“Yaada Tana Kaalla”
1. Yesuusa leemisuwaa nuuni kaallanaadan oottiya dumma oosoy awugee?
1 Yesuusi saꞌan deꞌido wodiyaabaa yootiya oyddu Wonggeleti Xoossaa Naꞌaabaa darobaa qonccissoosona. Kiristtaaneti “a kaallana” koshshiyo gishshau, haggaazuwan nuna minttettana danddayiya, Yesuusa deꞌuwaa hanotaa loyttidi akeekiyoogee goꞌꞌees.—1 PHe. 2:21; Mar. 10:21.
2. Yesuusi genccidoogan leemiso gidiyo hanotay nuna waati goꞌꞌana danddayii?
2 Yesuusi Leemiso Gididobaa: Sooppe soo haggaaziyo wode loꞌꞌo gidenna ogiyan neeyyo zaaro immida asaara gaytta eray? Hegaadan eqettiya asaara gayttiyo wode, Yesuus: “Eti tana yedettidabaa gidikko, inttenakka yedettana” giido qaalay maaddiyoogaa akeekana danddayoos. (Yoh. 15:20) Loꞌꞌo gidenna zaaro ubbay yedeta gidennaagee qoncce. Gidikkokka, Yesuusi wodeppe demmana ufayssaa qoppiyoogee i ubba metuwaanne paaciyaa genccanaadan maaddiis. Nuunikka nu xeelaa Yihoowa ufayssiyoogaaninne ammanettidi demmana anjjuwan wottana danddayoos. Hagee nuuni “wozanaa bayidi daafurenna mala” maaddees. (Ibr. 12:2, 3; Lee. 27:11) Nuuni aggennan haggaaziyo wode, Kiristtoos Yesuusi nuna kaafanaagaakka ammanettana danddayoos.—Maa. 28:20.
3. Haggaazuwaara gayttidaagan Yesuusa xeelaa waati kaallana danddayiyoo?
3 “Xoossay Tana Kiittidoogee Hegaassa”: Yesuusi ba deꞌuwan koyro sohuwaa immidoy Kawotettaabaa sabbakiyo oosuwaassa. (Luq. 4:43) Yesuusi bau danddayetta keena ubban haggaaziis. I eesuwan haggaazana koshshiyoogaa akeekiis; Kawotettaabaa yootanau ubbatoo injjiyaa koyiis. Nuuni Yesuusa leemisuwaa kaalliyo gishshau, a kaalliyoogee ay oottanaadan denttettii? Nu galla galla deꞌuwan nuuni mishiraachuwaa yootana danddayiyo asi deꞌii? Kiristtoosa siiqoy mishiraachuwaa aahuwan yootanaadan nuna denttettiyaagaa gido!—2 Qor. 5:14.
4. Nu haggaazuwaa hanotaa ayba ogiyan kaseegaappe loyttana danddayiyoo?
4 “Ha Bitanee Haasayidoogaadan, Mulekka Ooninne Haasayibeenna!”: Yesuusi tamaarissiyoogaa siyidaageeti a timirttiyan garamettidosona. (Yoh. 7:46; Maa. 7:28, 29) Hara asttamaaretuppe i dummatanaadan oottiyaabay aybee? I ba tamaarissiyo tumaa siiqiis; ba tamaarissiyo asaa siiqiis; qassi dumma dumma tamaarissiyo hiillaa goꞌettiis. Gita Asttamaariyaa leemisuwaa kaalliyoogan, nu haggaazuwaa hanotaa kaseegaappe loyttana danddayoos.—Luq. 6:40.
5. Kiristtoosa kaalliyaageeta gidiyoogaadan, nu halchoy ay gidana koshshii?
5 Yesuusa deꞌuwan qonccida, nuuni appe tamaariyo alꞌꞌobatuppe hageeti amaridaageeta. Hara ay alꞌꞌobata tamaarana danddayay? Yesuusa deꞌuwaa pilggiyo wode, neeni a haasayaanne oosuwaa leemisuwaa kaalliyoogan, “Kiristtoosa siiquwaa” eranau halcha.—Efi. 3:19.