Haratussi Siyettiyaabaa Akeeka

1. Koyro PHeexiroosa 3:8 maaran, nuussi siyettiyaabawunne nu ufayssawu qoppiya asaa giddon deꞌiyoogee nuna ufayssiyoy aybissee?

NUUSSI siyettiyaabawunne nu ufayssawu qoppiya asaa giddon deꞌiyoogee nuna ufayssees. Eti nu hanotaa qoppidi nuussi siyettiyaabaa akeekanawu baaxetoosona. Eti nuussi koshshiyaabaa akeekidi, haray atto maaddanaadan nuuni oychchanaappe kase maaddoosona. Haratussi siyettiyaabaa akeekiyab woy ‘qarettiya’ asaa, hegeekka nuussi qoppiya asaa nuuni nashshoos.—1 PHeexiroosa 3:8 nabbaba.

2. Nuuni haratussi siyettiyaabaa akeekanawu geella baaxetana koshshiyoy aybissee?

² Nuuni tumu Kiristtaaneti ubbay haratussi siyettiyaabaa akeekanawu koyoos. SHin, yaatiyoogee issi issitoo metana danddayees. Aybissi? Issi gaasoy, nuuni nagaranchcha gidiyoogaa. (Roo. 3:23) Meretan nuuni qoppiyo waannabay nubaa. Hegaa gishshawu, nuuni haratussi qoppanawu minnidi baaxetana koshshees. Qassi nuuppe issoti issoti diccido hanotaappe woy issi wode eta gakkidabaappe denddidaagan haratussi siyettiyaabaa akeekanawu metootana danddayoosona. Wurssettan, nu yuushuwan deꞌiya asaa qofay nu xeelaa moorana danddayees. Ha wurssetta gallassatun, daroti haratussi siyettiyaabaa akeekokkona. Eti “banttana siiqiyaageeta.” (2 Xim. 3:1, 2) Nuuni haratussi siyettiyaabaa akeekekennaadan oottiya paaceta xoonanaadan nuna aybi maaddana danddayii?

3. (a) Nuuni haratussi siyettiyaabaa kaseegaappe aaruwan waati akeekana danddayiyoo? (b) Nuuni ha huuphe yohuwan ay xannaꞌanee?

³ Nuuni Xoossaa Yihoowanne A Naꞌaa Yesuus Kiristtoosa leemisuwaa kaallikko, kaseegaappe aaruwan asawu siyettiyaabaa akeekana. Yihooway siiqo Xoossaa, qassi I haratussi siyettiyaabaa akeekiyoogan ooppenne aadhdhiya leemiso gidees. (1 Yoh. 4:8) Yesuusi wottiyoobi baynna ogiyan ba Aawaa leemisuwaa kaalliis. (Yoh. 14:9) I saꞌan deꞌiyo wode, asi haratussi siyettiyaabaa waati akeekana danddayiyaakko bessiis. Koyruwan, Yihoowaynne Yesuusi haratussi siyettiyaabaa akeekiyoogaa waati bessidaakko ha huuphe yohuwan xannaꞌana. Yaatidi, nuuni eta leemisuwaa waati kaallana danddayiyaakko beꞌana.

YIHOOWAY HARATUSSI SIYETTIYAABAA AKEEKIYOOGAA BESSIDOBAA

4. Yihooway ba ashkkaratussi siyettiyaabaa qoppiyoogaa Isiyaasa 63:7-9y waati bessii?

⁴ Yihooway ba ashkkaratussi siyettiyaabaa qoppiyoogaa Geeshsha Maxaafay tamaarissees. Leemisuwawu, beni Israaꞌeelati waayettido wode Yihoowawu siyettidabaa qoppa. Xoossaa Qaalay, “Eta waayee ubban i waayettiis” yaagees. (Isiyaasa 63:7-9 nabbaba.) Guyyeppe, hananabaa yootiya Zakkaariyaasa baggaara Yihooway ba asay waayettiyoogee I waayettiyoogaa mala gidiyoogaa yootiis. Yihooway ba ashkkaratuyyo, “Inttena bochchiyaagee ta aifiyaa buluwaa bochchees” yaagiis. (Zak. 2:8) Hagee Yihooway ba asawu qoppiyoogaa bessiya mino leemiso!

