Iitabay Gakkiyoogeetussi Siiquwaanne Tumu Pirddaa (Hagee 4ppe 3tto)

1-3. (a) Mazamure 5:4-6y yootiyoogaadan, iitatettaa xeelliyaagan Yihoowawu aybi siyettii? (b) Mattumaara gayttidaagan naꞌa qohiyoogee ‘Kiristtoosa higgiyaa’ phalqqiyaaba gaana danddayiyoy aybissee?

XOOSSAA YIHOOWAY iitatetta ubbaa ixxees. (Mazamure 5:4-6 nabbaba.) Keehi daganttiyaanne sheneyiya iita danoba gidida, mattumaara gayttidaagan naꞌa qohiyoogaa I keehi ixxees! Nuuni Yihoowa Markka gidiyo gishshawu, mattumaara gayttidaagan naꞌa qohiyoogaa Yihoowa leemisuwaa kaalliyoogan ixxoos; qassi Kiristtaane gubaaꞌiyan hegaa eriiddi coꞌꞌu gi xeellokko.—Roo. 12:9; Ibr. 12:15, 16.

² Mattumaara gayttidaagan naꞌa ayba ogiyankka qohiyoogee ‘Kiristtoosa higgiyaa’ phalqqiyaaba! (Gal. 6:2) Nuuni hegaadan gaana danddayiyoy aybissee? Hagaappe kasetiya huuphe yohuwan nuuni beꞌidoogaadan, Kiristtoosa higgiyawu, hegeekka Yesuusi haasayiyoobaaninne oottiyooban tamaarissidobawu denddoy siiquwaanne tumu pirddaa gidiyo gishshataassa. Tumu Kiristtaaneti ha higgiyawu azazettiyo gishshawu, naati woppu gaanaadaaninne eta tumuppe siiqiyoogaa naati akeekanaadan oottiya ogiyan naata oyqqoosona. SHin, mattumaara gayttidaagan naꞌa qohiyoogee ba xallaa siiqiyoobanne balaba. Hegee naꞌi bana ooninne naagenna woy siiqenna giidi qoppanaadan oottees.

³ Mattumaara gayttidaagan naꞌa qohiyoogee kumetta saꞌan deꞌiya wolqqaama meto gidiyoogee azzanttiyaaba; he metoy tumu Kiristtaanetakka qohiis. Aybissi? “Iita asatinne balettiyaageeti” daridosona; qassi amaridaageeti gubaaꞌiyaa gelanawu malana danddayoosona. (2 Xim. 3:13) Issi wode Yihoowawu haggaazida amaridaageeti pokkobaa amottidi oottiyo nagaraynne mattumaara gayttidaagan naata qohiyoogee hegawu hara gaaso. Mattumaara gayttidaagan naꞌa qohiyoogee gita nagara gidiyoy aybissakko ane beꞌoos. Yaatidi, mattumaara gayttidaagan naꞌa qohiyoogaa gujjin, gubaaꞌiyan issi uri gita nagaraa oottiyo wode cimati waatiyaakko, qassi yelidaageeti bantta naata waati naagana danddayiyaakko beꞌana.b

GITA NAGARAA

4-5. Mattumaara gayttidaagan naꞌa qohiyoogee A naaqqiyooba gidiyoy aybissee?

⁴ Mattumaara gayttidaagan naꞌa qohiyoogee asaa daro wodiyawu qohees. Hegee mattumaara gayttidaagan qohettida naata, qassi eta siiqiya eta soo asaanne Kiristtaane ishanttanne michchonttakka qohees. Mattumaara gayttidaagan naꞌa qohiyoogee gita nagara.

⁵ Qohettidaagaa naaqqiyooba.c Hegee harata qohiyaanne eti waayettanaadan oottiya nagara. Nuuni kaalliya huuphe yohuwan beꞌanaagaadan, mattumaara gayttidaagan naꞌa qohiya uri keehi wolqqaama ogiyan eta qohees. Naꞌi A ammanikkonne, I naꞌi woppu geennaadan oottiyoogaaninne gakkana koshshennabay naꞌa bolli gakkanaadan wolqqanttiyoogan eriiddi A qohees. Hegaa mala iita oosuwaappe nuuni naata naagana bessees; qassi qohettida naata minttettananne maaddana koshshees.—1 Tas. 5:14.

