Yelidaageetoo, Intte Naati Ammanuwan Minnanaadan Maaddite

1, 2. (a) Yelidaageeta gakkiya paacee aybee, qassi eti he paaciyaa waati xoonana danddayiyoonaa? (b) Nuuni xannaꞌana oyddubati aybee?

PARANSAAYE biittan deꞌiya issi azinaynne machiyaa, “Nuuni Yihoowan ammanoos; shin hegee nu naati ammananaagaa bessenna” yaagidosona. Eti gujjidikka, “Ammanoy issi uri laattiyooba gidenna. Nu naati loddan loddan ammanoosona” yaagidosona. Awusttiraaliyaa biittan deꞌiya issi ishay hagaadan giis: “Intte naati ammanuwan minnanaadan maaddiyoogee inttena gakkana danddayiya ay paaceppekka wolqqaama gidana danddayees. Naata maaddiya ubbabaa intte goꞌettana koshshees. Intte naꞌay oychido oyshawu likke zaaruwaa zaaridabadan inttessi siyettana danddayees. SHin guuttaa takkidi he oyshaa i zaaretti oychiyoogaa intte akeekeeta! Eranawu koyiya intte naꞌawu intte zaariyoobay a hachi ufayssikkokka, wontto ufayssennan aggana danddayees. Intte issi issibaa darotoo zaaretti tamaarissana koshshennan aggenna.”

² Neeni aawa woy aayo gidikko, ne naati ammanuwan mino asa gidanaadan tamaarissanawu danddayennabadan issi issitoo qoppay? Nuuppe ooninne ba eran hegaa oottana danddayenna! (Erm. 10:23) SHin nuuni Xoossay kaalettanaadan oychiyo wode hegaa oottidi polana danddayoos. Ne naati ammanuwan minnanaadan tamaarissanawu nena maaddana danddayiya kaallidi deꞌiya oyddubata akeeka: (1) Eta loytta era. (2) Ne tamaarissiyooban ne wozanaa wotta. (3) Leemisuwaa goꞌetta. (4) Danddayanne woossa.

INTTE NAATA LOYTTI ERITE

3. Yelidaageeti tamaarissiyo wode Yesuusa leemisuwaa waati kaallana danddayiyoonaa?

³ Yesuusi darotoo bana kaalliyaageeti woygi ammaniyaakko oychees. (Maa. 16:13-15) A leemisuwaa kaalla. Neeni ne naatuura haasayiyo woy issibaa oottiyo wode, eti ay qoppiyaakko oycha; qassi eti banttawu siyettiyaabaa neeyyo yootanaadan ootta. Eti siriyoobi deꞌii? Layttay 15 gidido, Awusttiraaliyaa biittan deꞌiya issi ishay hagaadan giis: “Ta aaway darotoo ta ammanuwaabaa tanaara haasayeesinne taani yuushsha qoppada ammananaadan maaddees. I hagaadan oychees: ‘Geeshsha Maxaafay woygii?’ ‘Geeshsha Maxaafay yootiyoobaa neeni ammanay?’ ‘Hegaa neeni ammaniyoy aybissee?’ Taani i woy ta aayyiyaa giyoobaa zaarettiyoogaappe ta qaalan zaaranaadan koyees. Taani gitaa gidada loytta qonccissada zaarays.”

4. Ne naati oychiyoobaa loytta akeekana koshshiyoy aybissee? Leemisuwaa yoota.

⁴ Ne naati Geeshsha Maxaafay tamaarissiyo issibaa sohuwaara ammanana xayikko, danddaya. Eti bantta oyshawu zaaruwaa demmanaadan maadda. Issi aaway hagaadan giis: “Ne naꞌi oychiyoobaa loytta akeeka. Koshshennaba gaada i oychiyoobaa karoppa, qassi i oychiyoobay nena ufayssennaba gidiyo gishshawu hegaa coo aggabayoppa.” Ne naꞌay wozanappe oychiyo oyshaa i qoppiyoogaanne akeekanawu koyiyoogaa bessiyaabadan xeelliyoogee maaddiyaaba. Yesuusi baayyo layttay 12 gidido wodekka deexo oyshaa oychiis. (Luqaasa 2:46 nabbaba.) Denmarkke biittan deꞌiya, layttay 15 gidido naꞌay hagaadan giis: “Nu haymaanootee tumeeshsha gaada taani oychiyo wode tabay eta hirggissana danddayikkonne, ta aawaynne ta aayyiyaa woppu giidi zaaridosona. Eti ta oysha ubbaa Geeshsha Maxaafaappe zaaridosona.”

