUPHE YOHUWAA | AMMANETTANA KOSHSHIYOY AYBISSEE?

Ammanettennaagee Nena Qohees

“Guuttaa worddotidi appe kiyana danddayiyo metoy ubbatookka gakkees.”—Samanto, Tohossa Afirkka.

Neeni he qofaa maayay? Samantiigaadan nunakka dumma dumma wodiyan metiyaabay gakkees. Ammanettennaadan paacciyaabay gakkiyo wode nuuni oottiyoobay nuuni xoqqu oottidi xeelliyoobay aybakko bessees. Leemisuwawu, nuuni asan nashettiyoogaa hara aybippenne xoqqu oottidi xeelliyaaba gidikko, worddotiyoogee bessiyaaba giidi qoppana danddayoos. Gidikkokka, tumay qoncciyaa kiyiyo wode, wordduwaa haasayidoogee darotoo iitabaa kaalettees. Kaallidi deꞌiyaabaa beꞌa.

AMMANETTENNAAGEE DABBOTAA MOOREES

Ammanettiyoogee issippetettawu keehi koshshiyaaba. Naaꞌꞌu asati issoy issuwawu ammanettikko, woppu giidi deꞌoosona. SHin hegaadan ammanettiyoogee issi kutti haniyaaba gidenna. Asay worddotennan haasayiiddinne kehiiddi issoy issuwaara wodiyaa aattiyo wode, issoy issuwaa ammanees. SHin issitoo worddotikko, eti issoy issuwaa ammanettiyoogaa aggana danddayoosona. Issi uri ammanettenna asa gidiichikko, zaarettidi a ammananaagee deexxiyaaba gidana danddayees.

Neeni loꞌꞌo lagge gaada ammaniyo uri nena cimmi erii? Yaatin neeyyo aybi siyettidee? Hegan qohettennan, ubba qassi nena kaddidabadan qoppennan aggakka. Hegaadan qoppiyoogee wottin deꞌiyaaba. Ammanettennan aggiyoogee alꞌꞌo dabbotaa mooriyaaba gidiyoogee aynne sirissenna.

AMMANETTENNAAGEE HARAYKKA AMMANETTENNAADAN OOTTEES

Kaliforniyaa Yuniversttiyaa profeeseree Robert Inesi, “ammanettennan aggiyoogee asaappe asaa oyqqiya hargge mala” gidiyoogaa akeekiis. Hegaa gishshawu, ammanettenna uraara darotoo wodiyaa aattiyaaba gidikko, neenikka ammanettenna ura gidana danddayaasa.

Ammanettennan aggiyoogee nena piredan oyqqennaadan waatana danddayay? Geeshsha Maxaafay nena maaddana danddayees. Hegaara gayttida amarida Geeshsha Maxaafaa maarata beꞌa.

Ammanettennaagaa Bessiya Hanotata

Worddotiyoogaa

HEGEE QONCCIYO OGIYAA: Tuma gididabaa yootana bessiyo urawu worddo gididabaa yootiyoogaa. Issi uri balabaa qoppanaadan oottanawu tuma gidennabaa yootiyoogee, issi ura cimmanawu keehi koshshiyaabaa yootennan aggiyoogee woy qassi hara uri likke gidennabaa qoppanaadan tuma gididabaa bolli gujjidi yootiyoogeekka worddotiyoogaa.

GEESHSHA MAXAAFAA QOFAA: “GODAI iitaa oottiyaageeta ixxees; shin suuretuyyo i ulottees.” (Leemiso 3:32) “Simmi worddotoppite. . . . Asai ubbai ba ishau tumaa haasayanau bessees.”—Efisoona 4:25.

Sunttaa Mooriyoogaa Woy Zigiriyoogaa

HEGEE QONCCIYO OGIYAA: Hara ura loꞌꞌo sunttaa mooriya, worddonne iita gididabaa haasayiyoogaa.

GEESHSHA MAXAAFAA QOFAA: “Geella asi ooshshaa denttees; zigirssanchcha asi ammanettiya laggeta shaakkees.” (Leemiso 16:28) “Mittai wurikko, tamai to7ees; zigiriyaabi xayikko, ooshshai attees.”—Leemiso 26:20.

Cimmiyoogaa

HEGEE QONCCIYO OGIYAA: Issi ura miishshaa woy aquwaa ekkanawu izaawa cimmiyoogaa.

GEESHSHA MAXAAFAA QOFAA: “Hiyyeesaa qaxarada naaqqoppa.” (Zaarettido Wogaa 24:14, 15) “Hiyyeesata toochchiya asi eta Medhdhidaagaa cayees; shin metootanchchatussi kehiya asi Xoossaa bonchchees.”—Leemiso 14:31.

Wuuqqiyoogaa

HEGEE QONCCIYO OGIYAA: Asabaa oychennan ekkiyoogaa.

GEESHSHA MAXAAFAA QOFAA: “Wuuqqiya urai hagaappe sinttau wuuqqoppo; shin hegaa aggidi, hiyyeesata maaddanau, ba kushiyan lo77obaa oottiiddi daafuro.” (Efisoona 4:28) “Baloppite. . . . Kaisoti woi miishshaa amottiyaageeti woi mattottiyaageeti woi cayiyaageeti woi bonqqiyaageeti Xoossaa kawotettaa laattokkona.”—1 Qoronttoosa 6:9, 10.