Kaseegaappe Loytta Xannaꞌa!

1. Amarida asay xannaꞌanawu dosennay aybisee?

HA WODIYAN, deꞌuwaassi koshshiya miishshaa demmanawu daro asay minnidi oottana koshshees. Nu ishanttuppe daroti bantta soo asawu koshshiya qumaa, maayuwaanne deꞌiyoosaa giigissanawu daro saatiyawu oottoosona. Hara daroti oosuwawu galla galla baanawunne soo simmanawu daro saatiyaa hemettoosona. Qassi daroti bantta soo asawu koshshiyaabaa kunttanawu deexxiya wolqqa ooso oottoosona. Ha minni oottiya ishanttinne michchontti soo simmiyo wode daafuroosona! Hegaappe denddidaagan, daroti xannaꞌanawu dosokkona.

2. Neeni xannaꞌanawu wode demmiyoy awudee?

² Gidikkonne, Xoossaa Qaalaanne nu xuufeta wozanappe xannaꞌanawu nuuni wodiyaa bazzana koshshees. Nuuni Yihoowaara dabbotidi deꞌanawunne merinaa deꞌuwaa demmanawu koyikko, hegee keehi koshshiyaaba! (1 Xim. 4:15) Amaridaageeti xiskki simmidi son cenggurssi siyettenna wodiyan loytti wotti dentti qoppana danddayiyo wode, xannaꞌanawu ubba galla kasetidi denddoosona. Harati omarssi soo simmiyo wode xannaꞌanawu, qassi Geeshsha Maxaafaaninne nu xuufetun nabbabidobaa wotti dentti qoppanawu bantta qofay shaahettenna wodiyaa goꞌettoosona.

3-4. Nuuni ay keena nabbabananne beꞌana koshshiyaakko laamettidabay aybee, qassi aybissi?

³ Xannaꞌanawu wodiyaa bazziyoogee keehi koshshiyaaba gidiyoogee qoncce. SHin nuuni ay xannaꞌana koshshii? Neeni hagaadan gaana danddayaasa: ‘Nabbabanawu keehi darobay deꞌees. He ubbabaa nabbabanawu tawu deexxees.’ Issoti issoti nu xuufeta ubbaa nabbabananne nuuni demmiyo Geeshsha Maxaafaa qofay deꞌiyo biidota ubbaa beꞌana danddayoosona; shin nu ishatuppe daroti yaatanawu wodiyaa demmanawu metootoosona. Bolla Gididi Heemmiyaagee hegaa erees. Hegaa gishshawu, mata wodeppe haa simmin Bolla Gididi Heemmiyaagee xuufiyankka intterneetiyankka kiyiyaabaappe poxxanawu qofaa qachchiis.

⁴ Leemisuwawu, deꞌuwan hanida keehi minttettiya darobata jw.org^® websaytiyan, qassi aginan aginan kiyiya JW Brodkastingiyaa^® pirograamiyan demmana danddayiyo gishshawu, hagaappe simmin Yihoowa Markkatu Laytta Maxaafay attamettenna. Asawu immiyo Wochiyo Keelaanne Beegottite! maxeeteti haꞌꞌi layttan heezzutoo xallaa attamettoosona. Yihoowawu goynniyoogaa shaaho gidennabati daro wodiyaa ekkenna mala hegaadan giigiis. Hegee giigido waanna halchchoy nuussi “keehi koshshiyaabaa” qoppanawu nuuni wodiyaa bazzanaassa. (Pili. 1:10, NW) Keehi koshshiyaabay aybakko neeni waata kuuyana danddayiyaakko, qassi Geeshsha Maxaafaa buzo xinaatiyaappe neeni waata loytta goꞌettana danddayiyaakko ane beꞌoos.

KEEHI KOSHSHIYAABAA

5-6. Nuuni loytti xannaꞌana koshshiyo xuufeti awugeetee?

⁵ Nuuni sinttayidi xannaꞌana koshshiyaabay aybee? Nuuni ubba galla Xoossaa Qaalaa xannaꞌanawu wodiyaa bazzana koshshiyoogee qoncce. Nuuni nabbabidobaa wotti dentti qoppanaadaaninne loytti pilgganaadan gubaaꞌiyan saaminttaa Geeshsha Maxaafaa nibaabiyawu giigidabay haꞌꞌi kaseegaappe guutta. Nu halchchoy he saaminttawu immettida xiqiseta nabbabiyoogaa xalla gidennan, hegee nuna denttettin nuuni kaseegaappe aaruwan Yihoowakko shiiqanaagaa gidana bessees.—Maz. 19:14.

