saꞌay Gannate Gidana Hegee Aymooyye Tumee?

Gannatiyaa! Heeraa erissiyo brooshuriyan keehi loꞌꞌiya sohuwaa beꞌiyo wode, nuuni gannate milatiya he sohuwaa biidi, unꞌꞌettanaadan oottidabaappe shemppi ekkanawu koyoos. SHin soo simmiyo wode, nu hanotay kaseegaappe aynne laamettenna.

Gidikkokka, gannatiyaabaa qoppiyoogee ufayssiyaaba. Yaatin, ‘Gannate giyoobay coo aymoo? Yaatikko, abaa qoppiyo wode asay ufayttiyoy aybissee? Qassi hegee tuma gidana danddayii?’ giidi qoppana danddayoos.

GANNATIYAA XEELLIYAAGAN ODETTIYAABATA

Daro xeetu layttaappe doommidi, asay gannatiyaabaa eranawu qoppiis. Daroti gannatiyaabaa eranawu koyidoy, Geeshsha Maxaafay ‘away mokkiyoosaa baggaara Edene giyoosan gannatee’ deꞌees giyoogaa eri simmiina. He gannatee keehi loꞌꞌiya soho gidanaadan oottiday aybee? Geeshsha Maxaafay, “GODAI Xoossai xeellanau lo77iya, maanaukka mal77iya ubba qommo mittaa biittaappe mokissiis” yaagees. He gannatee ufayssiyaagaanne loꞌꞌiya soho. Harabay qassi, ‘Gannatiyaa gidduwan deꞌo mittaykka’ deꞌees.”—Doomettaabaa 2:8, 9.

Qassi, Doomettaabaa maxaafay gannatiyaappe goggiya oyddu shaafata yootees. He shaafatuppe naaꞌꞌati ha wodiyankka deꞌoosona; hegeeti Xegiroosa, qassi Efiraaxiisa giyo shaafata. (Doomettaabaa 2:10-14) Ha naaꞌꞌu shaafati beni Parsse, haꞌꞌi qassi Iraaqe giyo biittaa kanttidi Parsse Abbaakko goggoosona.

Saꞌan deꞌiya gannatiyaara gayttida wogaa bessiya daro buquray Parssen deꞌees. Amarkkan Penssilveniyan, Pilaadelifiyaa Muuzemiyan deꞌiya 16tta xeetu layttaa Parsse minxxaafiyaa bolli direttida ataakiltte sohuwan mittatinne ciishshati deꞌiyoogaa bessiya misilee deꞌees. Parsse qaalan “direttida ataakiltte sohuwaa” giyoogee “gannate” giyoogaara issi mala; qassi he minxxaafiyan deꞌiya misilee Geeshsha Maxaafay yootiyo loꞌꞌiya Edene ataakiltte sohuwaa bessees.

Kumetta saꞌan daro qaalaaninne wogan gannatiyaabay odettees. Asay issi biittaappe harasaa biidi deꞌiyoogaa doommiyo wode, gannatiyaabaa haraatuyyo odees; daro wodiyaappe guyyiyan hegee heeraa ammanuwaaranne haysiyaara walahettees. Ha wodiyankka, asay keehi loꞌꞌiya sohuwaa gannate milatees giyoogee meeze gididaba.

GANNATIYAA KOYIYOOGAA

Ooratta heeraa koyiya amarida asati beni gannatiyaa demmidoogaa yootoosona. Leemisuwawu, Birttaaniyaa olanchatu gadaaway CHarles Gordoni, 1881n Sishelsse biidi, Valle de May giyo keehi loꞌꞌiya sohuwaa (ha wodiyan alamiyan erettida buquratuppe issuwaadan mazggabettiis) beꞌi garamettidi, hegee Edene gannate gidiyoogaa yootiis. Qassi 15tta xeetu layttan, issisaappe harasaa biya, Xaaliyaa biittaa asa gidida Kiristofor Kolombusi Hispaniyola haruuruwaa, ha wodiyan Dominikan Iripublikenne Heyti giyo heeri biido wode Edene gannatiyaa demmidabadan qoppiis.

