Maalaalissiya Meretay Xoossaa Bonchuwaa Qonccissees
Daro asay meretaa beꞌiyoogan ufayttees. SHin, meretay Medhidaagaa xeelliyaagan darobaa qonccissiyoogaa akeekiya asay keehi guutta. (Roo. 1:20) Beni Daawiti Yihoowabaa geeshsha ayyaanay denttettin xaafettida a Qaalaappe tamaariis. SHin Daawiti Yihooway medhidobaa ‘akeekidoogeekka’ akko kaseegaappe aaruwan shiiqanaadan maaddiis. (Maz. 8:3, 4) Maalaalissiya Meretay Xoossaa Bonchuwaa Qonccissees giya huuphe yohoy deꞌiyo biidoy nu naatinne nuuni Geeshsha Maxaafaa xannaꞌissiyoogeeti Yihooway medhidobaa loyttidi akeekanaadan, qassi nuna medhida Gita Xoossau ay mala eeshshay deꞌiyaakko akeekidi akko kaseegaappe aaruwan shiiqanaadan maaddees. He biiduwaa xeella simmada, kaallidi deꞌiya oyshata zaarana danddayiyaakkonne ane beꞌa.
(1) Saluwaanne saꞌaa aahotettay, qassi eti maran mankkan deꞌiyoogee neeni Yihoowa keehippe nashshanaadan oottiyoy ayba ogiyaanee? (Isi. 40:26) (2) Nuuni haattaa loytti xeelliyo wode, haattaa Medhidaagaabaa ay tamaarana danddayiyoo? (Ajj. 14:7) (3) Saꞌaa yesoy, qassi saꞌaanne awa ayfiyaa giddon deꞌiya haahotettay Yihoowa aadhida eratettaa qonccissiyoy ayba ogiyaanee? (4) Aginay aybissi maaddii? (Maz. 89:37) (5) Yihooway asay deꞌuwan ufayttanaadan medhidoy ayba ogiyaanee? (6) Di en ee aybee? (Maz. 139:16) (7) Yihooway saꞌan medhido ubbabaappe asaa naati dumma gidiyoy ayba ogiyaanee? (Doo. 1:26) (8) Ooratta alamiyan hanettiyaabaappe neeni yeemuwan naagiyoobi aybee?
Harabata: (9) Dumma dumma qalamee merettanaadan oottiyaabay aybee? (10) Haattay dafuwaa higgiyaa xoonidi mittaa licuwaa gakkanau biyoy ayba ogiyaanee? (11) Haattay nu bollau keehippe koshshiyoy aybissee? (12) Paxa deꞌiyaabati issoy issuwaara moggidi deꞌiyoogaa bessiya leemisuwaa yoota. (13) Meretati issoy issuwaara hashetidi deꞌanaadan oottiyaabay aybee? (14) “Goldden anggil” giyoobi aybee, hegee merettidaban qonccidoy ayba ogiyaanee?
Yihooway Medhidobata “Xeellite”: ‘Paalliya kafota xeellanaadaaninne dembban deꞌiya ciishati waani dicciyaakko akeeki xeellanaadan’ Yesuusi nuna minttettiis. (Maa. 6:26, 28) Hegaadan oottiyoogee nuuyyo mino ammanoy deꞌanaadaaninne Medhidaagan ammanettanaadan oottees, qassi Yihoowa aadhida eratettaa, i ashshiyo wolqqaanne a siiquwaa xoqqu ootti xeellanaadan maaddees. Ha alamee oottiyo issi issiban ne qofay shaahettanaadan oottiyoogaappe, Yihooway medhido maalaalissiyaabata beꞌanaunne he meretati nu Xoossaabaa ay qonccissiyaakko wotta denttada qoppanau wodiyaa bazza.—Maz. 19:1.