⁶ Nuuni loytti xannaꞌana koshshiyo harabay aybee? Nuuni Wochiyo Keelaa Xinaatiyawunne Gubaaꞌiyaa Geeshsha Maxaafaa Xinaatiyawu, qassi saaminttawu gidduwan shiiqiyo shiiquwawu giigida harabaakka giigettanawu koyiyoogee qoncce. Qassi Wochiyo Keelaanne Beegottite! maxeetiyaa ubbaa nuuni nabbabana koshshees.

7. Nu websaytiyaaninne JW Brodkastingiyan kiyiyaaba ubbaa nabbabanawunne beꞌanawu danddayennaba gidikko, nuuni hidootaa qanxxana bessii?

⁷ Neeni, ‘Hegee loꞌꞌo, shin jw.org, websaytiyaaninne JW Brodkastingiyan kiyiya ubba xuufetanne biidota shin? Qassi hegan darobay deꞌees!’ gaana danddayaasa. Issi leemisuwaa beꞌa: Alleequwaa bayzziyo suuqiyan keehi daro qommo alleeqoy dees. Alleqo shammanawu he suuqiyaa biyaageeti ubbabaa shammana danddayokkona. Yaatiyo gishshawu, eti amaridaagaa woy issuwaa xallaa dooridi shammoosona. Hegaadan, neeni elekitronike miishshan giigiya ubbabaa nabbabananne beꞌana danddayennaba gidikko, hidootaa qanxxoppa. Neeni danddayiyoobaa nabbabananne beꞌa. Xannaꞌiyoogaa giyoogee woygiyoogaakko, qassi nuuni xinaatiyaappe danddayettida keenan daro goꞌettana mala ay oottana danddayiyaakko ane pilggoos.

XANNAꞌIYOOGEE OOSO!

8. Nuuni Wochiyo Keelaa giigettiyo wode ay ay oottana danddayiyoo, qassi yaatiyoogee nena waati maaddanee?

⁸ Neeni xannaꞌiyo wode, keehi koshshiyaabaa eranawu ne nabbabiyooban xeelaa wottana koshshees. Xannaꞌiyoogee imettida xuufiyaa eesuwan nabbabiyoogaanne coo zaaruwaa malaatiyoogaa gidenna. Leemisuwawu, Wochiyo Keelaa Xinaatiyawu giigettiyo wode, huuphe yohuwaa doomettan ha xinaatiyan giyaagaa koyro nabbaba. Kaallada, waanna huuphe yohuwaa, sima huuphe yohuwaanne zaareto oyshata nabbabada hegaa loytta qoppa. Yaatada, menttota loddaaninne akeekan nabbaba. Menttuwaabaa yootiya qofaa qashuwaa akeeka; hegee darotoo ubba menttotun koyro qofaa qashuwan deꞌees. Menttoy qonccissiyoobaa neeni eranaadan he qofaa qashoy darotoo maaddees. Neeni kumetta menttota nabbabiyo wode, ubba menttoy sima huuphe yohuwaaranne waanna huuphe yohuwaara waani gayttiyaakko qoppa. Neeni kase erenna, qassi loytta xannaꞌanawu koyiyo qaalatanne timirtteta ubbaa xaafa.

9. (a) Nuuni Wochiyo Keelaa xannaꞌiyo wode, xiqisetu qofaa loytti qoppana koshshiyoy aybissee, qassi waatidii? (b) Yaasa 1:8y qonccissiyoogaadan, nuuni xiqiseta nabbabiyoogaappe harabaa ay oottana koshshii?

⁹ Nuuni gubaaꞌe shiiquwan Wochiyo Keelaa xannaꞌiyoogee Geeshsha Maxaafaa akeekanaadan nuna maaddees. Yaatiyo gishshawu, xiqiseta, ubba qassi he huuphe yohoy gubaaꞌiyan xannaꞌettiyo wode nabbabettana xiqiseta loytta akeeka. Xiqisetun deꞌiya qaalay woy qofay menttuwan deꞌiya waanna qofaa waati qonccissiyaakko loytta qoppa. Qassi neeni nabbabiyo wode, xiqisetu qofaa, qassi ne deꞌuwan eta waata oosuwan peeshshana danddayiyaakko takki gaada loytta qoppa.—Yaasa 1:8 nabbaba.

10. Ibraawe 5:14y yootiyo maaraadan, yelidaageeti so asaa goynuwaa wode bantta naati waati xannaꞌanaakkonne waati pilgganaakko tamaarissanawu wodiyaa bazzana koshshiyoy aybissee?

