Muruta Ogiyan Haasayissiyoogaa Doommanau Giigettiyoogaa
1. Loꞌꞌo ogiyan haasayissiyoogaa doommiyoogee keehi koshshiyoy aybissee?
1 Issi qumaa sawoy woy malꞌꞌoy miyo koshshaa denttettiyoogaadan, loꞌꞌo ogiyan haasayissiyoogaa doommiyoogee Geeshsha Maxaafaa loytti tobbanaadan oottees. Loꞌꞌo ogiyan haasayissiyoogaa doommiyoogee adussa woy qantta gidana danddayees, shin malꞌꞌo qumaa kattanau oottiyoogaadan, ubbatoo kasetidi qoppananne giigettana koshshees. (Lee. 15:28) Loꞌꞌo ogiyan haasayissiyoogaa doommanau ay oottana koshshii?
2. Asay siyanau koyanaadan oottiya ogiyan haasayissiyoogaa doommanau waatidi giigettana danddayiyoo?
2 Siyanau Koyanaadan Oottiya Huuphe Yohuwaa Doorite: Nuuni haasayissiyoogaa doommiyo qofay koshshaa denttettiyaagaa gidana xayikko, haasayissiyo uri siyanau koyennan aggana danddayees. Yaatiyo gishshau, giigettiyo wode heeran deꞌiya asay siyanau koyiyoobaa qoppite. Heeran deꞌiya asaa loꞌꞌo kawotettaabay, ufayssiya so asaa deꞌuwaabay woy olay xayiyo wodiyaabay qofissii? Asay darotoo ba qofaa yootanau koyees; yaatiyo gishshau, haasayissiyo uri loytti qoppanaadan oottiya oyshaa giigettite. Nu Kawotetta Haggaazuwan kiya, asaa haasayissiyoogaa doommanau maaddiya qofaappe issuwaa intte heeraadan goꞌettana danddayeetii? Issi issitoo intte Soo Asaa Goynuwaa omarssi amaridaageeta aybissi meezetekketii?
3. Nu moottan deꞌiya asaa wogaadaaninne haymaanootiyaadan haasayissiyoogaa waatidi doommana danddayiyoo?
3 Wogaanne Haymaanootiyaa Hanotaa Akeekite: Issi issi heeran, nuuni etakko biido gaasuwaa sohuwaara yootana koshshees. Hara heeran, keettaawaa sarotettaa oychennan woy babaa issi issibaa yootennan yiido allaalliyaa yootiyoogee bessennaba gidana danddayees. Hara heeran qassi, asay kaalliyo haymaanootiyaappe denddidaagan haasayaa doommiyo wode Geeshsha Maxaafaappe yootana danddayoos. (Oos. 2:14-17) Gidoppe attin, asay Kiristtaane giyo haymaanootiyaappe haraa kaalliyo woy ay haymaanootenne kaallenna heeran, koyro gallassi Geeshsha Maxaafaappe yootiyoogaappe zaaretti oychiyo wode yootiyoogee loꞌꞌo gidana danddayees.—Oos. 17:22-31.
4. Haasayissiyo wode giyoobaa nuuni ayba ogiyan giigettana koshshii?
4 Doommiyo Wode Giyoobaa: Doommanau giyoobaa loytti giigettite. Darotoo qantta, qassi akeekanau metenna qofaa goꞌettiyoogee aybippenne loꞌꞌo. Nuuni haasayaa doommiyo qofaa yootiyo ogeekka keehippe koshshiyaaba. Wozanappe yootite. Wozanappe pashkki giidi, haasayissiyo urau qoppiyoogaa bessiya hanotan yootite. Ha qofaa oosuwan peeshshiyoogee, nu moottan deꞌiya asay Yihoowa “masoofiyan” maanau koyanaadan denttettiya ogiyan haasayissiyoogaa doommanau giigettanaadan nuna maaddees.—1 Qor. 10:21.