6-7. Mattumaara gayttidaagan naꞌa qohiyoogee gubaaꞌiyaanne kawotettaa sunttata naaqqiyooba gidiyoy aybissee?

⁶ Gubaaꞌiyaa naaqqiyooba. Gubaaꞌiyaa yame gidiiddi, mattumaara gayttidaagan naꞌa qohiya uri gubaaꞌee borettanaadan oottees. (Maa. 5:16; 1 PHe. 2:12) Hegee ‘ammanuwawu baaxetiya,’ miilooniyan qoodettiya ammanettida Kiristtaanetussi bessiyaaba gidenna. (Yih. 3) Nagaraa oottidi hegaappe simmenna uranne gubaaꞌiyaa sunttay borettanaadan oottiya ura nuuni coꞌꞌu gi xeellokko.

⁷ Kawotettaa sunttata naaqqiyooba. Kiristtaaneti “deriyaa heemmiyaageetuyyo haarettanau” bessees. (Roo. 13:1) Nuuni kawotettaa higgiyaa bonchchiyo wodenne azazettiyo wode, “deriyaa heemmiyaageetuyyo” haarettiyoogaa bessoos. Gubaaꞌe yame gidida uri higgiyaa kanttikko, leemisuwawu, mattumaara gayttidaagan naꞌa qohikko, I kawotettaa sunttata naaqqiyoobaa oottees. (Oosuwaa 25:8⁠ra gatta xeella.) Cimati kawotettaa higgiyaa polissiyaageeta gidana xayikkonne, mattumaara gayttidaagan naꞌa qohida uri qixaatiyaappe attanaadan teqqokkona. (Roo. 13:4) Nagaraa oottida uri ba zeridoogaa cakkees.—Gal. 6:7.

8. Asi asa naaqqiyoogaa Yihooway waati xeellii?

⁸ Ubbaappe aaruwan, Xoossaa naaqqiyooba. (Maz. 51:4) Issi asi hara asa naaqqiyo wode, I Yihoowakka naaqqees. Xoossay Israaꞌeelatuyyo immido issi Higgiyaa ane qoppa. Ba shooruwaa bonqqiya woykko cimmiya uri ‘Yihoowa naaqqiyoogaa’ he Higgee yootees. (Wog. 6:2-4) Yaatiyo gishshawu, mattumaara gayttidaagan naꞌa qohiyoogan he naꞌi woppu geennaadan oottiya, gubaaꞌiyaa yame gidida uri Xoossaa naaqqees. Yihoowayyo goynniyaagaa gidiyoogan erettiya uri mattumaara gayttidaagan naata qohiyoogee Yihoowa sunttay keehi borettanaadan oottees. Mattumaara gayttidaagan naata qohiyoogee Xoossaa bolli oottiyo sheneyiya danoba gidiyoogaa nuuni akeekana bessiyoy hegaassa; qassi nuuni hegaa ixxana bessees.

9. Yihoowa dirijjitee Geeshsha Maxaafay denddo gidido ay qofaa daro layttawu attamissidee, aybissi?

⁹ Daro layttawu, mattumaara gayttidaagan naꞌa qohiyoogaa xeelliyaagan Geeshsha Maxaafaa qofay deꞌiyo darobaa Yihoowa dirijjitee attamissiis. Leemisuwawu, mattumaara gayttidaagan qohettidaageeti banttana gakkidabaa gaasuwan unꞌꞌettiyoogaara gayttidaagan waatanaakko, harati eta waati maaddananne minttettana danddayiyaakko, qassi yelidaageeti bantta naata waati naagana danddayiyaakko, Wochiyo Keelaanne Beegottite! maxeeteti qonccissidosona. Mattumaara gayttidaagan naꞌa issi uri qohiyo wode, cimati waatanaakko dirijjitee etawu daro kaaletuwaa immiis. Mattumaara gayttidaagan naꞌa qohiyoogaa xeelliyaagan dirijjitee gubaaꞌee he yohuwaa oyqqiyo ogiyaa ubbatoo zaarettees. Aybissi? Nuuni he yohuwaa Kiristtoosa higgiyaara maayiya ogiyan oyqqanaadaana.