5. Naati Yihoowa ammaniyaabaa milatikkokka, aawaynne aayyiyaa ay oottana koshshii?

⁵ Ne naata loytta era; yaatanawu eti qoppiyoobaa etawu siyettiyaabaanne eta qofissiyaabaa erana koshshees. Eti gubaaꞌiyaa shiiquwaa shiiqiyo gishshawunne haggaaziyo gishshawu ammanoosona gaada mule qoppoppa. Galla galla etaara ayyaanaabaa tobba. Ne naatuura issippe, qassi nerkka etawu woossa. Eta ammanuwaa paacciyaabaa akeekada eti hegaa xoonanaadan maadda.

INTTE TAMAARISSIYOOBAN INTTE WOZANAA WOTTITE

6. Aawaynne aayyiyaa Geeshsha Maxaafaa tumaa bantta wozanan wottiyoogee tamaarissanawu eta waati maaddii?

⁶ Yesuusi Yihoowa siiqiyo gishshawunne Geeshsha Maxaafaa loytti eriyo gishshawu, asay i tamaarissiyoobaa ufayttidi siyees. Eti Yesuusi banttana siiqiyoogaakka akeekidosona. Hegaa gishshawu, eti i tamaarissiyo wode akeekan siyidosona. (Luq. 24:32; Yoh. 7:46) Hegaadan, neeni Yihoowa siiqiyoogaa ne naati akeekiyoogee etikka a siiqanaadan maaddees. (Zaarettido Wogaa 6:5-8; Luqaasa 6:45 nabbaba.) Hegaa gishshawu, yelidaageetoo, Geeshsha Maxaafaanne xannaꞌanawu maaddiyaabata loytti tamaarite. Meretaabaanne nu xuufetun hegaabaa yootiya qofaa eranawu baaxetite. (Maa. 6:26, 28) Yaatiyoogee intte intte eraa gujjanaadan, Yihoowa kaseegaappe aaruwan nashshanaadaaninne intte naata tamaarissanawu loytti giigettanaadan maaddees.—Luq. 6:40.

7, 8. Yelida uraa wozanay Geeshsha Maxaafaa tuman kumiyo wode, i waatii? Leemisuwaa yoota.

⁷ Geeshsha Maxaafaa tumay ne wozanan kumiyo wode hegaa ne soo asaara tobbanawu koyaasa. Gubaaꞌe shiiquwawu giigettiyo wode woy so asaa goynuwaa wode xalla gidennan, ubbatookka hegaadan ootta. Hegaa bollikka, hegaa mala haasayay ubba galla haasayiyoogaa mala gidana koshshees. Amarkkaa biittan deꞌiya azinaynne machiyaa so asay issippe meretaa beꞌiyo wode woy qumaa miyo wode, Yihoowabaa wotti dentti qoppoosona. Eti, “Nuuni Yihoowa siiquwaanne i ubbabaa waati medhidaakko nu naati hassayanaadan oottoos” yaagidosona. Tohossa Afirkkan deꞌiya azinaynne machiyaa bantta naaꞌꞌu macca naatuura gaden oottiyo wode zerettay mokkiyoonne dicciyo maalaalissiya hanotaabaa etawu yootoosona. He azinaynne machiyaa, “Nu macca naati deꞌuwaa keehi bonchanaadaaninne deꞌoy keehi muttumurettidoogaa akeekanaadan baaxetoos” yaagidosona.

