Yihooway Banttana Ziqqi Oottiya Ba Ashkkarata Nashshees

1. Bana ziqqi oottiya asaa xeelliyaagan Yihoowayyo aybi siyettii? Qonccissa.

BANA ziqqi oottiya asaa Yihooway siiqees. Aara siiqettiya mata dabbo gidana danddayiyaageeti tumuppe banttana ziqqi oottiya asatu xalla. SHin, “otoranchchata i haahuwan erees.” (Maz. 138:6) Nuuni ubbay Yihoowa ufayssanawunne I nuukko shiiqanaadan koyoos. Hegaa gishshawu, nuna ziqqi oottiyoogaa tamaariyo loꞌꞌo gaasoy deꞌees.

2. Ha huuphe yohuwan nuuni ay tobbanee?

² Ha huuphe yohuwan, ha heezzu oyshatu zaarota nuuni tobbana: (1) Bana ziqqi oottiyoogee aybee? (2) Nuuni nuna ziqqi oottiyaageeta gidana koshshiyoy aybissee? (3) Nuuni nuna ziqqi oottiyoogee metana danddayiyoy awudee? Nuuni beꞌanaagaadan, nuna ziqqi oottiyo wode, Yihoowa wozanaa ufayssoosinne nuuyyo goꞌettoos.—Lee. 27:11; Isi. 48:17

BANA ZIQQI OOTTIYOOGEE AYBEE?

3. Bana ziqqi oottiyoogee aybee?

³ Bana ziqqi oottiya uri I haratuppe aadhdhiyaabadan qoppenna. Qassi I otorettenna. Bana ziqqi oottiya uri Yihooway baappe keehi aadhdhiyoogaa eriyoogaanne hara asatu hanotaa I akeekiyoogaa Geeshsha Maxaafay yootees. Bana ziqqi oottiya uri harati baappe issi issiban dariyoogaakka akeekees.—Pili. 2:3, 4.

4-5. Bana ziqqi oottiyaaba milatiya uri tumuppe bana ziqqi oottana danddayennay aybissee?

⁴ Issi issi asati banttana ziqqi oottiyaaba milatoosona; shin eti tumuppe banttana ziqqi oottokkona. Eti dungguuxa gidana danddayoosona. Woy qassi eta yelidaageeti tamaarissidoogaa gaasuwan eti harata bonchchiyaageetanne ashkke gidana danddayoosona. Gidoppe attin, eti wozanan keehi otorettiyaageeta gidana danddayoosona. Guyyeppe, eti bantta wozanan deꞌiyaabaa qonccissana.—Luq. 6:45.

⁵ Hara asati banttanan ammanettiyaageetanne bantta qoppiyoobaa haasayiyaageeta gidana danddayoosona, shin hegee eti otorettoosona giyoogaa gidenna. (Yoh. 1:46, 47) Gidoppe attin, dungguuxa gidenna asati bantta akeekan ammanettennaadan naagettana bessees. Nuuni dungguuxa gidin gidana xayin, ubbaykka tummuppe nuna ziqqi oottanawu baaxetana bessees.

6. Koyro Qoronttoosa 15:10n qonccidaagaadan, kiitettida PHawuloosa leemisuwaappe nuuni tamaarana danddayiyoobay aybee?

⁶ Kiitettida PHawuloosa hanotaa qoppa. Daro katamatun ooratta gubaaꞌeta essanawu Yihooway A keehi goꞌettiis. I Yesuus Kiristtoosi kiittido haratuugaappe aaruwan haggaazennan aggenna. SHin, PHawuloosi ba ishanttuppe aadhdhiyaabadan qoppibeenna. I bana ziqqi oottidi hagaadan giis: “Yesuusi kiittido ubbaappe taani laafa; taani Xoossaa woosa keettaa waissido gishshau, Yesuusi kiittidoogaa geetettada xeesettanaukka bessikke.” (1 Qor. 15:9) Yaagidi, I dumma asa woy darobaa oottida asa gididoogan gidennan, Yihooway assi aaro kehatettaa bessido gishshawu Yihoowaara loꞌꞌo dabbotan deꞌidoogaa PHawuloosi geeshshidi yootiis. (1 Qoronttoosa 15:10 nabbaba.) Bana ziqqi oottiyoogan PHawuloosi loꞌꞌo leemiso gidiis. Gubaaꞌiyan deꞌiya issoti issoti A borikkonne, Qoronttoosan deꞌiya Kiristtaanetuyyo dabddaabbiyaa xaafido wode, I babaa otoruwan haasayibeenna.—2 Qor. 10:10.

