Hananabaa Yootidaageetu Leemisuwaa Kaallite—Yuuꞌeela
1. Nuuni haggaaziyo wode Yuuꞌeelaagaadan ashkke gidana danddayiyoy ayba ogiyaanee?
1 Hananabaa yootiya Yuuꞌeeli oonee? I babaa yootidobay “Putu7eela na7aa” gidiyoogaa xalla. (Yuu. 1:1) Ashkke gidida Yuuꞌeeli baassi imettida maataa gidennan, Yihoowa kiitaa minttidi yootiis. Hegaadan, nuunikka haggaaziyo wode asay Yihoowanne Geeshsha Maxaafaa bonchanaadan koyoosippe attin, nuna bonchanaadan woy sabbanaadan koyokko. (1 Qor. 9:16; 2 Qor. 3:5) Qassi, nuuni yootiyo kiitay nuna minttettees. Ha wodiyan nuuni mishetti oottanaadan, qassi hidootay deꞌiyoogeeta gidanaadan maaddiya, Yuuꞌeela hiraagan deꞌiya qofay awugee?
2. Yihoowa gallassay matattidoogee nuuni ay oottanaadan denttettii?
2 “GODAA Gallassai Matees.” (Yuu. 1:15): Ha qaalay xaafettoosappe shaꞌan qoodettiya layttay aadhidaba gidikkokka, nuuni ha qaalay wurssetta wodiyau polettiyo wodiyan deꞌoos. Alamiyaa hanotay iiti iiti biyoogeenne haggaazuwan nuuni haasayissiyo asay siyanau koyennaagaa, qassi qilliicciyaagaa gidiyoogee nuuni ha iita alamiyau wurssetta gallassan deꞌiyoogaa bessees. (2 Xim. 3:1-5; 2 PHe. 3:3, 4) Nuuni wurssettay keehippe matattidoogaa wotti dentti qoppiyo wode, nu deꞌuwan haggaazuwaa kaseyana koshshiyoogaa akeekoos.—2 PHe. 3:11, 12.
3. Haggaaziyoogee nuuni daro waayiyau matattiyo wode keehippe koshshiyoy aybissee?
3 Yihooway ‘Ba Asaassi Baqati Attiyo Soho Gidana.’ (Yuu. 3:16): Ha xiqisiyan odettida kokkorssay, daro waayiyaa wode Yihooway pirddiyo pirddaa qonccissiyaaba gidana. He wode Yihooway ammanettida ba ashkkarata ashshiyoogaa eriyoogee nuna minttettiyaaba. (Ajj. 7:9, 14) Nuuni haggaaziyo wode Yihooway nuussi koshshiyaabaa kunttiyoogaanne nuussi wolqqaa immiyoogaa beꞌiyo wode, nu ammanoy minnees qassi gencciyaageeta gidoos; hegee daro waayiyaa wode nuna maaddees.
4. Nuuni ufayttiyaageetanne sintta wodiyaa ammanettidi naagiyaageeta gidana danddayiyoy aybissee?
4 Issoti issoti Yuuꞌeela hiraagay hidootaa qanxxanaadan oottiyaaba giikkokka, he hiraagay Xoossaa asay bashshaappe attiyo ufayssiya hidootaa yootees. (Yuu. 2:32) Yaatiyo gishshau, Yuu7eela 2:23y, “ufaittite; GODAN, intte Xoossan, hashshu giite!” yaagiyoogaadan, sinttaa wodiyaa ammanettidi naagiyaageeta, qassi Xoossaa Kawotettaa mishiraachuwaa mishettidi sabbakiyaageeta gidoos.