“Wurssettaa Gallassatun” Xoossaa SHeniyaa Minnada Ootta

1. Nuuni “wurssetta gallassi” deꞌiyoogaa waati eriyoo?

NEENI 1914⁠ppe simmin yelettikko, ne ha alamiyawu “wurssetta gallassi” deꞌadasa. (2 Xim. 3:1) Yesuusi ha wodiyaa xeelliyaagan yootido hanotaa nuuni ubbay beꞌida woy siyida. Hegee olaa, koshaa, biittaa qaattaa, wurssiya harggiyaa, makkalay dariyoogaanne Yihoowa asaa bolli yedetay gakkiyoogaa xaaxi waaxees. (Maa. 24:3, 7-9, 12; Luq. 21:10-12) Asaa eeshshay kiitettida PHawuloosi kasetidi yootidoogaa mala gidiyoogaakka nuuni beꞌida. (“Ha Wodiyan Deꞌiya Asaa Hanotaa” giya saaxiniyaa xeella.) Nu “wurssettaa gallassatun” deꞌiyoogaa nuuni Yihoowa Markkati eroos.—Mik. 4:1.

2. Nuuni zaaruwaa demmana koshshiyo oyshati awugeetee?

² Nuuni ‘wurssetta gallassay’ wuranawu keehi matido wodiyan deꞌoos; ayssi giikko, 1914⁠ppe hanno gakkanawu keehi daro wodee aadhdhiis. Wurssettay keehi matido gishshawu, keehi koshshiya amarida oyshatu zaaruwaa nuuni erana koshshees: ‘Wurssetta gallassay’ wuriyo wode aybi hananee? Qassi nuuni he hanotata naagiyo wode ay oottanaadan Yihooway koyii?

‘WURSSETTAA GALLASSATI’ WURIYO WODE AYBI HANANEE?

3. Koyro Tasalonqqe 5:1-3y yootiyoogaadan, kawotettati ay awaajjanee?

³ Koyro Tasalonqqe 5:1-3 nabbaba. PHawuloosi ‘Yihoowa gallassaabaa’ yootiis. Ha xiqisee alamiyaa worddo haymaanoote ubbaa xaaxa waaxiya ‘Gita Baabilooni’ bolli gakkiya qohuwan doommidi, Armmageedoona olan wuriya wodiyaabaa qonccissees. (Ajj. 16:14, 16; 17:5) He “gallassai” doommanaappe guuttaa kasetidi, kawotettati “ubbabai saro; aibikka hanenna” giidi awaajjana. Kawotettati kaseegaappe loꞌꞌo hanotan issoy issuwaara gayttiyoogaabaa alamiyaa haariyaageeti haasayiyo wode issi issitoo hegaa mala qofan qonccissoosona.b SHin, Geeshsha Maxaafay qonccissiyo, “ubbabai saro; aibikka hanenna” giyo awaajjoy hegaappe dummatana. Aybissi? Hegee haniyo wode, asay alamiyaa haariyaageeti alamee woppu giidi deꞌiyo soho gidanaadan oottidosona giidi qoppana danddayees. Gidoppe attin, he wode “iita waayee” doommin, ‘bashshay qoppennan’ gakkana.—Maa. 24:21.

4. (a) “Ubbabai saro; aibikka hanenna” giyo awaajjuwaa xeelliyaagan nuuni ay akeekana koshshii? (b) Hegaa xeelliyaagan nuuni eriyoobay aybee?

⁴ “Ubbabai saro; aibikka hanenna” giyo awaajjuwaabaa nuuni amaridabaa eroos. SHin nuuni harabaa erokko. Haariyaageeti he erissuwaa odanaadan gaaso gidanabay aybakko woy he awaajjoy ayba ogiyan awaajjettanaakko nuuni erokko. Qassi hegee issitoo awaajjettanaakko woy kaalli kaallidi odettanaakko nuuni erokko. Haniyaabay ayba gidikkonne, nuuni hagaa eroos: Alamiyaa haariyaageeti alamiyawu sarotettaa ehaana danddayenna gishshawu, eta awaajjuwan nuuni cimettana koshshenna. SHin he awaajjoy nuuni naaganaadan Geeshsha Maxaafay nuussi yootiyo awaajjo. Hegee ‘Yihoowa gallassay’ doommana haniyoogawu malaata!