ISSI URI GITA NAGARAA OOTTIYO WODE CIMATI WAATIYOONAA?

10-12. (a) Gita nagaraara gayttida allaalliyaa beꞌiyo wode, cimati hassayana koshshiyoobay aybee, qassi eta qofissiyaabay aybee? (b) Yaaqooba 5:14, 15y yootiyoogaadan, cimati waatanawu baaxetiyoonaa?

¹⁰ Cimati gita nagaraara gayttida allaalliyaa beꞌiyo wode, eti wudiyaa siiquwan oyqqanaadaaninne Xoossaa sinttan suurenne tuma gididabaa oottanaadan Kiristtoosa higgee yootiyoogaa hassayoosona. Hegaappe denddidaagan, eti issi uri gita nagaraa oottidoogaa eriyo wode, darobaa akeekan qoppana bessees. Xoossaa sunttaa geeshshatettaa naagiyoogee cimata qofissiya waannaba gidiyoogaa nuuni tamaarida. (Wog. 22:31, 32; Maa. 6:9) Gubaaꞌiyan deꞌiya ishanttinne michchontti ayyaanaaban payya gidiyoogeekka eta keehi qofissees; qassi eti nagaraa gaasuwan qohettida uraa maaddanawu koyoosona.

¹¹ Hegaa bollikka, cimati gita nagaraa oottida uri ba nagaraappe simmidoogaa akeekanawunne, I simmikko, Yihoowaara zaarettidi dabbotanaadan maaddanawu baaxetoosona. (Yaaqooba 5:14, 15 nabbaba.) Ba iita amuwaa polanawu gita nagaraa oottiya Kiristtaanee sahettida ura mala. Hegaa giyoogee Yihoowaara ayyo dabbotay loꞌꞌo gidenna giyoogaa.d Nuuni cimata dottoretuura geeddarssana danddayoos. Eti ‘hargganchchaa [nagaraa oottidaagaa] pattanawu’ baaxetoosona. Eti Geeshsha Maxaafaappe zoriyo zoree I Xoossaara zaarettidi dabbotanaadan maaddana danddayees; shin hegaadan hanana danddayiyoy I wozanappe ba nagaraappe simmiyo wode xallaana.—Oos. 3:19; 2 Qor. 2:5-10.

¹² Cimatuyyo gita aawatettay deꞌiyoogee qoncce. Eti Xoossay banttawu immido wudiyaa wozanappe siiqoosona. (1 PHe. 5:1-3) Eti bantta ishanttinne michchontti gubaaꞌiyan woppu gaanaadan koyoosona. Yaatiyo gishshawu, mattumaara gayttidaagan naꞌa qohiyoogaa gujjin, issi uri gita nagaraa oottidoogee etawu odettiyo wode, eti eesuwaara hegaa beꞌoosona. Mentto 13, 15⁠nne 17 doomettan deꞌiya oyshata ane qoppa.

13-14. Mattumaara gayttidaagan naꞌa asi qohidoogaa issi uri yootiyo wode, kawotettaa sunttatuyyo hegaa odiyoogaa xeelliyaagan cimati kawuwaa higgiyaa azazettiyoonaa? Qonccissa.

¹³ Mattumaara gayttidaagan naata qohida ura mootuwaa kawotettaa sunttatuyyo odiyoogaa xeelliyaagan cimati kawuwaa higgiyaara maayiyaaba oottana bessii? Ee. Hegaa mala higgee deꞌiyo heeran, mattumaara gayttidaagan issi uri naꞌa qohennan aggenna giyoogaa siyida asi hegaa yootiyoogaa xeelliyaagan cimati kawotettaa higgiyaara maayiyaabaa oottanawu baaxetoosona. (Roo. 13:1) Hegaa mala higgeti Xoossaa higgiyaa kanttanaadan oottiyaageeta gidokkona. (Oos. 5:28, 29) Hegaa gishshawu, mattumaara gayttidaagan naꞌi qohettennan aggenna giyoobaa cimati siyiyo wode, hegaa yootiyoogaara gayttida higgeta waatidi azazettana danddayiyaakko macara biiruwaa sohuwaara oychchana koshshees.