⁸ Awusttiraaliyaa biittan deꞌiya issi aaway ba naꞌawu layttay tammaa heera gidiyo wode, ba naꞌay Xoossaa, qassi meretaa i medhidoogaa mintti ammananaadan maaddanawu muuzemiyaa bessanawu efiis. Aaway ammonoydenne trilobayte giyo abbaa giddon beni deꞌiya meretata bessiyaabaa beꞌidoogaa yootiis. I hagaadan giis: “Beni xayida ha meretati ha wodiyan nuuni beꞌana danddayiyoogeetu mala keehi loꞌꞌiya, muttumurettidanne kumetta mereta gidiyoogee nuna keehi garamissiis. Hegaa gishshawu, deꞌoy laafabaappe keehi muttumurettidabawu laamettidaba gidikko, beni wode deꞌida ha meretati hegaa keena keehi muttumurettidaageeta gididoy aybissee? Hegaappe tana keehi maalaalissidabaa tamaaraas; qassi ta naꞌawu hegaa yootaas.”

LEEMISUWAA GOꞌETTITE

9. Leemisoti maaddiyoy aybissee, qassi issi aayyiyaa hegaa waata bessadee?

⁹ Yesuusi darotoo leemisuwaa goꞌettees; hegee qofaanne wozanaa denttettees, qassi hassayanawu maaddees. (Maa. 13:34, 35) Naati loytti qoppana danddayoosona. Yaatiyo gishshawu, yelidaageetoo, tamaarissiyo wode leemisuwaa goꞌettite. Jaappaanen deꞌiya issi aayyiyaa hegaadan oottaasu. I naaꞌꞌu attuma naatu layttay hosppunanne tamma gidido wode, a eta salo gufanttuwan deꞌiya carkkuwaabaanne Yihooway hegaa medhidoogee i nuussi qoppiyoogaa bessiyoogaa tamaarissaasu. Yaatanawu a he attuma naatuyyo maattaa, sukkaariyaanne tukkiyaa immaasu. Yaatada a baayyo tukkiyaa essanaadan he attuma naatussi huuphiyan huuphiyan yootaasu. A hagaadan gaasu: “Eti loytti qoppidi essidosona. Eti aybissi hegaadan qoppidaakko taani oychin, tukkee taani dosiyoogaa mala gidanaadan koyidoogaa yootidosona. Xoossay salo gufanttuwan deꞌiya gaazeti nuussi giiga gidanaadan hegaadan qoppidi walakkidoogaa taani qonccissaas.” He leemisoy naatussi haniyaaba; qassi eti siyiyoogaappe aaruwan bantta huuphen oottidobaappe tamaaranaadan maaddiis. Eti he timirttiyaa daro layttawu hassayidoogee qoncce!

10, 11. (a) Ne naꞌay Xoossan ammananaadan neeni aybaa leemisuwaa goꞌettana danddayay? (Doomettan deꞌiya misiliyaa xeella.) (b) Nena maaddida leemisoti awugeetee?

¹⁰ Ne naꞌay Xoossan ammananaadan maaddanawu aybippe aybippe qumaa kattanaakko xaafidobaa goꞌettana danddayaasa. Waatada? Neeni keekkiyaa katta simmada, hegawu xaafidobay waati maaddiyaakko yoota. Yaatada ne naꞌaayyo appile mala mittaa ayfiyaa immada, “Ha appilee xaafi wottidobaa malabaappe merettidoogaa eray?” yaagada oycha. Oychada appiliyaa naaꞌꞌu kessa qanxxada ayfiyaa ayyo imma. Kattana qumaabaa xaafido qaalaappe keehi muttumurettida qaalan xaafi wottidobay he ayfiyaa giddon deꞌiyoogaa yootana danddayaasa. Qassi, “Keekkiyaa kattanawu ay ay goꞌettanaakko xaafida uri deꞌikko, hegaappe keehi muttumurettidabaa appiliyan xaafiday oonee?” gaada oychana danddayaasa. Gita naꞌassi appiliyawu woy qassi appiliyaa ayfiya mittawu xaafi wottidobay Di en ee giyoobaa shaaho gidiyoogaa yootana danddayaasa. Qassi Deꞌuwaa Doomettaa—Oychana Koshshiyo Ichashu Oyshata giyo brooshuriyan sinttaa 10ppe 20 gakkanaassi deꞌiya misileta issippe beꞌana danddayeeta.

