Xoossaa Eratettaa Bolli Denddidi Xubbiya Asa Qofa Ubbaa Laaloos

1. Tiyettida Kiristtaaneti naagettanaadan kiitettida PHawuloosi yootidobay aybee?

“HA SA7AA asaa milatoppite.” (Roo. 12:2) PHawuloosi koyro xeetu layttan deꞌiya Kiristtaanetuyyo ha qofaa xaafiis. Bantta huuphiyaa Xoossawu sheedhdhidanne geeshsha ayyaanan tiyettida attumaageetussinne maccaageetussi he wolqqaama zoriyaa I immidoy aybissee?—Roo. 1:7.

2-3. Seexaanay nuna Yihoowappe haassanawu waati baaxetii, shin nuuni iita qofaa waati xayssana danddayiyoo?

² Seexaanay haariyo alamiyaa iita qofan amarida Kiristtaaneti qohettiyoogee PHawuloosa qofissiis. (Efi. 4:17-19) Nuuppe oonikka hegaadan qohettana danddayees. Ha alamiyaa xoossay Seexaanay nuna Yihoowappe haassanawu daro hiillata goꞌettees. Leemisuwawu, nuuni hayttatanawu koyikko, I nuna Yihoowappe haassanawu hegaa goꞌettees. Nuuni I koyiyoogaadan qoppana mala son, timirtte keettaaninne nu yuushuwan deꞌiya asaappe nuuni tamaaridobaakka goꞌettanawu baaxetana danddayees.

³ Nu guuggiyan wolqqaama “qatuwaa” mala gididabata xayssana danddayiyoo? (2 Qor. 10:4) PHawuloosi woygi zaaridaakko akeeka: “Nuuni asa qofa xaissoos; qassi Xoossaa eratettaa bolli denddidi xubbiya otoro qofa ubbaa laaloos. He qofa ubbai Kiristtoosayyo azazettana mala omooddoos.” (2 Qor. 10:5) Ee, Yihoowa maaduwan iita qofata xayssana danddayoos. Xalee marzziyaa xayssana danddayiyoogaadan, Seexaanaa alamee gattiyo qohiyaabaa xayssanaadan Xoossaa Qaalay nuna maaddana danddayees.

‘NE QOFAA LAAMMA’

4. Nuuppe daroti tumaa koyro tamaarido wode aybin laamettana koshshidee?

⁴ Tumuppe Geeshsha Maxaafay tamaarissiyoobaa neeni tamaarido wodenne Yihoowayyo haggaazanawu kuuyido wode neeni laammettidobaa ane qoppa. Yihoowayyo haggaazanawu, nuuppe daroti iitabaa oottiyoogaa aggana koshshiis. (1 Qor. 6:9-11) Yihooway maaddin ha iita oosota nuuni aggidoogan keehi ufayttoos!

5. Roome 12:2y nuuni oottanaadan yootiyo naaꞌꞌubay aybee?

⁵ SHin, nuuni laamettana koshshiyo harabay deꞌenna giidi mule qoppana bessenna. Nuuni xammaqettanaappe kase oottiyo gita nagaraa aggidaba gidikkonne, he gita nagarata zaarettidi oottanaadan nuna paaccana danddayiya aybippenne naagettanawu aggennan loytti baaxetana koshshees. Nuuni hegaadan waati oottana danddayiyoo? PHawuloosi hagaadan giis: “Xoossai intte qofaa muumeera dummayidi, inttena laammoppe attin, ha sa7aa asaa milatoppite.” (Roo. 12:2) Hegaa gishshawu, nuuni naaꞌꞌubaa oottana koshshees. Koyro, nuuni ha alamiyaa ‘milatiyoogaa’ aggana koshshees. Naaꞌꞌantto, nuuni nu qofaa laammiyoogan ‘laamettana’ koshshees.

