Xoossaa Maxaafay Yootiyoogaadan Darajjayettiis

1, 2. (a) Xoossaayyo dirijjitee deꞌiyoogaa xeelliyaagan issi issi asay woygii? (b) Ha huuphe yohuwan nuuni ay tamaaranee?

ISSI issi asay, “Nena kaalettiya dirijjite koshshenna. Neessi koshshiyaabay Xoossaara dabbotiyoogaa xalla” yaagana danddayees. He qofay likkee? Tumay ay qonccissii?

² Darajjayiyoogan maaraa Xoossaa Yihoowaara laggetiyaabi baynnaagaa qonccissiyaabaa ha huuphe yohuwan xannaꞌana. Qassi Yihoowa dirijjitee immiyo kaaletuwaa nuuni waati kaallana bessiyaakko pilggana. (1 Qor. 14:33, 40) Koyro xeetu layttaaninne ha wodiyan, Yihoowa dirijjitiyawu saꞌaa baggay darosan mishiraachuwaa sabbakanaadan Geeshsha Maxaafay maaddiis. Nuuni Geeshsha Maxaafaa mintti kaalliyo gishshawunne dirijjitee immiyo kaaletuwaa azazettiyo gishshawu, kumetta saꞌan deꞌiya gubaaꞌiyan geeshshatettay, sarotettaynne issippetettay deꞌees.

YIHOOWAY MAARAA XOOSSAA

3. Yihooway darajjayiyoogan laggetiyaabi baynnaagaa gidiyoogaa neeni ammanettanaadan oottiyay aybee?

³ Xoossay darajjayiyoogan laggetiyaabi baynnaagaa gidiyoogaa merettidabay qonccissees. Yihooway “ba aadhdhida eratettan sa7aa medhdhiis; ba akeekankka salota” minttidoogaa Geeshsha Maxaafay yootees. (Lee. 3:19) ‘Xoossay oottido oosotuppe amaridaagaa’ xallaa nuuni eroos; qassi ‘nuuni siyidoogee saasuketta xalaala.’ (Iyy. 26:14) SHin nuuni pilaanetetubaa, xoolinttetubaanne galakisetubaa eriyo guuttabay he saluwaa meretati maalaalissiya ogiyan darajjayettidoogaa ammananaadan denttettees. (Maz. 8:3, 4) Saluwan maaran mankkan yuuyiya miilooniyan qoodettiya xoolintteti galakisetun deꞌoosona. Pilaaneeteti tirafike higgiyaa naagiyaabadan awa ayfiyaa yuushuwan bantta ogiyaappe kiyennan yuuyoosona. Saluwan deꞌiyaabay keehi maalaalissiya ogiyan giigidoogee nuuni salotanne saꞌaa ‘aadhida eran medhida’ Yihoowa sabbana, awu ammanettananne goynnana bessiyoogaa akeekanaadan maaddees.—Maz. 136:1, 5-9.

4. Saynisee daro oyshaa zaaribeennay aybissee?

⁴ Saynisee saluwaabaanne saꞌabaa darobaa qonccissiis; qassi nu deꞌuwan nuna dumma dumma ogiyan maaddiis. SHin saynisee zarana danddayibeenna daro oyshay deꞌees. Leemisuwawu, saloy waani merettidaakko woy nuuni saꞌan deꞌiyoy aybissakko saluwaa meretatubaa xannaꞌiyaageeti yootana danddayokkona. Qassi, xaaxi waaxin asay merinawu deꞌanawu amottiyoy aybissakko yootana danddayiya asi baawa. (Era. 3:11) Zaaroy baynna keehi koshshiya daro oyshay deꞌiyoy aybissee? Amarida gaasoy daro saynttisttetinne hara asay Xoossay baawa giidi qoppiyo gishshataassanne lodda laamiyaa timirttiyaa tamaarissiyo gishshataassa. SHin ubbasan deꞌiya asay ba wozanan qoppiyo oyshatu zaaruwaa Yihooway ba maxaafan qonccissees.

