Xoossaa haaruwan, mereta ubbay issippetettaaninne sarotettan deꞌiis
Xoossaa Kawotettay Nuussi Koshshiyoy Aybissee?
Koyro asati merettido wode, nuna Medhdhida A sunttay Yihoowa gididoogee Haariyay A xalaala. I siiquwan haarees. I Edene giyoosan, asay deꞌanaadan loꞌꞌiya sohuwaa gannatiyaa giigissiis. I etawu gidi palahiya qumaakka immiis. Hegaa bollikka, I asawu ufayssiya oosuwaa immiis. (Doomettaabaa 1:28, 29; 2:8, 15) Asay Xoossaa siiqo haaruwan deꞌikko, eti sarotettan deꞌana.
Koyro asati Xoossay eta haarennaadan ixxidosona
Guyyeppe Seexaana Dabloosa geetettida makkalanchcha kiitanchchay, Xoossawu asaa haariyo maatay deꞌana danddayenna giidoogaa Geeshsha Maxaafay yootees. I Xoossaa kaaletoynne haaroy baynnan, asay ufayttana giidi yootiis. Addaameenne Hewaana Seexaanaa leemisuwaa kaallidi Xoossaa bolli makkalidoogee azzanttiyaaba.—Doomettaabaa 3:1-6; Ajjuutaa 12:9.
Addaameenne Hewaana Xoossay eta haarennaadan ixxido gishshawu, Gannateenne wottiyoobi baynna merinaa deꞌuwaa hidootay etappe haliis. (Doomettaabaa 3:17-19) Eti kuuyidobay guyyeppe eti yelido naatakka qohiis. Geeshsha Maxaafay Addaamee nagaraa oottido gishshawu, “Nagarai ha sa7aa issi asa baggaara geliis; he nagarai banaara haiquwaa ehiis” yaagees. (Roome 5:12) Asaa nagaray hara wolqqaama metuwaa kaalettiis: “Asi bau de7iya haariyo maataa hara asa qohanau [goꞌettees.]” (Eranchchaa 8:9) Hegaa giyoogee asay asaa haariyo wode, awudenne metoy xayenna giyoogaa.
ASAA HAAROY DOOMMIIS
Naamiruudi Yihoowa haaruwaa eqettiis
Asaa haarida koyro bitanee Naamiruuda gidiyoogaa Geeshsha Maxaafay yootees. Qassi I Yihoowa haaruwaa eqettiis. Naamiruuda wodeppe doommidi maatay deꞌiyo asay ba maataa bessenna ogiyan goꞌettees. Eranchcha Kawuwaa Solomoni 3,000 gidiya layttappe kase hagaadan giis: “Naaqettidaageeti banttana minttettiyaabaa xayidi yeekkoosona. Naaqqiyaageetussi gita maatai de7iyoogaappe attin, naaqettiyaageeta maaddiyaabi ooninne baawa.”—Eranchchaa 4:1.
Ha wodiyankka hegaa mala. “Ha wodiyan iitabay haniyo waannaa gaasoy” haariya iita asati darido gishshataassa gidiyoogaa Kawotettatu Issippetettaa dirijjitee 2009n giigissido issi xuufee qonccissiis.
ISSIBAA OOTTANA BESSIYO WODE!
Haariya loꞌꞌo asaynne loꞌꞌo aysoy ha alamiyawu koshshees. Qassi nuna Medhdhidaagee qaalaa gelidobay hegaa!
Keehi loꞌꞌo gidida kawotettatikka asa gakkiya gita metota xayssana danddayibookkona
Xoossay asaa haaruwaa ubbaa xayssidi ba Kawotetta woy ba haaruwaa essana, qassi he Kawotettay “merinau eqqidi daana.” (Daaneela 2:44) Miilooniyan qoodettiya asay woossiiddi deꞌiyoy he Kawotettaa. (Maatiyoosa 6:9, 10) SHin he kawotettaa ayssiyaagee Xoossaa gidenna. SHin, asa gididi saꞌan deꞌidaagee Haariyaagaa gidanaadan I sunttiis. Xoossay oona dooridee?