Loꞌꞌotettaa​—A Kaseegaappe Waata Gujjana Danddayay?

NUUNI ubbay harati nuna loꞌꞌo asa giidi qoppanaadan koyoos. SHin, ha wodiyan loꞌꞌo asa gidiyoogee metiyaaba. Hegawu issi gaasoy, daro asay ‘loꞌꞌobaa dosennaagaa.’ (2 Xim. 3:3) Eti Yihooway kessido maarata sheneho goosona. I loꞌꞌo giyoobaa, eti “iita” goosona; qassi I iita giyoobaa eti “lo77o” goosona. (Isi. 5:20) Nu kase hanotay nuna qohido gishshawunne nuuni nagaranchcha gidiyo gishshawukka loꞌꞌo asa gidiyoogee metiyaaba gidana danddayees. Hegaa gishshawu, daro layttawu Yihoowawu haggaazida issi michcheegaadan nuuyyookka siyettana danddayees. A, “Taani loꞌꞌo asa gidana danddayays gaada qoppanawu keehi metootays” yaagaasu.

Ufayssiyaabay, nuuni ubbay loꞌꞌo asa gidana danddayoos. Loꞌꞌotettay Xoossay immiyo geeshsha ayyaanaappe demmiyooba; qassi nuna gakkana danddayiya xubbiya aybippenne A ayyaanay keehi aadhdhees. Ane loꞌꞌotettay aybakko pilggidi, nuuni he eeshshaa waati loytti bessana danddayiyaakko akeekoos.

LOꞌꞌOTETTAY AYBEE?

Loꞌꞌotettaa giyoogee iitatetti baynnan, kandduwan suure gidiyoogaanne suurebaa oottiyoogaa giyoogaa. Loꞌꞌo asi ubbatoo harata maaddiyo ogiyaa koyeesinne etawu loꞌꞌobaa oottees.

Issoti issoti bantta so asawunne bantta laggetussi loꞌꞌobaa oottiyoogaa neeni akeekennan waaya aggana; shin loꞌꞌotettaa eta xallawu bessana koshshii? Nuuppe ooninne wottiyoobi baynna ogiyan ubbatoo loꞌꞌo gidana danddayennaagee qoncce; ayssi giikko, Geeshsha Maxaafay, “Xillobaa xalaalaa oottiiddi, nagara oottennan de7iya asi ha sa7aa bollan baawa” yaagees. (Era. 7:20) Kiitettida PHawuloosi, “Tanan, hegeenne ta asatettan lo77obai de7ennaagaa taani erais” yaagidi babaa ammaniis. (Roo. 7:18) Hegaa gishshawu, nuuni loꞌꞌotettaa kaseegaappe gujjanawu koyikko, he eeshshawu Pultto gidida Yihoowappe tamaarana koshshiyoogee qoncce.

“YIHOOWAY LOꞌꞌO”

Loꞌꞌobay aybakko maaraa kessiyay Xoossaa Yihoowa. Geeshsha Maxaafay Yihoowabaa hagaadan gees: “Neeni loꞌꞌo; neeni loꞌꞌobaa oottaasa; ne awaajjuwaa tana tamaarissa.” (Maz. 119:68, NW) Yihoowa loꞌꞌotettaa xeelliyaagan ha xiqisiyan qonccida naaꞌꞌu ginata ane pilggoos.

Yihooway loꞌꞌo. Yihoowa eeshshan loꞌꞌotettay qonccennabi aybinne baawa. Yihooway Muuseyyo, “Taani ta phooliya bonchchuwaa qonccetta ubbaa ne sinttaara kanttissana” giido wode hanidabaa qoppa. Yihooway ba loꞌꞌotettaa gujjin, ba bonchchuwaa Muusa bessiis. Muusee Yihoowa qonccissiya ha qaalaa siyiis: “Taani GODAA; taani GODAA; qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. Taani ta aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa. Gidikkokka, mooranchchaa qaxxayennan aggennaagaa.” (Kes. 33:19; 34:6, 7) Yihooway ubbaban muleera loꞌꞌo gidiyoogaa hagee qonccissees. Yesuusi asi loꞌꞌo gidana danddayiyo zawaa bessidaagaa gidikkonne I, “Xoossaa xalaalaappe attin, hara lo77oi ooninne baawa” yaagiis.—Luq. 18:19.

Yihoowa oosoy loꞌꞌo. Yihooway oottiyo ubbabay loꞌꞌo. “Yihooway ubbawu loꞌꞌo; I medhdhido ubbaban A maarotay qoncciis.” (Maz. 145:9, NW) Yihooway loꞌꞌo gidiyo gishshawunne asa asappe shaakkenna gishshawu, I asa ubbawu deꞌuwaanne deꞌuwawu koshshiyaabaa immees. (Oos. 14:17) Yihooway nuussi atto giyo wodekka, loꞌꞌo gidiyoogaa bessees. Mazamuraawee, “Abeet Yihoowa, neeni loꞌꞌonne atto giyaagaa” yaagiis. (Maz. 86:5, NW) “Suuretettan hemettiyaageeta [Yihooway] lo77obaa ubbaa” diggennaagaa nuuni ammanettana danddayoos.—Maz. 84:11.