¹⁰ Saaminttan saaminttan So Asaa Goynuwaa wode yelidaageeti bantta naati ufayttanaadan koyiyoogee wottin deꞌiyaaba. SHin, yelidaageeti so asaa goynuwaa wode ay xannaꞌanawu koyiyaakko ubba wode halchchana koshshikkonne, saaminttan saaminttan keehi ufayssiya dummabaa oottanaadan eti giigissana koshshenna. So Asaa Goynuwaa wode, aginan aginan kiyiya JW Brodkastingiyaa prograamiyaa beꞌana woy issi issitoo Nohe markkabiyaa issippe keexxiyoogaa mala dumma oosuwaa oottana danddayikkokka, naati waati xannaꞌanaakko eta tamaarissiyoogeekka keehi koshshiyaaba. Leemisuwawu, eti gubaaꞌe shiiqotussi waati giigettanaakko woy timirtte keettan denddida oyshata waati pilgganaakko tamaarana koshshees. (Ibraawe 5:14 nabbaba.) Eti son Geeshsha Maxaafaa qofaa xannaꞌiyoogan amarida wodiyaa aattiyaaba gidikko, gubaaꞌiyan, woradaaninne gita shiiqotun tamaariyo, biiduwan darotoo shiiqana danddayennaageeta eti akeekanawu metootokkona. Yelidaageeti issi kutti bantta naatuura ay keena xannaꞌanaakko eta layttaadaaninne eta eeshshaadan kuuyana bessiyoogee qoncce.

11. Nuuni Geeshsha Maxaafaa xannaꞌissiyoogeeti banttarkka waati loytti xannaꞌanaakko nuuni tamaarissiyoogee keehi koshshiyoy aybissee?

¹¹ Nuuni Geeshsha Maxaafaa xannaꞌissiyoogeetikka, waati xannaꞌanaakko tamaarana koshshees. Eti koyro Geeshsha Maxaafaa xannaꞌiyoogaa doommiyo wode, bantta xinaatiyawu woy gubaaꞌe shiiquwawu zaaruwaa giigettidi malaatiyoogaa beꞌiyoogee nuna ufayssees. SHin nuuni Geeshsha Maxaafaa xannaꞌissiyoogeeti waati pilgganaakko, qassi buzo waati loytti xannaꞌanaakko eta tamaarissana koshshees. Yaatiyoogan, metoy merettiyo wode eti waatana bessiyaakko gubaaꞌiyan deꞌiya harata oychchiyoogaappe nu xuufeta pilggiyoogan banttana maaddiya qofaa waati demmanaakko eti erana.

HALCHCHADA XANNAꞌA

12. Nuuni xannaꞌiyo wode ay halchchana danddayiyoo?

¹² Neeni xannaꞌanawu dosenna ura gidikko, xannaꞌiyoogee mule ufayssenna gaada qoppana danddayaasa. SHin ufayttana danddayaasa. Guutta wode xallawu xannaꞌiyoogan doomma; qassi yaatada xannaꞌiyo wodiyaa loddan loddan gujja. Neeni aybissi xannaꞌiyaakko qoppa. Aybippenne aaruwan nuuni halchchana koshshiyaabay ubbatoo Yihoowakko shiiqiyoogaa gidana bessiyoogee qoncce. Issi uri oychchido oyshaa zaariyoogee woy nuna gakkida metuwaa xeelliyaagan pilggiyoogee nuuni sohuwaara oottana danddayiyooba.

13. (a) Timirtte keettan issi yelagay ba ammanuwaabaa haratussi yootanawu ay ay oottana danddayiyaakko qonccissa. (b) Neeni Qolasiyaasa 4:6n deꞌiya zoriyaa waata oosuwan peeshshana danddayay?

¹³ Leemisuwawu, neeni tamaaraydda deꞌiya yelagee? Ne kifiliyaa tamaareti ubbay lodda laamiyan ammanana danddayoosona. Nuuni Geeshsha Maxaafay tamaarissiyoogaadan merettidoogaa neeni ammaniyo gaasuwaa yootanawu koyana danddayaasa; shin yaatanawu danddayennabadan neessi siyettennan waayi aggana. Yaatiyo gishshawu, neeni xannaꞌana koshshees! Neeni yaatiyo naaꞌꞌu gaasoy deꞌana danddayees: (1) Xoossay ubbabaa medhdhidoogaa neeni mintta ammananaassa, qassi (2) ne ammaniyoobaa waata loytta qonccissanaakko tamaaranaassa. (Roo. 1:20; 1 PHe. 3:15) Koyro, ‘Ta kifiliyaa tamaareti lodda laamiyan ammaniyoy aybissee?’ gaada nena oychchana danddayaasa. Yaatada, nu xuufeta goꞌettada he qofaa loytta pilgga. Ne ammaniyoobaa qonccissiyoogee neeni qoppidoogaadan metiyaaba gidennan aggana danddayees. Daro asay lodda laamiyan ammaniyoy eti bonchchiyo issi uri hegee tuma giidi etawu yootido gishshaa xallaassa. Neeni etawu yootana danddayiyo issibaa woy naaꞌꞌubaa demmikko, tumaa eranawu koyiya issi ura maaddana danddayaasa.—Qolasiyaasa 4:6 nabbaba.