6. Yesuusi Maatiyoosa 12:43-45n yootidobaappe nuuni ay tamaariyoo?

⁶ PHawuloosi yootidobay beettiyaaban laamettiyoogaappe aadhdhiyaaba. Hegee nu hanota ubbaara gayttidaba. (“Laamettadiiyye, Woy Laamettidaba Milatay?” giya saaxiniyaa xeella.) Nuuni nu qofaa, nu xeelaa, nuussi siyettiyaabaanne nu amottiyoobaa muleera laammana koshshees. Hegaa gishshawu, nuuni ubbaykka nu huuphiyaa hagaadan oychchana koshshees: ‘Taani Kiristtaane gidanawu laamettiyoobay haratussi beettiyaaba xallaara gayttidabeeyye, woy ta wozanaaninne qofan tumuppe Kiristtaane gidaydda deꞌiyaanaa?’ Yesuusi Maatiyoosa 12:43-45n yootidoban oottana koshshiyaabaa qonccissiis. (Nabbaba.) He qaalati ha keehi koshshiyaabaa tamaarissoosona: Iita qofata xayssiyoogaa xallay gidenna; nuuni Xoossaa ufayssiya qofatun eta laammana koshshees.

“INTTE WOZANAINNE QOFAI MULEERA OORAXXANAU BESSEES”

7. Nu wozanaanne nu qofaa waati laammana danddayiyoo?

⁷ Nuuni garssa asatettan laamettana danddayiyoo? Xoossaa Qaalay hagaadan gees: “Intte wozanainne qofai muleera ooraxxanau bessees. Tumu xillotettaaninne geeshshatettan Xoossaa leemisuwan merettida ooratta asatettaa maayite.” (Efi. 4:23, 24) Ee, nuuni garssa asatettan laamettana danddayoos, shin hegaadan oottiyoogee metiyaaba. Nuuni iita amuwaa eqettiyoogaappenne iitabaa oottiyoogaa aggiyoogaappe aadhdhiyaabaa oottana bessees. Nuuni nu ‘wozanaaninne qofan muleera’ laamettana koshshees. Hegee nuuni amottiyooban, nu eeshshaaninne nuuni issibaa oottiyo ogiyan laamettiyoogaa xaaxi waaxees. Hegee ubbatoo baaxetana koshshiyaaba.

8-9. Nuuni garssa asatettan laamettana koshshiyoogaa issi ishaa hanotay waati qonccissii?

⁸ Leemisuwawu, issi ishay kase danobaa oottiya asa. I likkiyaappe aattidi uyiyaanne warettiya asa, shin hegaa aggidi wurssettan xammaqettiis. Hegee I deꞌiyo guutta moottan loꞌꞌo markka gidiis. Gidoppe attin, I xammaqetti simmin takkennan, issi galla omarssi, I qoppibeenna paacee A gakkiis. Mattottida bitanee A soo yiidi aara warettanawu koyiis. Nu ishay warettennaadan koyro bana naagiis. SHin, he bitanee guyyeppe Yihoowabaa iitabaa haasayiis; haasayin ishay keehi hanqqettidi bana naagana danddayibeenna. I sooppe kiyidi he bitaniyaa shociis. I hegaadan oottidoy aybissee? I warettennaadan bana naagana mala, Geeshsha Maxaafaa xannaꞌidoogee A maaddikkonne, I wozanaaninne qofan muleera laamettiichchibeenna.

⁹ SHin, he ishay laamettanawu baaxetiyoogaa aggibeenna. (Lee. 24:16) Cimati maaddin I aggennan loytti laamettiis. Guyyeppe I cima gidiis. Hegaappe simmin issi galla omarssi, SHiiquwaa Addaraashaappe kare baggan, A amarida layttaappe kase gakkidaagaa mala paacciyaabay gakkiis. Mattottida issi bitanee cimatuppe issuwaa shocana haniis. Nu ishay waatidee? I woppu giidi ashkketettan mattottida bitaniyaa haasayissiis, he bitanee woppu gaanaadan, ubba qassi soo baanaadan maaddiis. Nu ishay he wode oottidobay kaseegaappe dummatidoy aybissee? I ba wozanaaninne qofan muleera laamettido gishshataassa. I tumuppe saronne ashkke asa gidiis. Hegee Yihooway sabettanaadan oottiis.