¹¹ Daro aawatinne aayoti Beegottite! maxeetiyan kiyiya “Hagaa Giigissiday Deꞌii?” giyo huuphe yohuwaa bantta naatuura tobbiyoogaa dosoosona. Woy qassi eti akeekanawu metennabaa guutta naata tamaarissanawu hegaa goꞌettoosona. Leemisuwawu, Denmarkke biittan deꞌiya azinaynne machiyaa horophilliyaa kafuwaara geeddarssoosona. Eti hagaadan giidosona: “Horophileti kafo mala. SHin horophilleti phuuphulliyaa phuuphullidi guutta horophilliyaa qoxana danddayiyoonaa? Kafuwawu uttiyoosaa giigissana koshshii? Qassi horophilliyaa cenggurssaa kafuwaa yettaara ane geeddarssa. Yaatin horophilliyaa medhidaagaappenne kafuwaa medhidaagaappe keehi eranchay oonee?” Loꞌꞌo oyshaa oychidi hegaa mala qofaa yootiyoogee naꞌay ‘adussi qoppanaadaaninne’ Xoossan ammananaadan maaddana danddayees.—Lee. 2:10-12.

12. Naati Geeshsha Maxaafaa loytti ammananaadan leemisoy waatidi maaddana danddayii?

¹² Loꞌꞌo leemisoy issi naꞌay Geeshsha Maxaafay likke gidiyoogaa mintti ammananaadankka oottana danddayees. Leemisuwawu, Iyyooba 26:7 (nabbaba) qoppa. Ha xiqisee geeshsha ayyaanay kaalettin xaafettidoogaa neeni waata qonccissana danddayay? Neeni hegaa qonccissiyaabaa coo yootiyoogaappe, ne naꞌay qoppanaadan maaddiyaabaa oottiyoogee loꞌꞌo. Iyyoobi teleskoppeenne orokeetee merettanaappe daro layttaa kasetidi deꞌidoogaa yoota. Ne naꞌay biittaa mala keehi gitabay aybinne baynnasan uttidoogaa ammananawu issoti issoti metootiyoy aybissakko bessana danddayees. Deexxiyaabay issibaa bolli uttana koshshiyoogaa bessanawu ne naꞌay kuwaasiyaa woy shuchaa goꞌettana danddayees. Asay naqaashaa demmanaappe daro wodiyaa kasetidi, Yihooway tuma gididabaa Geeshsha Maxaafan xaafissidoogaa loytti akeekanawu hegaa mala timirttee maaddana danddayees.—Nah. 9:6.

GEESHSHA MAXAAFAA MAARAA KAALLIYOOGEE AYBISSI MAADDIYAAKKO TAMAARISSITE

13, 14. Naati Geeshsha Maxaafaa maaraa loytti akeekanaadan aawaynne aayyiyaa waatidi maaddana danddayiyoonaa?

¹³ Geeshsha Maxaafaa maaraa goꞌꞌaa ne naati loytti akeekanaadan neeni eta maaddiyoogee keehi koshshiyaaba. (Mazamure 1:1-3 nabbaba.) Hegaadan oottiyo daro ogeti deꞌoosona. Leemisuwawu, ne naati keehi haaho haruuruwan deꞌiyaabadaaninne yan banttanaara deꞌana asata dooriyaabadan qoppanaadan oychana danddayaasa. Yaatada, “Yan deꞌiya ubbay sarotettan siga deꞌanaadan ubbaa eeshshay ay mala gidana bessii?” gaada oycha. Qassi Galaatiyaa 5:19-23n deꞌiya loꞌꞌo zoriyaabaa etawu yootana danddayaasa.

¹⁴ Hegaappe naaꞌꞌu keehi koshshiyaabaa tamaarana danddayettees. Koyruwan, Xoossay kessido maaray tumu sarotettaynne issippetettay deꞌanaadan maaddees. Naaꞌꞌanttuwan, Yihooway nuna haꞌꞌi tamaarissiyoogan ooratta alamiyaa deꞌuwawu giigissiiddi deꞌees. (Isi. 54:13; Yoh. 17:3) Issi ura deꞌuwan hanidabaa nu xuufiyaappe doorada he qofaa akeekanaadan maaddana danddayaasa. Wochiyo Keelan darotoo kiyiya, “Geeshsha Maxaafay Asay Laamettanaadan Oottees” giyo huuphe yohuwaappe hegaa doorana danddayaasa. Woy qassi intte gubaaꞌiyan deꞌiya uri Yihoowa ufayssanawu daroban laamettidaba gidikko, inttenaara gayttidi ba taarikiyaa yootanaadan oottana danddayaasa. Hegaa mala leemisoti Geeshsha Maxaafaa maaray qonccidi erettanaadan maaddoosona.—Ibr. 4:12.

