Yihoowa Xallawu Goynna

1. Yihoowa xallawu goynnana koshshiyoy aybissee?

YIHOOWAY nuna medhdhido gishshawunne nuussi deꞌuwaa immido gishshawu, nuuni A xalaalawu goynnana bessees. (Ajj. 4:11) SHin nuna metiyaabay deꞌees. Nuuni Yihoowa siiqiyaabanne bonchchiyaaba gidikkonne, nu harabaa xoqqu oottidi xeelliyoogee Yihoowa siiqennaadaaninne A xallawu goynnennaadan diggana danddayees. Hegee waani hanana danddayiyaakko nuuni akeekana koshshees. Gidoppe attin, koyro, Yihoowa xallawu goynniyoogaa giyoogee woygiyoogaakko beꞌana.

2. Kessaabaa 34:14y yootiyoogaadan, nuuni Yihoowa xallawu goynniyaaba gidikko, waatanee?

² Geeshsha Maxaafan Xoossawu aqiyoogaa giyoogee A wozanappe siiqiyoogaa bessiyaaba. Nuuni Yihoowa xallawu aqiyo wode, A xalaalawu goynnoos. Nuuni ooninne woy aybinne nu wozanan Yihoowawu immana bessiyo sohuwaa ekkanaadan eeno gookko.—Kessaabaa 34:14 nabbaba.b

3. Yihoowa siiqiyo loꞌꞌo gaasoy nuussi deꞌiyoy aybissee?

³ Nuuni Yihoowa siiqiyo loꞌꞌo gaasoy deꞌees. Ayssi giikko, nuuni abaa tamaarido tumay hegawu denddo. Nuuni A loꞌꞌo eeshshata nashshoos. Yihooway siiqiyoobaanne ixxiyoobaa nuuni eroos; qassi nuuyyookka aagaadan siyettees. I asawu halchchidobaa akeekoosinne hegaara maayiyaabaa oottoos. Nuuni A dabbo gidanaadan I eeno giidoogaa gita maatadan qoppoos. (Maz. 25:14) Nuna Medhdhidaagaabaa nu tamaariyo ubbabay akko kaseegaappe aaruwan shiiqanaadan oottees.—Yaaq. 4:8.

4. (a) Dabloosi nuuni Yihoowa kaseegaadan siiqennaadan oottanawu ay goꞌettii? (b) Ha huuphe yohuwan nuuni ay beꞌanee?

⁴ Ha alamiyaa haariyay Dabloosa; qassi I asay xoqqu ootti xeelliyoobaa nuuni koyanaadaaninne nu iitabaa amottiyoogaa eqettiyoogee nuuyyo deexxanaadan oottanawu ha alamiyaa goꞌettees. (Efi. 2:1-3; 1 Yoh. 5:19) Nuuni Yihoowa xalla gidennan, harabaakka siiqanaadan I koyees. Dabloosi hegaa oottana danddayiyo naaꞌꞌu ogeta nuuni beꞌana. I koyruwan nuuni miishshaa siiqanaadan, qassi naaꞌꞌanttuwan nuuni iitaban wodiyaa aattanaadan oottanawu baaxetees.

MIISHSHAA SIIQENNAADAN NAAGETTA

5. Nuuni miishshaa siiqiyaageeta gidennaadan naagettana bessiyoy aybissee?

⁵ Maanawu gidiya qumay, loꞌꞌo maayoynne deꞌanawu loꞌꞌo keettay daana mala nuuni ubbay koyoos. Gidoppe attin, nuuni miishshaa siiqiyaageeta gidennaadan naagettana bessees. Ha wodiyan daro asay ‘miishshaanne’ miishshan shammana danddayiyoobaa ‘siiqees.’ (2 Xim. 3:2) Yesuusi bana kaalliyaageeti hegaa siiqiyoogan paacettana danddayiyoogaa erees. Yesuusi hagaadan giis: “Naa77u godatuyyo haarettanau danddayiyai ooninne baawa; aissi giikko, woi issuwaa ixxidi, hinkkuwaa siiqana; woi issuwaa bonchchidi, hinkkuwaa karana; Xoossaassinne miishshaassi haarettanau danddayekketa.” (Maa. 6:24) Yihoowayyo goynniiddi aquwaa shiishshanawu daro wodiyaa wurssiya uri, naaꞌꞌu godatuyyo haarettanawu malees giyoogaa. I goynniyoy Yihoowa xallaassa gidenna.