10. Nuuni garssa asatettan laamettanawu ay oottana koshshii?

¹⁰ Ha laamee eesuwaara woy baaxetennan haniyaaba gidenna. Nuuni daro layttawu “minnidi” baaxetanawu koshshennan aggenna. (2 PHe. 1:5) Nuuni Yihoowayyo daro layttaa haggaazido gishsha xallawu hegaadan laamettokko. Nuuni garssa asatettan laamettanawu wozanappe baaxetana koshshees. Nuuni hegaadan laamettanawu oottana danddayiyo amaridabati deꞌoosona. Ane hegeetuppe amaridaageeta beꞌoos.

NU WOZANAANNE QOFAA WAATI LAAMMIYOO?

11. Nuuni nu wozanaaninne qofan laamettanaadan woosay waati maaddii?

¹¹ Nuuni oottana koshshiya koyroogee woosaa. Nuuni mazamuraawiyaagaadan, “Abeet Xoossau, geeshsha wozanaa ta giddon medhdha; ammanettiya ayyaanaa ta giddon ooraxissa” yaagidi woossana koshshees. (Maz. 51:10) Nuuni wozanaaninne qofan laamettananne maaduwaa demmanawu Yihoowa oychchana koshshiyoogaa akeekana bessees. Laamettanaadan Yihooway nuna maaddanaagaa nuuni waati ammanettana danddayiyoo? Hizqqeela wode deꞌiya wozanaa zozzida Israaꞌeelatuyyo Yihooway gelido ha qaalan nuuni minettana danddayoos: “Taanikka etau shaahettibeenna wozanaa immana; qassi ooratta ayyaanaakka eta giddon wottana . . . asho wozanaa, [hegeekka, Xoossaa kaaletuwaa kaallanawu eeno giya wozanaa] etau immana.” (Hiz. 11:19) Yihooway he Israaꞌeelati laamettanaadan ba dosan maaddiis, qassi I nunakka ba dosan maaddees.

12-13. (a) Mazamure 119:59y yootiyoogaadan, nuuni ay wotti dentti qoppana koshshii? (b) Nena oychchana koshshiya oyshati awugeetee?

¹² Nuuni oottana koshshiya naaꞌꞌanttobay wotti dentti qoppiyoogaa. Nuuni galla galla Xoossaa Qaalaa akeekan nabbabiyo wode, nabbabidobaa loytti qoppiyoogee laammana koshshiya qofatanne nuuyyo siyettiyaabaa nuuni shaakki eranaadan maaddees. (Mazamure 119:59 nabbaba; Ibr. 4:12; Yaaq. 1:25) Nuuni asa eratettan omoodettidoogaa bessiyaabi deꞌikko shaakki erana koshshees. Nuuni shugo gididobay aybakko akeekananne hegaa xoonanawu minttidi baaxetana koshshees.

¹³ Leemisuwawu, nena hagaadan oychcha: ‘Taani wozanan guuttaakkonne qanaatiyaanaa?’ (1 PHe. 2:1) ‘Ta wogaa, taani tamaaridobaa, woy taayyo deꞌiya aquwaa gaasuwan taani guuttaa otorettiyaanaa?’ (Lee. 16:5) ‘Taayyo deꞌiyaagaa malabay baynnaageeta woy zariyan taappe dummatiyaageeta taani kariyaanaa?’ (Yaaq. 2:2-4) ‘Seexaanaa alamee shiishshiyoobaa taani dosiyaanaa?’ (1 Yoh. 2:15-17) ‘Taani pokkobaaninne danoban allaxxiyoogan ufayttiyaanaa?’ (Maz. 97:10; 101:3; Amo. 5:15) Neeni ha oyshata zaariyo wode, ne laamettana koshshiyaabaa akeekana danddayaasa. Nu wozanan wolqqaama “qatuwaa” mala gidana danddayiya qofata xooniyoogan, saluwan deꞌiya nu Aawaa ufayssoos.—Maz. 19:14.