¹⁴ Cimati qohettidaageetuuranne eta yelidaageetuura woy mattumaara gayttidaagan naꞌi qohettidoogaa eriya hara uraara haasayiyo wode, sunttatuyyo hegaabaa yootiyo maatay etassi deꞌiyoogaa cimati kehatettan eta hassayissoosona. Intte yootiyoobay gubaaꞌiyaa yame gidida uraabaa, qassi hegee he wode heeran erettiyaaba gidikko shin? Hegaa yootiya Kiristtaanee Xoossaa sunttaa cayissiyaabadan qoppana koshshii? CHii. Xoossaa sunttay cayettanaadan oottidaagee naata qohidaagaa.

15-16. (a) Koyro Ximootiyoosa 5:19​y yootiyoogaadan, cimati issi uri gita nagaraa oottidoogaa shaakkanawu baa giishin naaꞌꞌu markka koshshiyoy aybissee? (b) Gubaaꞌiyaa yame gidida uri mattumaara gayttidaagan naꞌa qohiis giyo mootuwaa siyiyo wode, cimati waatiyoonaa?

¹⁵ Gubaaꞌiyaa cimati issi uri gita nagaraa oottidoogaa shaakkanawu baa giishin naaꞌꞌu markka koshshiyoy aybissee? Geeshsha Maxaafay hegee bessiyaaba gidiyoogaa yootiyo gishshataassa. Gita nagaraa oottiis giidi issi ura mootin, I hegaa ammanana xayikko, cimati pirddaa konttiyaa essanaappe kase naaꞌꞌu markkay markkattana koshshees. (Zaa. 19:15; Maa. 18:16; 1 Ximootiyoosa 5:19 nabbaba.) Hegaa giyoogee issi uri mattumaara gayttidaagan naꞌa qohidoogaa hara asi sunttatuyyo yootanaappe kase naaꞌꞌu markkay markkattana koshshees giyoogee? CHii. Hegee issi uri danobaa oottiis giyo mootuwaa siyida cimati woy harati hegaa Kawotettaa sunttatussi yootiyoogaara gayttidaba gidenna.

¹⁶ Cimati gubaaꞌiyaa yame gidida uri mattumaara gayttidaagan naꞌa qohiis giyo mootuwaa siyiyo wode, he allaalliyaa yootiyoogaa xeelliyaagan kawoy kessido higgetuura maayiyaabaa oottanawu baaxetoosona; yaatidi eti hanidabaa loytti qoroosona; hegaappe simmidi, Geeshsha Maxaafay yootiyoogaadan pirddaa konttiyaa essana koshshiyaakkonne kuuyoosona. Issi uri he mootuwaa kashi giikko, cimati markkati yootiyoobaa siyoosona. Mootiyaageenne baa giishin hara issi asi, mootiyo uri mattumaara gayttidaagan naꞌa qohidoogaa yootikko, pirddaa konttiyaa essanawu cimatussi gidiya naqaashay dees.e Naaꞌꞌantto markki beettibeennaagee mootiya uri ammanettennaagaa giyoogaa gidenna. Issi uri mattumaara gayttidaagan naata qohidoogaa shaakkanawu naaꞌꞌu markki xayikkonne, mootiyo uri geella harata keehi qohiyaabaa oottidoogaa cimati eroosona. Qohettidaageeta cimati aggennan minttettoosonanne maaddoosona. Hegaa bollikka, mattumaara gayttidaagan naꞌa qohiis giidi mootiyo uri gubaaꞌiyaa qohennaadan cimati ubbatoo naagana bessees.—Oos. 20:28.

17-18. Pirddaa konttee oottiyoobay aybakko qonccissa.

¹⁷ Pirddaa konttee oottiyoobay aybee? “Pirddaa” giya qaalay qohidaagee kawotettaa higgiyaa kanttido gishshawu, qaxxayettana bessees giidi cimati pirddiyoogaa bessiyaaba gidenna. Higgiyaa polissanawu cimati kelttiyaa gelokkona; eti danobaara gayttida allaalliyaa kawotettaa sunttatuyyo aggiigoosona. (Roo. 13:2-4; Tii. 3:1) SHin, eti gita nagaraa oottida uri gubaaꞌiyaa yame gididi deꞌana danddayiyoogaa woy danddayennaagaa kuuyoosona.

