So Asaa Maaddiyaabaa

1. Saaminttaa Sambbatay Israaꞌeela gidida so asaa waati goꞌꞌidee?

¹ Sambbataa bonchiyoogee so asaa goꞌꞌau Yihooway siiquwan giigissidoba. Israaꞌeelati bantta oosuwaappe shemppiyoogan, Yihoowa loꞌꞌotettaanne aara deꞌiya dabbotaa xeelliyaagan wotti denttidi qoppanau wodiyaa demmoosona. Yelidaageeti Xoossaa Higgiyaa bantta naata tamaarissanau he injjiyaa goꞌettoosona. (Zaa. 6:6, 7) Sambbatay, Yihoowa asay saaminttan saaminttan ayyaanaaban ba xeelaa wottanau wodiyaa demmanaadan maaddiis.

2. Sambbatay Yihoowa xeelliyaagan nuna ay akeekissii?

² Ha wodiyan, so asay Sambbataa bonchanaadan Yihooway koyennaagee tuma. Gidikkokka, he higgee Xoossaa xeelliyaagan nuuni issibaa akeekanaadan oottees. Yihooway ba asay ayyaanaaban loꞌꞌo hanotan deꞌanaadan keehippe koyees. (Isi. 48:17, 18) Ha wodiyan, Yihooway hegaa siiquwan qonccissiyo issi ogee So Asaa Goynuwaa omarssaa.

3. So Asaa Goynuwaa omarssaa halchoy aybee?

³ So Asaa Goynuwaa Omarssaa Halchoy Aybee? Ichashe 2009n, Tiꞌokiraase Haggaazo Timirtte Keettaaranne Haggaazo SHiiquwaara issippe Gubaaꞌe Maxaafa Xinaatiyaa shiiquwau shiiqiyoogaa doommida. He giigissuwau issi gaasoy, so asaa goynuwau issi omarssaa keeriyoogan so asay ayyaanaaban banttana minttiyo injjiyaa demmanaassa. Danddayettiyaaba gidikko, so asay kase gubaaꞌe maxaafa xinaatiyau goꞌettiyo gallassaa so asaa xinaatiyau goꞌettanaada, qassi woppu giidi Geeshsha Maxaafaa tobbanaunne so asaa maaddanau giigidabata xannaꞌanau goꞌettanaadan minttettoy imettiis.

4. So asay tobbana koshshiyoy issi saate xallaa gidana bessii? Qonccissa.

⁴ Gubaaꞌe Maxaafa Xinaatiyaa shiiquwan beettanaassi maayanau, he sohuwaa baanaunne hegaa mala harabau kase daro saatiyaa goꞌettoos. Nuuppe daroti issi saate ekkiya he shiiquwan beettanau, he shiiquwau goꞌettiyo saatiyaappe daruwaa goꞌettoosona. SHiiquwaara gayttida ooratta giigissuwan, so asay issippe Yihoowayyo goynniyo issi omarssaa demmidosona. Hegaa gishshau, So Asaa Goynuwaa omarssau issi saateppe dariya saatiyaa goꞌettana danddayoos. Nu soo asau koshshiyaabaanne eta abbiyaa qoppidi, hegau gidiya saatiyaa bazzana koshshees.

5. Bazzido saatiyaa ubbaa tobbiyoogaa xallau goꞌettana bessii? Qonccissa.

⁵ Bazzido Saatiyaa Ubbaa Tobbiyoogaa Xallau Goꞌettana Bessii? Yelibeenna azinaynne machiyaa, hegaadankka naati deꞌiyoogeeti Geeshsha Maxaafaa issippe tobbiyo wode issoy issuwaara minettoosona. (Roo. 1:12) So asay kaseegaappe aaruwan issoy issuwaara matattees. Yaatiyo gishshau, So Asaa Goynuwaa omarssan Geeshsha Maxaafan baasettidabaa tobbiyoogee keehippe koshshiyaaba. Gidikkokka, so asaa yame ubbay buzo xinaatiyaukka wodiyaa bazzana danddayees. Leemisuwau, issippe tobbi simmin, issoti issoti xannaꞌiyo wode woy shiiquwau giigettiyoogaa wurssanaashin woy maxeetiyaa nabbabishin harati issippe takkana danddayoosona. Issi issi keettaa asay he omarssi televizhiiniyaa mule dooyennan agganau qofaa qachoosona.