14. Loꞌꞌo laggeta dooriyoogee keehi koshshiyoy aybissee?

¹⁴ Nuuyyo keehi koshshiya heezzanttobay loꞌꞌo laggeta dooriyoogaa. Nu akeekin akeekana xayin, nuuni nu laggeta loytti kaalloos. (Lee. 13:20) Ooso sohuwan woy timirtte keettan, Xoossay koyiyoogaadan qoppana mala nuna maaddennaageetuura nuuni gayttana danddayoos. Gidoppe attin, Kiristtaane shiiqotun nuuni loꞌꞌo laggeta demmana danddayoos. SHiiqoti nuna ‘siiquwawunne loꞌꞌo oosuwawu’ denttettana danddayoosona.—Ibr. 10:24, 25.

“AMMANUWAN MINNITE”

15-16. Seexaanay nu qofaa laammanawu waati baaxetii?

¹⁵ SHin, Seexaanay nu qofaa laammanawu murttidoogaa hassaya. Nuuni Xoossaa Qaalaadan qoppiyoogaa mooranawu I daro hiillata goꞌettees.

¹⁶ Seexaanay Edene ataakiltte sohuwan Hewaano, “Xoossai tumu . . .  giidee?” yaagidi oychchidoogaa mala oyshaa aggennan oychchees. (Doo. 3:1) Seexaanay haariyo alamiyan, kaallidi deꞌiyaageetu mala nu ammaniyoobaa siranaadan oottiya oyshata darotoo siyoos: ‘Attumay attumaa woy maccay maccaa ekkiyoogaa woy geliyoogaa Xoossay tumu paqqadennee? Ufayssa masqqalaanne yeleta gallassaa neeni bonchchanaadan Xoossay tumu koyennee? Neeni suuttaa akkamuwawu goꞌettennaadan Xoossay tumu koyii? Neeni siiqiyo bohettidaageetuura ne laggetennaadan siiqiya Xoossay tumu koyii?’

17. Nuuni ammaniyoobaa siranaadan oottanawu issi uri oyshata oychchiyo wode nuuni waatana koshshii, qassi Qolasiyaasa 2:6, 7y hegee ay kaalettana danddayiyoogaa qonccissii?

¹⁷ Nuuni ammaniyoobati tuma gidiyoogaa ammanettana koshshees. Nu ammanuwaa xeelliyaagan keehi koshshiya oyshatuyyo nuuni zaaruwaa demmana xayikko, nuuni ammaniyoobay tumeeshsha giidi siriyoogaa doommana danddayoos. Hegaadan siriyoogee wurssettan nu qofaa geellayananne nu ammanuwaa moorana danddayees. Yaatin nuuni ay oottana koshshii? “Xoossai koyiyoobi, lo77obi, a ufaissiyaabinne qassi kumettabi” aybakko eranaadan nuuni nu qofaa laammana mala Xoossaa Qaalay yootees. (Roo. 12:2) Nuuni ubbatoo xannaꞌikko, Geeshsha Maxaafaappe nuuni tamaaridobay tuma gidiyoogaa ammanettana danddayoos. Yaatikko, Yihooway kessido maarati likke gidiyoogaa nuuni ammanettoos. Yaatiyo wode, mino xaphoy deꞌiyo mittaadan, nuuni “ammanuwan” xaphuwaa yeddidi minnana.—Qolasiyaasa 2:6, 7 nabbaba.

18. Seexaanaa alamee gattiyo qohuwaappe nuna naaganaadan aybi maaddii?

¹⁸ Neeyyo ne ammanuwaa ooninne minttana danddayenna; yaatiyo gishshawu, ne wozanaanne qofaa aggennan ooraxissa. Yihoowa ayyaanay maaddanaadan ubbatoo minttada woossa. Loyttada wotta dentta qoppa; ne qofaanne ne issibaa oottiyo ogiyaa ubbatoo yuushsha qoppa. Neeni ne qofaa laammanaadan maaddiya loꞌꞌo laggeta doora. Neeni hegaadan oottiyo wode, Seexaanaa alamee gattiyo qohiyaabaappenne iitabaappe nena naagana; qassi “Xoossaa eratettaa bolli denddidi xubbiya otoro qofa ubbaa” laalana.—2 Qor. 10:5.