5. Meretaa higgetun nuuni ammanettiyoy ayba ogiyaanee?

⁵ Nuuni Yihooway kessido laamettennanne ammanttiya meretaa higgiyan ammanettoos. Elekitirkiyaaranne bombbaara gayttidabaa oottiyaageeti, mandiseti, horoophiliyaa laaggiyaageeti, dottoreti eti ubbaykka he higgetun ammanettidi bantta oosuwaa oottoosona. Leemisuwawu, dottoreti asaa bollaa kifileti deꞌiyo sohoy laamettennaagaa ammanettoosona. Yaatiyo gishshawu, dottoree sahettida uraa wozanay awan deꞌiyaakko koyenna. Qassi nuuni ubbaykka meretaa higgiyaa bonchoos. Neeni mittaa bollappe guppanawunne kafodan paallanawu malikko qohettana danddayaasa.

XOOSSAY DARAAJJAYIIS

6. Yihoowayyo goynniyaageeti darajjayettana bessees giidi nuuni qoppana koshshiyoy aybissee?

⁶ Saloy tumuppe maalaalissiya ogiyan darajjayettiis. Qassi Yihooway baayyo goynniyaageeti darajjayettanaadan koyees giidi nuuni qoppiyoogee bessiyaaba. Hegawu nuna kaalettanawu Xoossay Geeshsha Maxaafaa giigissiis. Xoossaa dirijjitiyan maadettennaaninne Xoossay kessido maaraa kaallennan deꞌiyoogee ufayttennaadaaninne metootanaadan oottees.

7. Geeshsha Maxaafay maara giigida maxaafa gidiyoogaa qonccissiyaabay aybee?

⁷ Geeshsha Maxaafay Ayhudatunne Kiristtaanetu taarikee issoy issuwaara maayettennaagaa shiishshidoba gidenna. Hegee Xoossaa ayyaanay kaalettin maara xaafettida maxaafa. Geeshsha Maxaafaa giddon deꞌiya maxaafati issoy issuwaara maayettoosona. Doomettaappe Ajjuutaa gakkanaassi Geeshsha Maxaafay yootiyo waanna qofay Yihoowa haaroy suure gidiyoogee qoncciyoogaanne qaalaa gelido “zerettaa,” Kiristtoosa Kawotettaa baggaara i saꞌawu halchidobay polettiyoogaa.—Doomettaabaa 3:15; Maatiyoosa 6:10; Ajjuutaa 11:15 nabbaba.

8. Nuuni Israaꞌeelati maara darajjayettidosona gaana danddayiyoy aybissee?

⁸ Beni Israaꞌeela asay darajjayettiyoogawu leemiso gidees. Leemisuwawu, Muuse Higgiyan Xoossaa dunkkaaniyaa penggen oottanaadan maccaasay maddabettiis. (Kes. 38:8) Israaꞌeelati issi kambbiyaappe harasaa biyo wode Xoossaa dunkkaaniyaa maara efoosona. Guyyeppe, Kawuwaa Daawiti Leewatanne qeeseta citan citan darajjayiis. (1 Odi. 23:1-6; 24:1-3) Israaꞌeelati Yihoowayyo azazettiyo wode maaran mankkan, sarotettaaninne issippetettan deꞌiyoogan anjjettidosona.—Zaa. 11:26, 27; 28:1-14.

9. Koyro xeetu layttan deꞌida Kiristtaane gubaaꞌee darajjayettidoogaa qonccissiyaabay aybee?

⁹ Koyro xeetu layttan deꞌida Kiristtaane gubaaꞌee darajjayettiis; qassi kiitettidaageeti koyro heeran a yara gidido bolla gididi heemmiyaagee immiyo kaaletuwan goꞌettiis. (Oos. 6:1-6) Guyyeppe, hara ishantti bolla gididi heemmiyaagaa yaran gujettidosona. (Oos. 15:6) Koyro xeetu layttan deꞌiya bolla gididi heemmiyaagaara issippe oottiyaageeti woy eta yara gididaageeti ayyaanay kaalettin zoriyaanne kaaletuwaa immidosona. (1 Xim. 3:1-13; Tii. 1:5-9) Bolla gididi heemmiyaagee immiyo kaaletuwaa gubaaꞌeti kaalliyoogee waati maaddidee?