6. Xinaatiyaa ayba ogiyan kaalettana danddayettii?

⁶ Xinaatiyaa Ayba Ogiyan Kaalettana Danddayettii? Ubbatoo oyshanne zaaro xallan kaalettana koshshenna. Daro keettaa asay So Asaa Goynuwaa omarssay ufayssiyaagaa gidanaadan, Tiꞌokraasenne Haggaazo SHiiquwaa prograamiyaadan goꞌettoosona. Eti xinaatiyau goꞌettiyo wodiyaa shaakki shaakkidi dumma dumma ogiyan goꞌettoosona. Leemisuwau, issippe Geeshsha Maxaafaa nabbabanau, shiiquwau amarida kifiliyaa giigettanaunne haggaazuwaassi meezetanau danddayoosona. Sinttaa 6n issi issi qofay deꞌees.

7. Yelidaageeti ay mala hanotay deꞌanaadan baaxetana koshshii?

⁷ Yelidaageeti Ay Mala Hanotay Deꞌanaadan Baaxetana Koshshii? So asay loꞌꞌo hanotan tamaariyoy, siiqoynne woppu giida hanotay deꞌiyo wode. Hanotay injjetikko, issi issitoo karen xannaꞌana danddayeeta. Koshshiyaaba gidikko, xannaꞌiyo wode guuttaa shemppi ekkana danddayeeta. Issi issi keettaa asay xinaatiyaappe simmin so asaa ufayssiyaabaa oottoosona. Yelidaageeti So Asaa Goynuwaa omarssaa naata seeranau goꞌettana bessennaba gidikkokka, eti akeekido ufayssenna eeshshay woy metoy deꞌikko amarida wodiyaa hegaa xeelliyaagan tobbanau goꞌettana danddayoosona. Gidikkokka, harati siyana bessenna issi naꞌaa buzo allaalliyaa, saamintta giddon hara wode aara haasayiyoogee loꞌꞌo gidana danddayees; hara naatu sinttan hegaadan oottennaagee i yeellatennaadan maaddees. So Asaa Goynuwaa omarssay salettiyaagaa gidennan, nuuni ayyo goynniyo ufayttiya Xoossaa eeshshaa qonccissiyaagaa gidana koshshees.—1 Xim. 1:11.

8, 9. So asau huuphe gidiyaageeti ayba ogiyan giigettana koshshii?

⁸ So Asau Huuphe Gidiya Uri Waanidi Giigettana Danddayii? So asau huuphe gidiya uri So Asaa Goynuwaa omarssan aybaa xannaꞌana koshshiyaakko, qassi ayba ogiyan xannaꞌana koshshiyaakko qoppidi kaseti giigettiyaaba gidikko, so asay keehippe goꞌettees. (Lee. 21:5) Hegaara gayttidaagan azinay ba machiyo zoretaa bessiyoogee koshshiyaaba. (Lee. 15:22) So asau huuphe gidiyaageetoo, hegaa xeelliyaagan intte naatikka qofaa immanaadan issi issitoo aybissi oychekketii? Intte hegaadan oottiyaaba gidikko, eta ufayssiyaabaynne qofissiyaabay aybakko akeekana danddayeeta.

⁹ Saaminttatuppe dariya baggan, so asau huuphe gidiyaageeti giigettiyoogan daro saatiyaa goꞌettana koshshenna. So asay xinaatiyaa wode Geeshsha Maxaafaa nabbabiyoogaa mala ubbatoo kaalliyo prograamiyan ufayttana danddayees; so asau huuphe gidiya uri ubbatoo ooratta prograamiyaa kessana koshshenna. Ubbatoo, so asaa xinaatee kuuyetti simmin, so asau ayyaanaaban koshshiyaabay aybakko giigettiyoogee loꞌꞌo gidiyoogaa i akeekana danddayees. So asau huuphe gidida issoti issoti prograamiyaa giigissidi, so asay beꞌana danddayiyo sohuwan kaqqoosona. Hegaadan oottiyoogee so asay ufayttanaadaaninne yeemotti naaganaadan oottees; qassi koshshiyaaba gidikko eti giigettanau wodiyaa demmanaadan oottees.