7. Keehi erettiya ishay bana ziqqi oottiyoogaa ha wodiyan waati bessidee?

⁷ Bana ziqqi oottiyoogan keehi loꞌꞌo leemiso gidida ishay Bolla Gididi Heemmiyaagaa yara gididi haggaazida, Ishaa Karl F. Klayna. I ba deꞌuwan hanida keehi minttettiyaabaa xaafiis. Ishaa Klayni ba deꞌuwan hanidabaa odido wode, I shugo gidido darobaanne deꞌuwan A gakkida daro metota bana ziqqi oottidi tumabaa yootiis. Leemisuwawu, I 1920 heeran, sooppe soo biidi haggaazanawu koyro kiyido wode ayyo keehi deexxido gishshawu, naaꞌꞌu laytta gidiyaagaa haggaazanawu sooppe soo beennan takkiis. Guyyeppe I Beeteelen haggaaziyo wode, issi ishay A zori simmin I guutta wodiyawu he ishaa bolli hanqqettiis. Qassi I guuggiyaa sakettidi guyyeppe paxiis. SHin I keehi ufayssiya daro oosuwaa oottiis. Ishaa Klayni keehi erettiya asa gidikkonne, I shugo gididobaa yootidobay I bana keehi ziqqi oottiya asa gidiyoogaa bessees. Daro ishanttinne michchontti Ishaa Klaynanne I ba deꞌuwan hanidabaa tumubaa yootidoogaa loytti hassayoosona.b

NUNA ZIQQI OOTTIYAAGEETA GIDANA KOSHSHIYOY AYBISSEE?

8. Nuna ziqqi oottiyoogee Yihoowa ufayssiyoogaa akeekanaadan 1 PHeexiroosa 5:6y nuna waati maaddii?

⁸ Nuuni nuna ziqqi oottanawu baaxetana koshshiyo waanna gaasoy, yaatiyoogee Yihoowa ufayssiyoogaa. Kiitettida PHeexiroosi hegaa qonccissiis. (1 PHeexiroosa 5:6 nabbaba.) “Yaada Tana Kaalla” giya maxaafay PHeexiroosi giidobaa hagaadan qonccissiis: “Otoroy marzze mala. Hegee wolqqaama qohuwaa gattana danddayees. Otorettiya urawu daro eray deꞌikkonne, I Xoossawu aynne maaddenna. Qassi bana ziqqi oottiyoogee, laafa urikka Yihoowawu maaddiyaagaa gidanaadan oottana danddayees. . . . [I] . . . neeni nena ziqqi oottiyo gishshawu, nena anjjiyoogan ufayttees.”c Nuuni Yihoowa ufayssiyoogee oottana danddayiyo aybippenne aadhdhiyaaba!—Lee. 23:15.

9. Nuna ziqqi oottiyoogee hara asay nuukko shiiqanaadan waati maaddii?

⁹ Nuna ziqqi oottiyo wode Yihoowa nuuni ufayssiyoogaappekka hara daro goꞌꞌaa demmoos. Nuuni nuna ziqqi oottiyoogee harati nuukko shiiqanaadan oottees. Hegaadan giyoy aybissee? Ay mala asaara deꞌiyoogee nena ufayssiyaakko qoppa. (Maa. 7:12) Harati ubbatoo I koyiyoobaa oottanaadan koyiyaanne yootiyoobaa aybanne siyenna uraara takkanawu nuuni koyennaagee qoncce. SHin, nu ishanttinne nu michchontti ‘issoy issuwawu qarettiyaageeta, ishanttudan siiqettiyaageeta, qassi issoy issuwawu kehiyaageetanne’ banttana ziqqi oottiyaageeta gidiyo wode etaara deꞌiyoogee keehi ufayssiyaaba. (1 PHe. 3:8) Bana ziqqi oottiya uraaban nuussi hegaadan siyettees, qassi nuuni nuna ziqqi oottiyo wode, etikka nuukko shiiqanawu ufayttana.