10. Bolla gididi heemmiyaagee kuuyidobaa beni Kiristtaaneti naagidoogee ayba ayfiyaa demissidee? (Doomettan deꞌiya misiliyaa xeella.)

¹⁰ Oosuwaa 16:4, 5 nabbaba. Bolla gididi heemmiyaagaa gishshaa issisaappe harasaa biya ishantti “Yesuusi kiittido Yerusalaamen de7iyaageetinne cimati wottido higgiyaa” woy kuuyidobaa yootidosona. Gubaaꞌeti he kuuyidobaa naagiyo wode, “ammanuwan minnidi, qoodankka gallassappe gallassan dari dari biidosona.” Geeshsha Maxaafay yootiyo ha taarikee ha wodiyan deꞌiya Xoossaa dirijjitee yootiyoobaa nuuni oosuwan peeshshiyoogee loꞌꞌo gidiyoogaa akeekanaadan maaddees.

NEENI KAALETUWAA KAALLAY?

11. Xoossaa dirijjitee immiyo kaaletuwaa aawatettay deꞌiyo ishantti waatana koshshii?

¹¹ Macara biiruwaa konttiyaa yarati woy issi biittaa konttiyaa yarati, woradaa xomoosiyaageetinne gubaaꞌe cimati Xoossaa dirijjitiyaappe kaaletoy imettiyo wode waatana koshshii? Nuuni ubbay azazettanaadaaninne haarettanaadan Yihoowa maxaafay yootees. (Zaa. 30:16; Ibr. 13:7, 17) Boriyaageetussi woy makkaliyaageetussi Xoossaa dirijjitiyan sohoy baawa; hegaa mala eeshshay nu siiquwaa, nu sarotettaanne nu issippetettaa moorana danddayees. Ammanettida Kiristtaanee Diyotirefeesadan bonchennanne ammanettenna asa gidanawu koyenna. (3 Yohaannisa 9, 10 nabbaba.) Nuuni nuna hagaadan oychana danddayoos: ‘Taani harata ayyaanaaban maaddiyaanaa? Gubaaꞌiyaa cimati immiyo kaaletuwaa eesuwan siyiyaanaanne kaalliyaanaa?’

12. Cimatinne gubaaꞌiyawu oottiyaageeti waani sunttettiyaakko laamettidabay aybee?

¹² Bolla Gididi Heemmiyaagee mata wode kuuyidobaa qoppa. Cimatinne gubaaꞌiyawu oottiyaageeti waani sunttettiyaakko laamettidabay Hidaare 15, 2014, Wochiyo Keelan “Nabbabiyaageetu Oyshan” qoncciis. He huuphe yohoy bolla gididi heemmiyaagee koyro xeetu layttan yuuyidi xomoosiyaageeti hegeeta sunttanaadan oottidoogaa qonccissiis. Hegaadan, Masqqala 1, 2014⁠ppe haa simmin, cimatanne gubaaꞌiyawu oottiyaageeta woradaa xomoosiyaageeti sunttoosona. Woradaa xomoosiyaagee danddayettiyaaba gidikko sunttiyoogeetuura haggaaziyoogan eta loytti eranawu baaxetees. I he qoppido ishaa soo asaa hanotaakka akeekees. (1 Xim. 3:4, 5) Cimatinne woradaa xomoosiyaagee gubaaꞌiyawu oottana danddayiyaageetanne cima gidana danddayiyaageeta xeelliyaagan Geeshsha Maxaafay yootiyo kaaletuwaa akeekan tobboosona.—1 Xim. 3:1-10, 12, 13; 1 PHe. 5:1-3.