15. Ne naata tamaarissiyo wode ne waanna halchoy ayba gidana koshshii?

¹⁵ Waanna yohoy hagaa: Ne naata tamaarissiyo wode meezetido hiilla xallaa goꞌettoppa. Loyttada qoppanawu mala. Eta layttaa akeekada, eti qoppanaadan denttetta. Tamaariyoogee ufayssiyaabaanne ammanuwaa minttiyaaba gidanaadan ootta. Issi aaway, “Gamꞌꞌidabaa tamaarissanawu ooratta hiillaa mali beꞌanawu salettoppite” yaagiis.

AMMANETTITE, DANDDAYITE, WOOSSITE

16. Naata tamaarissiyo wode, danddayiyoogee keehi koshshiyoy aybissee? Leemisuwaa yoota.

¹⁶ Ammanoy mino gidanaadan Xoossaa ayyaanaa koshshees. (Gal. 5:22, 23) Mittaa ayfiyaagaadan ammanoy diccana mala wodiyaa koshshees. Hegaa gishshawu, ne naata tamaarissiyo wode, neeni danddayananne genccana koshshees. Jaappaanen deꞌiya naaꞌꞌu naatu aaway hagaadan giis: “Ta machiyaanne taani nu naatuura daro wodiyaa aattoos. Gubaaꞌe shiiqoy deꞌiyo gallassa gidana xayikko, eta naatettaappe doommada, taani galla galla 15 daqiiqa xannaꞌissaas. Nuussikka etassikka 15 daqiiqay wayssiyaaba gidenna. Woradaa xomoosiya issi ishay hagaadan giis: “Yelagatettan taani oychabeenna daro oyshay woy yootabeenna siriyo darobay ta wozanan deꞌees. Takkada, shiiquwan woy so asaa xinaatiyan woy buzo xinaatiyan hegeetuppe darotu zaaruwaa demmaas. Yelidaageeti aggennan tamaarissiyoogee keehi koshshiyoy hegaassa.”

17. Aawaynne aayyiyaa loꞌꞌo leemiso gidiyoogee koshshiyaaba gididoy aybissee, qassi issi azinaynne machiyaa bantta macca naatussi leemiso gidiyaabaa ay oottidonaa?

¹⁷ Keehi koshshiya issibay, neeni ammanuwan leemiso gidiyoogaa. Ne naati neeni oottiyoobaa loytti xeelloosona, qassi hegee eti loꞌꞌobaa oottanaadan denttettanaagee qoncce. Hegaa gishshawu, aawatoonne aayetoo, intte ammanuwaa ubbatoo minttite. Yihooway intteyyo ay keena qonccekkonne intte naati akeekanaadan oottite. Bermuda biittan deꞌiya azinaynne machiyaa hirggiyo wode, Yihooway kaalettanaadan bantta naatuura woossoosona; qassi naatikka banttarkka woossanaadan minttettoosona. Eti hagaadan giidosona: “Nuuni nu bayra macca naꞌeessi, ‘Kumetta wozanaappe Yihoowan ammanetta, Kawotettaabaa minnada ootta, qassi daro hirggoppa’ yaagoos. A hanidabaa wurssettan akeekiyo wode, Yihooway nuna maaddiyoogaa erawusu. Hegee a Xoossaanne Geeshsha Maxaafaa ammananaadan keehi maaddiis.”

18. Yelidaageeti akeekana bessiyaabay aybee?

¹⁸ Wurssettan, naati bantta ammanoy minnanaadan oottana koshshiyoogee tuma. Eta yelida intte tokkananne haattaa ushshana danddayeeta. Hegaa dichana danddayiyay Xoossaa xalla. (1 Qor. 3:6) Yaatiyo gishshawu, a ayyaana demmanawu woossitenne intte alꞌꞌo naata minni tamaarissite; ayssi giikko, intte yaatiyoogawu Yihooway inttena keehi anjjana.—Efi. 6:4.