Geeshsha Maxaafaa Kaaletoy Ha Wodiyan Maaddii?

ISSI ISSI ASAY MAADDENNA GEES. Issi dottoree Geeshsha Maxaafaa kaaletuwaa kaalliyoogee 1920 heeran attamettida maxaafaappe kemisttiriyaa tamaarissiyoogaa mala giis. Geeshsha Maxaafaa xaasayi xeelliya uri, ‘Issi asi ha wodiyaa ooratta komppiyuteriyaa beni wode komppiyuteriyaa kaaletuwaa kaallidi goꞌettanee?’ giidi oychchana danddayees. Hegaa giyoogee issoti issoti Geeshsha Maxaafaa beni attiichchidabadan xeelloosona giyoogaa.

Tekinolojiyaa eray keehi darido ha wodiyan, issi uri beni wode kaaletuwaa kaallana koshshanddeeshsha? Interneettiyan ubbatoo ooratta zoreenne kaaletoy kiyees. Televizhiniyan daro eranchchatunne erettida asatu zoree odettees. Qassi maxaafa keettatun asi bawu maadettiyo daro maxaafati bayzettoosona; hegee daro biiloone dolaare woriyaa demissees.

Daqiiqan daqiiqan oorattabay darobay hegaadan odettishin, 2,000 gidiya layttappe kase xaafettida Geeshsha Maxaafaa issi uri kaallana koshshanddeeshsha? Geeshsha Maxaafaa xaasayi xeelliyaageeti beni xaafettida ha maxaafaa kaaletuwaa kaalliyoogee beni attiichchida kemisttiriyaa maxaafaa woy komppiyuteriyaa kaaletuwaa kaalliyoogaa mala giyoogee likkeeshsha? Hegaadan qoppiyoogee bala. Sayniseenne tekinolojee eesuwan laamettees; shin asawu koshshiya waannabay laamettidee? Asay haꞌꞌikka ufayttidi, woppu giidi, qassi so asaaranne laggetuura siiqettidi deꞌanawu koyees.

Geeshsha Maxaafay keehi gamꞌꞌida maxaafa gidi uttidikka, hegeetubaanne hara darobaa yootees. Qassi he maxaafay nuna Medhdhidaagaa kaaletuwan xaafettidoogaa yootees. Nu deꞌuwan aybiininne kaaletuwaanne metiya aybanne xoonanawu maaddiyaabaa immanaagaakka qonccissees. (2 Ximootiyoosa 3:16, 17) Hegaa bollikka, ay wodenne maaddiya, mule laamettenna zoree an deꞌiyoogaa qonccissees! Geeshsha Maxaafay, ‘Xoossaa qaalay paxa deꞌees’ yaagees.—Ibraawe 4:12.

Geeshsha Maxaafay yootiyo he qofay tuma gidanddeeshsha? I beni attiichchida maxaafeeyye, ha wodiyankka nuna maaddiya zoriyaa yootiya paxa deꞌiya maxaafee? Kaalli kaalli kiyiya dumma maxeetetuppe koyro gidida ha Wochiyo Keelay ha oyshatu zaaruwaa ne eranaadan maaddanawu giigiis.