Ayyaanaaban Kaymida Asatuura Oottiyoogan Anjjettaas

TA AAWAY Jemis Sinkilerinne ta aayyiyaa Jesa 1935 heeran, Niwu York Siti kataman deꞌiya Bronkis giyoosaa biidosona. Etaara koyro erettidaageetuppe issoy etaagaadan Iskootilandeppe yiida Wili Snedena. Eti heezzay koyro gayttosaara bantta soo asaabaa haasayidosona. Hegee taani yelettanaappe amarida layttaa kasetidi haniis.

Koyro Alamiyaa Olaappe guuttaa kasetidi, i aawaynne i bayra ishay moliyaa oyqqiyo wolwoloy shuchaara domꞌꞌettin Huuphessa Abban eti muukettidi hayqqidoogaa ta aayyiyaa Wilayyo yootaasu. Wili, “Ne aaway siꞌooliyan deꞌees!” yaagiis. Wili Yihoowa Markka, qassi ta aayyiyaa Geeshsha Maxaafaa tumaa koyro siyidoy hegaadan daganttiya ogiyaana.

Ta aayyiyaa ba aaway loꞌꞌo asa gidiyoogaa eriyo gishshawu, Wili giidoban yiillotaasu. SHin Wili gujjidi, “Yesuusi siꞌooliyaa biidoogaa taani yootiyaakko, hegee nena maaddanee?” yaagiis. Ta aayyiyaa woosa keettay Yesuusi siꞌooliyaa biidi heezzantto gallassi denddiis giidi tamaarissiyoogaa hassayaasu. Hegaa gishshawu a, ‘Siꞌoolee iitati xuugettiyo tama soho gidikko, Yesuusi yaa biidoy aybissee?’ gaada qoppaasu. Ta aayyiyaa tumaa eranaadan koyro denttettidabay hegaa. A Bronkis Gubaaꞌiyan shiiqiyoogaa doommada 1940n xammaqettaasu.

He wode, Kiristtaane aawatinne aayoti bantta naata Geeshsha Maxaafaa xannaꞌissanaadan dumma zoree imettenna. Ta naatettaa wodiyan ta aaway tana naagishin, ta aayyiyaa shiiquwaa shiiqawusunne Qeeraanne Woggaa galla haggaazawusu. Amarida layttappe guyyiyan, inne taani ta aayeera shiiquwaa shiiqiyoogaa doommida. A mishiraachuwaa minna yootawusu, qassi tumaa siyanawu koyiya darota Geeshsha Maxaafaa xannaꞌissawusu. A xannaꞌissiyoogeetuppe amaridaageeti issi heeran deꞌiyo gishshawu, issi issitoo eta issippe xannaꞌissawusu. Timirtte keettay gorddettiyo wode taani iira haggaazays. Yaatiyoogan, Geeshsha Maxaafaabaanne an deꞌiya qofaa asaa tamaarissiyo ogiyaabaa darobaa eraas.

Taani naatettan tumaa loytta nashshabeykke; hegee azzanttiyaaba. SHin tawu layttay 12 heera gidiyo wode, Kawotettaabaa aassiyaagaa gidaas; he wodeppe doommada ubbatoo haggaazays. Tawu layttay 16 gidiyo wode tana Yihoowawu geppada, Isiine 24, 1954n, Kanaadan Toronto kataman xammaqettaas.

BEETEELEN OOTTIYOOGAA

Nu gubaaꞌiyan issi issi ishantti kase woy he wode Beeteele keettaa asaa yarata. Eti tana loꞌꞌobawu keehi denttettidosona. Eti Geeshsha Maxaafaa tumaabaa loytti haasayiyoogeenne qonccissiyoogee tana maalaaliis. Ta asttamaareti taani Yuniversttiyaa gelanaadan koyoosona, shin ta Beeteele gelanawu halchaas. Yaatiyo gishshawu, Tornoto kataman he gita shiiquwaa wode, Beeteele gelanawu malkkachaa kunttada immaas. Niwu York Sitii kataman Yankii Isttaademiyan, 1955n shiiqido gita shiiquwankka hegaadan oottaas. Hegaappe daro takkennan, tawu layttay 17 gidiyo wode, Masqqala 19, 1955n Birukiliine Beeteelen oottiyoogaa doommanaadan shoobettaas. Beeteele gelido naaꞌꞌantto galla, xaafettidabaa issippe oyttidi maxaafa kessiyoosan, 117 Adams Istrit giyoosan oottiyoogaa doommaas. Sohuwaara, maxaafaa maashiniyan sikkanawu giigissana mala, maxaafawu 32 sinttaa issippe shiishshiya maashiniyan oottiyoogaa doommaas.