5. Koyro Tasalonqqe 5:4-6y nuuni Yihoowa gallassawu giigetti uttanaadan waati maaddii?

⁵ Koyro Tasalonqqe 5:4-6 nabbaba. Nuuni ‘Yihoowa gallassawu’ giigetti uttanawu waatana koshshiyaakko PHawuloosi zoridobay yootees. “Nuuni harati xiskkiyoogaadan xiskkanau bessenna.” ‘Nuuni beegottidi’ deꞌana bessees. Leemisuwawu, nuuni alamiyaaban oossinne exatennaadaaninne polotikaaban gelennaadan naagettana koshshees. Nuuni hegaa malaban gelikko, “sa7aabaa” gidoos. (Yoh. 15:19) Xoossaa Kawotettaa xallay alamiyawu sarotettaa ehaanaagaa nuuni eroos.

6. Nuuni harata maaddanawu waatana koshshii, qassi aybissi?

⁶ Nuuni beegottidi deꞌiyoogaa bolli, Geeshsha Maxaafay kasetidi yootidobay alamiyan hananaagaa harati eranaadankka eta maaddanawu koyoos. Nuuni hegaa haꞌꞌi oottana koshshees; ayssi giikko, iita waayee doommiyo wode asay Yihoowakko simmanawu wodee aadhdhiichchana. Nu sabbakuwaa oosoy keehi koshshiyoy hegaassa!c

SABBAKIYOOGAN MULETOO MINNA

7. Yihooway ha wodiyan nuuni ay oottanaadan koyii?

⁷ Yihoowa ‘gallassay’ doommanawu guutta wodee attido gishshawu, nuuni aggennan minnidi sabbakanaadan I koyees. Nuuni “Godaa oosuwaa azallennan” oottana koshshees. (1 Qor. 15:58) Yesuusi nuuni oottanabaa kasetidi yootiis. Wurssetta wodiyan hanana gitabata ubbaa yootiyo wode, I hagaakka gujjiis: “Wonggeliyaa mishiraachchoi koiroora dere ubbau odettiichchanau bessees.” (Mar. 13:4, 8, 10; Maa. 24:14) Hagaa qoppa: Neeni haggaaziyo wode ubban, Geeshsha Maxaafaa hiraagay polettanaadan maaddaasa!

8. Kawotettaabaa sabbakuwaa oosoy waani dicciiddi deꞌii?

⁸ Kawotettaabaa sabbakiyo oosuwaa dichchaabaa woygana danddayiyoo? Layttan layttan, daro asay Kawotettaa mishiraachchuwaa siyees. Leemisuwawu, wurssetta gallassan kumetta saꞌan Kawotettaabaa aassiyaageetu qooday ay keena gujjidaakko qoppa. Eti 1914n, 43 biittatun 5,155. Ha wodiyan, 8.5 miiloone gidiya aassiyaageeti 240 biittatun deꞌoosona! Hegaa gidinkka, nu oosoy biron wuriichchibeenna. Asaa metuwaa ubbaa qaarana danddayiyay Xoossaa Kawotettaa xalla gidiyoogaa nuuni aggennan awaajjana bessees.—Maz. 145:11-13.

9. Nuuni Kawotettaa mishiraachchuwaa aggennan sabbakana bessiyoy aybissee?

⁹ Kawotettaabaa sabbakiyo oosoy Yihooway gidana gaana gakkanaashin wurenna. Asay Xoossaa Yihoowanne Yesuus Kiristtoosa eranawu ay keena wodee attidee? (Yoh. 17:3) Nuuni erokko. SHin gita waayee gakkanaashin “merinaa de7uwaassi” suure koshshay deꞌiyoogeeti mishiraachchuwaa siyidi Yihoowassi haggaazana danddayiyoogaa eroos. (Oos. 13:48) Wodee wurennan deꞌishin he asata waati maaddana danddayiyoo?