“LO77OBAA OOTTANAU TAMAARITE”

Yihooway nuuni A milatanaadan oottidi medhdhiis. Hegaa giyoogee nuuni loꞌꞌo asa gidananne loꞌꞌobaa oottana danddayoos giyoogaa. (Doo. 1:27) SHin hegee coo hanenna. Yihooway nuuni “lo77obaa oottanau” tamaarana koshshiyoogaa yootiis. (Isi. 1:17) SHin nuuni loꞌꞌobaa oottiyoogaa waati tamaarana danddayiyoo? Hegaa oottana danddayiyo heezzu ogeta ane beꞌoos.

Koyruwan, nuuni geeshsha ayyaanaa demmanawu woossana danddayoos; Kiristtaaneti Xoossaa sinttan loꞌꞌo gidanaadan geeshsha ayyaanay maaddana danddayees. (Gal. 5:22) Ee, loꞌꞌobaa siiqanaadaaninne iitabaa ixxanaadan Xoossaa ayyaanay nuna maaddana danddayees. (Roo. 12:9) Nuuni “lo77obaa ubbaa oottanaadaaninne haasayanaadan” Yihooway nuna minttana danddayiyoogaa Geeshsha Maxaafay yootees.—2 Tas. 2:16, 17.

Naaꞌꞌanttuwan, nuuni ayyaanaa kaaletuwan xaafettida Xoossaa Qaalaa nabbabana koshshees. Nuuni Geeshsha Maxaafaa nabbabiyo wode, Yihooway “lo77o ooso ubbaa” nuna tamaarissees; qassi “lo77o ooso ubbau” nuna giigissees. (Lee. 2:9; 2 Xim. 3:17) Nuuni Geeshsha Maxaafaa nabbabiyo wodenne hegaa wotti dentti qoppiyo wode Xoossaanne A sheniyaa xeelliyaagan loꞌꞌobay nu wozanan kumanaadan oottoos. Nuuni yaatiyoogan, guyyeppe nuna maaddana danddayiyaabaa minjjoos.—Luq. 6:45; Efi. 5:9.

Heezzanttuwan, nuuni ‘loꞌꞌobaa milatanawu’ nuuyyo danddayettida ubbabaa oottoos. (3 Yoh. 11) Nuuni eta leemisuwaa kaallana danddayiyo asatubaa Geeshsha Maxaafay yootees. Yihoowaynne Yesuusi ooppenne aaruwan nuussi leemiso gidiyoogee qoncce. SHin, loꞌꞌo asa gidiyoogan eretida haratubaakka nuuni xannaꞌana danddayoos. Naaꞌꞌu asatubaa, hegeetikka Xaabitibaanne Barnnaabaasabaa qoppana danddayoos. (Oos. 9:36; 11:22-24) Geeshsha Maxaafay etabaa yootiyoobaa neeni xannaꞌikko, eta loꞌꞌo leemisuwaappe neeni goꞌettana danddayaasa. Etabaa xannaꞌiyo wode eti harata maaddanawu ay oottidaakko akeeka. Intte son woy intte gubaaꞌiyan deꞌiya issota issota maaddanawu neeni ay oottana danddayiyaakko qoppa. Qassi Xaabitanne Barnnaabaasi haratussi loꞌꞌo gidido gishshawu, eti demmido loꞌꞌobaa akeeka. Neenikka hegaadan goꞌettana danddayaasa.

Nuuni ha wodiyan loꞌꞌobaa oottiya asatubaakka qoppana danddayoos. Leemisuwawu, ‘loꞌꞌobaa dosiya’ minni oottiya gubaaꞌe cimata hassaya. Qassi haasayiyoobaaninne oottiyooban ‘loꞌꞌobaa tamaarissiya’ ammanettida michchota qoppa. (Tii. 1:8; 2:3) Rasleno giyo michchiyaa hagaadan gaasu: “Ta laggiyaa gubaaꞌiyan deꞌiya harata maaddanawunne minttettanawu wozanappe baaxetawusu. A eta hanotaa qoppawusunne etawu issi issitoo guutta imotaa immawusu, woy harabaa oottiyoogan eta maaddawusu. A tumuppe loꞌꞌo asa.”

Yihooway ba asay ‘loꞌꞌobaa’ koyanaadan minttettees. (Amo. 5:14) Nuuni yaatikko, Yihooway loꞌꞌo giyoobaa siiqanaadaaninne loꞌꞌobaa oottanawu wozanappe koyanaadankka hegee nuna maaddana.