Xaafettidabaa issippe oyttidi maxaafa kessiyo kifiliyan issi agina gidiyaagaa ootta simmada, taani tayppiyan xaafiyoogaa eriyo gishshawu, Maxeetiyaa Kifiliyan oottanaadan maddabettaas. He wode, ishanttinne michontti Wochiyo Keelaanne Beegottite! maxeetiyaa kiittanaadan biron oychiyaageetu adraashshaa istensiliyan (birataappe oosettida guuttaban) xaafoosona. Guutta aginaappe guyyiyan, Xuufiyaa Kiittiyo Kifiliyan oosuwaa doommaas. He kifiliyaa xomoosiya Klawus Jenseni, xuufeta kumetta saꞌaa kiittanawu wottiyoosaa kaamiyan efiya ishaara oottanawu taani koyiyaakkonne oychiis. Amarkkan deꞌiya ubba gubaaꞌetussi kiittanawu postta keettaa gattiyo maxeetetikka deꞌoosona. Wolqqaa oosoy tawu loꞌꞌo gidanaagaa Ishaa Jenseni yootiis. Taani he wode, 57 kilo giraame, qassi keehi leeꞌe. Markkabiyan caaniyoosaanne postta keetti biyoogee taani asatettan minnanaadan maaddiis. Ishaa Jenseni tawu aybi loꞌꞌokko eridoogee qoncce!

Maxeetiyaa Kifilee gubaaꞌeti oychido maxeetiyaa kiittees. Nu maxeetee Birukiliinen attamettidi alamiyan deꞌiya dumma dumma biittaa kiitettiyo qaalatubaa taani hegaadan eraas. Taani he qaalatuppe darota mule siya erikke, shin tammu shaꞌan qoodettiya nu maxeeteti keehi haahosan deꞌiya daro biittawu kiitettiyoogaa eridoogee tana keehi ufayssiis. Taani he wode erana xayikkonne, guyyeppe he biittatuppe darota beꞌiyo maataa demmaas.

Taani 1961n, Grant Suteri xomoosiyo, miishshaara gayttidabaa oottanawu ooso kifiliyan madabettaas. Yan amarida layttaa ootta simmin, he wode kumetta saꞌan oosettiya oosuwaa kaalettiya Naatan Noora biiruwaa baanaadan tawu odettiis. I ba biiruwan oottiya ishanttuppe issoy issi aginawu Kawotettaa Haggaazuwaa Timirtte Keettan tamaaranawu baanaagaanne hegaappe simmidi Haggaazuwaa Kifiliyan oottanaagaa yootiis. Taani a sohuwan Don Adamsaara oottanaadan maddabettaas. Doni 1955n gita shiiquwan, taani Beeteele gelanawu kunttido malkkachaa ekkida ishaa. He biiruwan oottiya hara naaꞌꞌu ishantti Robert Waalenanne CHarles Malahana. Nuuni oydday 50 layttappe daruwaa issippe oottida. Ayyaanaaban kaymida hegeetu mala ammanettida asatuura oottiyoogee keehi ufayssiyaaba!—Maz. 133:1.

Taani 1970⁠ppe doommada, layttan layttan woy naaꞌꞌu layttan issitoo amarida saaminttawu kase zoniyaa xomoosuwaa geetettiyaagaa xomoosanawu Wach Tawer Soosaytiyaa daro macara biirota baas. He oosoy kumetta saꞌan deꞌiya Beeteele keettaa asaanne misoonaaweta xomoosiyoogaanne ayyaanaaban minttettiyoogaa, qassi macara biiruwaa mazggafaa xeelliyoogaa. Giiliyaade Timirtte Keettan doometta heeran tamaaridi he wodekka hara biittan ammanettidi oottiya amaridaageetuura gayttiyoogee keehi ufayssiyaaba! Taani 90⁠ppe dariya biittata he oosuwan beꞌidoogee tana keehi ufayssiya gita maata.

AMMANETTIYA LAGGE DEMMAAS

Birukiliine Beeteele keettaa asay ubbay Niwu York Sitii heeran deꞌiya gubaaꞌetun maddabettiis. Taani maddabettido gubaaꞌee Bronkisen deꞌees. Yan deꞌiya koyro gubaaꞌee diccidi naaꞌꞌu gubaaꞌe gidiis. Taani yan shiiqiyo he koyroogee Apper Bronkis Gubaaꞌe geetettiis.