13. Nuuni cimati yootiyo kaaletuwaa kaalliyoogaa waati bessana danddayiyoo?

¹³ Nuuni Geeshsha Maxaafaappe cimati yootiyo kaaletuwaa kaallana koshshees. Xoossaa dirijjitiyan deꞌiya ha ammanettida henttanchati Xoossaa Maxaafan deꞌiya ‘tumu qaalaa’ kaaletuwaa kaalloosona. (1 Xim. 6:3) Gubaaꞌiyan maara deꞌennaageeta xeelliyaagan PHawuloosi zoridobaa hassaya. Amarida asati ‘asa yohon geliyoogaappe attin, aynne oottokkona.’ Cimati eta zoriyaaba gidikkonne, eti he zoriyaa siyennan ixxidosona. Hegaa mala uraa gubaaꞌee waati oyqqana koshshii? PHawuloosi, “He uraa akeekite. . . . Appe shaahettite” yaagiis. Eti hegaa mala uraara laggetiyoogaa aggana koshshikkonne, a morkkedan xeellana bessenna. (2 Tas. 3:11-15) Ha wodiyan, ekkanawu woy gelanawu qoppidi ammanenna uraara wodiyaa aattiyoogaa mala, gubaaꞌiyaa qohana danddayiyaabaa oottiyoogaa aggenna ura xeelliyaagan cimati gubaaꞌee naagettana mala haasayaa haasayana danddayoosona. (1 Qor. 7:39) Cimati gubaaꞌiyan hegaa mala haasayaa haasayikko neeni waatuutee? He haasayan odettidabaa neeni erikko, hegaa mala uraara laggetennaadan naagettanee? Neeni siiquwan qoppiyoogeenne ne qofaa laammennaagee he uri oottiyo maara gidennabaa agganaadan denttettana danddayees.^[1]

GEESHSHATETTAY, SAROTETTAYNNE ISSIPPETTETTAY MOORETTENNAADAN NAAGA

14. Nuuni gubaaꞌee geeshsha gidanaadan waati maaddana danddayiyoo?

¹⁴ Nuuni Xoossaa Qaalan deꞌiya kaaletuwaa kaalliyoogan gubaaꞌee ayyaanaaban geeshsha gidanaadan maaddana danddayoos. Beni Qoronttoosa gubaaꞌiyan merettida hanotaa qoppa. PHawuloosi yan deꞌiya ishanttanne michontta siiqees. Qassi i etappe daroti tumaa siyanaadan maaddiis. (1 Qor. 1:1, 2) SHin i gubaaꞌee coꞌꞌu gi xeellido shori baynnabaa akeekido wode keehi metootidoogee qoncce. PHawuloosi pokkobaa oottida uraa cimati Seexaanawu immanaadan woy qassi bohanaadan yootiis. Gubaaꞌiyaa geeshshatettaa naaganawu, cimati ‘irshshuwaa’ diggana koshshees. (1 Qor. 5:1, 5-7, 12) Nagaraappe simmennan ixxida uraa bohanawu cimati kuuyidobaa nuuni maayikko, gubaaꞌee geeshsha gididi deꞌanaadan maaddoos; qassi he uri nagaraappe simmanaadaaninne Yihoowa maarotaa koyanaadan a denttettana danddayoos.

15. Gubaaꞌiyan sarotettay deꞌanaadan waatana danddayiyoo?

¹⁵ Qoronttoosa gubaaꞌiyan hara metoykka giigana koshshees. Issi issi ishantti bantta mala Kiristtaaneta pirdda keettan mootidosona. PHawuloosi, ‘Intte naaqettiyoogee kehennee?’ yaagidi eta oychiis. (1 Qor. 6:1-8) Hegaa malabay ha wodiyankka merettees. Ha wodiyan, gubaaꞌiyan deꞌiya issoti issoti bantta ishanttuura zalꞌꞌanawu maayidosona; shin guyyeppe eta miishshay kasaariis woy ishantti balbbakkidosona giidi qoppidosona. Yaatiyo gishshawu, bantta ishantta mootidosona. Hegaadan haniyo wode, asay Yihoowabaanne a asaabaa iitabaa haasayanaadan oottana danddayees. Qassi gubaaꞌiyan metoy merettanaadan oottana danddayees. Xoossaa maxaafay nuuni miishshaa kasaarikkonne, nu ishanttuura sarotettan deꞌana bessiyoogaa akeekanaadan maaddees.^[2] Walaqettidonne ooyettido wolqqaamabay giigana mala nuuni Yesuusa zoriyaa kaallana koshshees. (Maatiyoosa 5:23, 24; 18:15-17 nabbaba.) Nuuni yaatiyo wode, Yihoowawu goynniyaageetu giddon issippetettay deꞌanaadan oottoos.