ERANAWU LOYTTA KOYA

14-16. (a) Geeshsha Maxaafan deꞌiya, neeni loytta erenna maxaafaa eranawu ay oottana danddayay? (b) Goꞌettido xiqiseti Amoxa maxaafaa loytta akeekanawu nena waati maaddana danddayiyaakko qonccissa. (“Geeshsha Maxaafan Odettida Asatubaa Loytta Era” giya saaxiniyaakka xeella.)

¹⁴ Nuuni gubaaꞌiyan nabbabanaynne xannaꞌanay neeni loytta erennan aggana danddayiyo Geeshsha Maxaafan deꞌiya hiraaga maxaafaa gidida guuttatuppe issuwaa gaada qoppa. Oottana koshshiya koyrobay, he hananabaa yootiyaagee xaafidobaa eranawu loytta koyiyoogaa gidana danddayees. Neeni hegaa waata oottana danddayay?

¹⁵ Koyruwan, hagaadan nena oychcha: ‘Ha maxaafaa xaafidaagaabaa taani eriyoobi aybee? I oonee, I awan deꞌidee, I ay ooso oottidee?’ Nuuni he maxaafaa xaafidaagaabaa loytti eriyo wode, I he qaalata woy he leemisota aybissi goꞌettidaakko loytti akeekana danddayoos. Neeni Geeshsha Maxaafaa nabbabiyo wode, xaafida uraabaa akeekanaadan maaddiya qaalata koya.

¹⁶ Naaꞌꞌanttuwan, he maxaafay awude xaafettidaakko eriyoogee maaddees. Hegaa neeni Ooratta Alamiyaa Geeshsha Maxaafaa Birshshetta (Amaarattuwaa) wurssettaa heeran deꞌiya “Geeshsha Maxaafaa Maxaafatu Sanxxarazhiyaa” giyaagaappe metootennan erana danddayaasa. Qassi, Xoossaa Qaalaa Xannaꞌanawu Maaddiyaabaa, sinttaa 14-17n hananabaa yootiyaageetanne kawota odiya charttiyaa xeellana danddayaasa. Neeni Geeshsha Maxaafan xannaꞌaydda deꞌiyoy hananabaa yootiya maxaafa gidikko, he maxaafay xaafettiyo wode asaa deꞌoy ay malakko neeni eriyoogee loꞌꞌo. Hananabaa yootiyaagee asay giigissanaadan yootido iita xeelay woy meezee aybee? Maxaafaa xaafidaagaara issi wodiyan deꞌiday oonee? Hanotaa loytta akeekanawu Geeshsha Maxaafan dumma dumma sohuwan beꞌana danddayaasa. Leemisuwawu, hananabaa yootiya Amoxi deꞌido wodiyan aybi hanidaakko loytta eranawu, Amoxa 1:1 geeddarssanawu maaddiya 2 Kawotu Maxaafaanne 2 Hanidabaa Odiya maxaafan deꞌiya xiqiseta nabbabiyoogee nena maaddana. Hegaa bollikka, Hooseꞌi xaafidoogaa beꞌana danddayaasa; I Amoxaara issi wodiyan deꞌennan aggenna. Neeni ha maxaafata Geeshsha Maxaafan beꞌikko, Amoxa wodiyan deꞌoy ay malakko loytta akeekana.—2 Kaw. 14:25-28; 2 Odi. 26:1-15; Hoo. 1:1-11; Amo. 1:1.

DARIN KOSHSHENNABA MILATIYAABATA LOYTTA XANNAꞌA

17-18. Menttotun deꞌiya leemisota woy hara leemisuwaa goꞌettada, darin koshshennaba milatiya qofay neeni Geeshsha Maxaafaa nabbabiyo wode kaseegaappe aaruwan ufayttanaadan waati maaddana danddayiyaakko yoota.