Tohossa Bronkisen tumaa siyida, Laativiyaa biittaa asa gidida Yihoowa Markka so asay 1965 heeran he gubaaꞌiyaa moottaa yiis. Eta bayra naꞌiyaa Liviya, naaꞌꞌantto xekka timirttiyaa wurssosaara kumetta wodiyaa aqinye gidaasu. Amarida aginappe guyyiyan, a Kawotettaabaa aassiyaageeti keehi koshshiyoosan haggaazanawu Massachusetis giyoosaa baasu. Taani gubaaꞌiyan hanida oorattabaa iyyo xaafiyoogaa doommaas; a qassi Bostene heeran haggaazuwan demmido ayfiyaabaa zaarada tawu xaafawusu.

Amarida layttappe simmin, Liviya dumma aqinye gidaasu. A Yihoowawu haggaazanawu bawu danddayettida ubbaa oottanawu koyido gishshawu, Beeteele gelanawu malkkachaa kunttada, 1971n yaa gelanaadan shoobettaasu. Hegee tawu Yihoowappe yiida malaata milatiis! Xiqimita 27, 1973n o ekkaas; nu bullachcha haasayaa Ishaa Noori haasayidoogee nuussi gita maata. Leemiso 18:22y, ‘Loꞌꞌo macho demmida asi loꞌꞌobaa demmiis; he uray Yihoowankka nashettees’ yaagees. Liviyanne taani issippe Beeteelen 40⁠ppe dariya layttaa haggaaziyo gita maataa demmida. Haꞌꞌikka Bronkisen deꞌiya issi gubaaꞌiyan maaddoos.

KIRISTTOOSA ISHANTTUURA ISSIPPE OOTTIYOOGAA

Ishaa Nooraara oottiyoogee tumukka ufayssiyaaba. I tumawu minni oottiya, qassi kumetta saꞌan deꞌiya misoonaaweta keehi nashshiya asa. Etappe daroti maddabettido wode he biittatun hara Yihoowa Markki baawa. Ishaa Noora 1976n kanseriyaa harggee tuggayiyoogaa beꞌiyoogee keehi azzanttiyaaba. I hiixaappe denddana danddayenna wode issitoo, attamissanawu giigissiyo amaridabaa ayyo nabbabanaadan tana oychiis. I taani nabbabiyoobaa Fredirik Franzikka siyanaadan a xeesana mala tana oychiis. Ishaa Franza ayfee wayssiyo gishshawu, Ishaa Noori daro wodiyawu hegaa malabaa ayyo nabbabiyoogaa guyyeppe eraas.

Ishaa Noori 1977n hayqqiis; shin i saꞌaa deꞌuwaa ammanettidi wurssido gishshawu, a eriyaageetinne siiqiyaageeti minettidosona. (Ajj. 2:10) Hegaappe simmin, Ishaa Franzi nu oosuwaa kaalettiis.

He wode taani, daro layttawu Ishaa Nooraara oottida Miltten Henshilawu xaafe gidada oottays. Ishaa Henshili Beeteelen hegaappe simmin ta waanna oosoy Ishaa Franza koshshiya ubbaban maaddiyoogaa gidiyoogaa yootiis. Xuufeti attamettanaappe kase taani ubbatoo ayyo nabbabays. Ishaa Franzi hassayiyo hanotaynne ba wozanaa nabbabettiyaaban muleera wottiyo hanotay maalaalees. I saꞌaa deꞌuwaa Tisaase 1992n wurssana gakkanaashin taani hegaadan a maaddidoogee keehi ufayssiyaaba!

Taani Beeteelen haggaazido 61 layttay eesuwan aadhiis. Ta aawaykka ta aayyiyaakka Yihoowawu ammanetti deꞌidi hayqqidosona; qassi keehi loꞌꞌo alamiyan eti denddin eta mokkanawu yeemottada naagays. (Yoh. 5:28, 29) Ammanettida attuma asaaranne macca asaara kumetta saꞌan deꞌiya Xoossaa asawu oottiyo maalaaliya maatay ha alamee immiyo aybiiranne geeddarssana danddayiyooba gidenna. Liviyanne taani kumetta wodiyaa haggaazido layttatun ‘Yihoowa ufayssay nuuyyo wolqqa’ gidiis gaana danddayoos.—Nah. 8:10.

Yihoowa dirijjitiyan onakkoogaa keena koshshiya asi deꞌenna giyo uri baa; qassi Kawotettaa mishiraachoy ubbatoo odettees. Minnidi oottiya ammanettida daro ishanttuuranne michonttuura daro layttawu taani oottidoogee keehi ufayssiya gita maata. Taani etaara oottido tiyettida ishanttuppe daroti haꞌꞌi saꞌan deꞌokkona. SHin ayyaanaaban kaymida hegeetu mala ammanettida asatuura Yihoowawu issippe oottido gishshawu a galatays.