Neeni Loꞌꞌo Deꞌuwaa Waata Demmana Danddayay?

HA WODIYAN deꞌoy Xoossay qoppidoogaadaana gidenna. Saꞌay Medhdhidaagawu haarettanawu koyiyaageetun, A kaaletuwaappe goꞌettiyaageetuuninne A eeshshata bessiyaageetun kumana bessees. Eti issippe ufayttiiddi naata dichchanaadan, oorattabaa eranaadaaninne kumetta saꞌaa gannate oottanaadan Xoossay koyiis.

XOOSSAY SAꞌAA DEꞌUWAA GIIGISSANAWU HALCHCHIDOOGAADAN OOTTANA

• “I sa7aa gaxaa gakkanaassi de7iya olaa teqqees.”— Mazamure 46:9.

• “Sa7aa xaissiyaageetakka neeni xaissiyo wodee ha77a.”—Ajjuutaa 11:18.

• “Xiyoonen de7iya ooninne, ‘Taani harggais’ yaagenna.”—Isiyaasa 33:24.

• “Taani dooridoogeeti bantta adussa wodiyau bantta kushiyaa oosuwan ufaittana.”—Isiyaasa 65:22.

Ha hiraagati waani polettanee? Saluwan uttidi saꞌaa haaranaadan Xoossay ba Naꞌaa Yesuusa sunttiis. Geeshsha Maxaafay he haaruwaa Xoossaa Kawotettaa gees. (Daaneela 2:44) Geeshsha Maxaafay Yesuusabaa hagaadan gees: ‘Goday ayyo kawotettaa immana; I kawotana.’—Luqaasa 1:32, 33.

Yesuusi saꞌan deꞌiyo wode oottido maalaalissiya darobati I Kawo gididi haariyo wode asaa deꞌoy keehi loꞌꞌo gidanaadan oottanaagaa bessees.

YESUUSI AZAZETTIYA ASAWU OOTTANA LOꞌꞌOBATA BESSIIS

• I hargge ubbaappe asaa pattiyoogan, sahuwaa waati xayssanaakko bessiis.—Maatiyoosa 9:35.

• I abbaa woppu oottiyoogaaninne meretaa wolqqaa teqqiyoogan asaa waati naaganaakko bessiis.—Marqqoosa 4:36-39.

• I shaꞌan qoodettiyaageeta miziyoogan, asawu deꞌossi koshshiyaabaa kunttanaagaa bessiis.—Marqqoosa 6:41-44.

• I issi bullachchan haattaa woyne eessawu laammiyoogan, asay deꞌuwan ufayttanaadan oottanaagaa bessiis.—Yohaannisa 2:7-11.

Xoossay A siiqiya asawu koyiyo deꞌuwaa neeni waata demmana danddayay? Neeni oottana bessiya issibay deꞌees. Hegaa Geeshsha Maxaafay hagaadan qonccissees: ‘Deꞌuwawu efiya ogiyaa demmiyaageeti amaridaageeta.’—Maatiyoosa 7:14.

LOꞌꞌO DEꞌUWAA DEMISSIYA OGIYAA KOYIYOOGAA

Deꞌuwaa ogee aybee? Xoossay hagaadan gees: “Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana.” (Isiyaasa 48:17) Neeni ha zoriyaa kaallikko, ne deꞌoy loꞌꞌo gidana.

Yesuusi, “Ogee, tumainne de7oi tana” yaagiis. (Yohaannisa 14:6) Nuuni Yesuusi giidobaa oottikko, qassi A leemisuwaa kaallikko, Xoossaakko shiiqananne nu deꞌoy loꞌꞌo gidana.

Deꞌuwaa ogiyaa waata demmana danddayay? Daro haymaanooteti deꞌoosona; shin Yesuusi hagaadan giis: “Saluwan de7iya ta Aawai giidoogaa oottiya urai saluwaa gelanaappe attin, ‘Ta Godau, ta Godau’ giya ubbai gelenna.” (Maatiyoosa 7:21) I gujjidi, “Eti aifiyo aifiyan intte eta erana” yaagiis. (Maatiyoosa 7:16) Tumu haymaanootee awugaakko shaakka eranaadan Geeshsha Maxaafay nena maaddana danddayees.—Yohaannisa 17:17.

Deꞌuwaa ogiyan biyoogaa waata doommana danddayay? Neeni ubba asaayyo deꞌuwaa immidaagaabaa tamaarana koshshees: I oonee? A sunttay oonee? Ay mala eeshshay ayyo deꞌii? I nuussi ay oottii? I nuuni ay oottanaadan koyii?a

Xoossay asaappe koyiyoobay oottiyoogaa, miyoogaa, kaaꞌiyoogaanne naata dichchiyoogaa xalla gidenna. Nuuni nuna Medhdhidaagaa erananne A dabbo gidana danddayoos. Nuuni A sheniyaa poliyoogan A siiqiyoogaa bessana danddayoos. Yesuusi, “Asai nena issi Xoossaa gididaagaa erana mala. . . hagee merinaa de7o” yaagiis.—Yohaannisa 17:3.

DEꞌUWAA OGIYAN BAANAWU OOTTANA BESSIYA KOYROBAA

Nuuni oottanaadan Xoossay koyiyoobaa eriyo wode, nu giigissana amaridabay deꞌees. Hegee metiyaaba milatana danddayees. SHin hegaa giyoogee nuuni deꞌuwaa ogiyan biyo wode nu deꞌoy loꞌꞌo gidana giyoogaa. Xoossaa xeelliyaagan ne oyshatu zaaruwaa neeni demmana mala maaddanawu Yihoowa Markkati neeyyo injjetiya saatiyaaninne sohuwan miishshaa qanxxissennan Geeshsha Maxaafaa xannaꞌissoosona. Neeni www.jw.org/wal giyo nu websaytiyaa goꞌettiyoogan nunaara gayttana danddayaasa.