Maxeetiyaa Ubba Wode Immiyoogee Xinaatiyaa Doomissanau Maaddees
1. Yihoowa dirijjitee daro wodiyaappe doommidi, nuuni maxeetiyaa ekkiya asatuyyo immanaadan minttettiyoy aybisee?
1 Daro asay nunaara Geeshsha Maxaafaa xannaꞌanau koyennaba gidikkokka, nu maxeetiyaa nabbabanau koyees. Hegaa gishshau, ubba wode maxeetiyaa ekkiya asatuyyo immanaadan Yihoowa dirijjitee daro wodiyaappe doommidi nuna minttettees. Asay ubbatoo nu maxeetiyaa nabbabiyo wode, Xoossaa Qaalaa laamotana danddayees. (1 PHe. 2:3) Nabbabiyoobay eta wozanaa denttettin, eti Geeshsha Maxaafaa xinaatiyaa doommanau issi wode koyana danddayoosona.
2. Nuuni ubba wode xuufiyaa immiyo asatu wozanaa waatidi denttettana danddayiyoo?
2 Tumaa Zerettaa ‘Haattaa Ushshite’: Keettaawaayyo maxeetiyaa immidi simmi aggiyoogaappe, aara haasayanaunne meezetanau malite. Hegaadan oottiyoogee a hanotaa, i koyiyoobaanne a ammanuwaabaa eridi, aara eratettan haasayanaadan maaddees. (Lee. 16:23) Zaarettidi oychanau baanaappe kase ubba wode giigettite. Danddayettiyaaba gidikko, maxeetiyan deꞌiya issi qofaa woykko xiqisiyaa qanttan qonccissidi, a wozanan zerettidabaa haattaa ushshite. (1 Qor. 3:6) A haasayissido gallassaa, immido xuufiyaa, intte tobbido huuphe yohuwaanne xiqiseta masttooshan xaafi oyqqite.
3. Ubba wode maxeetiyaa ekkiya asata awude zaarettidi oychana koshshii?
3 Awude Zaaretti Oychana Koshshii? Ooratta maxeetiyaa immanau biyo wode, ubba wode maxeetiyaa ekkiya asata aginan issitoo oychite. Gidoppe attin, intteyyo hanotay injjetiyaabaanne keettaawaykka koyiyaaba gidikko, gidduwaara biidi oychana danddayeeta. Leemisuwau, maxeetiyaa immi simmidi, issi woy naaꞌꞌu saaminttappe guyyiyan, zaaretti biidi, “Ini galla immido maxeetetun issibaa bessana koyido gishshau yaas” gaana danddayeeta. Yaatiyoogee, keettaaway issi huuphe yohuwaa nabbabanaadan oottees. I he huuphe yohuwaa kasetidi nabbabidaba gidikko, ay qofa demmidaakko oychidi aara tobbana danddayeeta. Woy keettaaway nu xuufiyaa nabbabiyoogaa dosiyaaba gidikko, zaaretti biidi he aginan immiyo trakttiyaa, brooshuriyaa woy maxaafaa immana danddayeeta.
4. Ubba wode maxeetiyaa ekkiyaageeti Geeshsha Maxaafaa xannaꞌanau koyanaadan issi issitoo ay oottana danddayiyoo?
4 Keettaaway xannaꞌana koyays giidi yootana gakkanaashin naagoppite. Intte kasetana koshshees. I Geeshsha Maxaafaa xannaꞌanau koyennaagaa kase yootidaba gidikkokka, Wochiyo Keelan kiyiya, “Geeshsha Maxaafaa Oyshaa Zaaruwaa” giya huuphe yohuwaa issi issitoo bessidi, i tobbanau koyiyoogaa woy koyennaagaa erana danddayeeta. Geella penggen eqqidosan xinaatiyaa doomissana danddayeeta. Hegaadankka oottin xinaatiyaa doommennaba gidikko, a koshshaa denttettanau maxeeteta ubba wode immana danddayeeta.