10. Banttarkka deꞌiyaageeti So Asaa Goynuwaa omarssaa waati goꞌettana danddayiyoonaa?

¹⁰ Tarkka Deꞌiyaaba Gidikkoshin? Banttarkka deꞌiyaageeti So Asaa Goynuwaa omarssaa buzo xinaatiyau goꞌettana danddayoosona. Loꞌꞌo gidida buzo xinaatiyaa prograamee Geeshsha Maxaafaa nabbabiyoogaa, gubaaꞌiyau giigettiyoogaanne Wochiyo Keelaanne Beegottite! maxeetiyaa nabbabiyoogaa gujjana koshshees. Aassiya issoti issoti buzo xinaatiyaa wode hegaadan oottoosona. Issi issitoo, Geeshsha Maxaafan baasettida minttettiya xinaatiyau eti aassiya hara uraa woy hara keettaa asaa shoobbanau koyana danddayoosona.

11, 12. Aggennan So Asaa Goynuwaa omarssan shiiqiyoogan demmiyo goꞌꞌatuppe issoti issoti awugeetee?

¹¹ So Asaa Goynuwaa Omarssan Ubbatoo SHiiqiyoogaa Goꞌꞌay Aybee? Tumu ogiyan wozanappe goynniyaageeti kaseegaappe aaruwan Yihoowakko shiiqoosona. Hegaa bollankka, issippe goynniya so asaa issippetettay minnees. Issi azinaynne machiyaa bantta demmido anjjuwaa hagaadan qonccissidosona: “Nuuni naati baynna aqinye gidishin, So Asaa Goynuwaa omarssaa yeemotti naagoos. Nuuni issoy issuwaaranne saluwan deꞌiya nu Aawaara keehi matattidobadan nuussi siyettees. So asaa xinaatiyaa xannaꞌiyo galla xiskkuwaappe denddiyo wode, issoy issuwau: ‘Hachi nuussi aybi deꞌii? So Asaa Goynuwaa omarssaa!’ yaageettees.

¹² Issi omarssaa so asaa goynuwau goꞌettiyo giigissoy, oosoy dariyo keettaa asaakka maaddees. Naaꞌꞌu attuma naata barkka dichiya, kumetta wode aqinye gidida issi aayyiyaa hagaadan gaasu: “Kase so asaa xinaatiyaa issi issitoo xannaꞌokko. Taani keehi daafuriyo gishshau, xombban xombban xannaꞌoos. Ubbabaa taani waata giigissanaakko kirqqi gees. Taani hagaa xaafidoy, So Asaa Goynuwaa omarssaa gishshau inttena keehippe galatanaassa. Nuuni haꞌꞌi aggennan so asaa xinaatiyaa xannaꞌoosinne appe goꞌettiiddi deꞌoos.”

13. Ha giigissuwan intte soo asay keehippe goꞌettanaadan oottiyaabay aybee?

¹³ Sambbataadan, So Asaa Goynuwaa omarssaykka saluwan deꞌiya nu Aawaa imota gidida, so asaa maaddana danddayiyaaba. (Yaaq. 1:17) Israaꞌeela gidida so asay Sambbataa goꞌettiyo ogee ayyaanaaban keehippe goꞌettanaadan oottees. Hegaadankka, so asaa goynuwau keerido omarssaa nuuni goꞌettiyo ogee nu soo asay keehippe goꞌettanaadan oottees. (2 Qor. 9:6; Gal. 6:7, 8; Qol. 3:23, 24) Ha giigissuwaa loytti goꞌettiyoogan, mazaamuriyaa yexxiyaagee, “SHin taassa gidikko, taani Xoossaa matan de7iyoogee taayyo lo77o. Taani Ubbaa Haariya GODAA taayyo baqata attiyo soho oottaas” giidoogaadan intte soo asaykka gaana danddayees.—Maz. 73:28.