5. Yihooway ba asay waayettin maaddanawu ay oottidaakko bessiya issi leemisuwaa yoota.

⁵ Yihooway waayettiya ba ashkkaratussi coo qarettiyoogaaa xallan aggenna. I eta maaddanawu issibaa oottees. Leemisuwawu, Israaꞌeelati Gibxxen aylletettan waayettido wode, Yihooway eta waayiyaa beꞌidi hegaappe eta shemppissiis. Yihooway Muuseyyo hagaadan giis: ‘Taani ta asay tuggatiyo tuggaa geeshsha beꞌaasinne eti waassiyo waasuwaa siyaas. Taani eta Gibxxe biittaa asatu kushiyaappe ashshanawu wodhdhana.’ (Kes. 3:7, 8) Yihooway ba asawu qarettiyo gishshawu, I aylletettaappe eta laꞌa kessiis. Daro xeetu layttaappe guyyiyan, Hidootaa Biittan Israaꞌeelata morkketi qohidosona. Yaatin, Yihooway waatidee? “Huqqunnainne tuggai darin, eti waassiyoogaa siyidi, [I] etau qarettiis.” Zaaridikka, Yihooway ba asawu qarettiyo gishshawu, eta maaddanawu issibaa oottiis. I Israaꞌeelata morkketuppe ashshanawu daannata kiittiis.—Daan. 2:16, 18.

6. Issi ura qofay suure gidenna wodekka Yihooway awu siyettiyaabaa akeekiyoogaa bessiya leemisuwaa yoota.

⁶ Yihooway ba asawu, ubba qassi issi issitoo eta qofay suure gidenna wodekka etawu siyettiyaabaa akeekees. Yoonaasa hanotaa qoppa. Pirdda kiitaa awaajjanaadan Xoossay Yoonaasa Nanawe kiittiis. Eti bantta nagaraappe simmin, Xoossay eta xayssibeenna. Giddoppe attin, Yoonaasi hegan ufayttibeenna. I Nanawee xayana giidi yootidobay polettennan attido gishshawu, “keehi hanqqettiis.” SHin, Yihooway Yoonaasa danddayiis, qassi I ba qofaa suurissanaadan maaddiis. (Yona. 3:10–4:11) Yihooway A tamaarissidobaa I guyyeppe akeekiis; ubba qassi Yihooway ha taarikiyaa nu goꞌꞌaassi I xaafanaadan oottiis.—Roo. 15:4.c

7. Yihooway ba ashkkaratuyyo oottidobay nuuni ay ammananaadan oottii?

⁷ Yihooway ba asaayyo oottidobay I ba ashkkaratussi qarettiyoogaa nuuni ammananaadan oottees. I nu ubbaa waayiyaanne tuggaa erees. Yihooway ‘asaa ubbaa wozanaa erees.’ (2 Odi. 6:30) Nu qofaa, nuussi siyettiyaabaanne nuuyyo danddayettennabaa I akeekees. Qassi I “[nu] wolqqai danddayiyoogaappe aadhdhiya paaciyan [nu] paacettanau koyenna.” (1 Qor. 10:13) Ha qofay ay keena minttettiyaabee!

YESUUSI HARATUSSI SIYETTIYAABAA AKEEKIYOOGAA BESSIDOBAA

8-10. Yesuusi haratuyyo qoppanaadan geella aybi maaddidee?

⁸ Yesuusi asa gididi saꞌan deꞌido wode, haratussi wozanappe qoppiis. Asawu qoppanaadan A maaddida heezza gidiyaabati deꞌoosona. Koyruwan, qommoora beꞌidoogaadan, Yesuusi saluwan deꞌiya ba Aawaa eeshshaa loytti qonccissiis. I ba Aawaadan asaa siiqees. Yesuusi Yihooway oottido ubbaban A maaddidoogan ufayttidaba gidikkonne, I ‘asaa naatun ufayttido’ ufayssay dumma. (Lee. 8:31) Yesuusi haratussi siyettiyaabaa akeekanaadan siiqoy A denttettiis.

⁹ Naaꞌꞌanttuwan, Yihoowadan, Yesuusikka asaa wozanaa erees. Asay issibaa oottanaadan denttettiyaabaanne etawu siyettiyaabaa I erees. (Maa. 9:4; Yoh. 13:10, 11) Hegaa gishshawu, asay keehi azzanidoogaa Yesuusi akeekido wode etawu qoppiis, yaatiyo gishshawu I eta minttettiis.—Isi. 61:1, 2; Luq. 4:17-21.