6. Yesuusi Lodooqiyan deꞌiya gubaaꞌiyawu yootidobaappe ay tamaarana danddayiyoo?

⁶ Koyro xeetu laytta M.L. wurssettan, Lodooqiyaa giyo kataman deꞌiya gubaaꞌiyaa yameti ceeqettidi hagaadan giidosona: “Taani dure; mehiyaasa; tana ainne koshshenna.” SHin eti Yihoowanne Yesuusa xeelan “metootiya asa, qarettiya asa, hiyyeesa, qooqenne kallottida asa.” Yesuusi eta zoridoy eti dure gidiyo gishshataassa gidennan, miishshaa eti keehi siiqiyoogee Yihoowaara dabbotido dabbotaa moorido gishshataassa. (Ajj. 3:14-17) Nuuni miishshaa siiqiyoogaa doommidoogaa akeekikko, nu qofaa eesuwan giigissana bessees. (1 Xim. 6:7, 8) Nuuni hegaadan oottana xayikko, harabaa keehi siiqiyoogaa doommana; qassi nu goynuwaa Yihooway ekkenna. I “qanaatiya Xoossaa.” (Zaa. 4:24) Yaatiyo gishshawu, miishshay nuuni nu deꞌuwan xoqqu ootti xeelliyoobaa waani gidana danddayii?

7-9. Deevida giyo gubaaꞌiyaa cimaa hanotaappe neeni ay tamaaray?

⁷ Amarkkan deꞌiya minni oottiya Deevida giyo cimaabaa qoppa. I mino oosanchcha gidiyoogaa yootees. I oottiyo dirijjitee ayyo loꞌꞌo oosuwaa immiisinne daro miishshaa qanxxees; I he biittan he oosuwaa oottida gooba asatuppe issuwaadan xeelettees. Deevidi, “Taani hegaadan hayttatidoogee Yihooway tana anjjidoogaa bessiyaabadan he wode qoppaas” yaagiis. SHin I hayttatanaadan oottiday tumuppe Yihooway?

⁸ Deevidi ba oosoy Yihoowaara I dabbotido dabbotaa mooriyoogaa loddan loddan akeekiis. I hagaadan giis: “Gubaaꞌe shiiqotun, ubba qassi haggaazuwan, oosuwaara gayttida metotubaa taani qoppiyoogaa akeekaas. Taani daro miishshaa demmays; shin tana unꞌꞌissiyaabay gujji gujji biis; qassi ta aqo deꞌuwan metoy merettiyoogaa doommiis.”

⁹ Deevidi I keehi xoqqu ootti xeelliyoobay aybakko kuuyana koshshiyoogaa akeekiis. I, “Taani ta hanotaa giigissanawu murttaas” yaagiis. Deevidi ba oosuwaa prograamiyaa laammanawu koyido gishshawu I ay oottanawu koyiyaakko bana ootissiyaagawu yootiis. Hegee ay kaalettidee? Deevidi oosuwaappe yedetettiis! I waatidee? I, “Kaafiya aqinye gidada unddenna wodiyawu haggaazanawu wonttetta gallassi oychchaas” yaagiis. Deevidinne A machchiyaa banttassi koshshiyaabaa kunttanawu geeshshiyo oosuwaa oottiyoogaa doommidosona. Guutta wodiyaappe simmin, I ubba wode aqinye gidiis, qassi A machchiyaakka guyyeppe aqinye gidaasu. Ha azinaynne machchiyaa daro asay kariyo oosuwaa oottanawu dooridosona; shin he oosoy eti xoqqu ootti xeelliyooba gidenna. Eti demmiyo miishshay kaseegaappe tammu kushiyaa guuxxikkonne, eti banttassi koshshiyaabaa shammiyo miishshaa aginan aginan demmoosona. Eti Yihoowabaa kaseyanawu koyoosona; qassi Kawotettaabaa kaseyiyaageetussi koshshiyaabaa Yihooway kunttiyoogaa bantta deꞌuwan beꞌidosona.—Maa. 6:31-33.

10. Nuuni nu wozanaa waati naagana danddayiyoo?

¹⁰ Nuussi deꞌiya miishshay guutta gidin woy daro gidin, nu wozanaa naagana koshshees. Waatidi? Miishshaa siiqiyoogaa doommoppa. Qassi neeni Yihoowayyo haggaaziyo haggaazuwaappe ne oosuwaa xoqqu oottada xeelloppa. Ne hanotay hegaa mala gidiyoogaa waata erana danddayay? Kaallidi deꞌiya amarida oyshata nena oychchana danddayaasa: ‘Taani shiiquwan deꞌaydda woy haggaazaydda darotoo ta oosuwaabaa qoppiyaanaa? Taayyo sinttanawu gidiya miishshay deꞌanaadan muletoo hirggiyaanaa? Miishshaynne duretettay ta aqo deꞌuwan metoy merettanaadan oottiyoonaa? Yihoowayyo haggaaziyo daro wodiyaa demmana mala harati kariyo oosuwaa oottanawu eeno giyaanaa?’ (1 Xim. 6:9-12) Nuuni ha oyshata qoppikko, Yihooway nuna siiqiyoogaanne a xallawu oottanawu murttidaageetussi, “Taani nena mulekka yeggikke woikko aggikke” yaagidi gelido qaalaa nuuni hassayana bessees. Kiitettida PHawuloosi “miishsha siiqoppe inttena naagite” giidoy hegaassa.—Ibr. 13:5, 6.