10. Asaa tumaa tamaarissanawu maaddiyaabaa Yihooway nuussi ay immii?

¹⁰ Asaa tumaa tamaarissanawu nuussi koshshiyaaba ubbaa Yihooway ba dirijjitiyaa baggaara immees. Leemisuwawu, saaminttawu gidduwan shiiqiyo shiiquwan ubbatoo loohoos. He shiiqoy koyro haasayissiyo wodenne zaaretti oychchiyo wode, nuuni woygi haasayissanaakko eranaadan maaddees. Qassi Geeshsha Maxaafaa waati xannaꞌissanaakko he shiiqoy nuna tamaarissees. Yihoowa dirijjitee Tamaarissanawu Goꞌettiyo Waanna Miishshatakka nuussi immiis. He miishshati kaallidi deꞌiyaabawu nuna maaddoosona:

• Haasayaa doommanawu,

• Koshshaa denttettanawu,

• Asay Geeshsha Maxaafaabaa loytti eranaadan maaddanawu,

• Geeshsha Maxaafaa xinaatiyan tumaa tamaarissanawu, qassi

• Koshshay deꞌiyoogeeti nu websaytiyaanne nu SHiiquwaa Addaraashaa xomoosanaadan shoobbanawu.

Ha miishshati deꞌiyoogaa xallay gidenna. Nuuni eta goꞌettana bessees.d Leemisuwawu, siyanawu koyiya issi uraara ufayssiya hanotan haasayikko, neeni zaarettada aara gayttana gakkanaashin I gujjidi nabbabanaadan ayyo issi trakttiyaa woy maxeetiyaa imma. Aginan aginan Kawotettaabaa sabbakiyo oosuwaa aggennan minnidi oottiyoogee nu aawatetta.

11. Intterneetiyan Geeshsha Maxaafaa Tamaariyoobay giigidoy aybissee?

¹¹ Asay tumaa tamaaranaadan Yihooway waati maaddiiddi deꞌiyaakko ane hara leemisuwaa qoppa; jw.org^®. saytiyan Intterneetiyan Geeshsha Maxaafaa Tamaariyoobaa. Ha timirtteti giigidoy aybissee? Aginan aginan, kumetta saꞌan tammu shaꞌan qoodettiya asay Geeshsha Maxaafaabaa tamaaranawu Intterneetiyaa xomoosees. Nu websaytiyan deꞌiya timirtteti he asay Xoossaa Qaalaabaa tumaa tamaaranaadan maaddana danddayoosona. Neeni haasayissiyo asaappe amaridaagee Geeshsha Maxaafaa xannaꞌanawu mammottiyaagaa gidana danddayees. Yaatikko, nu websaytiyan deꞌiya he timirtteta eta bessa woy etassi he timirttetu linkkiyaa kiitta. Danddayettikko, eti eriyo qaalan deꞌiya he timirtteta etawu yootana danddayaasa.e

12. Intterneetiyan Geeshsha Maxaafaa Tamaariyooban issi uri erana danddayiyoobay aybee?

¹² Intterneetiyan Geeshsha Maxaafaa Tamaariyooban hagaappe kaallidi deꞌiya qofati deꞌoosona: “Geeshsha Maxaafaanne A Xaafissidaagaa,” “Geeshsha Maxaafan Odettida Waannatiya Asata,” qassi “Geeshsha Maxaafay Yootiyo Hidootaa.” He timirtteta xannaꞌiyo wode, issi uri kaallidi deꞌiyaabata tamaarana:

• Geeshsha Maxaafay issi ura maaddana danddayiyo ogiyaa

• Yihooway, Yesuusinne kiitanchchati oonakko

• Xoossay asaa aybissi medhdhidaakko

• Tuggaynne iitabay deꞌiyoy aybissakko

Ha timirtteti Yihooway kaalli deꞌiyaabata waati oottanaakkokka qonccissoosona:

• Tuggaanne hayquwaa waati xayssanaakko,

• Hayqqidaageeta hayquwaappe waati denttanaakko, qassi

• Xoossaa Kawotettay maara haarana danddayibeenna asa aysuwaa sohuwan eqqanaadan waati oottanaakko.