¹⁰ Heezzanttuwan, asaa bolli gakkiya metotuppe amaridaagee Yesuusa bollikka gakkiis. Leemisuwawu, Yesuusi hiyyeesa keettan diccennan aggenna. Bana dichchida aawaa Yooseefaara oottiyoogan, Yesuusi deexxiya wolqqa oosuwaa waatidi oottana danddayiyaakko tamaariis. (Maa. 13:55; Mar. 6:3) Yooseefi Yesuusi saꞌan ba haggaazuwaa wurssanaappe kase hayqqennan aggenna. Hegaa gishshawu Yesuusi I siiqiyo uri hayqqin seelettennan aggenna. Qassi ammanuwan issuwaa gidenna so asaara deꞌiyoogee ay malakko Yesuusi erees. (Yoh. 7:5) Hageetinne hara hanotati, Yesuusi asaa metuwaanne etawu siyettiyaabaa akeekanaadan maaddennan aggokkona.

11. Yesuusi asawu siyettiyaabaa akeekiyoogee qoncci beettidoy awudee? Qonccissa. (Koyro sinttan deꞌiya misiliyaa xeella.)

¹¹ Yesuusi asawu qoppiyoogee I maalaalissiyaabata oottido wode qoncci beettiis. Yesuusi maalaalissiyaabata oottana koshshiyo gishsha xallawu oottibeenna. I metootidaageetuyyo “qarettiis.” (Maa. 20:29-34; Mar. 1:40-42) Leemisuwawu, Yesuusi hayttay siyenna bitaniyaa pattanawu daro asaa giddoppe A gaxa kessido wode woy amꞌꞌeessi issi naꞌa gididaagaa hayquwaappe denttido wode ayyo aybi siyettidaakko qoppa. (Mar. 7:32-35; Luq. 7:12-15) Yesuusi he asatuyyo siyettiyaabaa akeekiisinne eta maaddanawu koyiis.

12. Yesuusi Marttissinne Mayraamissi siyettiyaabaa akeekiyoogaa Yohaannisa 11:32-35y waatidi bessii?

¹² Yesuusi Marttissinne Mayraamissi siyettiyaabaa akeekiis. Eta ishay Alꞌꞌaazari hayqqido gishshawu eti keehi azzanidoogaa beꞌidi, “Yesuusi afuxxiis.” (Yohaannisa 11:32-35 nabbaba.) I yeekkidoy hegaappe simmin ba mata laggiyaara gayttenna gishsha xallaassa gidenna. Yesuusi Alꞌꞌaazara denttanaagaa erees. Yesuusi yeekkidoy Alꞌꞌaazari hayqqidoogee A mata laggeta ay keena azzanttidaakko akeekido gishshataassa.

13. Yesuusi asawu qarettiyoogaa eriyoogee nuna minttettiyoy aybissee?

¹³ Yesuusi asawu qarettiyoogaa eriyoogee nuna keehi minttettees. Aagaadan wottiyoobi baynna ogiyan nuuni qarettennaagee qoncce. SHin, I haratussi qarettido gishshawu nuuni A siiqoos. (1 PHe. 1:8, 9) I Xoossaa Kawotettawu Kawo gididi haariiddi deꞌiyoogaa eriyoogee nuna minttettees. I mata wode meto ubbaa xayssana. Yesuusi asa gididi saꞌan deꞌido gishshawu, Seexaanaa haaroy ehiido tuggaappenne waayiyaappe asaa ashshanawu ooppenne aaruwan I maaddana danddayees. “Nuuni daafuriyo wode nuuyyo qarettanau” danddayiya Kawoy nuussi deꞌiyoogan nuuni anjjettida.—Ibr. 2:17, 18; 4:15, 16.

YIHOOWANNE YESUUSA LEEMISUWAA KAALLA

14. Efisoona 5:1, 2 qoppidi, nuuni ay oottanawu wozanappe koyiyoo?

¹⁴ Nuuni Yihoowaynne Yesuusi oottidobaa qoppiyoogee, kaseegaappe aaruwan asawu siyttiyaabaa qoppanaadan nuna denttettees. (Efisoona 5:1, 2 nabbaba.) Nuuni etaagaadan asaa wozanaabaa erana danddayokko. SHin, haratuyyo siyettiyaabaanne etawu koshshiyaabaa akeekanawu baaxetana danddayoos. (2 Qor. 11:29) Nuuni bantta xallaa siiqiya alamiyaa asaadan hanokko; nuuni ‘nu huuphe xalaalaa goꞌꞌiyaabaa koyiyoogaappe issoi issuwaa goꞌꞌiyaabaa koyanawu’ baaxetoos.—Pili. 2:4.

15. Haratuyyo siyettiyaabaa akeekana koshshiyay oonee?

¹⁵ Gubaaꞌiyaa cimati haratuyyo siyettiyaabaa akeekana koshshees. Eti heemmanaadan banttawu imettida dorssatuban oyshettanaagaa eroosona. (Ibr. 13:17) Cimati bantta ishanttanne michchontta maaddanawu qarettana koshshees. Cimati haratussi siyettiyaabaa akeekiyoogaa waatidi bessana danddayiyoonaa?