16. Xoossaa asay issippetettan deꞌana giidi nuuni qoppana koshshiyoy aybissee?

¹⁶ Yihoowa maxaafay a asay issippetettan deꞌana giidi nuuni qoppana koshshiyoy aybissakko qonccissees. Mazamuraawee, “Ishantti issippetettan de7iyoogee aiba lo77obeenne ufaissiyaabee!” yaagidi yexxiis. (Maz. 133:1) Israaꞌeelati Yihoowawu azazettiyo wode, darajjayettidi issippetettan deꞌidosona. Xoossay ba asaa sinttanaa hanotaa kasetidi hagaadan giis: “Dorssati birddiyan . . . shiiqiyoogaadan, taani eta issippe shiishshada wottana.” (Mik. 2:12) Hegaa bollikka, Yihooway hananabaa yootiya Sofonaasa baggaara kasetidi hagaadan giis: “Taani asa ubbaa haasayaa geeshsha [Geeshsha Maxaafaa tumaa] haasayau laammana; yaatin, eti ubbaikka GODAA sunttaa xeegananne issippe ayyo oottana.” (Sof. 3:9) Issippetettan Yihoowawu goynniyo maataa demmido gishshawu a keehi galatoos!

17. Gubaaꞌiyaa issippetettaynne geeshshatettay naagettana mala cimati pirddaara gayttidabaa waatana koshshii?

¹⁷ Gubaaꞌiyaa issippetettaynne geeshshatettay naagettana mala, cimati pirddaara gayttidabaa eesuwan siiquwan giigissana bessees. Xoossaa siiqoy coo qofa xalla gidennaagaanne I iitaa oottiyaageeta coo aggennaagaa PHawuloosi erees. (Lee. 15:3) Hegaa gishshawu, mino gidikkonne siiqiyoogaa bessiya koyro dabddaabbiyaa PHawuloosi Qoronttoosa gubaaꞌiyawu xaafennan aggiigibeenna. Amarida aginaappe guyyiyan xaafettida Naaꞌꞌantto Qoronttoosa dabddaabbee cimati kiitettidaagaa zoriyaa oosuwan peeshshido gishshawu laamettidabay deꞌiyoogaa qonccissiis. Issi Kiristtaanee erennan moorikko, cimati a ashkketettaa ayyaanan suurissanawu baaxetana koshshees.—Gal. 6:1.

18. (a) Ayyaanay kaalettin xaafettida Xoossaa Qaalan deꞌiya zoree koyro xeetu layttaa gubaaꞌeta ayba ogetun maaddidee? (b) Kaalliya huuphe yohuwan qonccanabay aybee?

¹⁸ Ayyaanay kaalettin xaafettida Xoossaa maxaafan deꞌiya zoree koyro xeetu layttan Qoronttoosaaninne harasan deꞌiya Kiristtaaneti bantta gubaaꞌiyan geeshshatettaa, sarotettaanne issippetettaa naaganaadan maaddidoogee qoncce. (1 Qor. 1:10; Efi. 4:11-13; 1 PHe. 3:8) Hegaappe denddidaagan, he wode deꞌiya nu ishanttinne michontti haggaazuwan darobaa oottana danddayidosona. PHawuloosi mishiraachoy “sa7an de7iya mereta ubbaa matan” odettidoogaa yootiis. (Qol. 1:23) Ha wodiyan, issippetettan sabbakiya dirijjitiyaa yara gididaageeti oottiyoobaa gaasuwan Xoossaa maalaaliya halchuwaa eray kumetta saꞌaa gakkiiddi deꞌees. Eti Geeshsha Maxaafaa xoqqu oottidi xeelliyoogaanne Ubbaa Haariya Godaa Yihoowa bonchanawu murttidoogaa bessiya harabaa kaalliya huuphe yohoy qonccissees.—Maz. 71:15, 16.