Yihoowanne Yesuusa Leemisuwaa Kaallada Godaa Kahuwaa Wode Neeni Mishettanee?

1. Godaa Kahuwaa wode Yihoowa Markkati ay oottanawu baaxetiyoonaa?

¹ Yihooway ba halchuwaa mishettidi polees. Isiyaasa 9:7y Xoossaa Kawotettay ehaana anjjuwaabaa yootiiddi, “Ubbaappe Wolqqaama GODAA mishoi hegaa polana” yaagees. Hegaadankka, Xoossaa Naꞌay saꞌan deꞌiyo wode tumu goynuwawu keehi mishettiyoogaa bessiis. (Yoh. 2:13-17; 4:34) Layttan layttan Kiristtoosa Hayquwaa Hassayiyo Baalaa wode, miilooniyan qoodettiyaageeti kaseegaappe gujjidi haggaaziyoogan Yihoowanne Yesuusa leemisuwaa kaallidi mishettanawu baaxetoosona. Neenikka hegaadan oottaneeshsha?

2. Mishettidi sabbakiyoogee nuuni Laappune 7ppe doommidi ay oottanaadan maaddii?

² Hassayiyo Baalaa Zamachaa: Ha laytti Godaa Kahuwawu asaa shoobbiyoogaa Qeeraa gallassi, Laappune 7n doommana. He wode mishettada haggaazanawu haꞌꞌi halcha. Godaa Kahuwawu gubaaꞌiyan deꞌiya ubbay bantta moottan deꞌiya asaa shoobbanawu baaxetiyo wode, keehi ufayttana. Geeshsha Maxaafaa xannaꞌissiyoogeeta, zaarettada oychiyoogeeta, nenaara oottiyaageeta woy tamaariyaageeta, qassi ne dabbota shoobe woraqataa woy jw.org sayttiyaa goꞌettada shoobbanawu baaxeta.

3. Laappuniyaaninne Hosppuniyan kaseegaappe waatidi loytti haggaazanawu danddayiyoo?

³ Kaafiya Aqinye Gida: Mishettiyoogee nuuni kaseegaappe aaruwan haggaazanaadankka maaddees. Laappuniyaaninne Hosppuniyan kaafiya aqinye gididi 30-saatiyaa irpportte oottana danddayettiyo gishshawu, daroti he wodiyan kaafiya aqinye gidana giidi qoppoos. Intte soo asaa goynuwaa wode woy buzo xinaatiyaa wode hegaadan waati oottana danddayiyaakko qoppite; qassi hegaabaa woossite. (Lee. 15:22) Neeni mishettiyoogee haratikka mishettanaadan denttettana danddayees. Neeni Yihoowa oosuwaa kaseegaappe loytta oottanawu ne deꞌuwan issi issibaa giigissiyaaba gidikko, Yesuusadan mishettana danddayaasa.—Mar. 6:31-34.

4. Yihoowanne Yesuusa leemisuwaa kaallidi mishettiyoogee ay demissii?

⁴ Nuuni Yihoowanne Yesuusa leemisuwaa kaallidi Godaa Kahuwaa wode mishettiyoogan anjjettana. He wode haggaazo moottan deꞌiya daroti mishiraachuwaa siyana. Nuuni Yihoowayyo oottiyoogaaninne haratuyyo immiyoogan he wode ufayttana. (Oos. 20:35) Ubbaappe aaruwan, nuuni mishettiya Xoossaanne a Naꞌaa ufayssana.