13. Issi uri intterneetiyan Geeshsha Maxaafaa tamaariyooban giigida timirtteta wurssikko, issi Yihoowa Markki A xannaꞌissana koshshii? Qonccissa.

¹³ Intterneetiyan giigida timirttee Geeshsha Maxaafaa xannaꞌissiyoogaa an laammanawu giigidaba gidenna. Erissiyo ashkkara oottiyo maataa Yesuusi nuussi immiis. Tamaaranawu koyiyaageeti Intterneetiyaa baggaara xannaꞌanaadan, tamaariyoobaa eti dosanaadaaninne gujjidi tamaaranaadan he timirtteti giigidosona. Hegaappe denddidaagan, eti Geeshsha Maxaafaa xannaꞌana danddayoosona. Issi issi timirttiyaa wurssettan, nabbabiya uri hara asi bana Geeshsha Maxaafaa xannaꞌissanaadan oychchana mala odettees. Nu websaytiyaa baggaara, kumetta saꞌaappe amakaayiyan galla galla 230⁠ppe dariya asay Geeshsha Maxaafaa xannaꞌanawu oychchees. Hegaadan issi asa issi uri xannaꞌissiyoogee keehi koshshiyaaba!

ERISSIYO ASHKKARA OOTTANAWU MULETOO BAAXETA

14. Yesuusi Maatiyoosa 28:19, 20n azazidoogaadan, nuussi danddayettida ubban nuuni ay oottanawu baaxetiyoo, qassi aybissi?

¹⁴ Maatiyoosa 28:19, 20 nabbaba. Nuuni Geeshsha Maxaafaa xinnaꞌissiyo wode, Yesuusi “azazidobaa ubbaa eti naagana mala” eta tamaarissiyoogan, ‘A kaalliyaageeta oottanawu’ nuussi danddayettida ubban baaxetana bessees. Yihoowassinne A Kawotettawu asay exatiyoogee keehi koshshiyaaba gidiyoogaa eti akeekanaadan nuuni maaddana koshshees. Hegaa giyoogee asay tamaariyoobaa oosuwan peeshshanaadan, bantta deꞌuwaa Yihoowawu sheedhdhanaadaaninne xammaqettanaadan denttettanawu nuuni baaxetana koshshees giyoogaa. Eti hegaadan oottiyoogaa xallan Yihoowa gallassaappe attana.—1 PHe. 3:21.

15. Nuuni waatanawu wodee baawee, qassi aybissi?

¹⁵ Doomettan beꞌidoogaadan, ha alamee xayana gakkanaashin deꞌiya wodee keehi guutta. Hegaa gishshawu, Kiristtoosi erissiyo ashkkara gidanawu aynne koyennaageeta Geeshsha Maxaafaa xannaꞌissiyo wodee nuussi baawa. (1 Qor. 9:26) Nu oosoy eesuwan oottana koshshiyaaba! Wodee wuriichchennan Kawotettaa mishiraachchuwaa siyana koshshiya daro asay deꞌees.

WORDDO HAYMAANOOTIYAARA GAYTTIDA AYBIPPEKKA HAAKKA

16. Ajjuutaa 18:2, 4, 5, 8y yootiyoogaadan, nuuni waatana bessii? (Tohossa qofaa xeella.)

¹⁶ Ajjuutaa 18:2, 4, 5, 8 nabbaba. Ha xiqiseti Yihooway baayyo goynniyaageeti oottanaadan koyiyo harabaa qonccissoosona. Tumu Kiristtaaneti ubbay eta Gita Baabilooniira gattiyaabaa oottana koshshenna. Tumaa tamaaranaappe kase, Geeshsha Maxaafaa tamaaree worddo haymaanootiyaa yame gidana danddayees. I he haymaanootiyaa oosotanne meezeta kase kaalliyaagaa gidana danddayees. Woy qassi I he dirijjitiyawu miishshaa immidaagaa gidana danddayees. Geeshsha Maxaafaa xinaatee xammaqettennan aassiyaagaa gidanaappe kase, I kase worddo haymaanootiyaara gayttiyooba aybanne aggidoogaa akeekana bessees. I ba kase woosa keettawu woy worddo haymaanootiyaa bagga gidida dirijjitiyawu hegaappe simmin yame gidennaagaa yootanawu dabddaabbiyaa xaafana koshshees.f