Mapping Paradayiz giyo ha wodiyaa taarikiyaa maxaafan 190⁠ppe dariya beni karttati deꞌoosona; hegeetuppe dariya baggan Addaameenne Hewaana Edene gannatiyan deꞌiyoogaa bessiya misilee deꞌees. Hegeetuppe 13tta xeetu layttan giigida Batus of Layibana giyo beni xuufiyaa koppiyan dummabay deꞌees. He xuufiyan huuphessa baggaara oyddu zoozee deꞌiyo saaxine malabay deꞌees; hegawu giddo baggan gannatiyaa misilee deꞌees. Hegee oyddu shaafati goggiyoogaa bessees; shaafatu sunttay “Xegiroosa,” “Efiraaxiisa,” “Pishoona,” qassi “Giyoona” geetettidi xaafetti uttiis; oyddaykka oyddu zooziyaara goggoosona; hegee Kiristtaane ammanoy saꞌaa oyddu zooziyan aakkanaagaa bessiyaabadan qoppidi medhido misile. Hegaa mala misilee, beni Gannatee awan deꞌidaakko haꞌꞌi erettennaba gidikkokka, abaa qoppiyoogee asaa ufayssiyoogaa bessees.

Jon Milten giyo, 17tta xeetu layttan deꞌida Inggilizetto danttuwaa xaafee, Addaamee nagaraa oottidi Edeneppe yedetettidoogaa yootiya Doomettaabaa maxaafaa waabe oottidi xaafido, Paradayiz Lost giyo dantto xuufiyan erettees. He xuufiyan, asay zaarettidi saꞌan merinawu deꞌanaagee odettido qofaa qonccissiis; i, “He wode kumetta saꞌay gannate gidana” yaagidi yootiis. Milteni hegaappe kaallidi Paradayiz Regeyind giyo xuufiyaa xaafiis.

QOFAY LAAMETTIIS

Asay saꞌaappe xayida gannatiyaabaa qoppiyoogaa aggibeenna. SHin haꞌꞌi daro asaa qofay laamettidoy aybissee? Mapping Paradayiz giyo maxaafan qonccidaagaadan, “haymaanootiyaa asttamaareti . . . gannatee awan deꞌidaakko eriiddi ammanennan” ixxido gishshataassa.

Woosa keettaa biya daroti wodeppe gannate gidana saꞌan gidenna saluwan deꞌanaagaa tamaaroosona. SHin Geeshsha Maxaafay Mazamure 37:29n: “Xilloti biittaa laattananne yan merinau de7ana” yaagees. Ha wodiyan alamee gannate gidenna gishshawu, ha qaalay polettanaagaa ammanettanaadan oottiyaabay aybee?a

KUMETTA SAꞌAY GANNATE GIDANA

Koyro Gannatiyaa giigissida Xoossaa Yihooway xayidaagaa mala gannatiyaa zaarettidi ehaanaagaa yootiis. Waatidi? Yesuusi, “Ne kawotettai yo; ne shenee saluwan hanidoogaadan, sa7ankka hano” yaagidi nuuni woossanaadan tamaarissidoogaa hassaya. (Maatiyoosa 6:10) He Kawotettay asaa kawotettaa xayssidi haaranawu deꞌiya, Yesuus Kiristtoosa haaro. (Daaneela 2:44) He Kawotettaa haaruwan, saꞌay gannate gidanaadan Xoossay qoppido a shenee ‘hanana.’

Daro wodiyaappe kase, hananabaa yootiya Isiyaasi yaana Gannatiyan deꞌanabaa ayyaanay denttettin qonccissiis. Payyatettaara, miishshaara, issippetettaa duussaara, zariyaara, haymaanootiyaara, heeraanne hegaa mala harabaara gayttida, ha wodiyan asaa metiya ubbabay, ooshsha ubbaynne unꞌꞌettanaadan oottiya ubbabay xayana. (Isiyaasa 11:6-9; 35:5-7; 65:21-23) Amarida daqiiqaa bazzada ha xiqiseta ne Geeshsha Maxaafaappe nabbabanaadan nena minttettoos. Yaatiyoogee, Xoossay azazettiya asawu immanawu giigissidobaa neeni eranaadan maaddana. He wode deꞌanaageeti Addaameppe halida naaꞌꞌubaa demmana; hegeekka eti gannatiyan deꞌana, qassi Xoossaa anjjuwaa demmana.—Ajjuutaa 21:3.

Saꞌay Gannate gidanaagee odettido qaalay aymo gidennan polettiyaaba gidiyoogaa nuuni ammaniyoy aybissee? Geeshsha Maxaafay, “Bolla xoqqa saloi Xoossaabaa; shin sa7aa i asaassi immiis” giyo gishshataassa. Saꞌay Gannate gidana giidi hidootiyoobay ‘worddotenna Xoossay daro wodiyaappe kase immana giidi’ qaalaa gelidoba. (Mazamure 115:16; Tiitu 1:2) Gannatiyan merinawu deꞌanaagaa Geeshsha Maxaafay yootiyoobay keehi ufayssiya hidoota!