10. Banttana ziqqi oottiya asati deꞌuwan gakkiya metota genccanawu metootennay aybissee?

¹⁰ Nuna ziqqi oottiyoogee nuuni deꞌuwan metootennaadankka oottees. Nuuni likke gidenna giidi qoppiyoobaa issi issitoo beꞌana woy hegee nuna gakkana. Eranchcha Kawuwaa Solomoni hagaadan giis: “Taani, ailleti haariyaageetudan paraa toggidi biishiininne qassi haariyaageeti ailletudan gediyan hemettishin be7aas.” (Era. 10:7) Keehi eranchcha asati issi issitoo sabettokkona. Qassi daro eri baynna asati issi issitoo keehi sabettoosona. SHin nuuni deꞌuwaa hanotaadan eeno giidi ekkana koshshiyoogaanne deꞌuwan haniyaaban yiillotana koshshennaagaa Solomoni akeekiis. (Era. 6:9) Nuuni nuna ziqqi oottikko, deꞌuwan nu dosennabaakka eeno giidi ekkiyoogee metennaba gidana.

NUUNI NUNA ZIQQI OOTTIYOOGEE METANA DANDDAYIYOY AWUDEE?

11. Nuuyyo zoree imettiyo wode, nuuni waatana koshshii?

¹¹ Nuuni nuna ziqqi oottiyoogaa galla galla bessana danddayoos. Amarida hanotata ane qoppa. Nuuyyo zoree imettiyo wode. Issi uri nuna zorikko, geella nuuni akeekibeenna iita balaa balido gishshawu I zoriyoogaa hassayana koshshees. Hegaa mala wodiyan, issi uri nuussi zoriyaa immiyo wode, nu he zoriyaa sohuwaara eqettennan waayi aggana. Nuuni zoriyaa immida uraa woy I zorido ogiyaa borennan waayi aggana. Gidoppe attin, nuuni nuna ziqqi oottikko, bessiyaagaadan xeellanawu baaxetana.

12. Leemiso 27:5, 6y yootiyoogaadan, nuuyyo zoriyaa immiya uraa galatana koshshiyoy aybissee? Leemisuwan yoota.

¹² Bana ziqqi oottiya uri zoriyaa gishshawu galatees. Leemisuwawu, neeni shiiquwan deꞌiyaabadan qoppa. Neeni amarida asatuura haasaya simmin, etappe issoy nena xeegidi asaappe gaxi kessidi ne achchan qumay deꞌiyoogaa yootees. Neeni yeellatanaagee qoncce. SHin I woy A hegaa neeyyo yootidoogawu galatikkii? Issi uri tawu sohuwaara yootidaba gidernneeshsha gaana danddayaasa! Hegaadankka, nuuyyo zoree koshshiyo wode issi ishay woy michchiyaa nuussi zoriyaa immikko, nuna ziqqi oottananne galatana koshshees. He uraa nuuni nu laggedan xeelloosippe attin, morkkedan xeellokko.—Leemiso 27:5, 6 nabbaba; Gal. 4:16.

13. Harati haggaazo maataa demmiyo wode, nuna ziqqi oottiyoogaa waati bessana danddayiyoo?

¹³ Harati haggaazo maataa demmiyo wode. Jesen giyo cimay hagaadan giis: “Harati maataa demmiyoogaa taani beꞌiyo wode, taani aybissi doorettabeykkinaa gaada qoppays.” Neeyyo hegaadan siyetti erii? Haggaazo maataa demmanawu ‘koyiyoogee’ bala gidenna. (1 Xim. 3:1) Gidoppe attin, nuuni nu qofaa naagana koshshees. Nuuni naagettana xayikko, nu wozanan otoroy diccanaadan oottana danddayoos. Leemisuwawu, issi Kiristtaanee gubaaꞌiyan issibaa I ooppenne loytti oottana danddayiyaabadan qoppiyoogaa doommana danddayees. Woy qassi issi Kiristtaane machchiyaa, ‘Ha oosuwaa ta azinay hara ishaappe keehi loyttidi oottana!’ gaada qoppana danddayawusu. SHin nuuni tumuppe nuna ziqqi oottikko, hegaa mala otoro qofaappe naagettana.