[Sinttaa 5n deꞌiyaagaa qonccissuwaa]

So Asaa Goynuwaa omarssay salettiyaagaa gidennan, nuuni ayyo goynniyo ufayttiya Xoossaa eeshshaa qonccissiyaagaa gidana koshshees

[Sinttaa 6n deꞌiya saaxiniyaa]

MATASAN WOTTITE

So Asaa Goynuwaa Omarssau Maaddiya Issi Issi Qofaa

Geeshsha Maxaafaa:

• Saaminttan nabbabiyo Geeshsha Maxaafaa kifiliyaappe amaridaagaa issippe nabbabite. Issi issi Geeshsha Maxaafaa taariketi issi uray taarikiyaa yootiyaagaa, harati qassi he taarikiyan qonccida hara asata milatidi nabbabana danddayiyo ogiyan giigidosona.

• Geeshsha Maxaafan nabbabiyo issi taarikiyaa ootti-bessite.

• So asaa yameti, so asaa goynuwaa wode nabbabana Geeshsha Maxaafaa shemppota kaseti nabbabidi, issi woy naaꞌꞌu oyshaa giigissanaadan oottite. Yaatidi, ubbatu oyshaakka issippe pilggite.

• Saaminttan saaminttan, xiqisiyaa xaafido woraqataa giigissidi an deꞌiya qofaa hassayanaunne qonccissanau malite. He woraqataa shiishshidi, woqqu xiqiseta hassayiyaakko saaminttan saaminttan zaarettite.

• Geeshsha Maxaafaa oyqqidi kaalliiddi, cenggurssan duuqetti giigida he kifiliyaa ezggite.

SHiiquwaa:

• SHiiquwaa kifiletuppe amaridaagaa issippe giigettite.

• Kaalliya saaminttan gubaaꞌiyan yexxana mazamureta meezetite.

• Intteppe issi urau Tiꞌokiraase Haggaazo Timirtte Keettan kifilee woy Haggaazo SHiiquwan ootti-besoy deꞌikko, waati shiishshana bessiyaakko haasayite woykko so asaa sinttan meezetite.

So Asau Koshshiyaabata:

• Yelagati Oychiyo Oyshaa woy Gita Asttamaariyaappe Tamaara giya maxaafatuppe issi issibaa tobbite.

• Timirtte keettan denddana danddayiya issi hanotaa waatidi oyqqana bessiyaakkokka haasayiyo wodiyaa bazzite.

• Yelidaageeti naatudan naati qassi yelidaageetudan hanin meezetiyo wodeekka deꞌo. Naati issi allaalliyaara gayttidabaa pilggidi yelidaageetuyyo qonccissoosona.

Haggaazuwaa:

• Qeeraanne Woggaa gallassatun asau xuufiyaa waatidi immanaakko meezetiyo wodiyaa bazzite.

• Godaa Kahuwaa bonchiyo heeran woy shemppo wodetun haggaazuwaa aassanau so asay kessana danddayiyo hoolliyaa xeelliyaagan tobbite.

• Haggaazuwan denddana danddayiya dumma dumma oyshata guutta daqiiqa giddon so asaa yameti pilgganaadan oottite; yaatidi hegaa meezetiyo wodiyaa bazzite.

Gujo Qofaa:

• Ooratta maxeetetuppe issi huuphe yohuwaa issippe nabbabite.

• So asaa yameti ooratta maxeetetuppe banttana ufayssida issi huuphe yohuwaa kaseti nabbabidi, appe yootanaadan oottite.

• Issi issitoo, intte So Asaa Goynuwaa omarssan aassiya issi uraa woykko issi azinaanne machiyo shoobbite; eti issi issibaa yootanaadan oychana danddayeeta.

• Nu biiduwaappe issuwaa beꞌidi, an tobbite.

• Beegottite! maxeetiyaappe “Yelagati Oychiyo Oyshaa” woy “So Asay Tobbiyoogaa” giyaagaa issippe tobbite.

• Wochiyo Keelaappe “Intte Naata Tamaarissite” woy “Yelaga Naatuyyo” giyaagaa issippe tobbite.

• Ooratta Laytta Maxaafaappe woy mata wode shiiqido awuraajjaa shiiquwan kiyida xuufiyaappe amaridaagaa nabbabidi tobbite.

• Gita shiiquwaappe simmin, ayfe yohota zaarettite.

• Yihooway medhidobata loytti xeellidi, hegee Yihoowabaa ay tamaarissiyaakko tobbite.

• Issibaa issippe oottite; leemisuwau moodeeliyaa, karttaa woy charttiyaa.