17. Issi Kiristtaanee naagettana bessiyo oosoy aybee, qassi aybissi?

¹⁷ Tumu Kiristtaanee ba oosoy worddo haymaanootiyaara ayba ogiyankka gayttennaagaa erana bessees. (2 Qor. 6:14-17) Leemisuwawu, woosa keettaaba gidida oosuwaa I oottana bessenna. Hegaa bollikka, hara oosuwaa oottiya issi Kiristtaanee worddo haymaanootiyaabaa gidida keettan ayba oosonne oottanawu ekkennaadan keehi naagettana koshshees; leemisuwawu, he keettaa loyttanawu oottiyo ooso gidana danddayees. Assi buzo oosoy deꞌikko, I Gita Baabilooniira gayttida oosuwaa oottanawu woy konttiraatiyaa ekkanawu malenna. Nuuni hegaabaa mintti qoppiyoy aybissee? Nuuni Xoossay tuna giyo worddo haymaanootee tamaarissiyo worddo timirttetanne bala meezeta kaallana koyenna gishshataassa.—Isi. 52:11.g

18. Issi ishay ba oosuwaa xeelliyaagan Geeshsha Maxaafaa maaraa waati mintti kaallidee?

¹⁸ Amarida layttaappe kase, konttiraatiyaa ekkida issi bitanee ba buzo oosuwaa oottiya issi cimay deꞌiyo kataman issi woosa keettan anaaxe ooso gidida guuttabaa oottanaadan A shoobbiis. Konttiraatiyaa ekkidaagee he ishay woosa keettaa oosuwaa oottikke giidi muletoo haasayiyoogaa erees. SHin konttiraatiyaa ekkidaagee he oosuwaa oottana danddayiya ura he wode demmanawu metootiis. Gidikkokka, he ishay Geeshsha Maxaafaa maaraa mintti kaalliyo gishshawu he oosuwaa ekkennan ixxiis. Kaalliya saaminttan, heeran attamettiya gaazeexay hara anaaxee woosa keettan masqqaliyaa wottiyaagaa bessiya pootuwaa kessiis. Nu ishay Geeshsha Maxaafaa maaraa mintti kaallennaakko, he gaazeexan kiyana pootoy aagaa gidennan waayi aggana. Hegee A mala Kiristtaanetu giddon awu deꞌiya loꞌꞌo sunttay keehi moorettanaadan oottana danddayiyoogaa qoppa! Qassi Yihoowayyo aybi siyettanaakko qoppa.

NUUNI AY TAMAARIDOO?

19-20. (a) Hanno gakkanawu nuuni ay tamaaridoo? (b) Nuuni tamaarana koshshiya harabay aybee?

¹⁹ Geeshsha Maxaafaa hiraagay yootiyoogaadan, alamiyan mata wode hanana gitabay kawotettati “ubbabai saro; aibikka hanenna” giidi awaajjana awaajjuwaa. Yihooway nuna tamaarissido gishshawu, kawotettati tumu sarotettaa eheennaagaa nuuni eroos. Hegee hananaappe kasenne bashshay qoppennan yaanaappe kase nuuni ay oottana koshshii? Yihooway nuuni Kawotettaa mishiraachchuwaa minnidi sabbakanaadaaninne darota erissiyo ashkkara oottanawu baaxetanaadan koyees. Qassi, nuuni worddo haymaanoote ubbaappe dummatana koshshees. Hegee aybiininne Gita Baabilooniira yametennaagaanne iira gayttanaadan oottiya oosuwaappe naagettiyoogaa xaaxi waaxees.

²⁰ “Wurssettaa gallassatun” hanana harabatikka deꞌoosona. Nuuni oottanaadan Yihooway koyiyo harabatikka deꞌoosona. Hegeeti aybee, qassi sinttappe yaana ubbabawu nuuni nuna waati giigissana danddayiyoo? Nuuni hegaa kaalliya huuphe yohuwan beꞌana.