¹⁸ Cimati pirddaa konttiyan oottiyo wode, he uri Xoossaara dabbotido dabbotaaranne ba mala Kiristtaanetuura dabbotido dabbotaara gayttida allaalle xallaa kuuyoosona. Eti qohidaagee ba nagaraappe simmidaakko woy simmibeennaakko kuuyanawu banttana maaddana mala, Geeshsha Maxaafaa goꞌettoosona. I ba nagaraappe simmana xayikko, bohettees; qassi erissoy gubaaꞌiyawu odettees. (1 Qor. 5:11-13) I ba nagaraappe simmikko, gubaaꞌiyaa yame gididi deꞌana danddayees. SHin, gubaaꞌiyan ayyo ayba maatinne mule imettana danddayennaagaa woy I gubaaꞌiyan ayba maatankka oottana danddayennaagaa cimati ayyo yootana. Cimata naatu hanotay keehi qofissiyo gishshawu, gubaaꞌiyan deꞌiya naati hegaa mala asa matan deꞌiyo wode eta yelidaageetussi cimati buzo yootana danddayoosona. Yelidaageeti naagettanaadan cimati yootiyo wode, he uri qohidoogeeti oonakko qonccissenna mala naagettoosona.

INTTE NAATA WAATIDI NAAGUUTETII?

19-22. Yelidaageeti bantta naata naaganawu waatana danddayiyoonaa? (Koyro sinttan deꞌiya misiliyaa xeella.)

¹⁹ Naati qohettennaadan naagiyo aawatettay oogee? Yelidaageetuugaa.f Intte naati Xoossaa Yihoowappe “imettiya imota.” (Maz. 127:3) Intte naata intte naagiyo aawatettaa Yihooway inttessi immiis. Mattumaara gayttidaagan qohoy gakkennaadan intte naata naaganawu waatana danddayeetii?

²⁰ Koyruwan, mattumaara gayttida qohuwaabaa intte erite. Mattumaara gayttidaagan naata qohiya asatubaanne eti naata cimmanawu goꞌettiyo hiillatubaa erite. Qohana danddayiya hanotata woy asata akeekite. (Lee. 22:3; 24:3) Dariya baggi, naꞌa qohiyaagee he naꞌi eriyoonne ammanettiyo ura gidiyoogaa hassayite.

²¹ Naaꞌꞌanttuwan, intte naatuura qoncce gidida ogiyan haasayite. (Zaa. 6:6, 7) Yaatanawu intte intte naati odiyoobaa loytti ezggana koshshees. (Yaaq. 1:19) Mattumaara gayttidaagan qohettida naati hegaabaa hara urawu yootanawu darotoo koyennaagaa hassayite. Eti hara asi banttana ammanenna giidi yayyana danddayoosona, woy qohidaagee eti hara urawu odikko eta bolli iitabaa gattana giido gishshawu eti yayyana danddayoosona. Intte naatu bolli iitabi gakkidabadan inttessi siyettikko, eta kehatettan oychchite; yaatidi eti yootiyo ubbabaa danddayan siyite.

²² Heezzanttuwan, intte naata tamaarissite. Mattumaa xeelliyaagan eta layttaadan haniyaabaa yootite. Issi uri eta bessenna ogiyan bochchanawu malikko, eti woyganaakkonne waatanaakko eta tamaarissite. Intte intte naata naaganaadan Yihoowa dirijjitee kessidobaa goꞌettana danddayeeta.—“Inttenanne Intte Naata Tamaarissite” giya saaxiniyaa xeellite.

23. Mattumaara gayttidaagan naꞌa qohiyoogaa xeelliyaagan nuuni ammaniyoobay aybee, kaalliya huuphe yohuwan nuuni beꞌana oyshay aybee?

²³ Nuuni Yihoowa Markka gidiyoogaadan, mattumaara gayttidaagan naꞌa qohiyoogee gita nagaranne iita ooso gidiyoogaa ammanoos. Yihoowa Markkati Kiristtoosa higgiyaa kaalliyo gishshawu, mattumaara gayttidaagan naata qohida uri qixaatiyaappe attanaadan teqqokkona. SHin, nu ishantti woy michchontti mattumaara gayttidaagan qohettikko, nuuni eta maaddanawu ay oottana danddayiyoo? Kaalliya huuphe yohuwan ha oyshaa zaaruwaa beꞌana.