¹⁷ Nuuni Geeshsha Maxaafaa nabbabiyo wode, kaseegaappe aaruwan eranawu mintti koyiyoogee loꞌꞌo. Leemisuwawu, Masiyaa hayquwaabaa kasetidi yootiya, Zakkaariyaasa shemppo 12 nabbabaydda deꞌiyaabadan qoppa. (Zak. 12:10) Neeni paydo 12 gakkiyo wode, Masiyaa hayquwan “Naataana zareti” yeekkanaagaa nabbabaasa. Neeni eesuwan nabbabada kanttiyoogaappe he darin koshshennaba milatiyaabatun takki gaada, nena hagaadan oychcha: ‘Naataana zaree Masiyaara waani gaytti? Hara naqaashaa demmiyo ogee deꞌii?’ Neeni guuttabaa pilggana danddayaasa. Geeddarssanawu imettidab 2 Sameela 5:13, 14 qofay, Naataani Kawuwaa Daawita naatuppe issuwaa gidiyoogaa neeni eranaadan maaddees. Geeddarssanawu imettida Luqaasa 3:23, 31, Yesuusi Mayraami baggaara Naataana zare gidiyoogaa qonccissees. (Wochiyo Keelaa, Naase 2017, sinttaa 32, mentto 4 xeella.) Neeni sohuwaara hegaa dosa bayana! Yesuusi Daawita zare gidanaagee kasetidi odettidoogaa neeni eraasa. (Maa. 22:42) SHin Daawiti 20⁠ppe dariya naata yeliis. Naataana zareti Yesuusa hayquwan yeekkanaagaa Zakkaariyaasi dummayidi yootidoogee keehi maalaaliyaaba!

¹⁸ Hara leemisuwaa beꞌa. Luqaasa koyro shemppuwan, kiitanchchay Gabreeli Mayraamikko yiidoogaanne A yelana naꞌaabaa maalaaliyaabaa yootidoogaa nuuni nabbaboos: “I gita gidana; qassi Ubbaappe Bolla Xoossaa Na7a geetettana; Godai ayyo a aawaa Daawita kawotettaa immana; inne Yaaqoobantta zariyan merinau kawotana.” (Luq. 1:32, 33) Nuuni Gabreeli Yesuusa “Ubbaappe Bolla Xoossaa Na7a” giido koyro qofaa xallaa akeekennan waayi aggana. SHin Gabreeli Yesuusi ‘Kawo’ gidanaagaakka kasetidi yootiis. Hegaa gishshawu, Gabreeli yootidobay Mayraama ay qoppanaadan oottideeshsha giidi nuuni qoppana danddayoos. A Gabreeli yootidobaa Yesuusi Kawuwaa Heeroodisa sohuwan woy appe kaallidi haariya issuwaa sohuwan Israaꞌeelan kawotana gaada qoppadee? Yesuusi kawo gididaakko, Mayraama kawuwaa aayyiyo gidana; qassi I soo asay kawo keettan deꞌana. SHin, hegaa malabaa Mayraama Gabreelayyo haasayidobaa woy qassi A Yesuusi erissiyo ashkkaratuppe naaꞌꞌatudan, Kawotettan maatay imettanaadan oychchidobaa Geeshsha Maxaafay yootenna. (Maa. 20:20-23) Ha darin koshshennaba milatiyaabay Mayraama bana keehi ziqqi oottiya macca asa gidiyoogaa nuuni mintti ammananaadan oottees!

19-20. Yaaqooba 1:22-25⁠ynne 4:8y yootiyoogaadan, nuuni xannaꞌiyo wode nu halchchoy aybee?

¹⁹ Kaseegaappe aaruwan Yihoowakko shiiqanawu koyiyoogee nuuni Xoossaa Qaalaanne nu xuufeta xannaꞌiyo waanna gaaso gidiyoogaa nuuni ubbatoo hassayana bessees. Nuuni ‘ay mala asakkonne,’ qassi Xoossaa ufayssana mala ay giigissana koshshiyaakko geeshshidi beꞌanawukka koyoos. (Yaaqooba 1:22-25; 4:8 nabbaba.) Qassi, nuuni xannaꞌiyoogaa doommiyo wode ubban, Yihooway ba ayyaanaa immanaadan woossana bessees. Nuuni nabbabiyoobaappe loytti goꞌettanaadaaninne nu laamettana koshshiyaabaa akeekanaadan Yihooway maaddana mala A woossana koshshees.

²⁰ Nuuni ubbay mazamurawee, “GODAA higgiyan i ufaittees; a higgiyaa gallassinne qammi qoppees. . . . I oottiyo ubbai au hanees” yaagido, Xoossawu ammanettida ashkkaraa mala gidanawu amottoos.—Maz. 1:2, 3.