16. Haratussi siyettiyaabaa akeekiya cimay ay oottii, qassi hegee keehi koshshiyoy aybissee?

¹⁶ Haratussi siyettiyaabaa akeekiya cimay ba gubaaꞌiyan deꞌiya ishanttuuranne michchonttuura wodiyaa aattees. I oyshata oychchees, yaatidi danddayan wozanappe eti yootiyoobaa ezggees. Ubba qassi, he alꞌꞌo dorssatuppe issoy ba wozanaabaa yootanawu koyidi, gaanabay ixxin metootiyo wode hegee I yaatiyoogee koshshiyaaba. (Lee. 20:5) Issi cimay ishanttuura wodiyaa aattikko, eti issoy issuwaara kaseegaappe aaruwan ammanettoosona, dabbotoosonanne siiqettoosona.—Oos. 20:37.

17. Daro ishanttinne michchontti cimatuyyo deꞌana bessiya keehi koshshiya eeshshay ayba gidiyoogaa yootiyoonaa? Leemisuwaa yoota.

¹⁷ Cimatuyyo deꞌana bessiya keehi koshshiya eeshshay eti haratussi siyettiyaabaa akeekiyoogaa gidiyoogaa daro ishanttinne michchontti yootoosona. Ayssi? Addoleyda hagaadan gaasu: “Eti ne hanotaa akeekiyoogaa neeni hegan eriyo gishshawu, etaara haasayanawu metootakka.” A gujjada hagaadan gaasu: “Neeni etaara haasayiyo wode eti zaariyo ogiyaappe, eti neeyyo siyettiyaabaa akeekiyoogaa erana danddayaasa” yaagaasu. Issi cimay A oyqqido ogiyaa nashshiya issi ishay hagaadan giis: “Taani ta hanotaa yootiyo wode cimatuppe issoy yeekkishin beꞌaas. Taani hegaa ay wodenne hassayays.”—Roo. 12:15.

18. Nuuni waanidi haratussi siyettiyaabaa kaseegaappe aaruwan akeekana danddayiyoo?

¹⁸ Haratussi siyettiyaabaa akeekana bessiyay cimata xalla gidennaagee qoncce. Nu ubbaykka kaseegaappe aaruwan ha eeshshaa bessana danddayoos. Waatidi? Ne so asaa, qassi ne ishanttanne michchontta gakkiya metuwaa akeekanawu baaxeta. Gubaaꞌiyan deꞌiya yelagatussi, sahettidaageetussi, cimidaageetussinne eti siiqiyoogeeti hayqqidoogeetussi qoppiyoogaa bessa. Eti waaniiddi deꞌiyaakko oychcha. Eti banttawu siyettiyaabaa neeyyo yootiyo wode loytta ezgga. Neeni eta hanotaa tumuppe akeekidoogee etawu siyettanaadan maadda. Neeni oottana danddayiyo ubbaban maadda. Nuuni hegaadan oottikko, eta wozanappe siiqiyoogaa bessoos.—1 Yoh. 3:18.

19. Nuuni harata maaddanawu baaxetiyo wode hanotaadan laamettana koshshiyoy aybissee?

¹⁹ Nuuni harata maaddanawu baaxetiyo wode hanotaadan laamettana koshshees. Aybissi? Metoy gakkiyo wode asay haniyoobay dumma dumma gidiyo gishshataassa. Amaridaageeti bantta metuwaa haratuyyo yootanawu keehi koyoosona, shin harati qassi yootanawu koyokkona. Hegaa gishshawu, nuuni eta maaddanawu koyikkonne, yeellayiya oyshata eta oychchana bessenna. (1 Tas. 4:11) Harati banttawu siyettiyaabaa nuussi yootiyo wode, eti yootiyoobaa nuuni ubbatoo maayettennan aggana danddayoos. SHin, etayyo aybi siyettiyaakko, nuuni akeekana koshshees. Nuuni siyanawu eesotiyaageetanne haasayanawu eesotennaageeta gidanawu koyoos.—Maa. 7:1; Yaaq. 1:19.

20. Nuuni kaalliya huuphe yohuwan ay xannaꞌanee?

²⁰ Nuuni gubaaꞌiyan deꞌiyaageetussi qarettanawu koyikkokka, haggaazuwankka ha loꞌꞌo eeshshaa bessanawu koyoos. Nuuni erissiyo ashkkara oottiyo oosuwan haratussi siyettiyaabaa waati akeekana danddayiyoo? Nuuni hagaa kaalliya huuphe yohuwan xannaꞌana.