NEENI WODIYAA AATTIYOOBAA AKEEKAN DOORA

11. Wodiyaa aattiyoobay issi uri waatanaadan oottana danddayii?

¹¹ Yihooway nuuni deꞌuwan ufayttanaadan koyees; qassi wodiyaa aattiyoobay nuuni ufayttanaadan maaddana danddayees. Xoossaa Qaalay, “Asassi go77a gidiyaabi aibee giikko, asi ba daafuridobaappe miidinne uyidi ufaittiyoogaa” yaagees. (Era. 2:24) SHin, alamiyan deꞌiya, wodiyaa aattiyoobaappe dariya baggay nuna qohana danddayees. Hegee Xoossaa Qaalan digettidabaa daro asay kaallanaadan woy siiqanaadan oottana danddayees.

12. Koyro Qoronttoosa 10:21, 22y yootiyoogaadan, nuuni wodiyaa aattiyoobaa akeekan doorana koshshiyoy aybissee?

¹² Nuuni Yihoowa xallawu goynnana koyiyo gishshawu, ‘A masoofiyaappenne xalahetu masoofiyaappe’ maana danddayokko. (1 Qoronttoosa 10:21, 22 nabbaba.) Issi uraara qumaa miyoogee darotoo laggetettaa bessiyaaba. Nuna danobawu, iita ayyaana oosuwawu, pokkobawu, woy hara iita koshshawu denttettiya, wodiyaa aattiyoobaa nuuni doorikko, Xoossaa morkketi giigissido qumaa moos giyoogaa mala. Hegaappe denddidaagan, nuuni nuna qohiyoogaa xalla gidennan, Yihoowaara dabbotido dabbotaykka moorettanaadan oottoos.

13-14. Yaaqooba 1:14, 15, maaran, nuuni wodiyaa aattanawu dooriyoobaa xeelliyaagan naagettana bessiyoy aybissee? Leemisuwaa yoota.

¹³ Wodiyaa aattiyoobaa ayba ogiyan qumaara geeddarssana danddayiyoo? Nuuni miyo wode, nu baariyoobaa doorana danddayoos. SHin, nuuni qumaa mitti simmidi, he qumay nu bollaa waati goꞌꞌanaakko woy qohanaakko doorana danddayokko. Loꞌꞌo qumay nuuni payya gidanaadan oottana danddayees; moorettida qumay nuuni sahettanaadan oottees. Hegee kaalettiyoobaa nuuni eesuwaara akeekennan aggana danddayoos; shin hegee amarida wodeppe guyyiyan erettees.

¹⁴ Hegaadan, nuuni wodiyaa aattiyoobaa dooriyo wode, nu guuggiyan gelissiyoobaa doorana danddayoos. Guyyeppe, wodiyaa aattanawu nuuni dooridobay nu qofaa moorana danddayees. Wodiyaa aattanawu dooriyo loꞌꞌobay nuna minttettana danddayees; qassi wodiyaa aattanawu dooriyo iitabay nuna qohees. (Yaaqooba 1:14, 15 nabbaba.) Hegee kaalettiyoobaa nuuni eesuwaara akeekennan aggana danddayoos; shin hegee amarida wodeppe guyyiyan erettees. Geeshsha Maxaafay kaallidi deꞌiyaagaadan giyoy hegaassa: “Inttena intterkka cimmoppite. Ooninne Xoossaa bolli qilliiccanau danddayenna; aissi giikko, asi ba zeriyoogaa zaarettidi cakkana. Ba asatettaa amuwan zeriyaabaa gidikko, asatettaa amuwaappe haiquwaa cakkana.” (Gal. 6:7, 8) Nuuni Yihooway ixxiyoobaa minttettiyaaban wodiyaa aattiyoogaa ixxiyoogee keehi koshshiyaaba!—Maz. 97:10.

