Xoossaa Sunttay Oonee?

Neeni issi uraara erettanawu oottiyoobaappe koyroy, “Ne sunttay oonee?” gaada oychchiyoogaa. Neeni he oyshaa Xoossaa oychchiyaakko, I woygi zaaranee?

‘Taani Yihoowa; hegee ta sunttaa.’—Isiyaasa 42:8, NW.

Ha sunttaa siya eray? Geeshsha Maxaafaa birshshiya daroti Xoossaa sunttaa mule goꞌettenna gishshawu, woy amarida soho xallan goꞌettiyo gishshawu, he sunttaa siyennan aggana danddayaasa. Darotoo, eti he sunttaa “GODAA” giya bonchcho sunttan laammoosona. SHin Geeshsha Maxaafay koyro xaafettido doonan Xoossaa sunttay 7,000 gidiya sohuwan deꞌees. He sunttay YHWH woy JHVH giyaagaa mala Ibraawetto oyddu guttuma pitaletun xaafettiis; qassi hegee Inggilizettuwan “Jehovah” geetetti xaafettiiddi takkiis.

Xoossaa sunttay Ibraawetto xuufetuuninne hara daro birshshettatun deꞌees

XOOSSAA SUNTTAY XOQQU OOTTIDI XEELLIYOOBA GIDIDOY AYBISSEE?

Xoossaykka he sunttaa xoqqu oottidi xeellees. Xoossay ba sunttaa bawu kessiisippe attin, ooninne awu kessibeenna. Yihooway “Hagee yeletaappe yeletaa gakkanau taani hassayettanau merinau ta suntta” yaagiis. (Kessaabaa 3:15) Geeshsha Maxaafan, Yihoowa giya Xoossaa sunttay Ubbaa Danddayiyaagaa, Aawaa, Godaa woy Xoossaa giya A bonchcho sunttaa awugaappenne woy Abrahaama, Muusa, Daawita woy Yesuusa giyaagaa mala ay buzo sunttaappenne keehi darosan deꞌees. Qassi Yihooway ba sunttay erettanaadan koyees. Geeshsha Maxaafay, “Ne xalaalai GODAA [“Yihoowa,” NW] gidiyoogaa, neeni Ubbaappe Xoqqiya Xoossai sa7aa ubbaa haariyoogaa eti erona” yaagees.—Mazamure 83:18.

Yesuusi he sunttaa xoqqu oottidi xeellees. Nu Aawawu giyo, woy Godaa Woosaa giyo woosan, Yesuusi bana kaalliyaageeti ‘Ne sunttay anjjetto’ yaagidi woossanaadan tamaarissiis. (Maatiyoosa 6:9) Yesuusikka, “Ta Aawau, ne sunttaa bonchcha” yaagidi woossiis. (Yohaannisa 12:28) Yesuusi ba deꞌuwan Xoossaa sunttaa bonchchissiyoogaa hara aybippenne sinttayido gishshawu, “Taani ne sunttaa eta erissaas; sinttaukka erissana” yaagidi woossiis.—Yohaannisa 17:26.

Xoossaa eriyaageeti he sunttaa xoqqu oottidi xeelloosona. Beni deꞌida Xoossaa asati dumma gidida Xoossaa sunttay eti naagetti attanaadan oottiyaaba gidiyoogaa akeekidosona. “GODAA [“Yihoowa,” NW] sunttai mino gimbbe mala; xillo asi yaa woxxidi saro attana.” (Leemiso 18:10) “GODAA [“Yihoowa,” NW] sunttaa xeesiya ubbai attana.” (Yuu7eela 2:32) Geeshsha Maxaafay Xoossaa sunttay awu oottiyaageeta shaakki erissiyoogaa yootees. “Asai ubbai ba xoossaa xoossaa sunttan hemettana; shin nuuni GODAA [“Yihoowa,” NW] nu Xoossaa sunttan meri merinau hemettana.”—Mikiyaasa 4:5; Oosuwaa 15:14.

XOOSSAA SUNTTAY AY QONCCISSII?

Hegee Xoossaa shaakki erissiya sunttaa. Yihoowa giyo sunttaa birshshettay “Hananaadan Oottees” giyoogaa gidiyoogaa daro eranchchati maayoosona. Xoossaa Yihooway Muuseyyo babaa, “Taani Hanana Koyiyoobaa Hanana” giidi yootidobay A sunttaa birshshettaa loytti akeekanawu maaddees. (Kessaabaa 3:14, NW) Hegaa gishshawu, Xoossaa sunttay I ubbabaa Medhdhidaagaa gidiyoogaa xalla gidennan, abaa harabaakka akeekanaadan oottees. Yihoowa sunttay I ba sheniyaa polanawu koshshiya aybanne hanana danddayiyoogaa, qassi I koyiyoogaadan hananaadan ba meretatakka oottana danddayiyoogaa bessees. Xoossaa bonchcho sunttati A maataa woy A wolqqaa qonccissana danddayoosona; shin A oonatettaanne I hanana danddayiyoobaa qonccissiyay Yihoowa giyo A sunttaa xalaala.

He sunttay Xoossay nuussi qoppiyoogaa bessees. Xoossaa sunttaa birshshettay I nuna gujjin, ba meretata siiqiyoogaa qonccissees. Qassi Xoossay ba sunttaa erissidoogee A nuuni eranaadan I koyiyoogaa bessees. Ubba I nuuni A biron oychchennan deꞌishin ba sunttaa nuussi yootiis. Xoossay nuuni A darin qonccennanne haahuwan deꞌiya xoossadan gidennan, akko shiiqana danddayiyo qoncce gidida Xoossadan xeellanaadan koyiyoogee erettidaagaa.—Mazamure 73:28.

Xoossaa sunttaa goꞌettiyoogee nuuni aara dabbotanawu koyiyoogaa bessiyaaba. Leemisuwawu, issi uraara laggetanawu koyada, I nena ne sunttan xeeganaadan yootaasa. He uray nena ne sunttan xeeganawu ixxis giikko neeyyo aybi siyettanee? He uri nenaara laggetanawu tumuppe koyidaakkonne sirana danddayaasa. Xoossaara gayttidaagankka hanotay hegaa mala. Yihooway asawu ba sunttaa yootiis; qassi nuuni A sunttaa goꞌettanaadan koyees. Yaatiyoogan, nuuni Yihoowakko shiiqanawu koyiyoogaa bessoos. Ubba I ‘ba sunttaa bonchchiyaageeta’ akeekees.—Milkkiyaasa 3:16.

Xoossaa sunttaa eriyoogee A eranawu koshshiya waannanne koyroba. SHin hegaa xallay gidenna. He sunttan xeegettiya Xoossaabaa loytti erana bessees. I ay mala Xoossakko akeekana koshshees.