Loꞌꞌo gidanawu, nuuni haratuyyo gitabaa oottana woy etawu alꞌꞌo imotata immana koshshenna. Leemisuwawu, misiliyaa medhdhiya uri buruushiyan issitoo woy naaꞌꞌutoo xallaa bochchidi misiliyaa medhdhenna. SHin, I buruushiyan darotoo guuttaa guuttaa bochchiiddi medhdhees. Hegaadan, nuunikka guuttabaa guuttabaa harata maaddanawu darotoo oottikko, nuuni loꞌꞌo asa gidiyoogaa hegee bessana.

Geeshsha Maxaafay loꞌꞌobaa oottanawu “giigettanaadan” nuna zorees. (2 Xim. 2:21; Tii. 3:1) Issi ura bolli gakkiyaabaa nuuni akeekikko, A maaddanawunne ‘minttanawu’ danddayiyo ogeta akeekana danddayoos. (Roo. 15:2) Hegee nuussi deꞌiyaabaa immiyoogaa gidana danddayees. (Lee. 3:27) Issi ura guutta quma maanaadan woy minttettiya wodiyaa issippe aattanaadan nuuni shoobbana danddayoos. Issi uri sahettidoogaa nuuni erikko, ayyo asa bolli kiitaa yeddana, A biidi oychchana woy awu silkkiyaa dawalana danddayoos. Ee, nuuni haasayiyooban “siyiyaageeta go77ana mala, koshshiyoogaadan minttettiya lo77o “ qaalaa haasayana danddayiyo daro hanotata akeekana danddayoos.—Efi. 4:29.

Nuuni Yihoowaagaadan, asa ubbawu loꞌꞌobaa oottanawu koyoos. Hegaa gishshawu asa asappe shaakkokko. Yihoowaagaadan asa asappe shaakkennaagaa bessiyo aybippenne aadhiya issi ogee Kawotettaa mishiraachchuwaa ubbawu sabbakiyoogaa. Yesuusi azazidoogaadan, nuna ixxiyaageetussikka nuuni loꞌꞌobaa oottanawu koyoos. (Luq. 6:27) Keha gidiyoogaaninne haratussi loꞌꞌobaa oottiyoogan mule bali baawa; ayssi giikko, “hageeta milatiyaageeta diggiya higgee baawa.” (Gal. 5:22, 23) Asay nuna iita hanotan oyqqiyo wode woy nuuni waayettiyo wodekka, nuuni loꞌꞌobaa oottikko, harati tumaa siyanaadaaninne Xoossaa bonchchanaadan oottana danddayoos.—1 PHe. 3:16, 17.

NUUNI LOꞌꞌOBAA OOTTIYO WODE GOꞌETTOOS

“Lo77o asikka ba lo77o oosuwaa waagaa ekkana.” (Lee. 14:14) He waagaappe amaridaagee aybee? Nuuni haratussi loꞌꞌo gidiyo wode, etikka nuussi loꞌꞌo gidana danddayoosona. (Lee. 14:22) Harati nuussi loꞌꞌo gidana xayikkonne, nuuni etawu ubbatoo loꞌꞌobaa oottana koshshees. Hegaappe denddidaagan, eti bantta eeshshaa laammananne nuussi loꞌꞌana danddayoosona.—Roo. 12:20.

Nuuni iitabaa oottiyoogaa aggidi loꞌꞌobaa oottiyo wode, nuna goꞌꞌoos. Yaatiyoogan, daro ishanttinne michchontti goꞌettidoogaa yootoosona. Nanssi hanotaa beꞌa. A hagaadan gaasu: “Taani naatettan gitataydda biyo wode, naagettikke, pokkobaa oottaysinne kawushshaba hanays. SHin, Yihooway yootiyoobay loꞌꞌoba gidiyoogaa akeekada ayyo azazettiyo wode, ufayttiyoogaa doommaas. Haꞌꞌi tana pattenna asadan xeellikke.”

Nuuni loꞌꞌotettaa kaseegaappe gujjanaadan oottiya gaaso ubbaappe aadhdhiyaagee, yaatiyoogee Yihoowa ufayssiyoogaa. Nuuni oottiyoobaa daro asay beꞌana xayikkonne, Yihooway beꞌees. Nuuni loꞌꞌobaa oottiyoonne loꞌꞌobaa qoppiyo wode ubban I erees. (Efi. 6:7, 8) I nuna waati anjjanee? “Lo77o asi GODAAPPE sabaa demmees.” (Lee. 12:2) Simi yaakko loꞌꞌotettaa kaseegaappe gujjoos. Yihooway, “Lo77o ooso oottiya ubbatuyyo galataa, bonchchuwaanne sarotettaa immana” yaagees.—Roo. 2:10.