15. Nuuni ufayttanaadan Yihooway immido imotay aybee?

¹⁵ Yihoowa asaappe dariya baggay Intterneetiyan deꞌiya nu televizhiine xaabiyaa, JW Brodkastingiyaa^® beꞌiyoogan ufayttees. Merilin giyo michchiyaa hagaadan gaasu: “JW Brodkastingee ufayttiya asa gidanaadan tana maaddiis; qassi hegan deꞌiya ubbabay taayyo loꞌꞌo gidiyo gishshawu taani ubbaa beꞌana danddayays. Taani boorasiyo wode woy hidootaa qanxxiyo wode, minttettiya haasayaa woy Maallado Goynuwaa prograamiyaa beꞌays. Hegee taani Yihoowakkonne A dirijjitiyaakko keehi shiiqidabadan tawu siyettanaadan oottees. JW Brodkastingee ta deꞌoy muleera laamettanaadan oottiis.” Yihooway immiyo imotan neeni goꞌettaydda deꞌay? JW Brodkastingiyan aginan aginan oorattabay kiyees; qassi hegan cenggurssan giigidabaynne biidoti, neeni awudekka beꞌananne siyana danddayiyo mazamureti deꞌoosona.

16-17. Nuuni allaxxiyoogan ay keena wodiyaa aattiyaakko naagettana bessiyoy aybissee, qassi hegaadan waati oottana danddayiyoo?

¹⁶ Wodiyaa aattiyo wode ay doorana koshshiyaakko nuuni naagettana bessees; qassi nuuni hegan ay keena wodiyaa aattiyaakkonne doorana bessees. Nuuni yaatana xayikko, Yihoowayyo haggaaziyoogaappe aaruwan allaxxiiddi daro wodiyaa aattana danddayoos. Allaxxiyoogan daro wodiyaa aattennan agganawu daroti metootoosona. Layttay 18 gidido Abigaalo giyo michchiyaa hagaadan gaasu: “Oosuwaappe simmada omarssan Televizhiiniyaa beꞌiyoogee taani ufayttanaadan maaddees. SHin taani naagettana xayikko, Televizhiiniyaa beꞌaydda daro saatiyaa aattana danddayays.” Sameela giyo yelaga ishay hagaadan giis: “Intterneetiyan qantta biidota beꞌaydda keehi daro wodiyaa aattiyoogaa akeekaas. Taani issuwaa beꞌiyoogaa doommikko, taani erennan heezzu woy oyddu saatee aadhdhees.”

¹⁷ Neeni allaxxiyoogan aattiyo wodiyaa waata naagana danddayay? Koyro ogee allaxxiyoogan ay keena wodiyaa aattiyaakko eriyoogaa. Hegan ay keena wodiyaa aattiyaakko issi saaminttaagaa xaafa oyqqiyoogee loꞌꞌo. Televizhiiniyaa beꞌaydda, Intterneetiyaa xomoosayddanne moobayliyan biiduwaa kaassaa kaꞌaydda neeni ay keena saatiyaa aattiyaakko xaafa oyqqa. Neeni keehi daro wodiyaa aattiyaabadan neeyyo siyettikko, prograamiyaa kessanawu mala. Keehi koshshiyaabata kasetada oottanawu halchcha; qassi hegaappe simmin allaxxanawu wodiyaa bazza. Yaatada, ne prograamiyaa kaallanaadan Yihooway maaddana mala oychcha. Yaatiyoogan Geeshsha Maxaafaa buzo xannaꞌanawu, so asaa goynuwawu, gubaaꞌe shiiqotussinne Yihoowayyo haggaazanawu koshshiya wodeenne wolqqay neeyyo deꞌana. Neeni Yihoowabaa kaseyiyoogaa gaasuwan, allaxxiyooban aattiyo wodiyan ufayttana danddayaasa.

UBBATOO YIHOOWA XALLAWU GOYNNA

18-19. Nuuni Yihoowa xallawu goynniyoogaa waati bessana danddayiyoo?

¹⁸ Seexaanaa alamee xayanaagaanne ooratta alamee yaanaagaa xaafi simmidi kiitettida PHeexiroosi hagaadan giis: “Ta siiqotoo, he gallassaa naagiiddi, pokkoinne boree bainnaageeta gididi, aara sarotettan de7ana mala minnite.” (2 PHe. 3:14) Nuuni he zoriyaa oosuwan peeshshiyo wodenne kandduwaaninne ayyaanaaban geeshsha gididi deꞌanawu nuussi danddayettida ubbabaa oottiyo wode, nuuni Yihoowa xallawu goynniyoogaa bessoos.

¹⁹ Seexaanaynne A alamee nuuni nu deꞌuwan Yihoowappe harabaa kaseyana mala ubbatoo paaccanawu malees. (Luq. 4:13) Gidoppe attin, ooninne woy aybinne nuuni nu wozanan Yihoowawu immana bessiyo sohuwaa ekkanaadan eeno gookko. Nuuni Yihoowa xallawu goynnanawu murttana koshshees!