“Xoossay Awu Biidee?”

DAAFABAY GAKKIYO WODE, ‘XOOSSAY AWU BIIDEE?’ GAADA OYCHCHA ERAY? WOY QASSI NE DEꞌUWAN GAKKIDA KEEHI AZZANTTIYAABAY NEENI XOOSSAY NEESSI QOPPIYAAKKONNE SIRANAADAN OOTTIDEE?

Amarkkan deꞌiya sheꞌiliigaadan neeyyookka siyettennan aggenna. Haymaanootiyaa mintti kaalliya keettan diccida A hagaadan gaasu: “Xoossay nuna Medhdhidaagaa gidiyo gishshawu, taani naatettaappe doommada A siiqays. SHin, taani akko shiiqidabadan taassi mule siyetti erenna. I tana haahuwaappe xeelliyaabadan qoppays. Xoossay tana ixxees gaada qoppa erennaba gidikkonne, I tana siiqees gaadakka qoppa erikke.” SHeꞌila aybissi siradee? A hagaadan gaasu: “Daafabay bolli bollan nu soo asaa gakkiis; qassi Xoossay nuna mule maaddennaba milatiis.”

SHeꞌiliigaadan, Ubbaa Danddayiya Xoossay deꞌiyoogaa neeni ammanennan waaya aggana. Gidoppe attin, I tumuppe neessi qoppiyaakkonne neeni sirennan aggakka. Medhdhidaagawu wolqqaynne aadhdhida eratettay deꞌiyoogaa ammanida xillo bitanee Iyyoobikka hegaadan siriis. (Iyyooba 2:3; 9:4) Iyyoobi woppu gaanawu naagiyoobi baynnan, daafabay bolli bollan A gakki simmin, I Xoossaa hagaadan oychchiis: “Neeni aibissi ne som77uwaa taappe genttai? Qassi tana aibissi ne morkkedan qoodai?”—Iyyooba 13:24.

Geeshsha Maxaafay woygii? Daafabay gakkiyo wode Xoossan gaasoyana koshshii? Xoossay asa ubbaassinne nuussi huuphiyan huuphiyan qoppiyoogaa bessiya naqaashi deꞌii? I nuna loytti xeelliyaakkonne, nubaa akeekiyaakkonne, nuussi qarettiyaakkonne, woy nu metuwan nuna maaddiyaakkonne erana danddayiya uri nu giddon deꞌii?

Xoossay nuussi qoppiyoogaa xeelliyaagan meretaappe nuuni ay tamaaranaakko kaalliya huuphe yohotun pilggana. (Roome 1:20) Qassi Xoossay nuussi qoppiyoogaa xeelliyaagan Geeshsha Maxaafay qonccissiyoobaa nuuni akeekana. I medhdhidobaa baggaaranne A Qaalaa baggaara neeni loyttada ‘A eriyo’ wode, ‘I neeyyo qoppiyoogaa’ neeni kaseegaappe aaruwan ammanettana.—1 Yohaannisa 2:3; 1 PHeexiroosa 5:7