14. Harati maataa demmido wode Muusee oottidobaappe nuuni ay tamaarana danddayiyoo?

¹⁴ Harati maataa demmido wode Muusee oottidobaappe nuuni tamaarana danddayoos. Muusee Israaꞌeela deriyaa kaalettiyo ba aawatettaa nashshiis. Gidoppe attin, Muusee oottiiddi takkido amaridabaa harati oottanaadan Yihooway eeno giido wode, Muusee waanidee? I qanaatibeenna. (Qoo. 11:24-29) I bana ziqqi oottiyo gishshawu asaayyo pirddiyo oosuwan harati bana maaddanaadan eeno giis. (Kes. 18:13-24) Hegaappe guyyiyan, Israaꞌeelati he oosuwaa oottana danddayiya daro attuma asa demmido gishshawu, pirddaa demmanawu keehi daro wodiyaa naagana koshshenna. Israaꞌeela deriyaa giddon daro maataa demmiyoogaappe aaruwan, hara asaa maaddiyoogee Muusa qofissidoogaa hagee bessees. Hagee nuuyyo keehi loꞌꞌo leemiso! Yihooway nunan goꞌettanaadan koyikko, nuuyyo daro eray deꞌiyoogaappe aaruwan nuna ziqqi oottiyoogee keehi koshshiyaaba gidiyoogaa hassayoos. “Yihooway bolla xoqqan deꞌikkokka, banttana ziqqi oottiyaageeta keha ayfiyan xeellees.”—Maz. 138:6, NW.

15. Daro ishanttunne michchonttu hanotay waani laamettidee?

¹⁵ Hanotay laamettiyo wode. Mata wodeppe haa simmin, Yihoowayyo daro layttaa haggaazida daro ishanttussinne michchonttussi hara oosoy imettiis. Leemisuwawu, awuraajjaa xomoosiyaageetinne eta machchoti 2014n, hara qommo ubba wode haggaazuwaa haggaazanaadan shoobettidosona. Issi ishawu layttay 70 gidiyo wode, I woradaa xomoosiyoogaa agganaagaakka dirijjitee 2014n yootiis. Qassi layttay 80 woy hegaappe bolla gidido ishay gubaaꞌiyan cimata shiishshiyaagaa gididi oottenna. Amarida layttaappe kase, Beeteele keettaa asaappe daroti aqinye gididi kiitettidosona. Harati sahettiyo gishshawu, so asaa aawatettay deꞌiyo gishshawu woy hara gaasotun ubba wode haggaazuwaa aggidosona.

16. Nu ishanttinne michchontti bantta ooratta hanotaa meezetiyoogan banttana ziqqi oottiyoogaa waati bessidonaa?

¹⁶ He laamettidabaa meezetanawu daro ishanttussinne michchonttussi keehi deexxiis. Eti he haggaazuwaa dosoosona; etappe daroti daro layttawu hegaa oottidosona. Issoti issoti keehi azzaniiddi ooratta hanotaa meezetidosona. Gidoppe attin, eti laamettidabaa guyyeppe meezetidosona. Aybissi? Eta maaddida waannabay eti Yihoowa siiqiyoogaa. Eti oosuwawu, maatawu woy aawatettawu gidennan, banttana Xoossawu sheedhdhidoogaa eroosona. (Qol. 3:23) Eti banttana ziqqi oottidi ayba ogiyankka Yihoowayyo ubbatoo haggaaziyoogan ufayttoosona. I etawu qoppiyoogaa eriyo gishshawu, eti ‘banttana hirggissiya ubbabaa A bolli olidosona.’—1 PHe. 5:6, 7.

17. Geeshsha Maxaafay nuuni nuna ziqqi oottanaadan minttettiyo gishshawu nuuni galatiyoy aybissee?

¹⁷ Geeshsha Maxaafay nuuni nuna ziqqi oottanaadan minttettiyo gishshawu keehi galatoos. Nuuni nuna ziqqi oottiyo wode, harati nunaara takkanawu ufayttoosona; qassi nuuni nuuyyookka goꞌettoos haratakka goꞌꞌoos. Nuuni deꞌuwan gakkiya metuwaa genccana danddayoos. Ubbaappe aaruwan, saluwan deꞌiya nu Aawaakko shiiqoos. I ‘gitanne xoqqan deꞌiyaagaa’ gidikkonne, banttana ziqqi oottiya ba ashkkarata siiqiyoogaanne nashshiyoogaa eriyoogan keehippe ufayttoos.—Isi. 57:15.